إغتيال الدكتورة أحلام حسب الرسول

مدخل
هذه واحدة من روايات الكاتب شاهين محمد سليمان شاهين...
رواية وهمية الأبطال واقعية الأحداث لدرجة انك تنسي انها وهمية...
عنوانها اغتيال الدكتورة احلام حسب الرسول...
مقدمة الرواية بواسطة الكاتب نفسه:
هذه الرواية لكم وعنكم يا عيال الله .. الى ابناء جيلى .. جيل الهزائم والهجرة والمقابر .
تكفي هذه المقدمة وهي رواية مثيرة للجدل
تابعوا الأجزاء...

حكايات دكتورة/ احلام حسب الرسول (احلام الصول(
- دكتورة احلام .. لو سمحتى المقرر السنة دى طويل مافى حذف ؟ .- لا .. عاينو انا ما بحب قصة الحذف من المقرر دى .. اى حاجة درسنها خلال العام الدراسى ممكن تجى فى الامتحان .- لكن دكتورة ..- مافى لكن .. انا من الاول قلتا قسم التاريخ فى الكلية هنا عشان الناس البتحب التاريخ مش عشان العايزين شهادة جامعية وخلاص .نظرت لى شذرا , مضت وهى (تبرطم) بكلمات مبهمة.. اسمع انها ابنة سياسى اسلامى كبير .. يظنون ان الجميع عبيد فى مزرعة اهلهم .كلية الاداب جامعة النيلين , قسم تاريخ .. تاريخى الشخصى الخاص هنا بين طرقات هذه الجامعة منذ ان كانت فرع الخرطوم .. اعرفها طوبة, طوبة .. اعشق ذكرياتى فيها .. دكتوراة فى تاريخ السودان الحديث .. رسالة الدكتوراة العبيطة تنام فى رفوف مكتبة الكلية .. لا احد يقراء ولا احد يسمع بها او يهتم , مثل الاف الرسائل .. عندما ادخل مكتبة الكلية انفض عنها الغبار , سنوات من المعاناة المرهقة اقبلها فى حنية هى التى جعلتنى احمل لقبى السخيف هذا - دكتورة-ذات مرة حضرت واحدة من الجيران وهى تحمل (حقنة) ملاريا ظنت اننى طبيبة .. شرحت لها مدة ربع ساعة الفرق بين الطب والتاريخ (رغم ان تاريخ السودان صنعته الملاريا) , قلت لامى فى غيظ- والله الواحد كان مفروض يقراء تمريض عالى مع الناس الوهم ديل .غدا الجمعة , يوم لقاء عصابة (الاحلامات) بعد غيبة طويلة لم نجتمع سويا منذ التخرج .. كم سنة يا ربى .. اكره الحساب .. اخاف من عد السنوات .. عادتى الشهرية اصبحت غير منتظمة- خايفة العادة تنقطع منى يمة .- تنقطع شنو يا بت .. انتى لسه صغيرة .يا امى حركاتك وبركاتك .. القلق من ولد حلال لا يطرق الباب .. القلق من عادتى الشهرية الخجل من عادتى السرية .طلبة نصفهم مسطول بمخدرات رخيصة .. جامعات اصبحت بدون طعم ومغزى حقيقى .رن هاتفى المحمول وانا فى طريقى نحو البوابة الخارجية- احلام الصول يا فقرية .صوت (احلام السمحة) بعد سنوات كثيرة فى (الدوحة) .. نجحت بت الكلب , زوج وخمسة ابناء وفيلا فاخرة فى (اركويت) - بكرة ح نكون معاك .. ايوه مفروض جلكنة تجى من الدلنج الليلة .كتابى الوحيد الذى نشرته من حر مالى لم يوزع سوى مئة نسخة فقط (محمد احمد المحجوب سياسى ومثقف فاشل) .. ابحاثى التى لا ينشرها احد .انحنيت على سيارتى (الاتوس) الصغيرة .. عادت الطالبة المشاغبة للظهور من جديد - عليك الله يا دكتورة احذفى لينا اى حاجة من المقرر .- انتى اسمك منو ؟ .- اسمى لبنى الطاهر .طيب يا لبنى احسن تمشى تقرى بدل ما تتكلمى معاى .عندما صعدت الى السيارة وجدتها تنظر لى بطريقة غريبة واكتشفت كم هى جميلة وذات جسد مثير .41 عاما هل ما زال جسدى مثير جنسيا ؟فى اى لحظة قد تصل (احلام جلكنة) الى بيتنا فى (ابوروف) هى الوحيدة فى عصابة (الاحلامات) التى احبها كثيرا .. وهى الوحيدة التى تحب التاريخ مثلى .

اغتيال الدكتورة أحلام حسب الرسول (2)

ورقة من اوراق دكتورة/ احلام حسب الرسول كتبتها فى مصحة للامراض النفسية والعصبية قبل مقتلها فى ظروف غامضة)
يصرخون فى اعمدة صحفهم اليومية - التى تلعب باقتدار دور التنفيس عن الغضب - نحن صنعانا ثورتين 21 اكتوبر و 6 ابريل .. نحن شعب عظيم يا دكتورة يا مغفلة .هى حجة عليهم وليست لهم .. ماذا فعلنا بهاتان الهبتان الشعبيتان ؟ .. ماذا فعلنا ؟هل الهبة الشعبية موضة ؟ .. ام انها اهداف وتقاس عظمتها بمدى تحقيق وتحقق هذه الاهداف الشعب الفرنسى صنع ثورته الانسانية العظيمة ومازال ينعم بثمراتها حتى الان .. المهم عندى هو الانجاز على الارض وليس الاناشيد الوطنية والملاحم الموسيقية .المافيا تسرق كل انجاز والشعب يضع يديه على خده وهو يشاهد السرقة جهارا نهارا .لماذا لم يتحرك الشعب وهو يشاهد 21 اكتوبر تتحول الى كومة رماد ؟لماذا ما تحرك الشعب و6 ابريل تحتضر ؟حجة الهبات الشعبية عليكم وليست لكم يا انصار احزاب المافيا الوطنية .د/ احلام حسب الرسول عابدين .

(3)- الو .- اهلا وسهلا .- دكتورة احلام ؟ .صوت انثوى مخنوق وباكى - ايوه معاى منو ؟ .- انا لبنى الطاهر .- لبنى الطاهر منو ؟ .- تلميذتك فى الجامعة .- انتى الزولة بتاعت خذف حاجات فى المقرر ؟ .- انا ذاتى .- يا بت انتى مجنونة ولا شنو ؟ .. لقيتى نمرتى دى اساسا وين ؟ . - لا .. انا بس عندى مشكلة , عشان كده اتصلت بسيادتك .- عندك مشكلة تمشى طبيب نفسى .. او تشوفى اخصائية اجتماعية .. اوعكى تتصلى بى تانى مفهوم ؟ .اغلقت هاتفى المحمول وقذفت به الى مقعد قريب .خرجت (احلام جلكنة) وهى تضع (بشكير) اصفر ضخم على شعرها المبلول - فى شنو عاملة شكلة فى التلفون ؟ .- طلبة اخر زمن .. عايزين هم يحددوا المقرر .. دى طالبة قالوا ابوها سياسى كبير فى البلد , ما عارفة الجدعا شنو على جامعتنا دى وهى ممكن تقراء فى احسن جامعة خاصة.. غايتو التعليم ده بقى كلو محن .- بقيتى عصبية يا بت الصول .- اعمل شنو يا جلكنة لى فترة اعصابى تعبانة وكمان مرض امى عامل لى توتر شديد .- ما فى زول ظهر ؟ .- عليك الله يا بت .. خلاص كبرنا .- مالك ؟ زى قمر اربعتاشر عينى باردة عليك .. الجامعة ما فيها رجال ؟ .- يعنى يا احلام الجاك عايزانى اتظارف واخفف دمى عشان القى عريس .. معلون ابوهم واحد وراء التانى .- والله يا بت الصول .. مرات القعدة ساكت بتكون اخير من العرس بتاعى .. متزوجة من انسان وسخ وما محترم .. تخيلى مرة بت فلاتية صغيرة جات تغسل لى الهدوم , بس مرقتى للسوق وجيت راجعة لقيت السجمان طالع فوق البت .. اتفو عليهو وعلى الرجال الزيو .- لسه مرزوع فى ليبيا ؟ .- بركة سيدى الامام ما يرجع تانى منها .. بعد ما انكشح يا داب انا والبنات ارتحنا من الفضايح ووجع الراس .- يخصى عليك يا فقرية ما جبتيهم معاك ليه ؟ .- حليمة ما بتحب الخرطوم .. وسعدية من ما نهداتا قامن وهى عاملة فيها مجكسة ود عمها وما دايرة تفارقو .- ربنا يخليهم ليك .. المرة دى ح تقعدى معاى اسبوع كامل .- اسبوع شنو يا بت ؟ .. عندى مليون الف التزام فى الدلنج ببيت معاك الليلة وبكرة ويوم السبت بتحرك على الحاج يوسف وبسافر من هناك .- دايرة اشبع منك يا فقرية .- الايام جاية كتير .. المرة الجاية يا رب تكون عشان عرسك .. انتى احلام تادروس بتكون بكرة موجودة معنا ؟ .- كيف , دى اكتر واحدة خططت عشان اللمة دى .. وبالمناسبة قالت اتصل بيها اول ما توصلى .- كويس عشان عايز استشيرها عندى مشاكل فى الرحم .. هسع عليك الله لو كنا عملنا زيها وامتحنا تانى وخشينا طب مش كان اخير من التاريخ السجم ده ؟ .- خلى الكلام الكتير وتعالى معاى المطبخ .. عاملة ليك سمك بلطى وسلطة اسود وكستر للتحلية .. مشروع تسمين يا جلكنة احتمال ترجعى شباب تانى .- حليل الحاجة زينب واكل الحاجة زينب .. مشتاقة ليها شديد .- بس ترتاحى وناكل وبعد ده تمشى تسلمى عليها عند ميرفت .- بالمناسبة عندى ليكم مفاجاة ب مليون جنية .. صورة ما اظن فى واحدة بتتذكرها فيكم .
(يتبع)

[عوض خضر]

متحرنك بفارغ صبر

الاخ اقلاب :
السلام عليكم مشكور اولا علي رفع الحس القصصي فينا وقصتك ممتعة شديد لانها تشرح الواقع بتفاصيلة المولمة فنحن نفضل الاشياء المعلبة والساهلة ولا نحب التعب والتلتلة والسهر والقراءه وهمومنا صغيرة ولا نجازف ونرضي بالقليل ، والكاتب الكبير الطيب صالح ( رحمة الله ) تتطرق لبعض الامور التي وردت بالقصة بصورة او باخري في كتابة موسم الهجرة للشمال .
ونحن شعوب العالم الثالث فينا الكثير الذي ينبغي ان يغير ( الرشوة - المحسوبية - الكسل - حب العلم - احترام الزمن - ...... الخ ) ومالم تتغير عقليتنا وسلوكنا في الحياه سوف نظل في حلقة مفرقة ثورة ( اكتوبر- مايو- يونيو - يوليو - اغسطس .....) والتغير يبدا مننا .
والنقارن بين شعوبنا والشعوب الاروبية والاسيوية مالفرق ( يحبون العلوم - يحترمون الزمن - لامحسوبية - لارشوة - لا للكسل - حرية الفكر والدين - التفاني في العمل - احترام المدراء والمسؤلين .... الخ ) اما نحن فالعكس تماما لذلك سوف نظل نعيد انفسنا كل ثورة واخري وكل قرن واخر ولا جديد تحت الشمس ياهو زمان وحسي .

الأخوان عوض , ياسر فيس
هناك قراءة أخري لتاريخنا مضمنة بالأجزاء التالية , جديرة بالنظر:

(3)
ورقة من اوراق دكتورة/ احلام حسب الرسول كتبتها فى مصحة للامراض النفسية والعصبية قبل مقتلها فى ظروف غامضة)
ليل المصحة هنا كئيب .. الاشجار التى تتحول الى مخلوقات شبحية فى الظلام .. السخرية منى ومن افكارى .. العاملة البسيطة التى تسرب اوراقى التى اكتبها الى الخارج .. ميرفت شقيقتى الوحيدة تخلت عنى .. لا زيارة واحدة منذ احتجازى , المسكينة تخاف على وظيفتها فى البنك .. جرحتنى تصريحاتها الاخيرة فى الصحف اليومية , نصل حاد من سكين لم تتخيل فى يوم من الايام ان يطعنك فى الظهر .اشجار المصحة عجوز وكئيبة اوراقها اصبحت بنية بدل ان تكون خضراء بفعل تراكم ذرات الغبار على مدى السنوات الطويلة .. قلت لواحد من الاطباء المعتوهين - الاشجار دى عيانة نفسيا .نظر لى وكانه اكتشف دليل مرضى - بالله ؟ .. ما عندك مشكلة نعالجها ليك طوالى .اشتاق الى اشجار الجوافة فى بيت ابى صول البوليس المتقاعد , كان يحب الجوافة ويعشقها , كان يتكلم مع اشجاره , يشتكى لها ويداعب اوراقها الخضراء الصحية .كم اشتاق ان اقف على عتبة بيتنا فى (ابوروف) انظر الى الناس واقول لهم فى سرى - مساكين .. انتو مسروقين وما جايبين خبر .مساكين .. كل من يحمل جواز سفر جمهورية السودان الديمقراطية هو مسكين بدرجة او باخرى .

(يتبع)

(4)
حكايات احلام حسب الرسول (احلام الصول)ا جلس فى عيادة (احلام تادروس) اتصفح عددا قديما من مجلة (حواء) المصرية .. كالعادة العيادة بسيطة وانيقة مثل صاحبتها .اول ما لفت نظرى فيها هو انها مسيحية .. لم اعرف قبطية قبلها .. اعجبنى الصليب الذهبى الصغير .. والتهذيب العالى , الانسانية التى تشع من العيون .. عرفنا بعد فترة من صداقتنا انها تنتمى الى اسرة غنية لديهم مصنع زجاج كبير .. ذات مرة شاهدتها تركب سيارة مرسيدس فارهة , نادتنى فى تهليل - ده بابا .. دكتور تادروس ميخائيل .. دى صحبتى يا بابا فى الجامعة واحدة من الاحلامات الحكيت ليك عنهم .اخبرتنى بعدها- ما بحب زول يعرف انى غنية .. عايزة اكون زيكم بدون فرق .- ابوك دكتور ؟ .- لا .. ما طبيب .. عندو دكتوراة فى الجولوجيا .. خلى التدريس فى جامعة الخرطوم واتفرغ للعمل الخاص .- عندك اخوان ؟ .- عندى اخت واحدة , طبيبة امراض نساء واخ اتوفى قبل ما ادخل الجامعة كان اسمو (حنا) .- وامك ؟ .- طبيبة اسنان .- ماشاء الله .. انتو اسرة راقية شديد .- لا .. عادى خالص , نحنا اسرة عادية جدا .متواضعة بشكل لا يصدق .. مثقفة - دى رواية فرنسية ؟ .- البؤساء بتاعت فيكتور هيجو .- بتعرفى فرنسى ؟ .- يعنى , شوية , شوية .اتذكر الايام التى ماتت فيها شقيقتها (ماريا) , انقلبت بها السيارة وماتت بنزيف حاد فى المخ .. كان عندى شغف ان اراها , وعدتنى اكثر من مرة ان نذهب لها فى العيادة - اقول ليك سر يا بت الصول ؟ .- سرك فى بير .- ماما ما بتحب مسلم يخش عندنا فى البيت .- ليه كده ؟ .- ما عارفة , هى ما بتحب السودان , وما بتحب نصاحب المسلمين .عندما ماتت (ماريا) تغيرت هى كثيرا - انا يا بنات نويت امتحان شهادة سودانية علمى .. واخش طب وامسك عيادة ماريا .(احلام السمحة) لا تحب الشخص الطموح - بالله عاينى الاقباط ديل جبارين كيف , ما عايزة تفك عيادة اختها . - ده اسمو وفاء وطموح . قبل سنة جاءت تزورنى فى الجامعة - عارفة , انتى الزولة الوحيدة الشجعتينى امتحن واخش طب .. ومتذكرة يوم زغردتى لى عشان نجحتا .- يا بت ده كان زمان .- فى حاجات ما بتتنسى لو مرت مليون سنة .لمحت نظرة الامتنان واطياف دموع قادمة فى العيون المسيحية الطيبة .. عرفت كم هى وحيدة وفى حوجة الى قلب قريب منها .. قررت ان ازورها بشكل منتظم كل اسبوع .. وها انا بعد سنة كاملة اجلس فى عيادتها .خرجت (احلام جلكنة) بجسدها الذى ترهل وخلفها كانت (احلام القبطية) وهما تضجان بالضحك - يا بت الصول شفتا قلة الادب بتاعت جلكنة .- حظك .- يا بنات ما تعملوا لى عقدة نفسية بلاش مسخرة فارغة معاكم .عنما ذهبت الى الحمام , تنهدت (احلام تادروس)- عندها ورم فى الرحم لازم نعمل عملية ازالة للورم وتحليل .- اتكلمتى معاها ؟ .- بعد برنامج بكرة عشان ما تدبرس . ونحن فى طريق العودة الى البيت , قالت (جلكنة) - احتمال يكون عندى المرض الكعب ؟ .- المرض الكعب ده كمان شنو ؟ .- السرطان . - لا حول ولا قوة .. انتى بقيتى دكتورة واحنا ما عارفين ؟ .- لا بالجد شايفة وش بت تادروس اتغير وهى قاعدة تكشف على . - يا بت مافى سرطان بتعرف بالكشف كده ساكت لازم الزول يعمل تحليل وهيصة طويلة .- انا الحاسة السادسة عندى ما بتغلط .- عليك الله بطلى هبالة وجرسة .وضعت شريط (زيدان ابراهيم) على الة تسجيل العربة .. اندلع الصوت السكران يترنح مع نغمات العود .. اغمضت (جلكنة) عيناها واراحت راسها على حافة المقعد - حليلك يا زيدان وحليل ايامنا .كنت اقود سيارتى وانظر لها بطرف عينى .. وجهها الرجولى الاسود كان يلمع مع اضواء السيارات القادمة فى الاتجاه المعاكس .. قلت فى سرى - ربنا معاك يا احلام .. ربنا معاك .

(5)
هل نستحق هذا البلد ؟ .. اعنى نحن , هل نستحق فعلا هذا البلد ؟ .. كثيرا ما راودنى هذا السؤال وانا اقود عربتى الخاصة , وانا استعد للنوم , وانا اقضى حاجتى فى الحمام .. يظل السؤال يلسع فى الحلق والقلب والعقل .لو كانت المليون ميل مربع هذه ومعها الاراضى الخصبة والثروة الحيوانية والمائية الضخمة .. والمعادن وغيرها من خيرات باطن الارض .. هل لو كانت فى يد شعب اخر غيرنا نحن , هل حال السودان سيكون كما هو عليه اليوم ؟ . انظر للبلاهة التى ترقد فى عيون الناس .. البصق على ارضية الحافلات العامة والمطاعم والطرق العامة .. اتحسر من اكياس النايلون التى تدمر البيئة وهى تتطاير مع الهواء الملوث بذرات الغبار الكثيفة .لو كانت امكانية السودان فى يد الشعب اليابانى ؟ .. لو كانت فى يد الشعب الصينى ؟.. لو كانت فى يد واحد من شعوب النمور الاسيوية ؟ .. هل كان السودان سيكون كما هو اليوم .قلت لعاملة النظافة وهى تنحنى لغسل ارضية لا تنظف - نحنا ما بنستحق السودان . قالت وهى منحنية - انا ما بتكلم فى السياسة . دكتور/ احلام حسب الرسول عابدين .


(7)حوش (ابوروف) .. اشجار الجوافة الكبيرة العجوز .. النوم والنظر الى النجوم فى سماء (امدرمان) .. كأن الزمن لم يجرى .. كأن السنوات لم تمضى .. اصبحنا فى حقبة الكهولة الحقيرة , نقاوم بالصبغة اثار شعر ابيض عنيد .. تجاعيد الوجه .. البسمة التى ما عادت مثل ايام زمان , ولا حتى الحزن .. زمان كان الحزن له معنى , الان اصبح ثقيلا جافا يترك فى القلب احساسا بالوجع .- نومتى ؟ .- صاحية .. الخميس ده بحب اسهر وافكر .- تفكرى فى شنو ؟ .- فى الدنيا .- زعلانة انك ما اتزوجتى ؟ .- خلاص نسيت الموضوع ده , فتحتا ليهو .. عارفة انا مش هسع عمرى واحد واربعين سنة , لكن لسه بمارس العادة السرية .- يجازى محنك يا بت الصول .- بالجد والله , يعنى اعمل شنو .. مرات بخجل من نفسى واقول الطالبات عندى ما بيعملوا كده .. دايرة اسأل احلام تادروس لو العادة السرية مضرة بالصحة .- يا زولة ما تشتغلى ب زول , اعملى البريحك , غايتو اخير ليك من مسخرة بنات الخرطوم ,عارفة يا بت الصول انا ايام الجامعة حملتا بالحرام وعملتا عملية اجهاض .. عارفة كده ولا ما عارفة ؟ .- يا بت انتى مسطولة ولا شنو ؟ .- خجلتا اكلمك فى الوقت داك .. انتى زولة جنك قرأية وكتب وما عندك شغلة مع الشربكة والقذارة البتحصل بين الناس .- جلكنة عليك الله عندى صداع وما دايرة اعرف اى حاجة .- تانى يوم من زواجنا زوجى كان سكران , قال لى انتى شينة ومافيك ريحة الانوثة .. قلتا ليهو الشنا دى عارفها لكن ريحة الانوثة دى جديدة لنج .- جلكنة اسكتى ما تطلعى دينى . - معقول يكون عندى سرطان رحم ؟ .. ده يكون عقاب من ربنا .. مش كده . - اسمعى يا جلكنة الساعة واحدة ونص صباحا .. نومى الله يرضى عليك .- تصبحى على خير .. لكن لو عندى سرطان بناتى ديل يمشوا وين .

المثقف السودانى .. هو من ارسله اهله وناسه لشراء الرخاء والرفاهية والامن والاستقرار لهم من السوق المجاور .. فخرج ولم يعد .. هكذا بكل بساطة , (ضرب القروش فى جيبه) .. هذا هو المثقف السودانى , خائن وجبان وابن كلب , يحب ان يحشر كلمات انجليزية وفرنسية بين اضراسه اثناء الحديث لكى نقتنع انه ابن كلب خطير واننا يجب ان نعطيه النقود ليذهب لشراء الرخاء ومعاقبة الذين (شردوا) بقروش الشعب .. نصدقه , ويذهب هو وينضم لنخبة (الشاردين) بقروشنا فى كروشهم .دائرة لعينة لا تنتهى .فساد ضرب فى النخبة حتى الجذور .المثقف السودانى مثل قرد (دارون) يناطح حتى يمشى على قدمين وينفرد بالنشؤ والارتقاء بعيدا عن الدهماء .فساد وحقير .صاحب توكيل منزوع الصلاحية .حقير .. حقير .. حقير .د/ احلام حسب الرسول عابدين .

ورقة من اوراق دكتورة/ احلام حسب الرسول كتبتها فى مصحة للامراض النفسية والعصبية قبل مقتلهافى ظروف غامضة)
اسهال من الاغانى الوطنية .. اسهال لزج كريه الرائحة .. اسهال يخرج من اجهزة المذياع والتلفاز .. اسهال عن الوطن الذى هو (قطع شك) افضل وطن فى الدنيا .. عن الشعب الافضل ويا سبحان الله من بقية مخلوقات الله التى تمشى على قدمين .اكره الاغانى الوطنية .. بضاعة مغشوشة .. اقول لاصدقائى - الاغانى دى تعبير عن العجز .. تعويض لمركب نقص حاد .فى دول العالم المتحضر لا توجد مثل هذه السخافات .. لا يوجد سوى النشيد الوطنى .نحن نمارس الافضلية عبر الاشعار والموسيقى .. نضحك على انفسنا او يضحكون علينا لا فرق .. الافضلية هى فى معيار فرص العمل والصحة واحترام حقوق الانسان والعبادة والمساهمة فى الثورة العلمية والتقنية العالمية .اما تقديم وجبة الاغانى الوطنية بهذا الشكل السمج وبهذا الالحاح العبيط فهو يعنى الافلاس التام والكامل .اسهال الاغانى الوطنية هذا يسبب القرف .. فقط لا غير .ارحمونا قليلا .دكتورة/ احلام حسب الرسول عابدين .

ورقة من اوراق دكتورة/ احلام حسب الرسول كتبتها فى مصحة للامراض النفسية والعصبية قبل مقتلها فى ظروف غامضة)
كررى) هى مشكلتى الشخصية .. احدق جيدا فيما قيل حولها , انقب فى دار الوثائق وفى المكتبات القديمة .اى قيادة عسكرية رشيدة تعرف متى يجب ان تستسلم ومتى يجب ان تتراجع .. لا يمكن ان تدخل معركة تعرف انها ستسحق عظامك .. هذه ليست بطولة , هذا غباء متناهى .اليابان خلال الحرب الكونية الثانية , اختارت الاستسلام , كانت خطوة ذكية للغاية , (ركوب الراس) كان سيعنى مواصلة القاء القنابل الذرية عليها .قرار الحرب ليس قرار شخصى حتى يتم اعلانه بشعارات الاسد الذى يأكل النار والفارس (الضكر) (اخو البنات) .. لا يمكن ان يتم وصف ما حدث فى (كررى) الا على ان (التعايشى) قد قدم ارواح برئية دون اى داعى للمحرقة .المساكين , حتى الية عمل (المدفع) لم يكن لديهم ادنى فكرة عنها , كانوا يعتقدون ان (حشر) الراس فى الفوهة المعدنية المستديرة كافى لايقاف (الدانة) من الانطلاق .لو كان الدراويش قد انتصروا فى تلك المعركة ؟ اى دولة ظلامية كانت ستعشعش فينا .(يونس ود الدكيم) مات وهو لم يتذوق (اللحم الابيض) للملكة البريطانية .- ان اسلمتى امنتى شرنا وزوجناك الامير يونس ود الدكيم- .اتخيل الملكة البريطانية وهى تخضع لعملية (طهور) اجبارية .. وهى (تعوس الكسرة) وتثرثر مع الجارات (الامدرمانيات) فى انتظار عودة زوجها الغالى (ود الدكيم) المشغول بنشر تعاليم الاسلام فى ارجاء المعمورة .(كررى) هى مشكلتى الشخصية والاكاديمية .دكتورة/ احلام حسب الرسول عابدين .

حوار صحيفة الشرق الاوسط مع دكتورة/ احلام حسب الرسول 1/2
:مراسل الصحيفة استطاع اجتياز اسوار مصحة للامراض النفسية فى الخرطوم واجراء حوار طويل مع وجه سودانى اثار ضجة كبيرة فى الاونة الاخيرة .. اللقاء مع الدكتورة/ احلام حسب الرسول وهى استاذة تاريخ فى واحدة من الجامعات السودانية , وهى نفسها التى اعلنت عن تشكيل تنظيم سياسى جديد يطالب بعودة الاستعمار الى بلدها السودان , السلطات السودانية اودعتها فى مصحة للامراض النفسية والعصبية بعد اسابيع قليلة من اعلنها عن حركتها السياسية التى اطلقت عليها اسم حركة (حمد) وهى اختصار ل حركة المطالبة بانتداب دولىالى مضابط هذا الحوار الجرىء .
* تطالبين يا دكتورة بعودة الاستعمار الى بلادك هل هذا حديث انسان عاقل ؟ .
- وهل ما حدث فى هذا البلد منذ الاستقلال حتى الان هو من فعل انسان عاقل ؟ .. عندما اطالب بوضع بلدى تحت الانتداب الدولى فهذا يعنى خبرات اجنبية تفيد وتستفيد وتصبح تحت اشراف ورقابة محاسبية دولية .. تضع هى الدستور والقوانيين وتشرف على توفير فرص العمل والصحة والتعليم والبنيات التحتية .. اقول لك لا فرق بين حزب الامة والمؤتمر الوطنى والشعبى والاتحادى و17 نوفمبر و25 مايو و30 يونيو .. كلهم واحد وكلهم استفادوا من خيرات هذا الوطن .. يسكنون فى ارقى مناطق الخرطوم وابنائهم تعلموا فى ارقى جامعات الخارج .. لديهم مزارع واراضى وحسابات فى بنوك الخارج .. من اين ؟ .. وبعضهم عاطل تماما عن العمل !!! من اين يصرف فلان وعلان , ما هو مصدر دخلهم .. تجد عندنا الزعيم السياسى يركب عربة ثمنها ربع مليون دولار وهو لم يعمل فى حياته عمل معروف للجميع .. يسافر الزعماء عندنا الى لندن وباريس وواشنطن كل شهر وشهرين من اين ؟ .. انا استاذة جامعية منذ عشر سنوات وانا اعمل واجد صعوبة فى توفير ثمن رحلة علاجية الى القاهرة .. والدى عمل اكثر من اربعين عاما ولم يستطع شراء بيت الا فى حى شعبى .هذه العصابة يجب ان ترحل فورا .. كلهم , كلهم دون استثناء .. وضع السودان تحت الادارة الاجنبية هو الحل الوحيد لوقف هذا النهب .. لهذا قالوا ان هذه الدكتورة مجنونة .* عفوا دكتورة هناك اتهام اخر بالعمالة , وسؤال لماذا ظهرت هذه الدكتورة هكذا فجأة ولم تتحدث غير الان .. يعنى انتى لم يكن لديك اى نشاط سياسى معروف وظهرتى دون اى مقدمات وبشكل مثير للجدل .- صحيح .. لكننى اتابع بدقة ما يدور ومنذ زمن بعيد بحكم اهتمامى بالتوثيق لما حدث ويحدث .. وقد حان اوان الكلام .. اما حكاية العمالة والجنون , فهى تدل على رعب هؤلاء من الفكرة .. صدقنى حركة (حمد) امتدت فى الجامعات والمعاهد العليا بصورة ادهشتنى انا شخصيا .. شعرت العصابة بخطورة ما اطرح ولذلك كان هذا الهجوم ووضعى فى مصحة للامراض النفسية واشعر انهم يريدون تصفيتى جسديا .. ما هو مفهوم العمالة ؟ .. هم من باع البلد سرا ودفنوا فيها نفايات ذرية .. انا خرجت للعلن .. يا دول العالم المتقدم ويا اصحاب الاستثمارات ويا شركات العولمة الضخمة نحن نريد ان نأكل ونشرب ونعيش فى سلام وان يتم احترام ادميتنا , اذا كنتم تستطيعون ذلك تعالوا واحكمونا فى ظل عدم فساد وعدم تلويث للبيئة .. نريد للراسمالية الحقيقية النظيفة ان تاتى وليس تلك الفاسدة . * والسيادة الوطنية يا دكتورة ؟ .- ماذا فعلت لنا هذه السيادة يا محترم ؟ هناك كلمات فى القواميس اخذت قدسية وبريق وطهارة ليست فيها مثل استقلال و سيادة وطنية وقطعة قماش يطلقون عليها اسم (علم) .. كل هذا استهبال فاضح وواضح .درسنا تاريخ مزور وزائف .. شخصيات فاشلة اصبحت فى التاريخ شخصيات عظيمة وصناع استقلال احكى لك حكاية طريفة , ذات مرة وانا استعد لتحضير رسالة الماجستير حاولت الكتابة عن واقعة اغتيال الامام (محمد احمد المهدى) على يد خليفته (عبدالله التعايشى) .. هناك اقوال حول هذا الموضوع وحول تسميم (المهدى) بعد ستة اشهر من سقوط الخرطوم .. لن تتخيل حجم المضايقات والتهديد بعدم اجازة الرسالة , عرفت عندها انهم يريدون الاحتفاظ بهذا التاريخ المزور من اجل حاضر هو ايضا زائف وغير حقيقى .نحن فى السودان نريد حياة رفاهية ورخاء .. نريد مثل مخاليق الله مترو انفاق وسكك حديدية على طراز رفيع وتصنيع غير ملوث للبيئة ومواصلات عامة شبه مجانية ومستشفيات انسانية حديثة فى متناول الجميع .. اما حكاية السيادة الوطنية والقرار الوطنى فهى من اجل ان يظل من كان ينهب اجداده هذه البلد منذ 1956 ان يواصل هو وابنائه واحفاده نهبها الى قيام الساعة
.* عودة الاستعمار يا دكتورة التاريخ هو الحل ؟
.- لو كان لديك اقتراح او حل اخر انا على استعداد لسماعه .. قلت لك هناك كلمات اخذت عكس معناها واحدة منها كلمة استعمار .. ماذا قدم لنا الانجليز ؟ هم نقلونا الى مشارف القرن العشرين .. قدموا لنا سكك حديد .. قدموا لنا تعليم مدنى راقى .. قدموا لنا افضل جهاز خدمة مدنية فى افريقيا .. ازدهرت فى ظلهم المشاريع الزراعية وفنون الغناء والشعر والصحافة الورقية .. عرفت الاسواق معنى النظام والتسعيرة .. عرف السودانى معنى احترام حقوق الحيوان .. الاستعمار هو الذى خلق السودان الحديث .

[عوض خضر]

والله ياياسر خليل الاوراق دي سببت لكل من يقرأها ربكه غريبه لكنها علي كل حال ربكه في اتجاه تصحيح بعض الرؤي

عوض خضر تبقي حقيقة ان تاريخ السودان خطته أياد غير سودانية..نعوم شقير وسلاطين باشا
الذي أكمل كتابه المرجع في تاريخ السودان "السيف والنار" قبل لأن يزور السودان, سماعا ونقلا
عن الجنود المصريين بالخدمة في السودان...دور السودانيين فقط كمحققين للكتابات التاريخية,
أمثال البروف أبو سليم...
نواصل........
حكايات احلام الجاك (احلام جلكنة)
الرحلة الى الخرطوم هذه المرة لها طعم مختلف .. سنوات كثيرة من البعد والابتعاد .. ذكريات الحنينة السكرة .. الحب الاول والاخير .. الحمل سفاحا والاجهاض فى بيت (داية) منحرفة فى (الموردة) .. اشجار الجوافة الكبيرة والكثيرة فى بيت (احلام الصول) فى (ابوروف) وامها الحاجة (زينب) صاحبة اجمل كباية شاى باللبن فى العالم .. الخرطوم اتنين , اول تجربة جنس حقيقى ومكان فض الغشاء .. (منعم) ابن القاضى الشهير الذى زرع حيوانه المنوى فى رحمى وصرخ فى وجهى - امشى اطلعى بره يا خادم .الخرطوم اتنين .. معنى الاهانة العرقية والطبقية والانسانية .ايام وشهور وسنين .الصورة التى احملها معى ستكون مفأجاة للجميع .. بعد اخر امتحان , ذهبنا الى ستديو مصوراتى اريترى عجوز , كلنا نحن الستة (احلامات) .. جلسنا لالتقاط الصورة .. كنت انا فى الوسط وعلى يمينى جلست (احلام حسب الرسول) وعلى يسارى (احلام الطيب) وهى تحمل زهورا بلاستيكية صفراء غبية .. خلفنا وقفت اجملنا واجمل من درست فى جامعة القاهرة فرع الخرطوم طيلة تاريخها الطويل , الدلوعة (احلام مختار) او (احلام السمحة) التى كان الطلبة ياتون اليها من جامعة الخرطوم والكليات التكنولوجية للفرجة على الجمال الالهى .. بجوارها وقفت (احلام الحاج) الكادر الخطابى لتنظيم (جبهة كفاح الطلبة) هى اخطر انسانة عرفتها تتحدث فى السياسة وهى التى وقفت الى جوارى فى عملية الاجهاض وحمتنى من الفضيحة .. على يسار الواقفين كانت (احلام تادروس) القبطية ذات الوجه الحزين , اكثرنا ثراء وتهذيبا وثقافة , كان الصليب الذهبى يتدلى من العنق ناصع البياض فى تحدى مثير .فى لحظة التقاط الصورة مرت قطة ضخمة من بين ساقى (احلام السمحة) , صرخت وتعلقت بكتف (احلام البعثية) .. دخلنا مع الاريترى العجوز فى نقاش صاخب وطلبنا باعادة التصوير , وافق وجاء الينا بحجة ترتيب الوقفة من جديد , وقام بالضغط على مؤخرة (احلام السمحة) بشكل ظاهر ومقصود .. ضربته بعنف على خده الايمن وحدث هرج ومرج .. خرجنا ونحن نسب ونسخط , وانا اضحك من الموقف - غايتو اريترى ما عندو ادب .. واعصابو بايظة .رجعت اليه بعد يومين , طلبت الصور , اعطانى ستة نسخ دون ان ينظر لى ورفض ان يتسلم منى اى نقود وهو يعتذر بشكل اوجعنى , عرفت عندها معنى ان تكون غريب فى بلد الغير .وبعد كل هذه السنوات اعود وانا احمل لكل واحدة منهن نسختها , كتبت على ظهر كل صورة بخط رقيق :1988 .. ستديو انوار المدينة .. عصابة الاحلامات .عندما اقتربت (الركشة) من بيت (احلام الصول) قلت لنفسى بصوتا عالى - يا ربى بتكون رجعت من الجامعة ؟ .رد الطفل سائق (الركشة) فى استغراب - نعم يا حاجة ؟ .- لا ما معاك يا ولدى .عندما طرقت الباب .. كانت اشجار الجوافة الكبيرة والكثيرة تنظر لى فى حب ومعرفة .