الكلبة - عثمان اليمني

[عبدالمنعم]

http://www.youtube.com/watch?v=BdcDpPxGUCU


قصيدة الكلبة - رمية للفنان عثمان اليمني

أصغوا لي واسمعوا يا زمالة
حقيقة وحاصلة مو ساكت قوالة
كلبةًً والده فوق كوم الزبالة
محجوب كلموهو وفات مشالا
مستعجل قبل ياخد سؤالا
بي فد طلقة أتَّم بي عيالا

بعد سلخوها واجتمعوا الرجَّالة
وكل الشافلو قوطة سمينة شالا
أخوياً لينا شغَّال في امجلالة
وقال ناولوني ماعون حتى إن كان شوالا

بعد شحدوا البرش طوالي فرّوا
فرحان بابكر مما يسرُّو
وصفَّق إيديهو وقال ياخوانا تروا
وكل الماهو قادر لا نضرُّو
أكلوا وخلوه والباقي شروا
وبعزل حقي في منديل وأصروا
اليعضِّي ولادنا لابد من نضرو
أصلو سعراً حايم الله يكافي شرو

عبلة وصدفة زعلانات يحدروا
حداد لا مدة أسبوع ما ينرُّوا
ولا إن شافوا الحرامي وراهو يجروا
ولا في السهل من الحوت يفطرو

الحقيقة هي لونها أزرق وصوفها يرهز
وكل الشافها أول مرة قال عز (عنز)
أتاري الدنيا ماشي عليها حز حز
وبي واحد عيار نافوخها بزبز

كمان عبد الرحيم أحمد حضيري
قال سيبوا الغلبة والجحة الكتيري
اللحم جيبوهو جوة من الهجيري
الراس أوعكم تدوهو غيري
أنا زولاً نفسي في التقسيم قديري
بس إنتو شوفوا لي المكرضمي والكبيري

عبد الرحيم الحاج ينقنق وماهو راضي
وقال كومين قليلي على ولادي
ممحوق وأشوا من لحم الجدادي
وإنتو شوفوا طريقة سوولي الزيادي

سلمان أصلو شارف وزيو مافي
جاهن واحدي لابسة وواحدي حافي
لا قولة سلام لا قال عوافي
فتحة خشمو قال ياديل قفافي
أدوني اللأفوت شوفوا الخلافي
نص كوم كستليتة والباقي صافي

شويتين مو كتير جاهن خليفة
قال الراس اسلخو سووا نيفة
يتوكل وحَّدو ولاَّ مع رغيفة
وصفوا المرقة في الباطي النضيفة

التوم كومو قال ظلموهو فيهو
جا شايلو براهو قال يسلقو ليهو
ساد بيتو متاكي الباب عليهو
في شان لا ضيف ولا شحاد يجيهو

خدر ود محمد نور بلحيل اتغشَّى
بعد ما جاب صلصتو وبصلو حشَّا
لقاهم شالو خلو الواطة غبشا
طنطن ما رضا وسوالو دوشة
وغمَّت بالزعل من بيتو طشّ

باقي سعيد فضيل بلحيل مدروش
يمط القوطة طول مترين وينتش
وقال والله مو هش
ومزة متل دي راجي الزول يغبِّش

جا عبد الله أخوه بالليل بيهرش
وقالب عينو حمرة وما بيرمش
وقال أصلو خوتكم بقت غش
محل تقسيمها وينو نروح نفتش
بدل نرمح من الرمرام نقرمش
أتاري السر يلوم في الناس وينبش
وغضبان يتركب متل المتلبِّش

كل زولاً ذكرتو مني زعلان
وأصلو راس القايدي عثمان عبد الرحمن
هو يشجِّع فييّ وأنا برضي شفقان
وهو محاول يحفظا ويوضع لها ألحان

عطا قرمان لحم قال كلو سيبوا
اليوم جمعة كان عازم نسيبو
جدع القفة غادي وفرّ توبو
الطايوق مجكنو في جيوبو
وحتى كبير أخوانو لملمو بي خبوبو
وداسي الجلد رافض يجيبو

دي جبتها من وين يامنعم انا لي كم سنة كايس ليها