اها قول رجعنا

مجابده ومشاركة لي مشاعرنا المتارجحه بين بين الغربه والرجعه والوجعه اها قول رجعنا يعني تاني ممكن لو ممكن يعني ترجع قومة الصباح وفكيك للسوق والجزارة وزحمة الناس في اللحمة وامكن تلقي لحمة وامكن لا
وبعد داك تشوف اول زول ماشي علي الفريق يوصل معاهو الملاح عشان تشرب ليك شوية قهوة مع شله جم دكان عبد الله الترزي وفاطمه عبد الرحمن ومن هناك تعرف اخبار الصرف متين والمكتب جاب ملح ولا لسه والهلال والمريخ كورتم متين ولاانتهت كم ولا الفاز بالممتاز منو والعيان راقد منو في الحله عشان زيارتو دا ما الواجب وعرس فلان متين حددو.
يعني بعد زحمة السوق دي كلها ممكن لو كان ممكن يعني تمشي الحواشه تاني عشان تمسح وتزرع وتسقي وتشلخ وتشتت الملح وتزرع ليك كم سرابه كدا عنكوليب تشجعك وتكسر الروتين يعني تاني ممكن لو ممكن يعني يجوك حريم اللقيط وكان حواشتك ما قريبه ولا بكسيك ابزيق بوصلهم يعني قطنك ياهم اللتحته في الواطه ولازم تجيب ليهم العيش والطحنيه والموص عشان فكة الريق ولا كسرة مرة وتخش الجناين تشيل ليك طماطم حمرة حبنقره ولا شوية تبش وعجور سيدوه اصلو زارعو للغاشي والماشي ودي طبعا تجاوز لي خط الحرام والحلال عشان النفس والنفس طماعه والبادي اظلم .
يعني ممكن لو كان ممكن يعني الواحد بعد الحواشه ولحخمتها يرجع بعد الضحوة عشان يصل البيت يلاقي واحده تعمل ليه في الفطور وتانيه في الشاي وتالته في القهوة يعني ممكن بعد الوجبه الدسمه دي وكاس القهوه ممكن تمش تديها عشره عشرتين كوشتينه في اي ديوان لحدي الغدا بعد داك ممكن لو كان ممكن يعني يكون في كورة بين فريق الحسين وود ابراهيم ولا الصاروخ ولا النيران ولا تشكه تشكه تشكا او تشكه مشينا لي المحطه او تشكا وادينها سته او تشكا ولا تمرين كارب حق النادي تجهز ليهن من بدري وتتلبس يعني ممكن لو كانممكن بعد الكورة ولا التمرين تلحق حمام سريع وتجي بعد صلاة المغرب النادي مسلسلات -اخبار -فيديو- طرابيز كوشتينه وست-هارت-اربعتاشر -شطرنج -ضمنه ودي جمهورها خاص ومتعصب - طربيزه بينق بونق عامره وهاك يا هرج ومرج والسهره شنو ومع منو وشله قاعده بعيد تحت الشجر همس حالم ونقنقه وونسه دقاق وشله تانيه مع فيصل كوري وحسن حبيب جم رملة الفرن وشلة تالته طشت وفاتت جنوب جات راجعه وش الفجر ماشه تجهجهو هوييييييييييييي اها خليناهم ديل عشان ما تقولوا لي الا كان ديل اتو الله في .
يعني تاني ممكن لو كان ممكن يعني الطيب مدحت وشريف حسين وعماد سيد احمد وعبد المجيد خير الله يرجعوا يغنوا السمحه قالوا مرحله ولا اشوف القمري لابس التوب ولا يا نور العين يعني ممكن لو كان ممكن يعني الصادق حريش وعبد الخالق العوض ووسيله يرجعوا يمثلوا لينا في مسارح المدارس كلها وفي ليالي النادي الثقافيه .
يعني ممكن لو كان ممكن يعني عارف عبد الرحمن يفتح الاستديو تاني ويصورني صوره حلوه عشان بكره وبعد بكره وممكن اهدي لي منهن صوره لي هنايه عشان بس الذكري هووووووووووووووي اها خليت السيره دي عشان ماتقولوا واحد صعلوك بس وما عندوا موضوع وممكن عوض خضر دا تاني يعذبنا اسي الساع اتنين صباحا يعني نقدموا لي المحطه عشان يجينا راجع الساعة سته صباحا ياخي اقنعوا اللنوم قبلوا اها اقتنع اقتنع لكنالصباح ما بنلقاهو لانه عارف ام الخير ما بتنوم كان ما جا صبحان الله ذي الزول
انا ذيكم كلوا يوم قلبي يقول لي والله الغربه دي كلام فاضي بس لكن الضمان شنو ما نرجع بي نفس فهم هنا نرجع بي حسب يحسب خاصه الناس بقت مسؤوله ودنيا مال واعمال وامال وعيال حسب يحسب يعني الدخل المنصرف الاولاد التعليم الصحه يعني تاني دوام كلي او جزئ والجزيرة اضيق من خيال المفتري بعد المشروع بقي في مهب الريح يعني الناس حاتمشي اقرب مدينه عشان تداوم ودي برضو غربه.
اخر شي قول رجعنا البرجع الزمن السمح شنو ؟؟؟؟؟؟؟؟؟؟؟
اها يا خوانا نحن مضايقين من الغربه ولا مشتاقين لي الزمن داك ؟؟؟؟؟؟؟؟؟؟؟؟؟؟

صديقي ورفيق غربتي المرحوم خالد الزين قلت ليهو ناس الحكومه قالوا ما دايرين قمح العاوز يزرع يمول علي كيفوا بعيد مننا رد لي سريع جدا قال لي يعني عاوزين يشهونا حبة اللقيميه وقد كان اشتهيناها
دا تمهيد لي سؤال مشروع علي هامش الموضوع شفع اليومين ديل بعرفوا شنوا قطن ولقيط قطن والله جد ما عارف لانه من زمان ما شفت لي زراعة قطن الله يستر ما يلحق اللقيميه
اقابلك في زمن مافي
وزمن جاي وزمن لسه
اشوف الماضي فيك باكر
ويا ريت باكر يكون هسه

[عبده مصطفي إبراهيم]

الذمن السمح داك ....قاعد جوة الناس ...البرة والجووة .....الا ايقاع الواقع بقي شفقان
وصحي الناس انشغلت في لحم جلدا ...بس دي سنة الحياة
والبلد لازالت بي خيرها........وارض خصبة لإرجاع الذمن السمح بابعاده الثلاثة

واحد قال لي الذمن داك "شالوهو" المغتربين في شنطهم الفاضية دي....الشنط تمش ملانا زمن سمح وتجي ملانا هديمات
الرجوع لم يرتبط بوجود الذمن السمح بل بالخيارات الافضل
عشان كدا دايما مدسي في اخر كورنا
والكورنا دي مخدرة طوالي.....عشان ما يفرفر
.........................
وبرجع ليك يا عاطف اصلو الدنيا دغش هنا

[كابلى]

واللة يا عاطف الزمن السمح راح والغربة اصبحت هاجس يؤرق الجميع والناس بقوا بين نارين الغربة والحنين للزمن الجميل لكن السؤال هل السودان يمكن ان نتعايش معة فى ظل المتغيرات وفرص الحياة التى اصبحت حصريا على فئة احتلت السودان حمرة عين وايدية والبقية تتقسم بين مدن الدنيا طوعا وكرها وربك يصلح الحال ويرجع لينا بلدا يشيلنا من جديد

[صادق محمد عوض]

البيرجعك شنو؟؟؟؟؟ وهو اصلا وينو البلد؟؟؟؟؟ ولو حصل رجعت وين الناس؟؟؟؟؟ كدي عاين للمنتدي ده اعضاهو قاعدين يكتبو من وين؟؟؟؟ ما كل زول خبرلو مكان لمان ضاقت بيهم الارض بما رحبت.... البمشي اجازة يجيك قرفان من نفسو..... اليوم كنت بتكلم مع المدرسين الجايين من السودان.... التقول الواحد جايي من الجحيم.... قرفانيين مش من فراق الاهل.... لا من الحاصل هناك.... ومافي واحد جا قال الحال تمام او حتي نص نص ... يحضرني في هذه اللحظات قول الامام الشافعي:

ارحل بنفسك عن ارض تضام بها ولا تكن في فراق الاهل من حرج
اني رأيت وقوف الماء يفسده ,,,,,ان سال طاب وان لم يجر لم يطب

[عبده مصطفي إبراهيم]

الأخ الأستاذ الصادق.......النرد ليك قبال سيد البوست يجي
الناس البتجي راجعة من هناك قرفانة دي........غالبا ما تشكو من الصرف الكتير
ودي معضلة لا يعاني منها الي المغترب السوداني.......وخاصة ذول الريف
يمرق من بشتنة الدوام وياخد ليهو كم حمام سونا....ويرطب بي جلد ويمشي علي
أمل ان يعدي اجازة خالية من الكرب
ويجد الناس ياها الناس بذات البساطة والطيبة والعيشة السهلة....والمجابدة من الدغش
لللقمة الطاعمة
ويرفض ذلك....لان لياقة القميس تتسخ بسرعة......والكهربا تقطع علي كيفا
والميزانية متناقصة......ويبدأ المقارنة....ويلعن .... ويقارن ...هسه كان كنت هناك كان أخدت لي دش
ساخن....بارد علي كيفي....ونزلت لي المكوجي ..... اجيب منو الجلابية الما مطبقة
وامش الف بالسيارة لمن افتر.......لا غبار....لا عرق
يفتش للفرص في الونسه عشان يدخل العبارات المعهودة....."نحن هناك...."...."ولا انتو ضايعين...."
هذه ثقافتنا.....لا أحد ينكر ذلك
نعم الذمن ليس كالذمن السمح داك.......لان هذه سنة الحياة
وهذا لا ينقص شيئا من سماحة الذمن الهسه....الناس السمحة قلوبهم مالين الحلة
وفطيس بشاشتها مدفقة ......بس إيقاع الحياة اتغير
ومقايس "الذمن" اتغيرت......
وأغلب المغتربين لم يعيش فترات التغير دي........"سمع ساي"
وعندما ننقنق.....ونقول حليل ايام.....ذمان......دي ذوغة من الواقع ورفض التعايش مع الحاضر
ودي دايما بتكتر ايام العودة المؤقتة

وبجيك راجع كان في العمر بقية......علي قول مامون

الاخ كابلي لك التحية ولا تنقطع تاني فاقدنك السيد المدير العام مشكورا مدرارا علي الاضفاء والاندياح ويبدو لي كاسك مترعة بالاشواق اكتر مني والموضوع كشف انجلاتك اخوانا الحبيب الصادق المتصادق اشكر جدا المرور والادلاء الحلو الصادق

انا عاوز كدا كل زول يجيب العندو نعيش الاحنه برأي جماعي وروح مشتركة كل زول يدي العندوتجاه هم واشواق مشتركة نتواسي علي الزمن الما عاد وعلي المستقبل اللسه سنينو بعاد .
القصد نفرق بين الاشواق لماضي جميل وفترة زمنيه يبدو عفي عليها الزمن وبين واقع معاش واجب التعايش او التحيل للتعايش معه مع اعمار نضجت وكبرت اشياؤها هذا الحنين الذي لا يفتا يلقي بظلاله علي العمر يكبل الانطلاق بالالتفاف والالتفات اليه كل حين بحسب ان الاروع كان بايدينا تركناه لنبحث عنه بوجه آخر .
لا شك راي الصادق معايشه واقع وافراز حقيقي لما يعانيه السودان اليوم الذي عجز ان يستوعب حتي ابنائه بمختلف الكوادر المؤهله وغير المؤهله طفقت في الارض تجوبها سعيا عن رزق حلال ومجد لم نكن بالقيه ولو بشق الانفس
ولكن هذا لا ينفي تفاؤل اخونا عبده مصطفي بان الجمال موجود والناس الحلوه والزمن الطاعم بس نسيب حاجاتنا المكلوفه ونجه ونقبل عليها بروح متسامحه بس يا عبدو ما فترنا من خلع توب ولبس اخر انا خايف اخرتها نبقي كومبارس تجي بي هينه حياتك حال وتمش بهناك حياتك غير نتلون كل يوم بوجه والف شخصيه عشان نواكب .
الله ينصر دينكم ادفقوا الموضوع قائم وباب الريد متاكه عبده شنو ليك ما مواكب ؟؟؟؟؟؟؟

[عبدالمنعم]

بإختصار...
عاطف زول يجيد البكاء على الماضي
الصادق يظهر إنو طبعو خرب ونسى ماضيهو
عبدالكريم تايه مع ساس يسوس وفئة احتلت السودان حمرة عين وايدية وما قادر ينسى
عبده كلامو سمح وموزون وكلام عقل
ولكم جميعاً أقول .. أرجعوا عشان ترجعوا الزمن السمح

[عوض خضر]

والله ياعاطف طرقت مسلكا خشنا

انا اعتقد انها المرحله والكل مر بهذه المرحله قد تطول عند البعض كما حدث معنا وبالتالي تاتي المراحل التي تليها متاخره حسب امكانات كل واحد منا لاكمال اشواط

المرحله التي هو بصددها فقد خرج كل منا لتغيير واقع واكتشف انه واقع في فخ لا فكاك منه فقد بلغ مرحله جديده من موقع مختلف يعني المرحله التي هو فيها وانا هنا

اشير للمغترب تضمه هو والاخرين الذين مازالوا موجودين في البلد لكنه تغيرت نظرته للامور فالموجودين هناك دخلوا المرحله وكونوا عوائلهم بنفس الطريقه التي

توارثوها ولكنه كون عائلته علي نسق جديد وطموحات جديده

تلك الحياة الحلم التي تحدثت عنها يمكن ان تكون موجوده

ولكن عليك تقبلها بحصرمها كما يفعل الذين هناك صحيح ان للحياة هنا حصرم اكبر ولكننا تعودنا عليه

يعني باختصار لو رجعت سترجع مفارق

بمعني ادق طريقة تعاملنا مع الامور اختلفت

وحليل هذا الزمن الذي ذكرته

[عارف عبد الرحمن]

الدنيا دي قطر ماشي وما بقيف الأ في محطات .. وليه ترابيس تغير مساره .. نحن كلنا ركاب في هذا القطار نجلس جنب بعض نتآنس ونتوانس ونتآلف ونعشق بعضنا بعضا .. وينزل كل منا في محطته .. ويحمل في ذاكرته بعض من تسامر يودعه في دواخله يرجع اليه حنينا مشتاق قنديل متوهج يدل الساري علي صواب الطريق وجادته .. واروقة وسراديب وكهوف الحياة بملامحها وصفاتها وسماتها .. توحي للرجوع ..ولكن هل يكون الأنطباع كما الأول الذي يرتسم بطقوس تخلقه اللحظة والمناسبة .. لا يخطط له ولا يبرمج له .. والا لكان لا اثر له .. الفرح حوار مع الذات للآخرين لا دخل للمادة فيه .. ولا الأشياء ولا كل كنوز الدنيا في ذلك .. شيئ خصوصي بين مجموعة أو أفراد يجتمعون يلونون الأفق بالمسرة والبهاء والنقاء .. وتصفو النفوس وترتاح من وعك السري ورهق المسافات ..وأجملها تلك الدراهم التي تجمع لكوب شاي أو قهوة من عند فاطمة الله يطراها بالخير .. لم تكن لتخمة الجيب دخل ولا أثر في ذلك ..الصفاء والفرح العبقري والتمهل والارتياح .. والمقل تنام ملء غيبها وغيابها والحان مسافرة يصدح بها مدحت .. والكل ينظر بأتجاه واحد والكون لونه بهي .. وفي نفس المكان يجلس آخر لا يري هذا الجمال .. لانه يأتي من الدواخل لا دخل للكنجالات فيه الا قليلا .. علامة الرجوع جودة الحضور وزفرة الحنين يغمرها التفاؤل كغنوة من أزمان بعيدة طالعة من صخب الدميرة تتسكع علي أرصفة الأنتظار وتتقرفص بسكينة ودفء علي أحضان حلمنا الراقي والمتوهج دوما والذي لا يخبو له وهج ولا ضياء سرا وعلانية علي مدار الساعة طوق نجاة من زخم وزمهرير وفيضان الحياة الطاحنة .. نصدح بتواشيح قديمة وحنينة لتسقط لنا بوح من تفاصيل الزمان .. تتحول وتتبدل الرؤي والمفاهيم وطموحات الحياة والمسؤلية .. يصير الهم أكبر وأن قدر للجميع بذات الأفراد الذين تنتقيهم وتودع فيهم فهم الفرحة والحياة .. بعد كل هذه السنون لما رجعت البهجة هي البهجة ولافسحات الأمل والأحلام هي كما هي ولا للزمان ولا الأشياء دخل في ذلك .. أنا جربت ورجعت ولم تتنازل دواخلي لحظة في أن أعزي سبب ذلك لحوجة . لم أجد الناس ولكن المكان هو نفس المكان والشوارع ذاتا بس السهوم يرتسم علي محيا الناس .. صرت زي أخونا عاطف أتمني أن ترجع الأيام أفضل من الماضي .. ولن ترجع ولن ينصلح الحال ما دام الكل يضع يده في الماء البارد وننتظر من غيرنا أن يغير لنا لنرجع هذا شرطنا للرجوع .. كلنا جينا للغربة وظنناها حلم كبير يحقق لنا طموحاتنا .. وتساقط لنا رطباً جنيا وتطعمنا بملعقة ذهب .. شرطنا للعودة ومعاودة الحلم الجميل والزمان.. أن نوقف الزمان لنجد الأرض تنثر الحب في الأكف ..ومزروعة ورداً ورياحين وعنبر ..ليتسني لنا فرد الشريط من الأول .. لنجعلها مقارنة بل سؤال للجميع .. أيهم أجمل آخر الشهر في بلاد الغربة .. ؟أم جلسة سمر وكباية شاي وقهوة مع الصباح الباهي وصحن فتة وعشرة كوتشينة أو ضمنة في النادي مع جرت خمسين وضمنة كاربة .. وضحكة مجلجلة لود الدابي مع فيلم هندي أو مع أبتسامة جرجور التي تشع برقا وأبتساما وسلاما ولنقل براءة .. أنا محق في الأخيرة يا ود طه ولاغلطان .. شكراً أخي عاطف للموضوع الشيق الذي فتح براحات الحنين مشرع ومشروع كبير حلو الحوامة فيه .. ودمت

[عبده مصطفي إبراهيم]

يقول عاطف البدوي

ما فترنا من خلع توب ولبس اخر انا خايف اخرتها نبقي كومبارس تجي بي هينه حياتك حال وتمش بهناك حياتك غير نتلون كل يوم بوجه والف شخصيه عشان نواكب .

المسألة ما بتصل تلون شخصة......أو حالة مؤقتة من الشيزوفرينيا.......ولكنه بحث عن الراحة الزاتية
بلا رتوش.......قلع ثوب للبس اخر ......عشان تكسر بيهو حواجز.....تمنع التعايش السهل
هنا الحال غير وهناك الحال غير......
والإصرار علي وضع شوكة وسكين في صينية فيها صحن عصيدة "ام الحفيرة"...
بناء مدماك "بضم الميم"...في تلك الحواجز
مجتمعاتنا البسيطة تقبل الإضافة....من برة ...ولكن تختار التغير من جوه
ففطيس تحتاج الي الإضافة وليس إعادة الماضي

والله يدي العافية
توضحيات
شيزوفرينيا : إنفصام الشخصية .....حمانا الله وحماكم
أم حفيره....كناية علي التوسط والوحدة....
مدماك.....طبقة في حيطة جالوص