الكــــرسي الســــــــاخن..يجلس عليه (-)

السؤال الثاني : ((لمن يجي الزمن الفلاني ... سمانا بتقطر مطر دُري وتمازج برتكاني)) في ظنك سيأتي هكذا زمان
( اذا جاءك هذا الزمان فسيغنيك عن سؤالك الاول )

( السؤال الثالث : أحياناً قد نتهيب إتخاذ بعض القرارات التي ربما تكون فاصلة في حياتنا خشية الإخفاق في مثل هذه المواقف هل يواجه الخليفة الأمر ويتحمل تبعات قراره أياً كانت النتيجة أم يتبع المثل الذي يقول (باباً بيجيب الريح سده واستريح ) اي إتباع سياسة الهروب ؟؟؟ )
والله ذكرتيني حاجه تتصوري انا حياتي المديده دي كلها ما لقيت فرصه اتخذ قرار وكتيرين زيي كده الحاجات قاعده تجي براها ونحن بنزعن فحكاية تقعد وتفكر عشان تقرر ده ترف ما حظيت بيه انشاء الله عقاب ايامنا الباقي لينا دي نلاقي فرصه نستمتع بالحاجه دي !!!!!!!!!!!!

السؤال الرابع : " طفلة حلوة وشايلة لونها ....... ترسم الوطن الشباب كل خط في اللوحة باين .............. ومن دموع الطفلة يحكي النفوس تبقى السحاب القلوب تبقى الأراضي ........... تزرع الوطن اليباب "
( أ ) مارأيك في هذا الحلم ؟؟؟؟؟
( ب ) هل تفهم في فن الرسم كأداة من أدوات التعبير ؟؟؟
(ج ) إن كنت لاتتقن الرسم إذاً فحدثنا عن إهتماماتك وهواياتك ؟؟؟



والله ياوفاء يابتي انا ماعايز ابدو ليك متشاءم بس الحاصل انه نحن عايشين في زمان كل ماقللت من احلامك كل ما قلت كوابيسك لاحقا بمعني انه نفس الحلم الحالي في مقبل الايام العوجه ببقي كابوس وبالتالي كل ماقلت الاحلام تضاءلت فرص اصابتك بالجنون لانه المسافات مابين الحلم والواقع بقت بعيييييييييييييده

/( [( السؤال الخامس : السودان بلد غني بموارده الطبيعية والتي بإمكانها أن تسد إحتياجاته وتكفيه شر الديون التي تثقل كاهله فماسر هذه الأزمات الإقتصادية المتلاحقة ( بما انك رجل إقتصاد أردت أن أعرف تحليلك للأمر)
/ السؤال السادس :
لاأعلم إن كنت ترتشف السياسة أم لا ولكن حتماً لك رأي !! )
(1 )هل تعتقد أن تجربة حكم الحركة الإسلامية في تركيا هو النموذج المطلوب في العالم الإسلامي ؟؟؟
(2 ) ونحن ننادي بالديمقراطية ونبحث عن وطن عادل في ظل الواقع الحالي في السودان كيف لنا أن نُحِدث التغيير المطلوب دون أن تهتز ثوابتنا ؟؟؟
آخر سؤال : وإن كان البلد في ظل التخبط الذي يعيشه لايأبه لأمر شعبه ولايشعرهم بحُنوِه رغم ذلك فإن كل غائب يتوق للعودة اليه فهل يفكر حسبو في عودة نهائية قريبة للسودان ؟؟؟ ]


السودان عاني ولازال من ازمة حكم فكل من لبس الكاكي نما الي خياله انه افضل من يحكم البلد والغريب يجد من المنتفعين والمتسلقين من يبرر له ويظل يرتكب الخطأ تلو الاخر فلو رجعتي الي تاريخ البلد من 1956 الي يومنا هذا تجدين انه خلال هذه الفتره تعاقب علي السودان عبود ( 7 سنوات ) باع حلفا نميري (16 سنه ) باع البشر ( 22 سنه ولازال ) باع الجنوب ولا زال يدلل علي الباقي . وخلال هذه الفرات توجد فترات انتقاليه علما بانه لم يحدث انا اكملنا دوره انتخابيه

تجربة الاسلاميين في تركيا الي الان لم تتشكل عنها فكره ثابته لكن البارز منها بقول انه ممكن في ظل حراسة جيده من التغول ان تنج.
تعبير ثوابت ده تعبير ممجوج يعني نحن امه عندها ثوابت وباقي الامم ماعندها ثوابت ثم اي قيمه او عرف او دين تقليد لايستطيع ان يتقبل الاخر او يحتاج لحمايه من انظمه دكتاتوريه ففي رايي انه لن يصمد طالما لا يتمتع بقدره لي الاقناع ومبرر وجود فالبقاء للاصلح من الافكار والقيم .
انا والله مابيني ومابين نهاية الغربة مصدر دخل ثابت يقيني ومن اعول ذل الحاجه ويوفر اساسيات الحياة

[
اولا الي متي يلزم الخليفه الخطوط الخلفيه والبعد عن الواجهه؟

عهدناك انسان مثقف لدرجه ممتازه وصاحب راي وجراة في الطرح وعلاقات اجتماعية ضخمة جدا
ولصيقا بكل الاحداث واللجان التي تكونت ولكنك اثرت البعد عن الواجه هل هو التواضع ام عدم القناعة
وهل اسم الخليفه امتداد لذلك ؟

ثانيا ما رايك في المظاهره ذلك الجسم الضخم الذي له الاف الايادي والحناجر كفعل يعبر عن ارادة وهل

كنت يوما احد المتظاهرين ؟
طالما الغربه لابسانا اكيد لا مواجهة .
ومادام نتاحة المرسال ده ما بتروح بتعقبها البعدها لا ثقافه ومادام البلد ممكون لا لجان ومادام اهتمامات شبابنا كلها في الخاص بتبقي لا لامظاهرات
متي يشعر الخليفه بالرضا ؟
لما يراودني شعور كذاب بانه الحكايه هانت

ابداء العاطفه تجاه من نحب هل هو ضعف ام قوي ام ......... ؟
اكيد شجاعه بس مع الاسف اغلبنا لا يملكها

في اي الكائنات يلتمس الخليفه الجمال ؟

انا بحب الخيول لكن كل مخلوقات ربنا فيها الجمال

في الختام امر عام يتوق له الخليفه ؟

انه البلد يتعافي وتطلع مننا الغضبه وتسكن في نفوسهم خوف وتتقدم ركاب تعمير تعمر فينا ما خرب نكون قيمه نكون واسوق نقدف بيها عالي بحار ونتناوب حرس ثوري

الكرسي دا مالوا صاني كدا ، لا ضجيج ولا حراك الجاي منوا ياناس ؟؟؟؟؟؟؟

[عبده مصطفي إبراهيم]

اهلا حباب أم محمد......... التحية ليك...وتحية خالصة لأبو محمد
ووما حا أبدأ بأي سؤال....
بس بس قلت اشوف ليك كرسي مريح بالرغم عارف في ناس لابتين ليك

مشكور اخي عبدو انشاءالله ايريحوك اولادك ( الطُعم )


قايتو انا حسبتها وقلت الناس مشغولة وكان انعصرت بكب الزوقة

والشغل الايام دي واجب وطني

والله يا أم محمد, عبدو ماقصر معاك تب دا كرسى لندنى والله عمر البشير ماقعد عليهو دحين بطلي الجقلبة وركزى .... وهاك السؤال دا من هى ام محمد فى سطور ؟؟ يعنى السيرة الذاتية بالتفصيل .... ثم الا تتفقين معى الراي بان ام فلان
وزيد وعبيد يمكن ان تكون حالات تقمص بمعني يمكن ان يكونوا من الشباب المشاكسين ؟؟؟ دى مقبلات وراجع ليك

[عبده مصطفي إبراهيم]

أم محمد..... شيلي شيلتك...حالتي قلت انبه الناس كالعادة... بعدم فتح موضوع الأسماء المستعارة لكن ...إتأخرت
......
سؤال... لماذا "المرأة الريفية"...دايما تعتبر السياسة ...للمرأة عدم شغلة..وتطاول علي عمل الرجال.
إلا من رحم ربي
......
وبجيك راجع