فطيس المشاكل والحلول - العنوسة

في جلسة من جلسات فطيس ضمت كل من الاساتذة : قاسم الشيخ ، ود جدة ، معتصم عبدالسلام ، الطيب مهدي ، عبدالخالق العوض ، واخرين كان محور الحديث عن بعض الاشياء ثم عرج المجلس علي موضوع العنوسة التي ضربت بناتنا في الاونة الاخيرة وقد اجمع الكل بدون استثناء ان هنالك مشكلة مستفحلة في فطيس ليس هنالك احصائيات دقيقة او غير دقيقة بتقول كم هم عدد الغير متزوجات في فطيس لكن بمسحة عامة هنالك كمية من الذين علي وشك البورة .

ثم اتينا للعقبة الكود ما الحل ؟
هنا تفرق القوم ايدي سبأ منهم من اثني علي تجربة الزواج باكثر من واحدة .
ومنهم من توجس من تجربة الزواج باخري .
ومنهم من اشار باعانة الراغبين بالزواج من الشباب .
ومنهم من قال ربنا يهون .
ومنهم من التزم الصمت .

فيا تري هل هنالك حل لهذا المشكلة في اعتقادكم .
ام ليس هنالك مشكلة علي الاطلاق .

الاخ ياسر
ام ساجده وام مجدل ما يسمعن
تفتكر الحل يكون شنو
اركز يا ياسر

[عبده مصطفي إبراهيم]

أولا التحية ... لهذا الجمع الكريم
وهم يحملون هموم البلد ويطرقون ابواب ... المشاكل من داخل البلد
موضوع العنوسة...بالرغم الحساسية التي تحيط به لطبيعة مجتمعنا الصغير
ولكن لا ينفصل عن مشكلة عامة ....
كنا نتمني أن يكون كاتب البوست اكثرا عمقا في جلب ما دار في الجلسه
بدلا من طرح المشكلة
كنا نتمني أن نعرف الأسباب بالتفصيل
ومتي بدأت المشكلة......لانو اخر زيارة لي 2010...كانت 8 يوم في فطيس حضرت فيها خمسة اعراس
وماهي الحلول الممكنة من وجهه نظرهم
ولماذا كان الجمع محدود..... وكان يمكن ان يتوسع ليشمل ... ناس واطين في الجمرة
................
ولنا عودة

ام ساجده وام مجدل ما يسمعن

الاستاذ : عليك جنس كبكبة ، غايتو كان سمعن بفركونا وبلايقونا
دا غير الكمش والمفاريك البتجيك طايرة .

لكن بيني وبينك كدا الموضوع دا مابستحق المجاسفة ؟

اخونا المدير :

ولكن لا ينفصل عن مشكلة عامة ....

بالتاكيد المشاكل الاقتصادية رمت بظلالها علي الحياة دا غير قلة المروة بتاعتنا قلت خالص خالص وبقينا نتشكا ( الكورعين البطن ،الضهر، وجع الراس ) .

اخر زيارة لي 2010...كانت 8 يوم في فطيس حضرت فيها خمسة اعراس

انت بخيت ساكت ، لو عملنا احصائية من الزمن داك لي هسي بكون الازوجوا لايتعدون الخمسة وحاول شوف الازوجوا في الفترة دي .

لماذا كان الجمع محدود..... وكان يمكن ان يتوسع ليشمل ... ناس واطين في الجمرة

اللمة دي غير مخطط لها جات بالصدفة والموضوع جاب الموضوع ، الواطين الجمرة كلنا البنات ديل ما اختي وبت عمي وبت خالي وبت الجيران .

علي اسوا الفروض دايرين نلفت النظر للمشكلة دا لو ماخرجنا منها بي حلول عملية .

ولنا عودة باذن الله

اخونا ياسر مهدى ياخى التحية ليك وانت تتحفنا بكل ماهو شيق وموضوعى والله موضوعك دا جد موضوع لايمكن تجاوزه والقفز عليه وبعدين ياخى جلسة فيها الجماعة ديل والله دى نقة تاريخية فاتتنا والواحد ليهو زمن محتاج لى حاجة
زى دى بعدين يابو ساجدة انا والله نظرتى لهذه القضية ومسبباتها والمشكل الرئيسى فيها هن النساء انفسهن ونحن معشر الرجال والله ماعندنا اى مانع من مسألة التعدد وكما يقول اخونا الصافى جعفر فى قلب كل رجل متزوج امراة اخرى
حتى قضية العدل نفسها هى بالمناسبة تعتمد على المراة اكثر من الرجل بمعنى ان المراة هى التى تجعل الرجل اما عادلا او ظالما من هنا انا ادعو جميع الاخوات الى تقديم الكتير من التنازلات واحتسابها عند الله والنظرة لهذه الدنيا
بانها نعيم زايل والتى تزوجت ورزقها الله بذرية من الابناء وعايشة الحياة الزوجية من حيث هى .. ينبغى ان لاتكون انانية وتفتح المجال لغيرها اذا اراد الزوج الزواج باخرى .... احد الاخوة اللذين تربطنى به علاقة اسرية حكى لى وهو
صادق انه فى مرة كان يمازح زوجته بمسالة الزواج من اخرى فقال لى ماكان منها الا قامت من جواره ثم حضرت وفى يدها كتاب الله فحلفت عليه قائلة وبكل جدية والله تسويها اكتلك... تتصوروا وهى بنت جامعية اليس مشكلتنا مجسدة
فى النساء الله المستعان

استاذنا يوسف :

ماقصدنا بهذة الاراء الاسفرية هو لفت الانتباه للذين فوق الثيرتي ( 30 ) والذين هم في امس الحوجة لهذة الحلول لو وجدت ومداخلتك بالتاكيد رشيقة وهيفاء ولذيذة وانا اقراء في القصة لمن وصلت لحدي قامت جابت كتاب القران قلت المراة دي عاقلة وحكيمة دايرة تحلفوا الا اقوم امش اعقد هسي تراها المراة دايرة تبعجوا .

شكيت محنكم يالنسوان مكنكشات في الراجل زي الحسكنيت

تحديد طريقه مراسم الزواج من كل النواحي كما في بعد قري السودان
وبرضو ما حا تتحل

لانو في اذهان كل الشباب العرس غالي وبس

السلام عليكم

انتو الناس ديل انشاء الله يجلسوا في الحرم بس كانوا اشوفوا ليهم حل للموضوع

اشجعوا بيو الشباب , من زمان والقاسم الشيخ قالها في كم جمعة والجماعة ما قصروا قالوا ليوا الله اقدرنا على واحدة مع الظروف دي

الموضوع محسوم بعد نرقد الفرضي علي كيفكم بس رأ سنا يشهم الهواء تشمو قدحا

أم محمد انشالله الفرضى بعد خرف لكنى صدقينى بعد الخرف بسويها واحسن ليك يسويها وانتى قاعدة تشوفى وتسمعى بعدين تعالى هنا انتى قبلى كدا ماعملتى ليك وكالة لتسهيل الزواج ونهالت عليك الطلبات والمواصفات بالميات
ونحن قلنا والله امحمد ولابلاش تجى هسع تمرقيها فى الفرضى اركزى وخليك مراة ست رجال ... كدى شوفيى لينا مراة اهم شى تكون مراة حربية من النوع الممكن يمشى الدهب يعنى مراة بحاتة بعدين ماتخافى من ام الليلتى لانها
قات لى انت عايز تعرس ليه ؟ قلت ليها الشى الحلو دايمن الواحد بحاول يكتر منو وانتو الحريم حلوين خصوصا الفطيسيات .. يقول الصادق الصدوق عليه افضل الصلاة والسلام حبب الى من دنياكم النساء والطيب وجعلت قرة عينى فى
الصلاة ...

انشاءالله الفرضي بعد خرف ليكم كلكم اخي يوسف لكن يا خووي لما سويت المكتب الرجع فيكم منو


قمتو شارديين

تقولي شنو تقولي منو خليك اخت رجال بعد الجماعة ديل اصدقوا الموضوع بكرة نسمع بيو وتظهر اللجنة

في الشاشة , كدي االنشوف والقنعان من روحو الارفع راسو