|
|
06-25-2010, 11:53 AM
|
#1 | ||||||||||
|
حليوه ست الشاي..... ابراهيم الكرسني
حليوة.... ست الشاى شوفو حليوة ست الشاى شايك ما بدورو براى كم مليون بدورو معاى شايا ليهو خرمانين سيد الركشة سيد الكارة الطيانى المكانيكى الكل قال تعال بى جاي ... قايمى حليوة نص الليل عشان رزقا حلال وعديل رزقا ما بيدورلو دليل وان فد يوم جاتا "الكشة" بتتبهدل جنس بهديل ... تشيل الهم هما عاد يهد الحيل داكا يتيم بدور مصروف داكا مرضان وغالبو الشوف ديكا بنيي عيانى وترجف من كترت الخوف ... وصوتا جاها من قاطوع مهدهد بى كترت الجوع حليوة... يا بتى قشى دميعتك النازلى وأسألى ربك الرزاق يسهل ليكى كل ممنوع ... تسوى الشاى تبيعى حلال تجيبى الكسرى للأطفال تجيبى الدكوة للأطفال و السكر بدل رطلين منو تجيبى كم شوال وصندوك شاى بدل تمنة عاد مو حايقى فى الأطفال .... صوت الوالدة باقى حنين بتسمع فيهو ليها سنين بتندهليها كل الفقرا و الصالحين يغتوها ويضاروها من الجايرين البيقطعو الأرزاق ومو خايفين ... ديل حكامنا مو خايفين عيونن ديمة مفتوحات على المسكين الفارشلو كوم عجور و البيطرق السكين القايمات نصوص الليل ست الشاى ست الكسرى القالاها نار الدوكى و البتسوى فى التركين ... ديلا يربو فى الأيتام فى اطراف البلد ساكنين بيوتن من بروش وصفيح لا اسمنتى لا من طين ورقادن ديمه فى الواطه حتى ان كانو مرضانين ... يا حكامنا قولو عديل زى ناس ديل يدوهم زكاة الله و الله "الكشة" و البهديل ... وشان حكامنا جبارين قصورن ديمة بتضوى وهن جواها مطامنين لا مرضا بيغشاهم و لافى أنين لا ركشات و لا "كشات" عاد مو ديمه محروسين ... كم عربيى بى سواقا بى بنزين ديكا صغيرى للأطفال واحدى براها للستات واحدى كبيرى للأولاد ما مال الحرام لامنو ليهو سنين ... يا ناس ما تخافو الله نهبو بلدنا... بإسم الدين سرقو قروشنا ... بإسم الدين زادو امراضنا... بإسم الدين كتلو اولادنا... بإسم الدين نشفو ريقنا... بإسم الدين طلعو "..."... بإسم الدين و الكل عاد صبح جيعان بعد ما كنا شبعانين .... نسأل الله ليل ونهار يوريهم حقيقة الدين تبين آياتو فى زى ديل ناسا ما بخافو الدين تبين آياتو فى الدنيا قبل ما يجينا يوم الدين عليكم الله يا اخوان قولو آمين عليكم الله يا اخوان قولو آمين |
||||||||||
|
|
06-25-2010, 02:31 PM
|
#2 | ||||||||||
|
نيران توّج جواها اكتر بى كتير من نار كوانينا التعج بى اصناف الكفاتير والبراريد والشرارق تنسى احزانا وتفج الروح وقت تلقى المعالق فى كبابيها بتراقص حلمها بى لحظه بتخت راسا وتروح فى نومه هانيه تريح الجسد المسمم بالعيون مزق الكلام الجايى من عصر الظلام … حليوه زيّها زّينا عندها الحال ما زال منصوبا على قدرة بشر مادام وتد حالنا انقلع واتوتد المقلوع غصب والكان قبيل اصبح وتد مجرور ورا التور التشوش واندفع يخفج خفج .. حليوه بتا مننا اختا لنا جاتا الهموم زى سيل كسح بس شالتا قدرت عليها ادارتا مرقت تصارع حجتا تعدل مزاج ناسا تعادل حالتا شايا المظبط وقهوتا وقعدة دقائق شويه فوق سطح الارض تعنى الكتير لى زول تحمم بالهجير شايل الكتير زى ما هى شالت شيلتا وما ختتا وفجاه بدون سابق وعد نبر القبيل كان السبب فى مرقتا !! من جوف مصدر بى دموم الناس رفاتم والعرق اطلق قرار فيهو اتهام لى كل حليوه بتنجبر علشان توفر وبى عفاف اسباب حياه لى ارواح تتقل ذمتا حد الكفاف .. لمتين لمتين ؟؟ لمتين يظل حال البلد منصوب على قدرات تعيقا وتبهتا افكار مسممه اتهام .. ايها الساده : هلا نزلتم من علاكم لحظه بس لتتناولوا من ايد حليوه كوبا من القهوه الحريفه وساده شاى!! وتاكدوا انه لن يعلق بذيل اى منكم سوى دفئ المشاعر من نسيج كل البنابر جنب حليوه اللى هى اصلا مننا اختا لنا عندها الحال مازال منصوبا على قدرة بشر … الله يطري بالخير فاطمة وعائشة ستات الشاي بالسوق ولمة شلة الشباب مع الصباح وكباية كاربة ولا مو كدي يا ود الخضر .. وفي البال ود جرجور وعبدو نورين ومدحت ومهدي وحوتة وبقية الشلة المباركة http://www.youtube.com/watch?v=hSHJi2rbTBA
|
||||||||||
|
|
|
06-26-2010, 02:25 PM
|
#3 | ||||||||
|
ابوعبدالرحمن الله يديك العافيه ياحليل زمن الكبايه دي مازلت اكن لكل واحده من هؤلاء وغيرهن الكثير من الامتنان لهن التحيه ومازالت مالوفة فاطمه محطه رئيسيه عند عودتي الي هناك |
||||||||
|
|
|
06-26-2010, 02:35 PM
|
#4 | ||||||||||
|
الشكر لكما علي المروووووووووووووووووووور والاضافة...... |
||||||||||
|
|
|
07-02-2010, 02:02 PM
|
#5 | ||||||||||
|
salam
لكم التحية يا شباب .. حقيقة حضوركم من الصباحات يضفي ألقاً على المساءات التي تسامر الذكرى
|
||||||||||
|
|
 |
|
|
 |
 |
 |
Linear Mode
