|
|
07-08-2011, 11:11 PM
|
#1 | ||||||||||
|
لكم سودانكم ولهم وطن
لكم سودانكم الذى لا يقبل الاخر وينفية لكم سودانكم الذى فية بغض واضطهاد لكل الاخر فى سودانكم يقتل الاخر لانة فقط مختلف سودانكم يقتل يشرد يعمل جاهدا على محو الاخر سودانكم لايطيق التنوع ولايقبل الاخر سودانكم لون واحد لايحب تعدد الالوان سودانكم دين واحد ينبذ اديان اللة السماوية ان سودانكم انتماء يحارب كل الانتماءات كما ان سودانكم يجادل فى الارض سنن اللة ففى البدء خلق اللة كل البشر اسوياء من ذات الطين لكم سودانكم ها قد اتيتم لتقسيمة كما الغنيمة لكم سودانكم يحب شهوة الموت ويهوى الاقتتال ... هكذا عبر البعض عن واقع الحال المرير الذى اوصل السودان بفعل فاعل الى مربع التقسيم المخزى وهذة الاسباب هى فعلا ماجعلت خيار الانفصال هو الانسب لشعب يعانى الحروب والحياة فى هامش المواطنة وفى غبن مسئول عنة كل السودان شعبة وحكوماتة الفاشلة منذ الاستقلال المزعوم لان الاخوة فى الجنوب يتم التعامل معهم على اساس عرقى منبوذ وهذا الاستعلاء هو ما جعل الجنوب يتسرب كما الرمل من بين الاصابع ويذهب بعيدا ليكون انسانة انسان مطلق لا تحكمة لغة ولا تحاصرة بحار العرب المتلاطمة ولة ان يدين ماشاء من الاديان وان يكون مواطن من الدرجة الاولى ولكن يبقى فى القلب حسرة على وطن فشل اهلة فى ان يتعايشوا اخوة ويستثمروا فى التنوع الذى خصاهم بة اللة دون الشعوب ولكن للاسف مايتم الاستثمار فية هو الاستعلاء ورفض الاخر والكراهية التى شيدت لها منابر وسنت لها اقلام صدئة لتنخر فى وحدة الوطن لتجعل منة وطنين وربما اكثر طالما يبحث اهل النقاء على دولة السودان العباسية التى هى اكرم من مكة وشعبها انقاء من اهل جزيرة العرب ... هاهو السودان ينشطر واهلة ينظرون وينتظرون ما تحملة لهم الايام المقبلة من الخزى والفشل الذى ظل يلازم هذا الوطن المنكوب ولكن يظل الباب موارب على امل ان ياتى من يجمع الوطن من جديد بعد تصحيح مسببات الانقسام وترتيب البيت من الداخل والاعتزار لشعوب الهامش عن الدموع والدماء والتهميش حينها يمكن ان يكون سودان المليون ميل كما كان ... اللة يجازى الكان السبب .
|
||||||||||
|
|
07-10-2011, 09:15 AM
|
#2 | ||||||||
|
أصبحنا يا نادوس وأمسينا بيك يا أم أمسينا يا نادوس وأصبحنا بيك يا أم يا سوسة ضد السوس قلباً بلاكي يضم ليل الضياع مهووس يحلم هواكي يؤم بعد الحصاد الروس عالم نداهو يعم ختيت هواك فانوس بقلبي شلتو وحم جيت المدن باخوس لاقيتو جالب السم راشح هجير البوس وكل الوجوه دم دم |
||||||||
|
|
|
07-10-2011, 10:20 AM
|
#3 | ||||||
|
زائر
|
يا شعبنا يا والداً أحبنا يا من وهبت قلبنا ثباتك الأصيلا إليك هذه الرسالة القصيرة الطويلة إليك من زنزانة تخاصم الفصولا إليك رغم أنف كل بندقية وطعنة شقية وحقد بربرية إليك الحب والسلام والتحية إليك يا حبيبنا وبعد أدبتنا أحسنت يا أبي فلم نتابع الهوى لكنما قابيل ما أرعوى كالذئب في حظيرة عوى وكم غوى وتابع الهوى وتاه في الأنا أراد للدماء أن تسيلا ونحن مثلما عرفت يا أبي بفضلك الكريم من أشرس الرجال حينما نقاوم نموت لا نساوم ندوس كل ظالم ونفتح الصدور للمدافع الثقيلة ومن هنا أبناءك الرفاق أقسموا فصيلة فصيلة أن يثأروا لحرمة الأمومة الجليلة لطفلة جميلة تنفست قليلا تمددت قتيله رصاصة في قلبها وطعنة في جنبها ولم تعش طويلا لكنما مليون مثلها سينجبوا النضال يا أبي حقيقة وأجمل الأطفال قادمون ساعة فساعة عيونهم أشد من عيوننا بريقاً صدورهم بما وهبت أكثر اتساعا سيوفهم تزيد من سيوفك الطوال طولا (محجوب شريف) |
||||||
|
|
|
07-10-2011, 05:46 PM
|
#4 | ||||||||||
|
الاخوان عبدو وعوض شكرا على المرور ولكن يظل السؤال قائم كم الف محجوب شريف من السودانيين وكم مليون من الهندى عزالدين والطيب مصطفى وحين تتعادل الكفة يمكن ان تحط طيور السلام فى باقى السودان ويمكن ان يكون سودان جديد غير الذى يرضى ان يتنازل عن اجزائة ويمدح نفسة ويصفها بانة مثال لحل القضايا المزمنة ويجب ان يحزو الاخرين حزوة .
|
||||||||||
|
|
|
07-10-2011, 09:24 PM
|
#5 | ||||||
|
زائر
|
(مرت الأشجار) محجوب شريف ـــــــــــــــــ مرت الأشجار كالخيال أحلام ناس لطاف وظراف مابين غزال وزراف مابين ظلال وغمام مرت الأشجار طابق طبق طابقين في ضلهن كرتون حر والسقط أولاد تحت المطر ياجون لاعندكم عداد ولابوهيتك كم لون ما احتجت لي حداد يوما ولا نجار وكنت ألطف جار ومرت الاشجار الباقي تحت العين حيث الرماد أحجار من يوما داك فاقداك كل الدروب فوق راي ياخيت وهيت ياكيت حس المقص بكاي سكسك سنون براق نار الفراق جواي أمونه ست الشاي صمت الكبابي عويل برادا ساكت ساي ياحليل تريزا قريب كانونا كان بي جاي ياحليل جناها جناي هم يسألون وعيون تحزن تقول باي باي يامنتهي الأشواق اتمحن الكنتين والنيمه ذات الساق القدره كم تشتاق كم كمشه مويه فول سمسم عمل زقزاق وين الملامح ديك يازحمه البصات واللفه والدقداق ليل القهاوي حزين عدد الكراسي فراق جفت عروق السوق ريق الطريق العام واتحتت الأوراق --------- وين ياسواد العين مشهد علي صعبان شبان وهم حبان تحت النجوم الفوق في عتمة الميدان الشوق بلا بيبان من وين ذهاب واياب وكلاهما تعبان ابنوسة اللاوو ياحليلا غصن البان جمر الحصي الوقاد علا الكتف أركان ميري الفراق بي طال وسال سيل الدمع هطال لكنو مهما كان لو بالوسم سكان لو بالرسم جيران متين بقيت يانيل عددا من الخيران نتدفي بس أو قول نعزم بعض يوم داك بنولع النيران |
||||||
|
|
|
07-11-2011, 05:28 AM
|
#6 | ||||||||
|
غنى ياخرطوم غنى شدى أوتار المغنى ضوى من جبهة شهيدك أمسياتك واطمئنى نحنا منك ريح وهبت نار وشبت فى وجوه الخانو اسمك ياجميلة ونحن ياست الحبايب من ثمارك فى دروب الليل نهارك وقبل مايطول انتظارك نحن جينا وديل أنحنا القالو متنا وقالوا للناس انتهينا جينا زى ما كنا حضنك... يحتوينا لما فارسك فينا هبّّ وعبّّ حجرك بالمحبة وبالأماني صحى نار الثورة تاني وجانا داخل زي شعاع الشمس من كل المداخل وهز بالمنشور وبشر يوما فرهد فى عيونك غصن أخضر وفرحة أكبر من شجونك والسلاسل يا جميلة يوما كان ميلاد شهيدك يلا غني ولاقي عيدك ولى ثمارك لقي ايديك جيل مكافح حلّّ قيدك فى غضبنا الحر لافح وياما باكر وفى زنازين العساكر نبني مجدك ومهرجانك وكل قطرة دم عشانك ولى جديدك يا جميلة محجوب شريف |
||||||||
|
|
|
07-11-2011, 08:07 AM
|
#7 | |||||||||
|
زائر
|
Quote:
|
|||||||||
|
|
|
07-13-2011, 06:02 AM
|
#8 | ||||||||
|
طواقي الخوف قصيدة جديدة للشاعر : محمد طه القدال ما خايف المطر يتحاشى الضهاري الراجية قولة خيرا ولا خايف المطر يمشي على الصحاري تلمو في بشكيرا ولا خايف العشم يتناسى العشامى ونيما ياكل نيرا ولا خايف النفس تتذكر نفسها وتنسى يوم حِدّيرا خوفي على البلد الطيب جناها وقمنا في خُديرا شاحدك يا كريم لا تحصل خراب لا أرجى يوم ودّيرا *** وانا ما بجيب سيرة الجنوب. عيال بتسرح للمدارس .. والفطور نجماً بعيد. بنوت بتجري على الخطاطيب الخطاطيف البتجرح .. والعريس نجماً بعيد. الدكاكين التملا تفضي، السماسرة يسمسروا، والبسفو الطين .. يسفوا، والبحتّوا الراب .. يحتّوا، والبناطلين ليها سستم، والقوانين ليها سستم، البنوك الفيها بستم .. من سويسرا ولي ماليزيا بالسفارات والعمارات والخبارات .. . انا كنت متغطي .. ومتدفي، العمة ملوية، والشال على كتفي. سودان وكان ما كان سودان علي كيفك السكة ساعة إيد والأرض مروية والناس حنان وظراف والراح يجيك .. للحول والخدمة مظبوطة مظبوطة مدنية والدنيا حرية الماشي درب الكار يغور والتاب من التمباك يتوب..! انا مابجيب سيرة الجنوب. الغبّوا عرفوهو والعرفو سوّوهو والسووا بلقوهو .. …… أصبحت زي الزول قادل بوسط السوق سروالو نصلوهو لو العِرق مسروق أو قلبي نشلوهو طعم الكضب مسلوق ماسخ تضوقوهو لو فمي ما مطلوق أو كمي غسلوهو ياني البسوي القوق قولي البتابوهو ماعندكم دمي ما عندهم دمي من دمي لا لا لا ماقدروا فصلوهو. وانا ما بجيب سيرة الجنوب؟ قول استقلْ .. انا في صفوف الزوق واقف مع الواقفين مزنوق بهنِّيهو ويهنوهو أواستقال .. ودا أول الأحزان أو قالوا باعوهو ودا ياهو قطِّيع القلوب أنا ما بجيب سيرة الجنوب، فالسيرة كمين ألف عام لوني المحرق مندوكور وشكلي شكلين شكل منقة وشكل تور دمي المشتت من قبايل نوح وحام شعري المقرقد زي حصايا اتشتت فوق الدروب كتفي المهدل بالعيوب وانا ما بجيب سيرة الجنوب أصل البقت من ساس وسايس أو يسوس ياها البقت خلونا من حرب البسوس الفاضلة تكفير الذنوب الفاضلة لمليم البشاتن والمعاطن والخبوب الباقي مايخموكا تاني على الدفافير والكناتر والحروب الباقي تعظيم التماسك في الخطوب لا نافع الشَّدة العلوق ولا نافع المبقوص يحوق لا بنفعك عَرَق الزنوج ولابرقعك لبن العروب إلا الوقوف ألفاً ضكر واحد براك في الشيمة تلفحك الهبوب الغيمة تديك للسفاسف والعواصف والمطر برطع مع الأفعال وادخل على التاريخ يغلب أجاويدك من قرقريب عوسك اخرِج من التاريخ شيخك وعربيدك لا نافعك التكفير ولانافعك التوبيخ فامشيه وحيدك وامرق على التاريخ تلقاه في السهلات مستني كمسيدك لا بيظلم التاريخ ولا يرحم التاريخ إياه عوس ايدك. |
||||||||
|
|
|
07-13-2011, 06:04 AM
|
#9 | ||||||||
|
والأرض موقوت القنابل في الحدود والأرض منهبة الثعالب والطحالب والجيوش باليوناميد واليوناميس والفُرقة بينات القبايل والشتايم في المنصات والشراكة الفي المكايد والخناجرفي الحناجر والمنابر .. آه من تلك المنابر، إنداية كرتلة وبنابر والجرايد داقة طارات المدايد الصَدَق في الناس كذوب الساسة نِيّام العسل بين انتباهة وغفلتين بين السلاطين والحبوش والشلاتين والقرايب فين حلايب؟ واللي بنى الأرض كان في الفرض سوداني عيني عليها اتمزعت حتة في قلبي وحتة ف غصتي .. تاني آدي اسرائيل في النيل بكِّيني ولعبطني والنيل أدنداني إحنا حبايب في الطيّبة والآه؟ آ. غنيلي ورقصني ؟ طيب. بسِّ سمعني آه الآه في وداني. *** أنقد السُقا وما بينصلح وكَّايو وانكشح اللبن ما بينفعِن بكَّايو بعدن بى الدروب مابقصِّرِن تكَّايو والشاكي النقاص ناقص قمح شكَّايو *** وانا لا بجيب سيرة الجنوب ولا أكلوني إذا ما أكلو التور الأبيض .. (الأرض في الجزيرة) وبدر الله فوق سماهو يا ساسا يابساحوتة مكوار حبس مياهو عطشت قبايل ابقوتة؟ البودة في خلاهو والأرضة في بيوتا؟ الزول رِبَت كلاهو سمينة بي مقوتا يا تمت المعاهو أو خلصت الحدوتة وانا لا بجيب سيرة الجنوب ولا أكلوني إذا ما أكلو التور الأبيض .. *** يدر الله يابسلوكة سلوكة الجزيرة كل يوم فينا بتنتش سكك الحديد بي كم؟ بي كم بيت المفتش؟ والبيع بيعة عدوكا بعت الأرض بترابا؟؟ باكر تبيع أبوكا وان مُتْ من تُخمة باكر ناس الشرق يبكوكا وناس الغرب يبكوكا ناس الشمال يبكوكا وناس الجنوب يبكوكا. وانا لا بجيب سيرة الجنوب ولا أكلوني إذا ما أكلو التور الأبيض .. *** حمدتكم بالجاية والجاية فوق الجاية وعسكري الجباية قلبو الحجر اللداية *** بشرتكم بالسادة والسادة بعد السادة وجرادة فوق جرادة من دوكة لام كدلدة *** حمدتكم بالواقعة والصاقعة جنب الصاقعة مقدودة مالها راقعة والدمعة صابة وناقعة *** بشرتكم بالتوية والصبنة لي الدامبوية في الحلة دي ام كدوية ما تقعدوا شدرة موية *** والأرض لا حليوة ولاها دي الجزيرة الأرض أمات الحنين لو نقط الضحوي البريق، في الحين تبتق شهوتِن. تحبل كما الأمات وتشرق بالوحم لو تسعة الميلاد بتمرق بالسنين، أو دي الشوارع بالبنات متحينة، ترسل تراتيل الخروج في يوم وتقطع سرتِن. الأرض تعريف الهديل هدل الحمام بشري وشوق السلام انسان بالحيل بيعرف أنَّتِن والأرض شافت إلا خافت من عيون الليل تناجي حبيب غريب في الليل وتفرز غنوتِنْ. زي بذرة في جوف الأرض أو ضحكة عند طرف القلب بتغني لو جات في العيون والضحكة لاقت مرقتِن الأرض منصوص الضمان حضن أمك الدافي وأمين ريحة حبيب جاياني من شمة حبيبتي وكرفتِن لو جاتا في يوم الهموم، في الحين تزغرد فرحتِن. أو حرقصت فوقها السموم، باكر تهبهب نسمتِن. والأرض ما بتعرف تنوم ترتاح وغابت جمتِن بس تدِّي مدين للعديم بالمدة تحفظ ذمتِن *** هن مارقات خلاهِن ما مارقات بَراهِن لي بصاص حِداهِن إو قصاص بِراهِن هن مارقات تراهِن تريانات تراهِن الخوف ما حَماهِن من شوفة حِماهِن طمانات جناهِن بي لبنا معاهِن يوم الشينة جَاهِن.. مرقن ليهو جَاهِن بالعز المبطَّر والزوق الشَفاهِن لا حايدات مداهِن لا قايدات عماهِن وما كشحن بلاهِن فوق زولاً أباهِن لو الضيم رماهِن هِنْ ياهِنْ وما هِنْ. *** وانا لا بجيب سيرة الجنوب لاني زول بالمرة خايف إلا شايف إلا شايف إلا شايف *** أنا شايف المطر يتحاشى الضهاري الراجية قولة خيرا وانا شايف المطر يمشي على الصحاري تلمو في بشكيرا وانا شايف العشم يتناسى العشامى ونيما ياكل نيرا وانا شايف النفس تتذكر نفسها وتنسى يوم حديرا وانا شايف البلد الطيب جناها وقمنا في شدِّيرا … … شاحدك يا كريم لا تحصل خراب لا أرجى يوم وديرا. |
||||||||
|
|
|
07-13-2011, 02:31 PM
|
#10 | ||||||
|
زائر
|
كلمة اسرائيل فى النيل انا شايف تجينه اسرائيل عديل معروفه دوله كافره لكن المشكله فى ذو الوجهين اى المنافق فى مثل بقول اتقى شر من احسنت اليه والشعب السودانى استاهل العصر داء جاب لى نفسه براه وساكت الى يومنا هذا وبقولوا المابتجيبو المحبه تجيبو الضبه بعد اوصلو الشعب مرحلة الضرب بعرف امرق والغريب فى الامر حصل تمزق وحصل ضرب وحصل انقسام ولا حياة لمن تنادى الى متى مع هذا الوضع |
||||||
|
|
 |
|
|
 |
 |
 |
Linear Mode
