7يوم في فطيس

كلما غافلت حواسي عن الموضوع اجدني اعود متاملا فيه بل ومشدوها به لانه ترك في نفسي صدي عميقا لذا قررت ان اغازلكم به حبا
في اجازتي الاخيره كان موضوع المجالس انه المغتربين اشتروا الاراضي الزراعية لانه الزراعة اصبحت مجزيه بعد ارتفاع اسعار البصل والكبكبيه لاسعار خرافيه

مما ضيق الفرص علي اصحاب الدقندي البسطاء (صغار الزراع ) وكانت فرصه للمغتربين من باب تزويد الدخل وطبعا اخوكم صاحب الموضوع لا جمل له ولا ناقه في ذلك

سمعت وشفت وعدي الموضوع دون بليغ اثر بل من غير اثر خالص.

سمعت في المجالس ايضا انه الاتوس دا حاجه مجديه ودخلها جذاب لكن كلما اذهب السوق اشوف امام نظري من غير المستخبي عدد 35 اتوس وطبعا اخوكم برضو لاجمال

له ولا ناقه في ذلك سمعت وشفت وعدي الموضوع ذي سابقه

شفت انتخابات قالوا عدد المسجلين من فطيس 2500 زائدا 500 فرج الله اي بمجموع 3000 شخص جميعا انتخبوا المؤتمر الوطني رجب وعمر البشير بفهم جمعي

مفاده ردهم علي مرشح الاتحادي عندما قال لهم يا اخوانا انا رمزي العصايه سالوه عندك لينا زلطايه ؟

وبرضو سمعت وشفت وعدي الموضوع ساكت .

باختصار لانكم ما ناقصين نقه زراعه كيف وسكه حديد كملت شالوها الجماعه ساي يعني ماف سكه حديد تصدقوا ماف سكه حديد تاني في فطيس يعني توت تووووووووووووت

تاني ماف بعدين النمره الزمان مخصصه لمحصول واحد اليوم فيها بصل وكبكيه وفول وعدس وعيش وتمر هندي وامكن بنقو الله يكرمكم اي مالو ما دخل عالي ذي ديل

باختصار حسيتها نزوع روح او فرفرة مذبوح املا ان اكون اخطات الفهم

شد ما جذب انتباهي وملاني لاحقا انبهار حتي هذه اللحظه خطاب مختصر عقب صلاة جمعه بلغه شفيفه من استاذ سيف الدين عبد السلام

(بعد السلام .يا اخوانا نحن بصدد مشروع اناره القريه تخليدا لروح الفقيد الهادي حجازي لذا نرجو منكم المسانده جميعا وربنا يتقبل منا ومنكم . انتهي )

صبيحه اليوم التاني السبت حضرنا ونحن عدد 4 نفر سيف وابراهيم الشراقي وشريف عبد الحميد وشخصي المتفرج والمتامل واخذنا كراس 24 ورقه من ميرغني النضيف

شفتهم كتبو فيهو عدد كم نفر كدا 50 جنيه للواحد يعني 50000 للماعارف وبعدين انطلقوا ناس السوق وخشوم البيوت وشفع الروضه بي الساهله بس العندك اسي ما بكره

لا تجهموا في وش القال ما عندي لا عابو علي البخيل بخله ودور فتحو الدنقلاوي في الموضوع مواد من الحصاحيصا وجيب وودي وجاهم عثمان مساعد ابو كديسه وعماد

الزينيكي ومهدي احمد وكم ولد كدي بي بكاسيهم ما عرفتهم والله ومهندس مصطفي عبد السلام قدر المرقت قال ليهم شيلوها ناس تاني انا طبعا عريس مرقتي ما كتيره

ما شفتهم لكن حسيت بي المشهد لكن والله يا جماعه غرقوا فطيس في نور خلوها قطعه بلور في اسبوع بس واحد. شفت والله عواجيز شارع الجامع مساهرين لي الساعه

اتناشر ونص وبقيت قدر ما امر بي شارع اسمع اصوات الناس طالعه من البيوت في نشوه ادركت انه في روح جديده دخلت الناس

وغالبت دمعه لما صابر ود الفلاته المشهور جاء لي سيف وفي يدو قروش قال ليه دا حق فلاته تعالوا نوروا لينا انتهي .

فائده : ذكرت هذه الاسماء لابطال العمل دون اذنهم ارجو ان يسامحوا لم ارد افشاء سرهم لكن فرط الفرح جاء كذلك

اتعلمت منهم كيف نعمل من دون كلام وكيف انه البلد لما تحتاج الناس بتلقاهم بدون تاخير

اتعلمت منهم كيف نعمل دون كلام وكيف البلد ما بعز عليها جهد ولا قروش .

العريس عودا حميدا وزواج مباركا وبي صراحه نورة الحله وجيت نورت المنتدى برضو وده كله في اسبوع ..

والتحيه ايضا والتجله والتقدير لكل من اسهم في هذا الموضوع الذى يستوجب من الكل ان يعتز ويفتخر به وقد نفذ من أجل تخليد ذكرى استاذنا الفاضل الهادى (له الرحمه) وهذا التفاعل أن دل على شئ فهو يدل على مكانة وموقع المرحوم وما قدمة في هذا الوسط للعلم والبلد ، فالتحية لك الخال عاطف وقد أبت نفسك الى أن تعتز وتفتخر وتفتخر بطرح هذا العمل الجميل، وللفقيد الجلل الرحمة والمغفره ..

[عارف عبد الرحمن]

أخي عاطف لك التحية والأحترام والتهاني .. شدني جداً والله الموضوع وهمة الأخوة الكرام وأسلوب العمل المسؤول .. وياريت الأخوة احسوا بالمجهود الجبار الذي أنجز في زمن قياسي مش زي ناس قريعتي .. وتكون عرفت أنو الجماعة هنا مازالوا بيبحثوا عن البنج عشان العملية القيصرية لأخراج مبلغ لا يساوي ربع المجهود البزل من الأخوة الكرام وجزاهم الله خيراً ودي المحرية فيهم ونتوقع أكثر منهم ... بس البقنع الجماعة هنا بأن هذا العمل لفائدة البلد منو .. وافرحني منظر صابر وهو يمد اليد بالمبلغ وذلك يؤكد عظمة وأهمية الأنجاز وأحساس الأنسان البسيط بأهمية المشاركة وأنه جزء من هذه البلدة وأنه يساهم ولو من قوت يومه ليقدم الدعم لمن يستحقونه .. ويا لها من مواقف وعبر .. وجزاك الله خيراً أخي عاطف وأتمني المواصلة بالكتابة أنت والأخ عبدو نورين لأنكم جداد لنج ومعاكم مايفيد من أخبار البلد ولو سماع .. عشان أنتوا عرسان والمرقة محسوبة .. لاأقصد مرقة ماجي بقصد الطلعة .. وسؤال أرجو الأجابة عليه بأسهاب أرجو منك أن تكتب عن حياتك قبل وبعد الزواج وكيف وجدت عالم الزواج وكيف أنت بعده .. يعني مقارنة بين الأول والآن ..؟؟

[عوض خضر]

العريس حبابك منور هنا وهناك وان كنتم معاكم كنت بكون 000000 التحيه لسيف الدين عبدالسلام والبنا ورفاقهم الكرام وللبلده الحنون اشتهاء وتوقان للرؤيه

الاخ عوض شكرا علي المرور

الباقر الامين ما اروعك اشكر مرورك

ابو عبد الرحمن احيك علي الشفافيه

واجابة سؤالك اتمني ان ارجع ليها بصورة تفيد الكل

[محمد ابراهيم احمد ابراهيم]

لك التحيه عاطف