الرياض

كيف كانت الحياة بالنسبة لنا عندما كنا اطفالا وحديثي هنا عن الفنرة من نهاية الخمسينات الى بداية الستينات يعني ماقبل المدرسة ,,
طبعا الاولاد في هذه الفترة بكونوا مجموعات مثلا فريق الحسين مجموعتنا مكونة من شخصي +علي دراب التاج جباره+ازهري اباهيم الحاج +ونحن تابعين لمجموعة تانية اكبرمننا وهم ناس جون رحمه الله وبشير ابوقرن ودفع الله خيرالله وحاروقي وعمر اللبيبي رحمه الله ابراهيم دفع الله مبارك احمد حامدومصطفى مدني وحامد احمد وعثمان الحاج ولاانسى من مجموعتنا ايضا مضوي وكنا مكونين فريق كورة وكان لكل واحد من المجموعة اسم على لاعب معروف من فريق المريخ طبعا كلنا مريخاب بالفطرة هناك اشياء ثابتة نعملها كل يوم مثلا تقديم الغنم للراعي اوالسرحة اذا كان الراعي عنده ظرف سقاية الحمير في الترعة ودي مهمة جدا لان فيها حمام في الترعة وهو من الممنوعات طبعا لكن نستقل الفرصة وفي واحدين ماعندهم كانوا يستعيروا من الذين ماعندهم عيال يقومو بهذه المهمة واذكر حبوبتنا دارالنعيم كنا نتشاكل في حمارتها لانها كانت اعني الحمارة مسكينة و(مكادية)
الذهاب للسوق كان ممنوع خصوصا يوم الصرف وكان الواحد ممكن اروح من زحمة الناس وكان الجزارين يذبحون كمية من الابل والبقر الضان , والفراشين يجو من مدني والحصاحيصا والمسلمية وبعضهم من ام درمان وياسلام لو صادف الصرف ختان احد الاولاد كنا نقيف في شارع الجامع ونطلب العادة من الاغراب وفي حالة رفضة ان يعطينا العادة نسحب منه عمامته ونجري بها الي بيت ودالطهور ولانها كانت عادة فصاحب العمامة بعدمايصرف يحضر لبيت الطهور وبكل رضاء يدفع للعريس فدية عمامته وهو راضي ,,,, وللموضوع بقية

[عبدالمنعم]

الله الله الآن كسبنا نوع آخر من الذكريات والتوثيق موازياً لذكريات للأخ عوض خضر.. الأخ عبدالله واصل التوثيق لفتر مهمة كادت أن تنسى من تاريخ فطيس بإمكانك بما تملك من معلومات أن تجعلها ملك لجميع الأجيال وأن تحفز الجميع لمواصلة الجمع والتأريخ.طبعاً تستطيع الأستعانة بآخرين في التذكر وتأكيد المعلومات ... يا سلام وفقك الله

وبناسبة الطهور عندنا عادات الان ماموجودة مثلا حكاية سرقة الاواني (مفتاح الباب احزية طواقي اي شئ يكون مهم والشخص يحتاجه في حياته اليومية عرضة ان يسرق من قبل زملان العريس) وفي المساء اي بعد المغرب هناك شئ مهم جدا اسمه (القاشيد) وهو عبارة عن وجبة خفيفة تعمل بالحليب(اللبن)ودقيق الفيني والسكر واهم شئ انه يكون اللبن مسروق (يحلب خلصة من غنم الفريق)اما الدقيق والسكر فمن القروش التي تجمع من العادة, في الصباح نلعب لعبة اسمها (ام الزمل) وهذه هي اظهار قوة الفرد والمجموعة لانها تلعب بواسطة اربعة كل اثنين مع بععض ثم نلعب البلي والفلل وكنا نجمع الفلل من دكان الطيب محمد احمد رحمة الله عليه لانو كان عنده تلاجة ويبيع البارد ولاننسى كمان صيد الدجاج وذبحه عند وصولنا بيت الطهور وكان صاحب اوصاحبة الدجاجة يجري خلفنا اذا حصلنا يفديها بالقروش واذا ماحصنا تذبح فورا والغريب انو الناس مابكونو زعلانين في هذه الممارسات وكانو يحكوها مع بعض سواء في السوق اوالجامع الواحد يقول لصاحبه (والله البارح شفع العادة شالو جداتي من الحيطة) والملاحظ ايضا انو العادة لاتتعدى القرش او القرشين وفي حالات نادرة جدا شلن والناس الذين يدفعون الشلن معروفين جدا اذكر منهم واحد اسمه(حسون) كان يعمل في دكان فنقلن 000
العصر طبعا شئ معروف كل شباب الفريق يتجمعون في ضل المخزن(المخزن هو مخزن الحسين الموجود حاليا ومعروف بمخزن مختار) والمسافة مابين المخزن والجامع هذه كانت فاضية مافيها غير المطامير وكانت ميدان للعبة اسمها(التيوة)وكان ابطالها حامد طه- خلف الله الامير رحمه الله -صديق محمد احمد عثمان يوسف تنقر ابوالروس حامد مدني رحمه الله بشير عبدالرحيم مختار ابوقرن بله دفع الله وجون رحمه الله مختار محمد الامين وصديق اخوه الحسين ابراهيم وعلي وداللهل وآخرين وتستمر اللعبة حتى مغيب الشمس بعدها دورنا نحن الصغار في اللعب (الرمة وحباسها ام الزمل شليل ام السكوكية ) ونتمردغ في تراب المطامير ونرجع البيوت غبش وفتارة الواحد انجدع في العنقريب متل الميت طبعا مافي واحد عنده غيار ياهو بس اللابسو ده وهو عبارة عن(شورطي ولباس) طبعا من نوع قماش واحد وغالبا دمورية بس في واحدين شوية راغيين بلبسو دبلان او بوبلين لكن هو الشورطي واللباس,,,, وللموضوع بقية

[محمد ابراهيم احمد ابراهيم]

يا سلام عليك يا عم وانت تتحدث عن جيل من اجيال فطيس وتنقل لنا عاداتهم وتقاليدهم وتربطنا بهم من خلال مواضعك الجميله
واصل بلا انقطاع

واتمنى ان يتم تثبيت الصفحه يكون اسمها ( حكاوى او حكاوينا ) من فطيس يتحدث كل شخص عن الجيل الذى عاش فيه حكاوى طرائف ذكره جميله حزينه كل شى عن الزمن الماضى اجمل المواقف.......................الخ

[عثمان الخليل]

الأخ الحبيب عبدالله موضوعك شيق وحلو جدا ومن المؤكد أن هنالك حكايات ومواقف كتيرة الرجاء عدم تجاهلها فى سردك فنرجو مواصلة الموضوع ولك التحايا مرة أخرى

[صادق محمد عوض]

الله الله عليك وعلي ذكريات الزمن الجميل.... والناس الطيبة وبسيطة..... والحياة السهله وهينه...... والنفوس الطيبة...... والاخوة الصادقة...... تعرف اجمل ما في الكلام اللغة السهلة البسيطة.... والبعيدة عن التنميق.... مما اعطي الموضوع حيوية وجمال....... واااااااااااااااااااااااا ااااااااااااااااااااااااص ل يا ابو عمار...... واربط الجيل الجديد بالقديم....... علمهم ان حياتكم كانت اسهل من تعقيدات اليوم..... شكرا علي الابدااااااااااااااااع....

وقفنا عند النوم وزي ماقلت غبش وعلينا حال لما نقوم الصباح الواحد القى نفسه عريان وممسح بالزيت يعاين لحبل الشر القى الشورطي والسروال مغسلات ومشرورات البس هدومه وطوالي على الشاي شاي الصباح شئ مهم جدا طبعا شاي لبن لازم ومابنرضى بكباية واحدة وكان اماتنا يغشننا كباية لبن عليها خمسة كبابي موية ,,
زيما قلت كل مجموعة من فريق بتعمل انها الاقوى ودئما يكون في مصادمات بين المجموعات فريق الجعليين بزعامة صلاح بله ومحمد الحاج(التاج) وهم اصغر مننا لكن قلبهم حار ويحبو الدواس ودائما يصطادونا افراد وهم مجموعة وفريق ودابراهيم بزعامة المرحوم دفع الله سالم ومصطفى حسين وفي فريق اسمه فريق وراء وده مكون من احمد نورين رحمه الله والجيلي حسين رحمه الله وواحد اسمه الحاج حسن الامير(الحويج)والنور ابراهيم حسين وزدعليهم القريشاب واولاد عباس وعندنا اولاد الكنبو وديل خطرين جدا وزعيمهم اسمه تمساح وهو الاخ غير الشقيق لنورالدين ارباب معاهم شله من اولاد الشمالية نحن نقول ليهم (الدناقلة) وهم ناس حيدر سيد احمد ويوسف محجوب وحسين عبدالنور(خال اولادمصري)وديل كانو دائما هم المنتصرين ومجموعة تانية هم اولاد الفلاتة بزعامة بالي ومصطفى محمود ودبل كانو غالب ومغلوب حسب الظرف واما انا كنت محظوظ جدا لصلتي الرحمية مع اغلب هذه التكتلات طبعا عدا جماعة الكنبو والفلاتة وكان دائما لما يكون في ضرب انا مابضربوني لانهم اهلي وكنا نستعين ببعض الاخوات عندما نهزم مثلا سعاد بت كي - فوزية محمود لانو دائما يكون معانا التاج جبارة ومعتصم محمود كمان في اولاد من ودالبر ليهم علاقة بالحاجة فاطمة بت خالد زوجة جدنا الحاج الفكي مختاروديل بتاعين شغب لما اجو فطيس نحن بنكون مصيطرين على الموقف صيطرة تامة,,,, وسنوصل

وين بقية الموضوع