من هو الفرضي؟؟؟؟

يا عارف طبعا اخوك عبده مصطفي لقي ناس وادي الشعير مرقوا من الفرضي ملوص بقي يفتش في اهلي واهلوا الضباب الله يثبت دي ما يطير لينا فيها زول تاني

التحيه لكم جميعا في نقاشاتكم واختلافاتكم كنتم الاروع في نظري في كل شي واظن كل الاشياء التي تدور حول فطيس شيقه وذات الق جميل

[عبدالمنعم]

Originally Posted by عارف عبد الرحمن

بس بنبه اخونا عاطف أنا وأنت لاجئين .. واعمل حسابك في كلامك أقوموا بكرة أطردونا شر طردة أنت لود سلفاب وأنا للمسلمية .. ودمتم

الأخ عارف فطيس عبارة عن مضافة كما يطيب لبعض الإخوة أن يطلقوا عليها هذا الإسم، وهي قد جمعت بين حناياها مجموعة كبيرة من قرى السودان المختلفة القريبة والبعيدة ولو حصلت كشة لن يبقى فيها إلا بيوتات قليلة وبهذه المناسبة عندي زول مهتم بهذا الشأن سأحركه للكتابه عن ما تشكله فطيس من تماذج وتداخل.

Originally Posted by عارف عبد الرحمن

ياجماعة ما في زول أزعل عشان بحاول أدي الموضوع نكهة بالطرفة الغير موجه لأي زول ولا حاجة .. ودمتم

مافي زول يزعل دي أهم حاجة عشان الموضوع كلو عبارة عن بحث في التاريخ ومحاولة لإكتشاف الأصول وتثبيتها

[عبده مصطفي إبراهيم]

حسب كلام عارف الفرضي من وادي شعير
واذا قال عارف............صدق عارف

[عبدالملك مصطفى]

يا أخوانا كلامكم ده سمح شديد ولو أديتوني فرقة معاكم بقول ليكم العندي وأنا زي اخوي الكاشف ود عبدالرحمن ؛ المهم مرة قاعدين في الجامع والشيخ المرحوم محمد ود الزين الله يطيب قبره قال فطيس إتأسست سنة واحد لكن واحد دي قاصد بيها شنو الله أعلم هل سنة 1901م ؟؟
المعلومة دي سمعتها منه شخصياً لكن قصة الإسم والله أعلم سمعت أنه أبونا الشيخ الحسين الزهراء كان قاصد يسميها فسطاط تيمناُ بمدينة الفسطاط المصرية بحكم أنه درس بالأزهر الشريف ولكن قالوا الناس زمان حرفوه عشان إسم الفسطاط كان صعب عليهم ينطقوه صاح واتحرفت لفطيس .
والله أعلم

[عارف عبد الرحمن]

الشكر للأخ عبده وأتمني أن أكون قدر الثقة التي أستشهد بكلامي ولا عليك تاكد من أنو كلامي صاح 100% وكمان الواحد بالو أرتاح لمن لقي ليه ضهر في فطيس ..يعني بفهم هنا كفيل .. شفتو كيف الغربة حاااااااااارة ..وفي أنتظار منعم .. وعند جهينة الخبر اليقين ..عشان تاني أجي عبدالله خير الله أقول زول زعلان من أهلو قام زرع حلة وقامت شجرة والشجرة عييييييك لمت خلق الله والزول دا كان عندو تيس .. ايوه تيس عدييييل كده والناس أقولوا مافي زول في التيس بدل أسم الزول الزعلان .. التيس ما شبعان وراقد قفا وأجرجر في دقنو ساي .. لما بقي أشهر من سيدو .. أها بقت من الزمن داك فتيس ..بس في واحد عندو لحمية وبتنفس بخشمو تاء بقت طاء عشان كده بقت فطيس . ملحوظة المراجع التي أستندت عليها في بحثي وتقصي الحقائق من طبقات ود حريش وممنوع الهبيش المتوفي عام الكديسة خنقت وما لقت زول ساي أديها موية .. أها ما جبتها ليك ياعاطف..

[عبده مصطفي إبراهيم]

هو ها ما تلغبتو الكيمان نحن في موضوع الفرضي....إسم فطيس دا مكانو بي غادي
وليكم كل الشكر

الاخ عارف اطمئن انتو صرتو من العائلة المالكة (عائلة ودنورين الكبير ) فما عندك مشكلة .. وبعدين انا قابلت الاستاذ الطيب محمد الطيب صدفة في عيادة دكتور علي محمد عثمان الفاضلابي (خال رحمة الله عبدالقادر) وهو رحمهم الله جميعا كانوا مهتمين بالتاريخ والتراث وذكر لي الاستاذ الطيب ان الفرضي اصلا من منطقة القضارف وله احفاد هو التقى بهم وهو مدفون في هذا القبر وليس بيان كما يقول بعض الناس ودفن قبل ان تكون فطيس لأن ودضيف الله عندما زار هذه المنطقة لم تكن هناك فطيس ولكن الفرضي موجود وذكره في طبقاته ووصفه (غرب ام عضام او ضهرة ام عضام وصعيد وادي شعير ) ,,,,
تخريمة مبارك سعد ربنا يديه العافية لما بدرالدين اتزوج وهو يبارك لي الزواج قال لي ماعندكم حظ ماحضرتو زمن الفرن كان رغيفكم ليهنا وأشار الى انفه

[عبدالمنعم]

Originally Posted by عبدالملك مصطفى

يا أخوانا كلامكم ده سمح شديد ولو أديتوني فرقة معاكم بقول ليكم العندي وأنا زي اخوي الكاشف ود عبدالرحمن ؛ المهم مرة قاعدين في الجامع والشيخ المرحوم محمد ود الزين الله يطيب قبره قال فطيس إتأسست سنة واحد لكن واحد دي قاصد بيها شنو الله أعلم هل سنة 1901م ؟؟
المعلومة دي سمعتها منه شخصياً لكن قصة الإسم والله أعلم سمعت أنه أبونا الشيخ الحسين الزهراء كان قاصد يسميها فسطاط تيمناُ بمدينة الفسطاط المصرية بحكم أنه درس بالأزهر الشريف ولكن قالوا الناس زمان حرفوه عشان إسم الفسطاط كان صعب عليهم ينطقوه صاح واتحرفت لفطيس .
والله أعلم

الأخ عبد الملك لك ودي وتقديري أعتقد أنه كان يقصد 1301 هجرية لأن الشيخ الحسين توفى قبل 1901م لأنه توفى في السجن أثناء فترة الخليفة عبدالله ونهاية دولة المهدية كانت سنة 1898 معركة كرري إذن فطيس تأسست سنة 1884 أثناء فترة المهدية

[عارف عبد الرحمن]

يعني الواحد أتكلم ساي وبعين قوية ..الواحد كده أتفر وهاك يافطيس أمانة ما جاك زول أهلو أسياد البلد عديييل ولحدي أم دوانة كمان .. وأنا لقيت لي ضهر يا ود البدوي وقالوا أنت كمان عندك عرق أم دواني .. يعني نوم قفا ونقنق ساي .. وعبده عاوز أطردنا من البوست بتاعو وقال دا مخصص للفرضي وكده .. يلا خلونا ندورا بهناك مع عصام .. وشوف ليك واحد تاني أكتب ليك عن فرضيك دا يا عبده بوست وأتقفل ..

[عبده مصطفي إبراهيم]

عارف اااذول بوست الفرضي إنقفل كيف....دا موضوعو طويل.....لازم نجيب خبرو
كان ذول وادي شعير ساهل نجيب خبرو
بس حكاية إتبين دي ما راكبا في الراس
داير ليها بحث