![]() ![]() |
![]() |
#1 | ||||||
زائر
|
![]() رحلة في ديار الغربة لاولاد الغبش مسدار غاية في الروعة والسرد الجزء الاول http://www.youtube.com/watch?v=U7DB7w-jAL4 الجزء الثاني http://www.youtube.com/watch?v=q_4EECWLNkE الجزء الثالث http://www.youtube.com/watch?v=rVz_hVZRLQs |
||||||
![]() |
![]() |
#2 | ||
![]() أولاد الغبش .... الجزء الأول ابواتي الغبش بيكم دوام بستملأ عووك يالصالحين يالالف بالجملة انتو الذاكرين بتقشو الدمع للخملة دايركم حجاب من المجاهدين والحملة قلت يا ابواتي الغبش يا اهل الذكر والحالة عوك يالصالحين مسحوره السيالة البلد الغنيه وكتير جباله لا ضقنا العمل لا شفنا ليه رياله حالتك يالخميس والله العظيم بطاله شغلت اليهود والمسلين عطاله جوة في حشاك لامي الجنسيات باشكاله جانب الصومال والهنود والبنقاله يا حليل الغبش الكلكم سادتنا لديار الخميس الظروف ساقتنا البلد الجميله السمعته جابتنا لا لقينا العمل ولا الدوريات خلتنا المساعد ابوي دود الخلا ا بعاجات كراماتك مثبوته في الزمان الفات جافينا الوطن لا جدود ولا ابوات دايرك لي حجاب من التلات تسعات ابواتي الغبش ليكم شكيت اغراضي بالقضا والقدر قليبي المسيكين راضي صغيركم كان هما يحكم في الدوائر قاضي سمحا للبريد وكيا للموراضي انتم اطبائي دايركم تشوفو اعراضي من مرض القلب والجري الفي الفاضي ابواتي ما تشمتو القالو الكلام هو فاضي احسبو الامر يا ساداتي بينكم ماضي قمنا للعمل في الحرج حرجنا وظلت الهموم جوه القلب منعجنا كسرولنا البيوت دبرنا لي مخرجنا الريح للسليمه في المعامل سجنا للقصر الجميل نزلنا واستأمنا اخوانا العذاذ فيهم بشاشه اهلنا الترحيب والكرم والله العظيم هولنا تحيو وتعيشو يالليمكم يتمني جيناكم قاصدين ما خاب فيكم املنا والبسمة من افواهكم تحمل رضاكم عنا كل الفي المعامج لحماك يا ذو المنا من الحاسدين شر الانس و الجنا الوضع الفيه نحنا والله مو مقبول والبريقة بتلف سواقها تقول مسطول السبب الخلاني ناوي الرجوع علي طول استفزاز ببساطة وكلمة المجهول زي ما اقول اسافر يقولو لي اتصبر والمروق بلف مكسي السراق في العنبر السبب الخلاني ناوي الرجوع في شهر حالة المجهولين اصلاً دوام في خطر
|
|||
![]() |
![]() |
#3 | ||
![]() أولاد الغبش.... الجزء التاني الوضع الفيه نحنا..هربنا من الواقع لكن وجدنا هموم القلب يحسب والعلات جا من النوم المجهول حقيقي اصلو ما معلوم خربانة الدنيا غارانا دار الشوم لكن نحن السودانيين تاريخنا دوام معلوم بنصون العرض لفارغة ما بنحوم الشعب العفيف لنصرت المظلوم وما هن علي الزهب الفي الخزن مختوم الليلة في دة العد الشهر والعدو تلاتة سنين حالتهم معلومه ماكلين شاربين جافينا الوطن ما قلنا مغتربين جيوبنا فاضيه لا هلله لا مليم فينا اليحسب في السنين لا عمل لا مال دايرين الرجوع كايسين سترة الحال ده الخلاني ارجع بي سرعة واستعجال كان الرب قبل ما فش عليه محال اكل البسكويت والببسي بالقارورة ما بنسينا لبلدناً عيشو بالمطمورة من غير المناسك اللمسلمين مشهورة ما بهوي غير بلادي في كافة المعمورة انا ما بحب الكولا الببسي وموية الصحة وما بريد المنادي والكبسة بتزيد الصحة من عودة بلادي انا اصلي ما بتنحي وما مهم ريالكم ان كتر وان شحه فتناك يالخميس وتاني ما بنجيك فتناك يالخميس ياخايب عرفنا الفيك خلاص اتحاربنا لا تدينا لا نديك نزلنا في تنتحت ماسكين دريب الشيك السودان وطنا اصبحنا ناوين ليه سألين الاله من فضله يغنيه الشيك وصلناه وعرفنا الفيه نوم الحارور اديتو لينا معديه تراه الشباب اصبح خلاص مربوك دايماً في حيرة وداهمته شكوك عدمان الحرية وفي العمل مملوك وعامل التنكه ما بفتح حساب في بنوك الخالقنا مو ناسينا ان اتعلقنا في حبال الهوا بدلينا فتناك يالخميس وللمعامل جينا سألين الاله رب العلا يغطينا البريقه بتلف(عربيه الشرطة) والجيب دة ما خلانه ساهرتيبنا الليالي عيونا مو نعسانه فتنا ليها المدن في الخلا لاحقانه خلاص فايتين بلادنا تاني شن طالبانه كان جينا للحقيقه البريقه مي غلطانه العيب فينا انحن البصايرنا عميانه هجرة بالسنين بكل شرف وامانه قاعدين من غير عمل ونقول الظروف خاينانه
|
|||
![]() |
![]() |
#4 | ||
![]() أولاد الغبش... الجزء الثالث نحن نحن اهل الكرم كل الجنسيات عارفانه نحن اهل البشاشه تقوي ومعاهه امانه الدايرن يفهمو عننا اسلوباً معاه رزانه اسألو للخليج المملكه وسكانه نحن اهل النفوس الفي بعضها مرضيه نحن اهل التواضع لا كبر لاريه نحن نحن نحن اهل الشهامه المن بعيد معنيه نحن اهل البشاشه والبسمه سوداينه الليل يالنور اخوي الغربه مي مرتعنه العجب العجايب كان موسي قام ودعنه بالسودان بلدنا ياربي جود وارفعنه شجرتنا الاصيله المنها اتفرعنه ارجوك ياصديق شيل معاك تحايه لاهل الطبول اهل الذكر والرايه قول ليهم ولدكم لا عمل لا روايه داير ليه حجاب بخره ومعاه محايه بلغ تحياتي للولد الوسيع ديوانو مشبع بالزكر جالسين دوام ضيفانو ما بصر الجبين حافظ حقوق جيرانو صاين للعرض وماسك عليه لسانو اليله الغربه حاره واحسن كويه النار لا مال لا اهل دي ودرتنا ودار هلكت للشباب وفيها بقي محتار والقضاء والقدر امر الكريم مختار ماسكين المزارع كوسه ومعاها خيار يعافرو في الارض ويكسرو الحجار جاتكم امانه من صغيرلكبار ماشفتو الجزيرة الخضرة المعاها ثمار ابوك يالجيلاني الغربه مي هماه لكن بخاف البشاتن والكلمه البتجيه في قفاه الزول يفوت والدينو انا نفسي مي حاباه يهاجر بالسنين مقصودو ما يلقاهو يسلم حاج علي الرجل الحليم في وفاه ركازة الضعيف مسكنو ومأواه ذو الطبع الرزين حقيقه الشكر حقاه الرجل الاديب يارب جود وارعاه البريقه بتلف والجيب ده ما خلانه ساهرتيبه الليالي عيونا مي نعسانه فتنه ليها المدن في الخلا لاحقانه خلاص فايتين بلادنا تاني شن طالبانه الاحد الصباح الدريقه جات شايلانه ما بالخاطر ودعنا لي خلانه السجن الدوريات كتمه وكمان زنزانه بسجنها الكبير والله العظيم ازانه عدينه فيه يومين الكلباش رطن في يدانه البصات الكبيره بالبشر مليانه سبعه ساعات سفر زله ومعاه اهانه والداخل السجون ما بقبلو بيه علمانه اخواني الشباب ان اصبحت ناوي القومه الروق عن الله والروح في يد قيومه ما تودو الرسائل اخباركم شعر منظومه وانكشفت حقيقه الشنط الكبار مردومه اهلنا في السودان كرماً معاه حفاوه ارجعو ياشباب الامه ما بتتساوه الزول كان مرض في المستشفي ما بداوه عشان هو مجهول وساكن مع البداوه الليله كلمة المجهول انحنا ما بنرضاها كل الناس عبيد عند خالقها ومولاها البلد الدوريات لافه فقدت خلاص معناها غير البيت العتيق والله ما بنغشاها غايتو انا والرجوع بقيننا بايتين سوا اتوكلت علي البارئ وعقده العزم من جوه مويه من بلادي ولا لحمه محشوه احسن لي من جبالاً فيها القرد يتحوم تراه الشباب في امرو دايماً حائر حارسين الحرج والله دمنا فاير اغريتونا بالشنط الكبار وعصائر غشيتونا انشاء الله اغترابكم طاير في الميناء نزلت مابقدر اجيب تفسيري سلاااااااام ياوطن سلام ياعذتي وتوقيري قال لي ادني قريب النحكي ليك في ضميري احوال الشباب ماشين يعمرو غيري خليهم يابلد يمكن الظروف جباره عساهم يعودو بالمال الكتير وبطاره قال لي نفسي ما برضي ليها حقاره كرامتي فوق مرفوعه بي عذتها ووقاره سلام سلام يابورسودان عروس البحر يا حوريه سلام يابورسودان اقبليني عشيه عشان قالوبكره قايمة منك كمان سفرية بصات الرفاعي القالت الشنط معفية سلام ياكسلا بلد سادتي الختميه سلام ياكسلا انت ليكي الف تحيه سلام للفي الضرايح من قبب لي بنيه وبجاهكم يا كرام انا عيشتي تبقي هنيه نهر عطبره والقضارف باهره سلام ياود مدني الارض العذيذه وطاهره الخرطوم سلام يابنت العروب الماهره الف سلام عليك شايف عيونك ساهره بحب وطني بحب اهلو وجميع سكانه شبابنا المهاجر يا رب يعود لمكانه عشان نحن صغيرنا حافظ حقوق ضيفانو من قول السلام يفقد فراش ديوانو تاني غير وطني الحبيب عقبال تاني مالي عيشه مالي ومال ابن هاشماً والمعامل بيشه البلد الغنيه وكتير تفتيشه وااا شوقنه لي الحلقه اليسوق درويشه سمح الزول يسأل للكريم بارئه يسأل للاله من فضله يغنيه سمح الزول يفتش بلدو ويعرف الفيه كعب الزول يهاجر والقسمه ما تديه غايتو سمح الزول يكون يا معتمر يا حاج ويعود لبلدو لا اساءه لا احراج يترك للمأسي وقعده الاحراج ويمدح لرسول الاسراء والمعراج " اللهم صلى وسلم وبارك على سيدنا محمد "
|
|||
![]() |
![]() |
|
|
![]() |
![]() |
![]() |