مبروك عليك والعقبه للمرخرخ اخوك

هلال السرور الديمه سامق وعالي
شرحت الصدور بالنصر المعزز غالي
جبار الكسور الفوق النجم متلالي
جمهورك طرب والعقبه للمتباطي

[عارف عبد الرحمن]

يا عاطف أخوي جبت الكلام الزين
في العالي الحبيب الزيو الشبه وين
هلال السرور والبشري للسمحين
واضعنو فوق الجبين والعين
وأعفيني من الكلام في الشينين

[عارف عبد الرحمن]

هلال الشموخ ساطع في سماك العالي
وابهج محبيك بالفرح طوالي
ظني فيك ما خاب وريحت بالي
أمش في مشيك وأقدل عديل ما تبالي
ويا كاربوني الغشيم ضيعت النجم وشيخنا الوالي

[عبده مصطفي إبراهيم]

والله بالجد إلف مبرووك يا هلال الشموخ
والمريخ فعلا يحتاج الي الكثير
وفعلا صدق كلام العرب....جوع كلبك يتبعك
والرفاهية لا تنجح مع ثقافتنا ودي فطن لها الأرباب
ولي قدام.........
وكترو من المسادير....يا سدنه...السنه حقتكم
مبروووووووووووووك

[عبدالملك مصطفى]

يا أخواني قريت كلامكم وجيتكم جاري
هلالنا فرحنا وأسعدنا وهل شوف عيني في هراري
وحديثكم بدورلو قعدة بالبرنجي والبحاري
نبخبخ وننفخ ونحكر رجل فوق رجل وشايفين هلالنا كالمنشاري
قايم يقطع ونائم يقطع لا طايرتاً خاصة ولاكمساري

[عارف عبد الرحمن]

ياملك سلام مبروك لهلالنا في العلالي تمام
سكت الخشامة من ود أبرق ونعام
سابح في سماه وبرضوفي بحورو عوام
كل السنين حقتنا وبرضو هذا العام
وشكراً لمرورك يا مديرنا العام

[عبده مصطفي إبراهيم]

ماشة معاكم حلاوة لا قرش ولا تعريفه
طفيش كورة وشلاليت لا حرفنة ولا توليفه
الغريق قدام كدي فراقو القيفه
وبنقيف معاكم بس كتر الرقاد يا هليفه