النسوان خشم بيوت

ألكم صنف أو صنفان من التالي:

البوبارة.......
دي تحملك فوق طاقتك...تشريك الما بينشري....وجيت ناس في البيت...تجري علي علبة الدهب...وتتعنكش كلها من راسها لكرعيها....وتقعد تنضم..بايديها وكرعيها ورقبتها...واضنيها...عشان توري الدهب

النوامة.........
تجي من الشغل نص النهار وزهجان.... تلقاها....تانيةالمخدة وخاته ايدها تحتها....وتشخر... وريالتها سايله...وحالتهابالبلا.....
الحوامة.........
طول اليوم فوق كرعيها...في الحلة من بيت لبيت.....وتدخل البيت.. قبال ما انت تجي من الشغل بخمسة دقائق....وتجري تولع النار.......وتطبخ لك القطر قام.....واول ما ينتهي الغدا ....تدخل في سفنجتها....استعداد لرحلة جديدة
اللوامة.....
دا نوع مزعج جدا......لو جبت سيرة اخوك ساكت....تفتح فيهو...الله بيسألني.......سنتنا ديك وقت انت خليتنا بلا قروش وسافرت..... يدخل ويمرق علينا مدلدل ايدهو...كيس موز ساكت ما بيجي شايلو.......ولو جبت سيرة امك....... هي والله امك دي اصلها ما بتريدني.....من تشوفني تزعل والنيران تطلق فيها...وتمد قدومها.....ووليداتي ديل السلام.... يا الله ويا امين تسلم عليهم......

الفنانة.....
حتمرق معاها وتقعد تحوم.....في الحفلات....وتشوف كرسي قدام.وتقعد فيهو..شايل عكازك....وسكينك في ضراعك....وعينك عليها.......ان راجل بشّر ساكت...... تتحنفش...وتقوم.......الا يهجروك اتنين...علي الكرسي......وتجو نص الليل راجعين اهلكم....والنهار كلو نايمين...
الممحوقة .............
دي ان جبت دكان كامل وختيتو لها في البيت تكملو في يومين......تصوطو كلو فوق تحت............لكن ممكن توديها لاصحابك الزعلان منهم لو عندهم مناسبة تطبخ لهم.... عشان....لما المناسبة تنتهي يشحدو وانت تتبسط........

اللايوقة..........
دي حكاية تانية.... تمسك في موضوع يحلك منو الجليل الرحيم......يا...دا ....هوي يا دا..... الليله يا يمة....طرشت؟...وقدرما تطنش هي مصرة.....وممكن تجي جنبك وتخجك.....خجة جامدة عشان تنتبه...... للنقة
الحنانة........
طول النهار برا البيت....تحنن في نسوان الرجال....وهي كرعيها يكونن ما شافن حنة ليهن سنتين...والنهار كلوانت تحاحي في الشفع مايلمسو الصبغة....

الحردانة.......
دي حتكرهك حياتك....اقل كلمة...تتقنّع توبها وتجري بيت ناس ابوها...وتلحقها انت.....وتلقى ابوها....تقعد في طرف العنقريب....تطقطق...في اصابعيك.. ومدنقر في الواطة...وداير تراضيها ترجع البيت....... لكن احسن حل لك يا تسكنو مع ناس ابوها...ياتجيب ناس ابوهاعندكم .....عشان توفر المشاوير والجري..........

المدرسة...........

أول حاجة دي ما بتقدر تفرق بينك وبين الطلبة.......وحتقعد..... تعيد وتكرر في الكلام مليون مرة..زي برنامج من الأمس الفي تلفزيون السودان....وممكن جدا تسرح وتقول لك فاهم يا شاطر؟

المدبرسة......
تلقها طوالي زهجانة.....وشايله اخلاقها في طرف نخرتها...وان كلكلتها ما تضحك........في النهاية حتوديك التيجاني الماحي...... نزيل اكتئاب

المفلسة.........
ما دايرة أي شرح


الكوبارة.........
دي تكبر أي موضوع...وتسوي ليهوتوم وشمار..... وتقولك ناس القبور دقو الطنبور...... لو شافع من شفعك.....عتر ووقع...... تصرخ وتخت ايديها في نص راسها.....وبطول حسها.....ووووووووب علي ووووووووب علي...مااااااات ..ماااااااااات........ يسمعوها في الشارع....والغريبة لوانت كنت نايم وسمعتها..... تقوم مخلوع.....وتمرق من الاوضة لحدي نص الصالة.............اما لو كان عندك قلب مرضان....اللحظة ديك....من المهد الي اللحد

الخبّارة......

البي تدور الشمار..... لو في نضم تلقاها سكتت الشفع....ونهرتهم عشان تسمع.......الجيران مالهم بيهرجو وصوتهم عالي......ولو كانت بتكوي لك في هدوم.....قطع شك......قميص ولاّجلابيه.....حيكون في عداد ضحايا الحريق.....وممكن الملاح...يحرق وممكن الجردل يكون في الماسورة.... يتملي والبيت يغرق من الفيضان......وحرمكم المصون واقفة فاتحة خشمها وتصنت للجيران........



نصايح متأخرة
إن بقيت بخيت.....ربنا يديك....امرأة هدية ورضية.... السماحة ما ضروري لانو بعد شوية...... ما حتكون لك سمحة..... حتكون عادية........ نصيحة لك.....النسوان البقولن ديل اوعك تعرس واحدة فيهن.

[محمد ابراهيم احمد ابراهيم]

والله نعم النسوان خشم بيوت
مشكــــــــــــــــــــــ ـــــــــــــور

[عارف عبد الرحمن]

وشحات الطايوقة .. والناقص زوقة ..
بس ليه ما ذكرت العالي زوقة .. وبدل الحنانة .. تبقي الحنينة .. والراقية ورايقة .. الله أديك العافية ود نورين .. الله أكون في عون رجال العوين الزي ديل

يديكم العافية محمد وابو عبد الرحمن الموضوع للضحك بس عشان المزوج واحدة من الصنف الفوق ما يزعل ودمتم

[صادق محمد عوض]

بالحيل الحريم خشم بيوت....... فاظفر بذات الدين تربت يداك................