لو عندك غبينه اتفضل؟؟؟

قرر حاج صديق وهو معاشي من سكان اركويت بالخرطوم ان يستثمر جزء من مكأفاة نهاية الخدمه ويفتح صاله للبكاء، يذهب اليه كل من يريد ان يبكي ويفش غبينتو !كتب في دراسة الجدوي ان الممغوسين من الشعب السوداني رجالا ونساءا يحتاجون الي صالات واسعه لكي يتنفسوا ويبكوا ولندب الحظ السئ ولكي يلطموا ويجعروا.
قال له صديقه وجاره مأمون: اتوكل علي الله ياحاج صديق واعمل المشروع ده واوعك تتردد والله تكسب دهب وكمان تفش غبينة الناس دول وتلقي اجر، اول حاجه تعمل ليك قسم للناس الكبار في السن غبينتهم شديده بالحيل وقسم لناس الصالح العام وقسم لي ناس الركشات واهم قسم غرفه للمغتربين وخليهم ادفعوا بالدولار وفي اسؤا الحالات بالريال السعودي الريالات التانيه حقت ناس عمان وقطر دي ماتقبلها.
وماتنسي ناس الطيارات الوقعت واهم حاجه ناس السدود بالذات ناس كجبار ودال يجوك من الكلاكله ومناديل الورق كان جبتها بالدفار مابتكفي، حاج صديق مشي للفاضل السمسار في شارع جوبا في سبيل ايجادمقر للمشروع( بيت البكاء)!!
والله يالفاضل اخوي انا عايز لي بيت كبير... كبير جدا...
ياحاج صديق انت ماساكن في ملكك البيت عايز بيهو شنو؟؟يالفاضل اخوي انا ماعايز البيت للسكن عاوزو تجاري!!! قصدك مخزن ياعم صديق؟
مخزن شنو يالفاضل عاوز اعمل بيت بكاء!!!بكاء شنو؟ المات ليكم منو؟ ماتدق ليك صيوان في الشارع وتخلص روحك.
وما ان انتهي حاج صديق من شرح المشروع حتي بادره السمسار: والله دي فكره بت ستين كلب الشعب كلو عاوز يبكي ويتفشي ومالاقي ليهو طريقه والله انا اول زول يجي يفش غبينتو ناس المحليه مغصوني جنس مغصه كل يوم ضرائب وزكاة المهم انا عندي ليك بيت كبير ولقطه جنب البلابل سته غرف وصالون وصاله كبيره وحمامين.. بس يالفاضل ماح يكون في ازعاج للجيران وبعدين نخش في اشكالات مع ناس النظام العام ويجو يكشونا... ازعاج شنو ياحاج انا ح اعمل ليك عوازل ضد الصوت عشان الناس تبكي لامن تقول بس.
بعد ان عاين حاج صديق للبيت وابدي اعجابه طلب من السمسار باحضار سباك يعمل في كل غرفه حوض غسيل وحنفيه ويوصلوا بالسايفون عشان الزول بعد الجعير والتفشي يقوم يستغفر الله ويغسل وشو!!!
دفع مقدم تلاته شهور ورجع البيت شايل عقد الايجار
يانفيسه!!
نفيسسسا!!
ايوه ياحاج في شنو؟ خلاص لقيت بيت البكاء ودفعت الايجار...
اها ياحاج مافضل ليك الا الزبائن والله يوم الافتتاح اجيب ليك نسوان الحله كلهن احررن ليك البكاء جنس حرير! اعمل ليك جنس افتتاح ياحاج
ووووب واحييي ماتديك درب. ناس كلتومه عندهم اتنين ماتو ا في الجنوب، حليمه راجلها عمرو39 نزلوه الصالح العام ورقيه بت التومه اختها زرعت الكليه في الاردن وماتت في الطياره الاتحرقت... كفايه يانفيسه ..
انتي عايزه تطرشقي لي المشروع من اول يوم انتي ماعارفه الاختلاط ممنوع عايزه تجيبي لي نسوان يبكن ويتشخنفن قدام الرجال!!!
في هذه اللحظات يستيقظ حماده الطالب في الجامعه من النوم ويتمطي ويذهب نحوهم...
والله ياابوي اجيب ليك كترة جكسويات شواكيش سااااكت(تربح) وبالمناسبه ياابوي عشان نحل اشكالية الاختلاط دي احسن نعمل الغرف للرجال والحوش للنساوين تتدخل الحاجه نفيسه لا انا رأي كل ناس غبينه نعمل ليهم قسم بي حالوا يعني ناس الصالح العام براهم وناس الحور العين براهم وناس الطياره براهم... طيب المغتربين!! المغتربين يكونوا مع ناس الركشات وكمان ياابوي في ناسDOUBLE GABINA‏ يعني زول شالوهوا الصالح العام قام جاهوا ضغط او مغترب عندو ضغط وسكري.
قبل الافتتاح بيوم تم الاعلان في الصحف المحليه لزوم الدعايه يتم في تمام الساعه السابعه مساء بتاريخ كذا افتتاح محلات فش غبينتك صالات مكيفه تحتوي علي عوازل للصوت للبكاء الحار والسكلي والحييي وووب...
يوجد قسم خاص للنساء والمحل مزود بمناديل الورق واحواض الغسيل والبراطيش لزوم اللطم الاسعار في متناول الجميع الفين جنيه بالقديم البندول مجاني وكذلك البصل لزوم الافاقه في حالات الهستريا.
لم يصدق حاج صديق وهو يري افواج المواطنين تتداعي نحو المحل ،اضطر لطلب عدد من قوات حفظ الامن ، انتابت بعض الصفوف خارج المحل حالات الاجهاش البكائي قبل وصول البوابه الرئسيه وغرف البكاء عندئذ طلب حاج صديق من رجال الامن بالسماح للذين علي(الهبشه) للدخول صار المتماسكين قليلا يحتجون .
في اليوم الاول امتلا المحلfull‏ ‏
الو حماده اغشي السوق المركزي اشحن بصل زياده حالات الاغماء في ازدياد.
جلست الحاجه نفيسه في كاونتر النساء وجلس زوجها في كاونتر الرجال يدخل المواطن في غرف فش الغبين ويخرج محمر الوجه متورم العينين مستريح الاعصاب بعد ان قام بفش غبينته!!
بعد ان رأي حاج صديق الغبائن المختلفه وسمع الجعير والسكلي والنحيب لم يعد ينظر الي الربح بقدر نظره الي خلق جو بكائي مثالي مماجعله يحدد يوما في الاسبوع مجانا وبكاء جماعي كل شهر.
بعد ثلاثه ايام دخل عليهم شخصان احدهم يحمل كاميرا والاخر يحمل دفتر وقلم.. نحن من صحيفة الاثاره وعاوزين نعمل لقاء تقدم حماده اليهم ورحب بهم وجلس معهم طلب الصحفيان المرور في الغرف ليروا كيف ان المواطنين يفشوا غبينهم في هذه الصاله اكثر من مائة شخص ينتحبون بطرق مختلفه. وقف الصحفيان بعيدا وهما يتابعان هذه الحالات التراجيديه وصارا ينظران الي احد المواطنين يضرب راسه بالحيطه ويبكي بحرقه ويردد :
انا كان مالي ومال كده!!!
انا كان مالي ومال كده!!!
سأل الصحفي حماده الزول البضرب في راسو ده مالوا؟؟؟
رد حماده
ده الوالد صاحب المحل حاج صديق امبارح ناس الضرايب جابو ليهو ضرايب اكتر من راسمالو عشان كده بضرب راسو بالحيطه!!!

[عبده مصطفي إبراهيم]

إتأخرت علينا بالخبر ... تجيبي سيرتو بعد ما سيدو بقي إضرب راسو بالحيطة
ويقفل
كان ... وصفنا لي ياسر مهدي دا ... شايفو فاتح لي بوست في العام "الحل شنو"

دي حلول عصرية ومفيدة في تخفيف الالام بدون شك وياريت نظيف عليها صالة صالتين للمشوكشين والماقادرين اتزوجوا لمن صلعتون وصلت نص راسون لانهم شريحة مهمة ولها تاثير كبير في المجتمع .