فطيس هل سوف تصير أحسن ام اسوأ ؟

الطريق الجديد هل هو نعمه ام نقمه :
طبعا زي ما انتو عارفين قالو الزلط جاي ( من زمن سمعنا الكلام دا ) و اسي ناس الحله مختلفين اجي بي اي طريق ولا اجي بالسكه و المحطه بهناك او اجي بوادى شعير و الاربعين و ادخل الحله بالجامع و ناس قالوا اجي بي طريق بس ان شاء الله اجي ( هو عريس عشان اجي ) لكن لو جينا حسبناها بالعقل و ما دخلنا النبذ و الكلام الفاضي زي ما حصل في اجتماعات اللجان السابقه ( والله قلبت حلبه مصارعه و نحن الشباب خجلنا عديل كده و قولنا ديل كبارنا ) المهم خلونا في موضوع الزلط , اولا :
لو جاي بطريق السكه بعيد و ما بعكس اي حاجه للحله و ما حا نستفيد منو حاجه يعني لو زول جاي من الخرطوم متاخر و انقطع حا تقول لي كيف انقطع اقول ليكم كيف ناس الفريجاب و طابت ما مجبورين ادخلوا ناس فطيس لانو المسافه بعيده شديد ( يعني البنقطع في الطريق اشيل شيلتو ), و الحاجه الظهرت اسي قبل الزلط اجي بهذا الطريق ارتفاع اسعار السفر يعني الاتوذ اسي سعرها للحصاحيصا 6 جنيه و البكاسي 4 جنيه برضو بحجه الشارع بعيد ( يعني جايبنو عشان شنو ) و ثانيا :
لو جي بهذا الطريق اوعدكم انو الشارع دا حا انتهي في غضون 10 الي 20 سنه او اقل من كده بسبب المياه الراكضه في هذه المنطقه طيله السنه تقريبا ( لو الله ادنا العمر )
عشان كده احسبوها صاح يا ناس اللجان يا كبارنا لو ما قادرين تصلوا لي قرار بالعقل و الكلام الاحسن استقلوا ( و خلوا الشباب اعمل ) , برضو ناس بقولوا التكلفه بتاعت الشارع في الطريق بتاعت السكه اقل من بتاع وادي شعير بس انا مامهندس طرق و جسور عشان اقول كلامي دا بس لو اي زول سالوا قالوا ليه احسن تعمل زلط طوله 14 كيلو و لازلط طوله 7 كيلو حا اقول 7 كيلو ,
والله انا اسف لو حا اقول كلام جارح لببعض بس امس حصلت حاجه غربيه وانا جاي من الخرطوم جيت بالحصاحيصا عشان خايف من انني انقطع و الحمد لله لقيت اتوذ ماشه الحله لكن الحصل انني كنت راكب و معي زول من فرج الله و زول من ناس لجنه الحله المهم فتحوا موضوع الزلط و الظريف اننو استلم الونسه الزول المن فرج الله و الزول المن ناس اللجنه وكان الزول المن ناس اللجنه زي البغبغاء اي حاجه اقولها ناس فرج الله اقول صاح و لكن بعد نزل الزول من ناس فرج الله بتاع اللجنه قلب 360 درجه معنا و بقاء شاغل كلامكم صاح صاح ,( معليش ما قاصد التفريق بين ناس الحله و ناس فرج الله كلنا اهل و المصلحه واحده ) بس المفروض الزول بتاع اللجنه اكون حقاني و اخاف من الله قبل ما اخاف من ................
مصلحه الحله فوق الجميع .

[عبده مصطفي إبراهيم]

المهذب جدا ...محمد عبدالمنعم
بالرغم من محتوي البوست ولكن تحس بسعادة وانت تعلم أن بالبلد شباب...يحملون همها ويبحثون عن كل الممكن
لرفع شأنها....التحية لك والتحية لكل شباب فطيس الباحث عن الفرصة لتقديم شئ
....
شارع الظلط....دا حا يلحق ظلت "الكريبة" للناس السمعت بيهو...
إختلاف الناس...مفترض يفيد لأنو بيوسع المدارك ...ودائما النتيجة بتكون لصالح العامة
أما هناك....فيبدو أن الإختلاف لا يتخذ المسارات المعتادة....بل تتحكم فيهو الجهوية والقبلية "كبر كومك"
النظرة إلي من اين يدخل الظلط فطيس مفترض يخضع إلي نقاش بعيدا عن الأفضلية
نقاش يكون محتكر لمصلحة فطيس عامة ...وليس أقلية
ومع إحترامي لأهل فرج الله...فيجب أن يكون هناك قناعة تامة تعم البلد بأن الطريق يجب
أن يدخل فطيس...بأي جهه.
أما إذا كان النقاش بأي الابواب يمر الظلط....وكل زول داير يطلع من بيتو يلقا الظلط في وشو
فتكون...مساحة الإختلاف أوسع ... ولا يمكن أن تضيق مهما كانت التضحيات
أتمني أن ينتبه الناس الي ما هي أهمية الظلط...والي أين سيقود المنطقة
وكيف سيستفيد إنسان فطيس المغلوب علي امرو
ويخرج الناس من الفهم الضيق بأن الظلط لابد يمر ببيتك
كلنا علي علم بالجهد المقدر الذي يقوم به أفراد من فطيس كلها..."الحلة أو فرج الله بالرغم إني اكره هذا التقسيم"
ولكن يجب أن لا يستغل هذا الجهد ....لترجيح كفة جهه علي أخري
وما ذكرته اخ محمد....بما يقوم به العليهم "الرك"... يقشعر له البدن
ونتمني أن يقوم ربيع...شبابي ...من فطيس يسوق الناس دي للطريق الصحيح
وعند كلمة الحق....الكتوف بتتلاحق
ونتمني ان ينصلح حال البلد
ويدينا الله الفي مرادنا