قصة من الواقع السوداني

اخوانا القصة دى عجبتنى فقررتا كل مرة انزل ليكم جزء بقلم الدكتور طارق جبريل
للعلم قصة مكسيكية يعنى العندو حقة تمباك يحافظ عليها والعندو شاى فى النار يطفيهو والدعايات كل 5 دقائق فاصل اعذرونا لروعة القصة قمت نقلتها بىضبانتا
نقول بسم الله نبدا

الحلقة رقم (1)
ونحن في الثانوي انا وصحبي عوض دا كنا شغالين طلب
مع بناي كدي ايدو خضراْء تحلف تقول الزول دة ساقية يمين منتبدأ الاجازة ونحن مدورين
يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
غربل الرملة يا ولد... الخرصانة وصلت ولا لسا... بكرة حا نعمل البيم...
المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة
ونحن مقدمين للجامعة بعد ما امتحنا الشهادة..
عوض صحبي دا شليق شلاقة عدوكم.. قومنا يوم ونحن ماشين علىالعمارات جاب اورنيق الجامعة معاهو
قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...
المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدومو وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..
المهم كملنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالوليك شيل نفسك وتاني ختو السهم يصل الصحافة من الديم من شدة ما زردناها فول...
عوض على غير عادتو يغني ساكت في الطريق... المهم لامن وصلنا لقينا ليكم بنيا سمحي جنس سماح واقفة منتظرانا... جملة الايمان وجيها من شدة ما ناعمه لو كبو في وشهم عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟
انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة..
قامت قالت ليه: ياخي انت راجل مكافح خلاص... الكلمة دي وقعتنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....
ونواصل



2)
اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا...
تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوض... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني...
المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل...
المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...
ونواصل






(3)
عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الخرطوم دي كلها هنا كان رفعها... بس مرات لامن البت تبقى ماها في وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي (ابوعديلات عشان ناس كردفان)... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها زرة زرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة

فاصل ونواصل

[عبده مصطفي إبراهيم]

لك التحية أخ ياسر ....... وهاردلك ما حصل للهلال امس .... وجعنا بالحيل
هذه القصة تم سردها بمنتدي القصص بواسطة عبد المنعم
صبي بناي ...............

ولك التحية دايما