زلط فطيس.....هل سيصبح حقيقة (توجد صور للمسار)

[عبده مصطفي إبراهيم]

خبر ...لم أصدقة في البداية... وافتكرته احد الوعود ولكن يبدو أنه تحول إلي واقع
التحية لمحمد عبدالمنعم الذي نقل إلينا الخبر
وهو توقع وصول المعدات الي مواقع العمل غدا وبدأ العمل في العاشر من نوفمبر
وسوف يدخل الحلة عن طريقة المحطة إلي السوق والمستشفي والجامع
وسوف تتكفل القرية بتوفير الأكل والشرب للعمال

ونسأل الله أن يتمو بخير

[عارف عبد الرحمن]

نعم ياعبده دي المواضيع المثمرة الفيها فايدة لينا نحن ناس فطيس ..وكنت أتمني ان تكتب أكثر من ذلك لهذا الموضوع الحيوي .. عندي معلومة صغيرة بس ما متأكد منها .. ولما أصل ليها بوريكم .. لاني قبل العيد عندي معلومة بأن هناك أخ عزيز كان وراء متابعة هذا الامر .. خليني أعرف أولا .. ودي الاخبار التي تسر وتشرح البال وتهم فطيس وانسان فطيس البسيط والبعيد كل البعد عن مشاكل السياسة والتي وانا متأكد أنه لا يفقه فيها شئ ولا عندو استعداد يسمع .. عشان كده أرمي زي دا بس كبر الرمية وياريت بالأرقام والديباجات زي ما قاعد تعمل في مقطوعة الطاري السياسة ـــ عبدو لمعلوميتك انا بعرف في السياسة أكثر مما تتصور واكثر بكثير من الذين يكتبون فيها .. بس ما بتهم فطيس .. وفي فرق بين الكراهية وعدم المعرفة .. فطيس اولا واخيراً ودمت

انشاءالله يارب الحلم يبقي حقيقة وتنتهي المعاناة والتعب والشقا

خبر فرحنا شديد ودي الاخبار السارة فعلا ...

[عبده مصطفي إبراهيم]

الأخ عارف... والله يا ريت لو عندي معلومات اكتر من كدا...ولكني في محاولة
لتجنيد زول ....يتابع لينا سير المشروع دا.. وما هي الخطواط الجاية
وهناك أسئلة ... كيف سيكون دور المغتربين في ما أوكل لناس فطيس "حق الضيافة للعمال"
ولا ح يبقو فراجة ساي
وما هي الجهه الممولة ...عشان نديها حقها
ومن من فطيس خلف هذا العمل ....عشان نديهو حقو
وبجي بي وين...عشان فتشت المنطقة بي فوق غلبتني
..يحصل المحطة كيف.... وهل بجي بي درب السكة حديد
نتمني أن يدخل علينا زول من الحلة ...يفهم الناس الحاصل.
وما هي الألية الحا يأكلو ويشربو بيها العمال
ونحن نعلم أن ناس فطيس ما بقصرو في الحتة دي
بس بالمنطق كدا... الشغلة دي ما ساهلة
ونتمني تفاصيل اكتر

دا كلام يفرح لكن ناس البلد وين لاحس ولا خبر نرجو الافاده الدقيقه والمتابعه المتصلة والتغطيه للموضوع حتي لا نكون اخر من يعلم

يا عبده كلامك جمييييييييييييييل وعديييييييييل نرجو تحديد دور ناس البلد يا اخوانا عشان نحدد كيف شكل مساهماتنا حيكون وحاضرين والله

وانشاء الله في كلو كيلو سلامه .

اولا التحية لكل ناس فطيس والاعضاء بالمنتدى وعلى راسهم الاخ الكريم عبده مصطفى ، طبعا الزلط بقى حقيقة ما فى شك فى ذلك واملك كل المعلومات منذ من كان فكرة حتى الان ولكن قبل ما ابداء فى سرد التفاصيل احب اسال اسئلة هل يا ترى لاتدرون من هو وراء هذا العمل ؟ ام المسالة فيها تحفظ ..؟ ................؟ ....................؟ افيدونى وانا على استعداد لتمليكم الحقيقة حتى المكاتبات التى تمت فى هذا العمل موجودة الان

[عبده مصطفي إبراهيم]

الأخ هيثم... متعك الله بالصحة والعافية
هذا عمل عام.. يجب أن يملك كل إنسان الحقيقة
وهو عمل عظيم.... فيجب أن يعرف من وراءه حتي ترد الحقوق إلي أهلها
وأغلب الناس علي دراية... بالغلط التي صاحب هذا العمل
من ناحية تحديد مساره
وكل ما اعرفه أن ناس فطيس إشتروهو بأسواطهم في الإنتخابات الأخيره
"قد أكون غلطان"
فلنا أن نعرف من الذي سعي وراءه... حتي يعطي كل ذي حق حقه
ولك مني كل التحايا

[عبده مصطفي إبراهيم]

زلط فطيس
البدء بتحية شكر لكل الذين سعو لجعل هذا الحلم حقيقة وكل من ساهم بالرأي والرأي الأخر حتي يخرج إلينا كشئ واقعي نكاد
نلمسه
لا أحد يخفي عليه المشاورات التي حدثت بين كل الأطراف ... نسميها مشاورات لأن الهدف منها كان ربط فطيس بالطريق المسفلت
طريق الفريجاب...
اخر زيارتي لفطيس كانت عقب الإنتخابات الأخيرة, إلتقيت إبراهيم عبدالسلام في قنطرة الجعلي متابعا لمساح يقوم بطرح الطريق من وادي شعير الي فطيس... وعرفت أن فطيس 99.99% سوطت لمرشح المؤتمر الوطني فقط من أجل سفلتت الطريق وربط فطيس بطريق الفريجاب
وكنت أظن هذا هو المسار... ولكن عرفت فيما بعد أن هناك إختلاف وقع في وجهات النظر إي طريق يتم سفلتته
كنت ولا ذلت أعتقد إن ذلك يتبع إلي المهندس المسئول... لأن عمل الطريق...لا يعني ردم خيرصانة وسفلتة
بل يسبقة دراسة ومسح شامل لكل المنطقة ... حتي يصل إلي أنسب إتجاه ممكن أن يسلكة الطريق
سمعت من أحد مهندسي الطرق أن الجزيرة أرضها متحركة... وتعبيد الطرق فيها ليس طويل العمر يعني الواطة ح تجر مهما فعلت.. ولكن الأنسب هو طريق السكة حديد (الكانت واختفت)... لانها مندلوها الإنجليز....هكذا قالها بكل بساطة
قد يكون علي حق ولكنني سألته ... هل الإنجليز ديل جابوها معاهم ولا ياها الواطة ....المهم أعتقد هذا ما استند عليه الإختيار
(الخط الاحمر في الصورة الأولي) ...طوله إلي كبري المحطة 8.55 كيلومتر
من هنا يوجد تلاتة خيارات...خيار رقم واحد وهو المعتمد علي ما اعتقد ويعيبة اربعة كورنات حادة ... ويطيل الطريق الي 11.38 كيلومتر ليصل الي موقف العربات....ولا أعرف ما هي الحسنة.
الخيار رقم إتنين أخف قدر توجد به كورنتين ..ويجعل الطريق بطول 9.84 كيلومتر
أما الخيار رقم تلاتة ... وهو متابعة طريق السكة حديد وهذه حسنة حسب ما ذكرت فوق ... ولكن سوف يخلق مشكلة ذي حقت طابت ... زول بدخل علي فطيس مافي.
أما الطريق الأخر فإلي كبري المقابر طوله تقريبا 6.640 كيلومتر ... من كبري المقابر هناك خيارين
الخيار رقم أربعة وهذا يطيل الطريق إلي 7.82 كيلومتر وبه كورنة واحدة .....خيار منطقي
أما الخيار رقم خمسة فيجعل الطريق بطول 7.6 كيلومتر...وبه كورنتان
حسب رأي المتواضع هناك أربعة أشياء هي التي تحدد مسار الطريق
طول الطريق... عدد التعرجات (الكورنات) ... نوع التربة التربة...وهذه يحددها المهندس
وكيف تستفيد فطيس من الطريق
عدد التعرجات هي السبب الرئيسي في كل الحوادث في المنطقة....ولذلك ركزت عليها
طريق فطيس نتمني أن لا ينظر إليه كحل من وحل الخريف فقط ... بل ماذا يمكن أن تستفيد منه فطيس تجاريا
ودائما ندعو الله يدينا خيرو ويكفينا شرو

[عارف عبد الرحمن]

التحية للاخوة الكرام .. أخي عبده كنت في السودان في الفترة السابقة .. وقامت ضجة بموضوع المسار وانا كنت أول المحتجين بالمسار الجديد .. وكلام المهندس كان واضح أنو المسار الذي يأتي بالسكة حديد مجري لمياه وارض غير ثابتة .. أما الطريق الآخر أقصر مسافة وأقل تكلفة .. ناس الطرق مهمتهم دراسة المشروع وتقديم المقترحات والرؤي العلمية كما قال المهندس .. الا ان تتدخل جهة سياسية في ذلك .. ودا الوارد في طريق فطيس .. هناك جهات عديدة لا تريد لفطيس التقدم وتعمل بكل ما تملك لتأخير البلد وتراجعها للوراء ..المسار القديم هو الأجدي والانفع لفطيس .. بس حكاية الترعة دي مرقت من وين .. طيب المهندسين الخططوا في الأول ما لقوا الترعة دي .. نفرين ولا تلاتة من أم دوانة علي ما أعتقد لهم حواشات هم الذين يقفون حجر عثرة امام المشروع وذلك بايعاز من مجموعة الهدم .. أخونا كمال يوسف جاب أوراق قال تصديق لزلط فطيس أم عضام .. وقامت الدنيا وقعدت .. والزول الداير أخدم البلد من المفروض أكسب الجميع وأصل معهم لحل وسط ... من ضمن ما ذكر في الأجتماع أن يمر الزلط عن طريق المركز الصحي والنقطة مرورا بود فرج الله حقتنا دي .. لكن ناس ود فرج الله قالوا بنغرق .. واحدين قالوا أجي داخل قصاد الكبري المقدود وأمشي لحي المستشفي ويطلع بالسكة حديد عن طريق الكبري الطالع لأم دوانة ويمشي لحدي المحطة وينزل حتي فرج الله القديمة بس الناس ما وصلت لأتفاق بخصوص الموضوع ... في تصديق قديم أنا شفتو موجود مع عمنا علي التيجاني ملف كامل فيه الدراسة والتكلفة بتاعت المشروع .. الطيب مهدي بعد ما عرف الضجة مشي وزارة النقل وقابل المهندس المسئول مع محمد عثمان وقال ليه الموضوع في درج الوزير وعليه تعليق بكلمة ملف فقط .. عرفت مؤخراً أن من المفروض ان الرئيس أجي أفتح طريق الحلاوين .. والناس قالت تغتنم الفرصة وتضع حجر الأساس للمشروع .. بس مين في فطيس مؤثر وله القدرة علي مواجهة المسئولين والمطالبة بحقوق البلد كاملة غير منقوصة .. والموجودين هناك محسوبين علي المخزلين والذين يعملون لحسابهم الخاص أسألوا فتح الرحمن محمد صالح عن موضوع الجازولين حق الردمية وأسالوا أبراهيم الصديق عثمان الشراقي .. أسألوا عمكم علي التيجاني عن المساخر والبلاوي .. وينك يا أستاذ حمدان غيبتك طالت .. شوف ليك فكي كارب ..ههههههههههها

[عبده مصطفي إبراهيم]

الأخ عارف.... ما معني أن تتدخل جهه سياسية... وما علاقة مزارعي أم دوانة بالطريق
مش التكلفة مدفوعة من الحكومة
ما دخل الأفراد في ذلك
وهل يعني هذا إن ليس هناك لجنة مكونة من فطيس تقدم أو تؤخر
إستوقفتي نقطة ناس فرج الله قالو بنغرق
وهل المسار الختوهو دا... ما بتغرق... دا بكون مصايبو أسوأ واضل لانه غير مستقيم
والله يا عارف .... الواحد متحير البلد دي الأمور بتمشي فيها كيف
النقاط الحدتتها ديك هي المفترض تحدد مسار الطريق.
وهي مشتركة بين المهندس والناس البتهمهم القرية
وبعد داك أي تدخل سياسي أو شخصي يخرج القضيه من إطارها المنطقي
ويرجعنا إلي الخلف