سيد جرسة .....

[عبده مصطفي إبراهيم]

قصص سيد جرسة ما بتنتهي وهنا استعرض بعضها ...منقولة مع تغير النص للضرورة
الأسماء الموجودة لا علاقة لها بالواقع
سيد جرسه
سريع الغضب....سليط اللسان كلمتو ما بتنهبش ..الكل بيتحاشاه وخصوصا في رمضان..
مرتو فاطنة..مرا بالها طويل وبتريد رمضان جدا بس مجهجها راجلا والاحراج اللي بيعملو ليها مع الناس طوول الشهر..
اخر يوم في شعبان..من الصباح اي زول يسألو ..يهب فيه ويندمو علي فتحت خشمو معاه
واحد من الجيران :سيد رمضان قالو بكرة؟؟
سيد : يسد نيتك ماعارف طير من وشي كدا ولا كدا
يدخل البيت وهو من الزهج داير يطق.
فاطنة :ياراجل مالك زهجان كدا؟؟
سيد: ترجي المسيح الدجال ..ماعارف..
فاطنة: طيب.... سمعت رمضان قالو متين؟؟
سيد بنظرة كلها شلاليت... الله يطولك يارووووح :العرفني بيهو شنو!! ان شاء الله مايجي..!!
احمد ولده ..جرسه طالع لي ابوه..
مابيصوم خاااالص ومكجن رمضان
احمد يجي قاطع جنبهم وهو زهجان نفس زهجت ابووه
فاطنة: هاا جنا ها رمضان سبتو ولا لسه؟؟
احمد: اي سبتوه الله يكتلهم..ماعارفين السنه دي حاره
فاطنة :يا جنا هم مالهم ومال الحر والبرد دا امر من ربنا..متى ما اراد نصوم نصوم
وبعدين انت مالك ...ناوي تصوم.
احمد يطنطن: أصوم في الحر دا صومو انتو....ويعاين في موبايلو..ويبتسم
جاتو رسالة...ويخرج بسرعة
فاطنة: الله يهديك ياولدي
سيد جرسة :ياوليه قومي جهزي العشاء انا ماشي الدكان اجيب الحاجات الناقصه دايرين شنو؟؟
فاطنة: ياراجل العشاء جاهز..!!
سيد جرسة: عشاء شنو الجاهز..يجهزوك للدفن ..يا مرا دا مابكفي..رمضاااان بكرة..
يمد قدومو مع بكرة
ويمرق وصوت الباب قرب يشيلو معاهو
فاطنة تطنطن :الجن بداوا....وتتلفت لي بيتها سلمى: يااا بت اخوك ايمن وينو؟؟
سلمى: لسه ماجاء يمه..!!
فاطنة : سجمي ماجاء من وين؟؟اخوك من الصباح مافي..!!
سلمى: مشى قال مع اصحابو يخمو الرماد علشان رمضان
فاطنة: رماد شنو البخموه ماعارفين دا غلط
سلمى:والله يايمة ماعارفه بعد يجي اسعلي براك
فاطنة:اجي يا خواتي البيت دا كلو من يجي رمضان يبقوا ماعارفين حاجة
سيد جرسه من طلع من بيتو يشاكل في الناس لما وصل الدكان خم الحاجات وجاء
راجع البيت اتعشى اكل وشرب لما غلبو النفس
فاطنة:ياراجل وكتين مضايق كدي قوم أتمشي شوية بالحوش وتعال نوم..
فعلا قام جكه بالحوش وحس روحو اتفش شوية جاء رقد
كل دقيقتين يقوم يشوف الساعه كم علشان السحور مايفوتو..

ونواصل

[عبده مصطفي إبراهيم]

ملخص اليوم الأول:

الساعه 7 وسيد ماصحي من النوم..فاطنة جات تنضف الغرفة لقتو نايم
فاطنة:سجمي ياراجل ها..قوم علي حيلك الشغل ..بتتاخر ..
سيد:ياولية قولي بسم الله الليله اول يوم في رمضان شغل شنو البمشي ليه دا؟؟
فاطنة:ياراجل ها ... بكره ارفدوك تقعد تباري في الضلله قوم علي حيلك
سيد: رفد شنو يا وليه استهدي بالله... كدي جيبي التلفون دا هنا النضرب للمدير
ناولتو التلفون ولوت خشمو بتعجب..وهو بين صاحي ونايم دق الرقم وانتظر..
ترررن ..ترررن..تررن.
سيد: الو محمد
محمد :الو عليكم السلام..منو معاي
سيد:معاك سيد محمد سيد ..
محمد: سيد.!! رمضان كريم ياراجل الرقم غريب في البيت انت ولا شنو؟؟ نعل ما في عوجة
سيد: الله اكرم..اي اي في البيت..
محمد : خير مالك ماجيت الشغل..؟؟
سيد: انت عارف انا عندي القرحه وليها كم يوم قايمه علي كمان السكري مرتفع شوية
قلت اخد اجازة كم يوم لما ابقي كويس..
فاطنة تعاين ليه بخلعه....وتوسوس ليه :ياراجل اختشي دا رمضان بطل كضبك المسيخ دا!!
سيد يحمر ليها ويأشر ليها اصبري لي النكمل كلامي مع الراجل
محمد: خلاص ياسيد بعمل ليك اجازة مرضية..
سيد: الله يخليك ....ان شاء الله نسد ليك في الافراح....
يقفل السماعه ويقبل علي فاطنة..ياولية اتي انا كم مرة بكلمك اقول ليك وكتين اكون بتكلم في التلفون
ماتقاطعيني يقطع رقبتك يافقر
فاطنة: نان ياسيد الكضب دا حبلو قصيييييييييير .....ورمضان دا ربنا قال من صام رمضان ايمانا
واحتسابا غفر له ماتقدم من ذنبه..انت ماداير مغفرة ربنا..بطل كضب في رمضان علي الاقل..
يحس سيد بالخوف من كلامها ويطردها من الغرفة..
سيد: ياولية طيري من وشي انا برااااي عطشان وجعان..اللهم اني صايم
ويغتي وشو ويتكرفس تاااني وينوووم ويشخر..وفاطنة تحسبن عليه وتمشي..
الساعه 3 قام علي حيلو مخلوووع وريقو نااشف من العطش
سيد يكورك: فاطنة.....ياااولية..يااااا سجم..
فاطنة في المطبخ تجهز في حاجات الفطور سمعتو بيكورك..في سرها الله يستر من اليوم دا الليله ..
الراجل دا من يبدا رمضان يكشف حالنا في الحلة بالطريقة دي..يا الله تعقلو وتهديه..
فاطنة:هوووي ....اي جااية ..وتجي جاارية جرري ماالك ياراجل؟؟
سيد:الساعه كم؟؟ ورمضان باقي لي كم
فاطنة :الساعه ..3 قول بس الله
سيد: تلاته شنو ياوليه خرفانه اتي..قولي 6

فاطنة :تلااته قلت ليك..وكدي قوووم عل حيلك صلي ليك صلاتن تنفعك الصبح والضهر ماصليتن ..
بعدا العصر اذن..صيام برا صلاة دا صيام شنو هو؟؟
سيد: بكره رمضان ومكجنوعشان نقتك الكتيرة ووعظك المابتفتري منو دا..
فاطنة:ياراجل بدون صلاة صيامك دا رايح عليك جوع وعطش سااااااي..
سيد:اوووووووف...خلاص اقفلي قدومك دا الواحد مايسعلك سعال تنفجري فيه
قام صلي وقال ليها..يافاطنة انا مااشي انوم..وصحيني مع الاذان..
قبل الاذان كان مات ابوي ماتصحيني خلي اليوم الطويل دا الانتهي علي خير..
قبل الاذان بربع ساعه فاطنة صحتو.قام علي طول قعد في الفرشه منتظر الاذان..
الاذان قبل ما يأذن هو كب العصير في كبايتو..لما الاذان بدأ هو ماصدق والعصير خلص
قبل المؤذن مايكبر سمح..كباية وراء كباية لما نفسو اتقبض تااني
ومن هناك علي السرير
فاطنة جابت القهوة لقت سيد ناايم في السرير يشخر..
فاطنة: لا حول ولا قوة الا بالله..ياا رب لطفك..
سيد سمعها وقام مخلووووع :مالك ياولية المات منو؟؟
فاطنة: نبري ياخوي موت شنو؟؟الجاب سيرة الموت شنو هسي؟؟
سيد:المرة المطرطشة دي خلعتيني ..من النوم سامعك بتحوقلي قلت اكيد زول مات..
فاطنة:بحوقل في حالك ات دا
حالك في الصيام برا صلاة ولا تعبد..شهر رمضان دا للعبادات ما للاكل والنووم..
..وكدي بالمرة قوم وشوف اولادك ديل طفشو وين كمان من الضهر قامو منالنوم مرقو ماجو راجعين البيت تاني ..
سيد:طفشو منك اتي دي,,مابتصدقي رمضان يجي وتستعدي بري نقنق نق نق باعوضة بس..
فاطنة:ياراجل عقاب حديثك المسيخ دا لمو عليك..رمضان دا فارضاه عليكم انا؟؟
كدي قوم استغفر ربك وصلي المغرب وارحكا معانا الجامع نصلي التراويح..
خلي ربنا يرحمنا ويقبل صيامنا ...