لكم سودانكم ولهم وطن

حأسأل عن بلد رايح
وأفتّش عن بلد سايح
حأسأل وأسأل عن أمانينا
أمانينا اللي ما بتدّينا
صوت صايح
حأسكن كلّ نـخلاتنا
إذا جانا الزّمن لافح
وأكتب عن بلد مـجروح
وعارف الـجّارحو ليه جارح
وأبكي على بلد مـمدوح
وعارف الـماسكو ما مادح
وأحلم بـ حلم مسروق
لا هو الليلة لا أمبارح
****************

*************
أعلّق فـي جناح سفري
جوابات لزمن فجري
لكلّ مضاجع الأحزان
وأضفـّر من شجر بلدي
بروقاً مارقة من صدري
وأسأل عن بلد غاطس
لـحدّ الليلة فـي الوجعة
أنط فوق سرجي وأتـحزّم
أقوم من وقعة لوقعة
وتبقى الفوتة هي الرّجعة
***************

**************
وأخت إيدي البتوجعنـي
على السأم البيراجعنـي
وأسأل يا وطن يا بيتنا
ليه شوقك مواجهنـي
وليه حبّك مـجهجهنـي
وليه تاريخ زمن خاسر
موكّر لسّه فـي شجنـي
**************

************

حأكتب لشدر مقطوع
مسادير يـمكن يتحرّك
خطابات لطفل مـجدوع
يقوم يـجري ويقع يبرك
وأصرخ يا وطن يا بيتنا
ليه ماتبقـى لينا السّاس
قدر ما تـجري فـي شرياننا
يبقالنا الشكك ترباس
أقولّك يا وطن رايح
أقولّك يا وطن آمر
سلام النّفس ما كافر