جواب للبلد للشاعر التجاني حاج موسي

[خالد احمد محمد الحسن]

ضل الضحي الرامي
شمس شتوية دفاية
ريحة البن ....
لما يفوح في قلاية
فروة جدي..
وسبحة جدي ..
لامن جيت امد يدي
جدي ادين تعريفة
بتقرا الحمدو يالمبروك ؟
بقراها
وشان تعريفة القاها
بجود في القراية كمان
ايه يا يمة والله زمان
سبحة بت الفكي
والطورية والواسوق
سعف حبوبه والحنقوق
وصوت سعدية بت جيرانا
تشحد ليها في طايوق
وصوت عرفة!
لما تخمج الدلوكة غناية
وصور محفورة في جواي
ولي اليلة وبعد باكر
عشان الزمن غدار
ما معروف زمان مكار
زمان كلو خوف في خوف
...........
بدور اجيك يايمة
ضاقت بي يايمة هنا
بشتاق يايمة
لملاح النعيمية
وريحة صاجك المحروق
لما تسوي طعمية
غباشة روب
وعنزة حلوب
بدور اجيك واتمسى بعيونك
واصابحك ياحبيبتي انا
..............
اتاري الدنيا من دونك شينة
ومرة دي حارة زي النار
ولو درتي احكي ليك
عن حالي في الغربة (البندر)
ابد بس من وين
ما شيتن غريب وعجيب
وشيتن كلو شين في شين
هنا الزول العديل ونصيح
وحاتك انتي يالغالية
يعيش حياتو بي وشين
...................
..........
يايمة زولتي الحتى حبيتا
كان شفتي يايمة
زولتي الحتي حبيتا
لقيتا بلاي تحب زولين
لقيت يايمة والله زمان

[عبده مصطفي إبراهيم]

غباشة روب.................فعلا الدنيا بقت شينة جنس شنة
إختار رائع......يا خالد......وكلمات التجاني ديما لها رنة مرهفة ورصينة