زولة )))))))) جمال حسن سعيد

[عارف عبد الرحمن]

زولة .......... كما النورس تجئ
تنزل شواطئ الالفة في الزمن الشفيف
وأنا زي مكتف في الرصيف
مربوط على حبل السفن في الظلمة والليل المخيف
بتجيني تدخلني وتقيف

·* * * * * * * * * *
شرشرت تيبان السكات على أرض رويانة وخريف
زولة .... بتعرف تدخلك ..... وتقفلك .... وتغفلك
تقعد على ناصية هواك .... وتشغلك
وأنت بتحنس غمام كي تجعلك مطرة ودعاش
طاير تحلق في السماء وأرضك فراش

هذا الفراش بيطير على نضرة رحيقا وخُضرتها ... ومحبتا .... ومحنتا
أو ضحكتها وسخريتا وتقعد تهضرب ياولد من حمتا


ولو تسألك وتحلفك في ذمتك او ذمتا
والى متى ..... هذا الجنون الى متى ؟ كل التفاصيل لمتا
هذه البنية قد أتت وأنت ذاتك كالورق
كيف تنجو انت من ذاك الغرق
من زكرياتك تنجو وين ؟
وين مهربك ...؟؟ من دفترك ...؟؟؟؟؟ من مصدرك ....؟؟؟؟ من مظهرك ....؟؟؟؟ من جوهرك ...؟؟؟؟؟؟
من حرقة الجوف والعرق

هذه البنية تفتح الروح ضلفتين
وعلى ضفتين في نهر احزان الزمن
تقعد تلوح باليدين
زولة
تخشك .... تمرقك ... عادي
ما بتقفل الباب من وراها ...... بل تساسق بين شفقتك وحرقتك ... ما بتاذنك
ما روحا نفاج غربتك
هذه البنية الساكنة أسرار فكرتك
هي الشايلة حسك وسترتك
زولة ... كما النور تجي
تنزل شواطئ الالفة في الزمن الشفيف .

[عبده مصطفي إبراهيم]

يا ريت كل الذولات ذيها...........

ما بتقفل الباب من وراها ...... بل تساسق بين شفقتك وحرقتك ... ما بتاذنك

ظنيتن بقن
ما بتقفل الباب وراها..........بل تساسق بين محفظتك وحقتك...........وما بتستاذنك
...........
للدعابة فقط

لك التحية عارف

[عبدالمنعم]

رغم أنني لا أشعر بأي متعة في خرابيط المدعو جمال حسن سعيد ولكن بصوت الرائع سيف الجامعة لها وقع آخر


لحفظ الأغنية بصوت سيف الجامعة

زولة .... بتعرف تدخلك ..... وتقفلك .... وتغفلك
تخشك .... تمرقك ... عادي
في إعتقادي أن جمال أفسد الدراما ويحاول إفساد إحساسنا بالشعر

[عبدالمنعم]

عارف المشاركة أعلاه (بيني وبين) جمال حسن سعيد أما أنت فلا نستطيع شكرك على ما تتحفنا به من روائع
بيني وبينك لاحظت أنني فرضت وجهة نظري كأنني د. عبدالله الطيب

[عارف عبد الرحمن]

الأخ منعم لك التحايا وحمد الله علي السلامة .. وليك وحشة .. وشكراً علي المرور الجميل والأخ عبده بالأضافة الطريفة .. جمال حسن سعيد له نكهة خاصة جداً ومفردة ذات أيقاع وجرس ومعان أخري .. شخصياً تعجبني كلماته كلون جديد وطرح جديد وتنوع في التناول .. وصدقني جمال في التمثيل أمكن في السودان الوحيد الذي يضحكني من الأعماق .. طبعا حب الناس مذاهب ولك الشكر علي سيف ودمت

الله اديك العافية يا عارف والله القصيدة دى لى زمن بفتش عليها وما لا قيها لانها جد شى روعة شغل مجانين عديل كدا

[Amhar]

لك التحية أخي عارف وأظنك عرفتي لها أختاً أخرى وهي زولة جميلة جداً لمن لا يعرفها فليستمع إليها

المشاركة جميلة وكيف لا تكون كذلك وهي من كلمات الدرامي الرائع جدا جمال حسن سعيد لأن روحه جميلة ومن كان كذلك كل ما يصدر منه لابد أن يكون جميلا إذ يحسن القول بحسن قائله .