جرسة رمضان ...

[عبده مصطفي إبراهيم]

السنة دي الناس هنا متجرسة من طول اليوم ..أمساك قبل الساعة تلاتة وإفطار الساعة تسعة..وقربو يفتو بالصيام مع اقرب دولة مسلمة
اليوم فيها معقول شوية...
شهر تمانية دايما ساخن شوية..لكن أمس من بالليل..جاب ليهو حر بعطش
شربت الكباية الاولي...ما نفع اديتا التانية بعد شوية تاني عطشت
قلت هوي .... االسنة..دا جا مشاتر
المهم شوية كدا الاذان أذن..خلاص اليوم دخل
أخدت لي نومه ... أول مره أصحا بي وجع راس مع إنو ما بشرب اي مكيف
قالو الواطة برة نار
قلت كيف الكلام دا...
تاوقت لقيت الشجر صورة بس ..ولا حركة...الليلة كتلنا
الساعة عشرة ما جات...درجة الحرارة فوق للعشرين...دي كتيرة هنا
لكن هبشت في النت قالو درجة الحرارة هناك فوق للأربعين
صميت خشمي...وقلت الله يكون في العون
...
الذول قالو ليهو رمضان السنة دي جاي في حر شديد
قال حبابو لكن بنجهجهو ليكم بالسفر
----
تصومو وتفطرو علي خير

الاخ عبده
تحية طيبه ورمضان كريم
طيب ديل انتو نحن نعمل شنو
واحد اخونا المهم من الحله
قال والله رمضان ده لو ما بقق الوضوء والله ما بنصام

[عبده مصطفي إبراهيم]

الأستاذ الطيب تصوم وتفطر علي خير
...
الناس كلها مقتنعة إنو رمضان هنا ساهل..جو أوربي...وشمس باردة
ولكن دا ما عندو علاقة بالواقع
الجوع حاصل
العطش حاصل
اليوم طويل وملولو...يكفي اننا نمسك في ذمن واحد ونفطر بعدكم باربعة ساعات
غايتو اليوم الاول تمنيناهو
قلت لي باقي كم

[عبده مصطفي إبراهيم]

نسيت اجدع ليك النكتة دي
رباطابيه مشت المستشفى لعلاج بتها الصغيرة وهى صايمه وفي الرجعه بتها قالت ليها يمه شيليني امها قالت يابت انا صايمه مابقدر اشيلك فردت بتها انا قلت ليك شيليني ما قلت ليك ضوقينى .

[محمد ابراهيم احمد ابراهيم]

خلى الجرسه ياعبدو لسه فات يوم واحد
ربنا يتقبل منا ومنكم صيام رمضان

[عارف عبد الرحمن]

تحياتي للجميع ورمضان كريم وتصوموا وتفطروا علي خير وتقبل الله من ومنكم صالح الاعمال .. كان السلف يتخيرون الايام الصعبة للصيام ــ صيام التطوع ــ فما بالك برمضان لان الاجرر فيه مضاعف .. ونحن الزمن دا مع المكيفات والسهر وكسير الزمن برضو متجرسين .. أكتب الآن ورزاز من المطر وريحة دعاش ترد الروح ونحن قادمون من صلاة الظهر .. رغم اني كنت اصوم في مكة وما ادراك ما مكة وطبعاً لا توجد مقارنة من ناحية القدسية والمكانة الدينية .. بس رمضان هنا في السودان ليهو طعم تاني .. بجد الواحد خفيف زي الريشة ولا تسعه الدنيا من الحبور والسعادة التي يحسها .. تعال جرب الصوم هنا .. تقوم تجي وتنقلب الاجواء ؟ بس انت عارف أنو التغيير الذي يعتري الانسان عند تبدل الاوضاع ومن المؤكد في البداية الصوم بكون فيهو تبدلات .. بس الجو هنا تاني ..

واحد قابل حلفاوي في رمضان قال ليهو رمضان سخن الحلفاوي قال ليهو ما من مصلحتو

اول حاجة رمضان كريم وتصوموا وتفطروا على خير واعاننا الله واياكم على صيامه وقيامه على الوجه الذي يرضيه عنا....
تاني حاجة كان ناس بلد السقط بتجرسوا جنس الجرسةدي يبقى ناس هنا معذورين !! رغم انوا الجو عندنا ماحااااار شدييييد لدرجة انوالناس تتجرس لكن من الصبااااح بتلقى اي زول صاري وجهه وحيلوا ميت رغم انو لافي جوع ولاعطش لكن الحكاية اظنها حرقان روح سااااي....
‏.......................................
واحد جرسة اتعشى وجاب كورةالرقاق باللبن حقت السحور ختاها جنبه ونام حس بكركبة السحور قام مخلوع لقى الكديسة شربت سحوره وقلبت الكورة ورقدت جنبها وقال ليها والله بكرة كان تصومي انتي

الاخوة والاخوات الاعزاء مبروك عليكم الشهر الكريم وجعلنا الله جميعا من عتقاء النار 000 بمناسبة جرسة رمضان قالوا الرباطابى الجماعة دخلوا عليهو فى نهار رمضان لقهو خاتى قدامو صينية قدر الضربة محدقات
وام فتفت وشطوط ودكوة وشية قالو لبهو يازول دا شنو دا مبتخل وعينك عينك كمان 00 قال ليهم ياخونا ما تفهمونى غلط انا صمت لى ايام فى الفطر بقضي فيها 00

[عبده مصطفي إبراهيم]

صقط شنو يا وفاء ... من غيرالمعتاد .. جاتنا سموم.. اظنها رايحة منكم
"محمد معانا ما تغشانا"
واحد هنا صحا مرتو قال ليها قوم سوي لينا السحور
قالت ليهو اجي يا راجل جنيت سحور شنو وانت ما صايم
قال ليها خلاص سويتينا كفار...لا صيام ولا سحور