قراءات في كتاب " سر الحياة"

اليوم سأحكي لكم قصة تشرح كيف لو أننا طبقنا قانون الجذب وفق ماوضحه الأخ عبدو من خطوات أن نجذب مانريد الى واقعنا
كان في تلاتة رجال شغالين حمالين كل واحد فيهم عنده حمار بينقل بيه بضائع الناس من السوق لبيوتهم في يوم قاعدين بيتونسوا بي مزاج قام واحد منهم قال لي أصحابه الإثنين كل واحد فيكم يوريني لو انا بقيت أمير المؤمنين ح يطلب مني شنو واحد قال ليه انت لاتصلح الا إنك تكون حمٌال على حمارك ده والتاني قال لا لا مستحيل( خيالك واسع إنت ) قال ليهم إنتوا مالكم إتخيلوا بس إني بقيت أمير المؤمنين وكل واحد يقول لي طلبه واحد منهم قال : رغم إنه لو انطبقت السماء على الأرض ماح تبقى امير لكن فرضاً لو بقيت أمير المؤمنين ح أركب حماري ده بالمقلوب وأقبل وشي لي وراء وتقوم تأمر واحد من جنودك يمشي معاي في المدينة ويقول أيها الناس هذا محتال هذا دجال من يتكلم معه فإن الخليفة سيودعه السجن
والتاني قال : لو بقيت أمير المؤمنين ح أطلب منك تديني ألف دينار وقصر وحديقة غناء ومائة جارية حسناء واسطبل مليان خيل
المهم مرت الايام والسنين وبإصرار الرجل ده وإجتهاده وعزمه على تحقيق حلمه قدر حققه وفعلاً إعتلى عرش الخلافة وإتذكر اصحابه القدام الإثنين قام نادى واحد من حراسه وقال ليه أمشي مكان كذا لو لقيت رجلين صفتهم كذا جيبهم لي ومشى الحارس ولقاهم قاااااااعدين في محلهم نفس المكان ونفس العمل ونفس الحمير ونفس العقليه مافي حاجة إتغيرت قال ليهم أمير المؤمنين طالبكم طبعاً خافوا وقالوا ليه نحن ماعملنا حاجة عشان أمير المؤمنين ينادينا قال ليهم أنا عبد مأمور ومشوا معاه لما دخلوا قصر الخلافة إتفاجأوا لما لقوا الخليفة هو صاحبهم الزمااان زاته إستغربوا طبعاً قال ليهم عرفتوني قالوا ليه عرفناك قال ليهم وانا مانسيتكم تتذكروا يوم قلت ليكم اتخيلوا إني بقيت أمير المؤمنين وكل واحد يطلب مني طلب قالوا ليه : متذكرين قال للأول إنت طلبت شنو ؟ قال ليه : مائة الف دينار وقصر وحديقة ومائة جارية حسناء واسطبل من الخيل قال ليه الأمير وليك ماطلبت وفوقها راتب شهري وإتلفت على التاني قال ليه وإنت طلبت شنو ؟؟ قال ليه أعفيني ياأمير المؤمنين أنا طالب الصحبة قال ليه الأمير لو قلت طلبك الزمان ليك الصحبة قال ليه قلت ح اركب حماري بالمقلوب وامشي مع واحد من حراسك وهو يقول هذا دجال هذا محتال من يتكلم معه سيسجنه الأمير قال ليه ولك طلبك
الأمير ده كان الحاجب المنصور بن ابي عامر من اشهر الفاتحين وأمراء الأندلس
انا حكيت القصة دي لأنها توضح إنك بأفكارك بتجذب الأشياء الى واقعك والخليفة ده لو ما كان بيفكر بطريقة إيجابية ماكان حقق حلمه وجذبه لأرض الواقع
............................................... ح نواصل بإذن الله .............................