سلسلة الأمثال الشعبية

مشكووووووور يا ود حبوبتك ( الشريفيه ) اكتب القالتو ليك كله

[عبدالملك مصطفى]

مشكور أخوي وليد ولك التحية والتجلة والرجوع للحبوبة وزمنها شئ لابد منه لأنه زمن كله حكم ومعاني وزي مابقولوا الماعنده قديم ماعنده جديد كدي هسي ذكرتني مثل خليني أكتبه في الرد الجاي
فتك بعافية انت وأخوانك

[عبدالملك مصطفى]

( الكـــــــلام يبــــدأ ويزيــــــد قبضــــة )
القبضة شنو؟؟؟ هي مقياس زي الصاع يعني هي إيد الزول مليانة حاجة لو كان عيش ولا قمح ودي بقول عليها قبضة والمثل بضربوه في حالة تكون في اشاعة في المنطقة أو قصة معينة حقيقية حصلت وحتى لو كانت القصة أو الحادثة صغيرة لكن بتلقى الناس بزيدوها شوية أي زول بتمر عليه الاشاعة دي بزيدها من عنده شوية ومستحيل تلاقي القصة الحقيقية الا من صاحب القصة نفسه ولو الواحد تابع القصة وبديت من الزول السمعتها منه وتوصلها لصاحب القصة نفسه تلاقيها زادت اضعاف الاضعاف من الحقيقة والمثل بقول لينا مانتابع الناس والاشاعات وخلونا في نفسنا أحسن ولو الواحد سمع حاجة وضروري ينقلها ينقلها زي ماهي صاح أو يخليها لأنه الزيادة بتجيب كلام والكلام بجر كلام وجر الكلام عيب والعيب عندنا في أهلنا زي الحرام وزي مابقولوا سمح الغناء في خشم سيده ولو الغناء حرام أحسن نخليه.
مثل حكيم وياريت نعمل بيه ونتمسك بتقاليدنا السمحاء وماننقل الكلام ولو نقلناه مانزوده ولو عايزين نزوده وزودناه نزوده احسن في سرنا وعشان اللسان جباد بلاء أحسن لينا ننجمه مظبوط
الله لاجاب الكلام وانشاءالله نسمع عنكم كل خير.
ولحدي مانلقى ليكم قصة ومانزيدها قبضة أخليكم في رعاية المولى وفتكم يعافية .

[صادق محمد عوض]

مشكووووووووووووووووووووور اخي عبدو علي السرد .... ابدااااااااااااااااع في الشرح والتفسير....... واصل....... لك الود

[عبدالملك مصطفى]

( العــــــــرجاء لمــــــــــراحا )
العرجاء هي شنو؟؟ العرج هو عدم القدرة على المشي الطبيعي وهي نفس معنى الظلع وبالعامية عندنا بنقول الضلع الواحد يقول ليك الشاة الضالعة يعني البتعرج ودي بكون عندها مشكلة في رجلها مثلا والواحد مننا لو شاف منظر مراح غنم ماشي بشوفهم ماشين في مجموعات زي الشلة تحس بأنه في ولف بيناتهم وكل مجموعة بتمشي بتشوفهم ماشين بوتيرة واحدة ونسق واحد ؛ ياسبحان الله الإلفة حتى في الحيوانات موجودة ومابال البشر ؟؟؟ وهنا المقصود بالعرجاء حرفياً طبعاً مقصود بيها الشاة العرجاء بترجع لمراحا أي جماعتها يعني بتمشي مع العرج عشان مابتقدر تمشي مع الشياه الطبيعية لكن رمزياُ لرجوع الزول لأصله
المثل بضربوه لما الزول يشوف الفة بعينه ويشوف ولف بين ناس ما ينفك ولما الزول يرجع لناسه وكلمة ناسه هنا ليها معاني كتيرة مثلا لجذوره أو شلته أو أهل منطقته أو حتى لما الزول يكون ماشي في طريق ما طريقه لكن يرجع لطريقه الصحيح؛ تعالوا شوفوا معاي الفة ومحبة وود وتعاون ورحمة ومودة بين الناس دي كلها معاني بتدخل في مثلنا السوداني البسيط ده وأظن كلنا حاسين بالمثل ده عندنا في فطيس وشايفين مننا وفينا مهما الزول بعد منها في النهاية برجع ليها وبالجد الخلاني اقول المثل ده اليوم عبارة حلوة وملفتة بالجد قالها اخونا الجميل جعفر محمدين وليه مني الف تحية وتحية لما قال فطيس انا ما ساكنها لكن هي ساكناني ؛ صحي العرجاء لمراحا
ولحدي مانلقى مثل تاني نشرحه معاكم خليتكم بعافية وبنتلاقى لو المولى هون ؛؛؛

[صادق محمد عوض]

شكرا علي السلاسة وربط المثل بواقع كلمات الحبيب جعفر....

ابداع الاخ عبدالملك ماليهو حدود دمتم ولكم التحية

[عبدالملك مصطفى]

شكراً ليك كتير أخوي محمد حسن فحل على مرورك ودي شهادة من زول جد جميل

[عبدالملك مصطفى]

الف شكر ومليون تحية ليك أخوي حرش

[عبدالملك مصطفى]

( النار مافيها من شريرة وبت النساء مافيها من صغيرة )
قصة المثل بتقول انه كان في واحد عنده بت سمحة سماحة شديدة ولما بقت عمرها زي 14 سنة بدأ الخطاب يجوها واحد بعد التاني لكن ابوها كان بتعلل بصغر سنها دائما كان بقول انه البت صغيرة لسة ما بقت زولة عرس لكن البت بينها وبين نفسها كانت شايفة نفسها زولة عرس وتقدر تمسك بيتها لكن عشان الخجل ما بتقدر تقول الكلام ده لابوها ؛ ومرة من المرات ابوها كان قاعد جنبها وهي دايرة تولع ليها نار قامت شالت ليها شرارة صغيرة وبدت تولع بيها النار أبوها شاف المنظر وشاف انه الشرارة دي صغيرة سالها قال ليها يابتي كيف تولعي النار بشرارة صغيرة زي دي؟ ردت عليه البت قالت ليه يا أبوي النار مافيها من شريرة وبت النساء مافيها من صغيرة وبكده تكون وصلت الرسالة القاصداها لابوها وهو فعلا فهم القصد .
والمثل بضربوه للناس اللي ما بزوجوا بناتهم بحجة صغر السن لكن يا اخواني شوفو البت قالت شنو ؟؟؟ قالت بت النساء مافيها من صغيرة ماقالت بت الرجال مع انها بت رجال بس هنا جابت سيرة الأم لانه ليها دور كبير في تجهيز البت لبيتها وتربيتها على حب المسؤلية ومسك بيتها وهي من صغيرة وخاصة اهلنا الزمان كانت الام كل همها كيف تربي بتها تربية صحيحة تقدرها على بيتها ومسؤلياته .
تعالوا سواء نرسخ الفهم ده عند اهلنا وتعالوا نزوج بناتنا ونجهزهم من هم صغار وخلونا نعلمهم حب المسؤلية زي ما بنعلمهم العلوم والحساب وخلونا نعلمهم شغل البيت مانقول البت لسة صغيرة ما بتعرف تشتغل هي لازم تعرف وعشان تعرف لازم تكسر ليها صحن ولازم نصبر عليهن وعشان ما ينكسر بعدين خاطرنا وخاطرن خليهن يكسرو ولو كل الصحون ؛ خلونا اخواني واخواتي نتلم على قدح واحد وكبير اسمو قدح محاربة العنوسة والعزوبية وقبل الفاس مايقع في الرأس
افهموا كلامي ده وخلوه دعوة للوقوف مع النفس ومراجعة حساباتنا في المحك ده
لحدي مانلقى لينا مثل تاني بقول ليكم فتكم بعافية وودعتكم الله ؛؛؛