الكــــرسي الســــــــاخن..يجلس عليه (-)

[عبده مصطفي إبراهيم]

الفكرة معروفة للجميع...واحد يجلس علي الكرسي لمدة إسبوع.....وعلي الأعضاء ممارسة حقهم الديمقراطي في
توجيه كل انواع الأسئلة...مع مراعاة الاتي
---الإجتهاد في إجابة الأسئلة قبل إنتهاء فترة الجلوس في الكرسي الساخن
---من حق الجالس علي الكرسي الساخن عدم الإجابة علي بعض الأسئلة إن أراد
---علي الجالس في الكرسي الساخن ان يحدد من يكون بعده..... بيوم أو اكثر وسوف تقوم الإدارة بمراسلته.
---من الثلاثاء حتي يوم الإثنين.......
---اول ذول يدخل يحدد من يجلس علي الكرسي الساخن هذا الإسبوع

ولكم مني كل التحايا

[ابودباره]

لكن خلونا نبدأ بي عارف عبد الرحمن

[عبده مصطفي إبراهيم]

شكرا لك اخونا أبودبارة ............وخير الإختيار

[عبده مصطفي إبراهيم]

إسئلة قد تكون معروفة للجميع ولكن لابد منها
الحالة الإجتماعية:
مكان الإقامة:
أخر مرة زرت فطيس:
سياسيا:
توقعاتك للإنتخابات القادمة: من الفائز:

ولي عودة طبعا

[عوض خضر]

لا يا معلم سخنو اكتر

[عبده مصطفي إبراهيم]

انا مدردقو ليك.......اصبر ليهو عشان ما إختفي

[عارف عبد الرحمن]

احبتي الكرام شكرا لأختياركم لي وأتمني صادقا أن أكون قدر ظن أخي أبودبارة فيني وأوفق في الأجابات .. والله أقدرنا عليها بس خليكم حنان شوية أنا ما مذاكر كويس لان كراسة الذكريات أندفنت في كوم قش الصبابة والحنين وجرفتها غربة الذات وما قالت كش ... أتفقد الأرقام أحسب بعدالألف مائة بل ثلاثة مئات بل ثلاثة حاجات ماثلة ذات قوة مبيدة يعرفها ودالخضر...
الفكرة أن ترتبط ليلات الشجي والشجن بنهر كاد أن يجف وتموت فيه الأسماك وتموت من العطش ونشاف الريق وعوجة الطريق ... رهق قديم منذ زمن سحيق تورمت كرعيه من الحوامة بفتش لحواء لان منذ أن غازلته وقامت جارية صوف وقلبو يدق زي الطار لم يخبو توهجه وزال عن الأرض التعب وأمتلأت البحار ومقياس الرسم بقي جرجير واطة وبلكات طين دفن الليل اب كراعن بكدارة .. أنا متفأل جدا وبكره الشؤم وطائره ..بكره أسرائيل والعاوز أفرق بينا وحركات خاسر سجمان ... أحب السودان جدا..
ان جيت بلاد تلقي فيها النيل بيلمع في الظلام
زي سيف مجوهر بالنجوم من غير نظام
تنزل هناك وتحي ياطير باحترام وتعيد سلام
علي نيل بلادنا سلام وشباب بلادنا سلام ونخيل بلادنا سلام
مع تحياتي : أبو عبدالرحمن

[عارف عبد الرحمن]

قال أدردقو قال .. تدردق منو يا دقوسة .. أنا زاتي عاوز ادردق روحي ... وأعمل لي درداقة .. أنتو عندكم مغلق وأنا ماعارف

[عارف عبد الرحمن]

يا عبدو حوي كان دي أسألتك ياني الجاي الأول ...
السؤال الأول : الحالة الأجتماعية متزوج والحمد لله ولي أبن عبدالرحمن وعمره 7 سنوات وزوجتي من مدني السيدة: نشوي أبراهيم نور بنت عم الأستاذ عصام محمد نور ( يعني العندو حفلة أمر علينا أول )لزوم الواسطة وكدي ...
السؤال الثاني :مكان الأقامة مكة المكرمة .
السؤال الثالث :آخر مرة زرت السودان . كان ذلك قبل سنة وخمسة شهور .وبنزل في رمضان كان ربنا سهل
الفائز في الأنتخابات : الهلااااااااااااااااااااا ااااااااال والبحب الهلال جعلي جد ماهو زول نية رمزو الشجرة ومنو الغير البشير البحكم السودان .. وين باقي الأسئلة علينا جاي

[ابودباره]

تعطي هذه آلألقاب
- آوكسجين منتدى قرية فطيس..؟
- بسمة منتدى قرية فطيس..؟
- حكيم منتدى قرية فطيس..؟
- ملح منتدى قرية فطيس..؟

كم ريال في محفظتك حاليا ؟؟ وكم صرفت اليوم منها ؟؟هع بامانة
لمن تقول:
- طلبآتك آوآمر ..؟