الحاصل شنو

قدر ماتقبل تلقي الحاجات ماياها تمشي المستشفي تلقي اتنين اوتلاتة يادوب في سنا تالتة اورابعة راسن لافي ماتعرف تقعد تنتظر دورك ولا تمشي .... اقوموا اكتبوا لي روشتة فيها خمسة ادوية غايتوا تلقي من الخمسة علاجك ولو عندك عملية صغيرة والله جزارة بس ربنا قايتوا يشفي المرضي والناس تعبانة خالص , ولو مشيت لدكتور اول حاجة الخمسين واهم حاجة .......ودقيقتين مابتقعدين معاهو اوديك الفحص........ والفحص مامعروف بشنو غايتو تخمينات .........وارجع للدكتور والدكتور بدورة اكتب الروشتة والفيها كم دواء .........وتمشي الاجزخانة تشتري اي دواء وفي اغلب الاحوال مضروب ولو مامضروب تكون الجرعة ناقصة ويستمر المسلسل بعد اسبوع اواسبوعين ترجع تاني للدكتور .
وناس التطعيم كل شهر بدوروا في الشفع قال الشلل ظهر في الغرب وامسكوا الشفع بالدور تطعيم وديل والله ماعرفين اقفوا متين ولا ماعندهم فرملة ماعارف ........والملاريا تجيك في كل المواسم لاصيف بمسكها ولا شتاء بوقفها ولا ناموسية مشبعة كمان .
اما السياسة فامرها عجب لاتعرف الناس ديل دستورهم اسلامي لا علماني كل زول ابلع الحكومة دايرة حق المواطن والمواطن يسف في حق اخوانوا المساكين والكل شغال هبر وجغم والناس نسوا القيامة ودايرين الدنيا والمال والنساء الحسان والعربة الفارهة .
اما الاهل والاقارب فكلهم مشقولين من بعض ولو واحد يوم من الايام جاك تقول الزول دا داير لية قروش وتقول تزوق منوا او تتخارج منوا بسرعة المهم ياحليل المحنة وضوقوا ملاحنا وادونا حبة ملحة وحبة شطة وجونا ضيوف ادونا كسرة وملاح وكمان معاها سلطة حمراء
واتمني ان لااسبب دبرسة للناس علي الدبرسة العندهم وسوف نواصل لو مدا الله في العمر