الله يكضب الشينة

[عارف عبد الرحمن]

الشينة منكورة.... الشينة الفعل الكعب..والنضم الكعب..والقول الكعب... والسواة الكعبة...الشينة منكورة....وكل شي شين يسويهو صاحبو بي ينكرو ويبلع السيف متني....وبلع السيف وهو متني من اصعب حالات بلع السيف.... اسهل حاجة يكون مستقيم وواقف علي حيلو....والاسهل منها يكون مكسر حتة حتة...اما متني فهي صعبة جدا.... وتطلق مقولة بلع السيف متني للزول البينكر الفعل الكعب... ويحلف انو ما سوا كدي..مع انو متأكد وعارف والغيرو عارفين..... الله يكضب الشينة... المجتمع والبلد...كلهم في ختر كبير.... بلد اطرافها مولعة... اي طرف احمى من التاني....ونحن في النص قاعدين نتسبّك علي النيران الهادئة البتصلنا من الاطراف زي حلة(القطر قام) القطر قام تبيخ فيهو الخضار علي اللحم على البصل علي الزيت علي الملح على البهارات كلها مع بعض ويشدوها فوق النار ويرخو ليها النار ويقعدو يرجوها لمن تتسبك... والحلة المسبّكة احلى طعم....ويكون اي زول داير ياكل منها....ولما تنزل من النار تلقى الايدين قعدت تختف فيها... الله يكضب الشينة... مجتمع اتقسم نصين ..نص قاتل الجدادة وخامي بيضها....والنص التاني بربي في الجدادة عشان تبيض ويكتلها النص الاول ويخم البيض.....نص ماسك في نضم جدودنا زماااااان..ويعمل بيهو...ونص رافع النضم شعار عشان يغش بيهو النص الاول.... وياكلوهم ... الله يكضب الشينة... شغالاين بالفارغة....نتباهى كل قدر ظروفو...وقدر قُدرتو.... ناس تعرس وتصرف صرف من لا يخاف الفقر.... وناس حايمة كايسة حق فطور الوليدات البايتة القوا....اطلع من الصباح ولحدي ما تصل مكان عملك..شوف كم شحاد يعتر لك فوق دربك...شحاد ...شحاد شحدة صُرمة...وشحاد هواية.. وشحاد مزونق لحظة...وشحاد قايل انها دي شغلانة سمحة وساهلة ... وما بتخجِّل... وزمن الخجل قبَّل غادي...الله يكضب الشينة....دكاترة تقراء وتتعب وتدخل جامعة وتتخرج وما تلقى شغل..وناس يالله يخلصو مرحلة الاساس ويستعجلو متين ينتهو منها ويشتغلو دكاترة.... ويسو عمليات ..اربعة سنوات السنة ورا السنة.... داخلين ومارقين في مستشفيات الحكومة...والحكومة ما فايقة...الجامعات لشنو ؟ والمصاريف فوق كم؟ وضياع الوقت ليه؟... ما دام الميكانيكي ممكن يبقى دكتور... والدكتور شغال حلاق في الحلة...والمهندس شغال ترزي...العجلاتي ممكن يبقى مهندس وياخد رقم هندسي... الله يكضب الشينة....السجون بقت زي الفنادق... تدخل بمزاجك.. وتطلع بمزاجك..... سجون مختلطة... رجال حايمة وسط سجون النسوان..والنسوان الواحدة تبيع جنياتها الراس بي مليون ونص...تبيعهم وترجع بيتها وتخت توبها تحت راسها وترقد تغرق في النوم..كأنها باعت ليها جريوات كلبة....وتفكر تحمل تاني وتشحد الله يجو تيمان عشان تلحق السوق.....الله يكضب الشينة...!!!

[قفل الباب:-

يرافقني سرابك أريحيّا

فأغمر بالرحيق و بالملاب

سراب أسمر القسمات هان

نديّ اللمح ورديّ الحباب

يزوّق لي الرّمال جنى و ظلاّ

و يغمز بالكؤوس و بالشراب

و قطّف ما ينور من طيوف

على أجفان ناهدة كعاب


منقول : د: عادل الصادق المكي

في ظل غياب المؤسسية والوازع الديني وغياب الافق المستنير وكل شئ غايب دا بكون نتاج طبيعي وليس بمستغرب ولا مستهجن وربنا يكون في العون

[عوض خضر]

الله يكضب الشينه