فطيس وللا الصفا ؟

[د.هيثم ابوعاقله سالم]

لأول مره اكتشفت اني ما من مواليد فطيس
ودا حصل لما كنت اقوم بتسجيل بياناتي
في استماره الرقم الوطني
ومن البديهي كتبت مكان الميلاد فطيس
ولما جيت للتحري مع السيد الضابط
سالني وين اتولدت فقلت ليهو فطيس
قام قال لي فطيس دي تبع شنو
قلت ليهو تبع محليه الحصاحيصا _
اداريه طابت او حاجه بالشكل ده
فبحث في جهاز الكمبيوتر الموجود قدامو
وقال لي فطيس دي مافي
وقلت ليهو كيف يعني
اودخلت معاهو في نقاش طويل
بانو فطيس دي بلد قديمه وكبيره ومشهوره كمان
قال لي والله العظيم بلدكم دي مافي
وفجاه اتذكرت الصفا , وقلت ليهو كدي شوف الصفا
طوالي قال لي ما تقول كده من قبيل
]طيب انت مولود في الغربي وللا الشرقي وللا فرج الله؟
وقلت ليهو الغربي
المهم بي قدره قادر لقيت نفسي ما مولود في فطيس
والله يجازي اللي كان السبب
دكتور هيثم يريد ان يعرف انو مولود وين فطيس وللا الصفا

[عبده مصطفي إبراهيم]

الاخ الدكتور هيثم...الإجابة علي سؤالك دا.."مبارك الكودة" ...ما يقدر يلقاها ليك
المشكلة انو في كل المؤسسات الرسمية....سموها الصفا
وأذكر انهم اوهمونا بأن يضعو قبلها كلمة مدينة
وهي لازالت قرية فطيس
وكونك تلقا نفسك ما مولود في فطيس
دي حارة شوية
شوف الكان السبب وتعال كلمنا

[عارف عبد الرحمن]

تحياتي أخونا الدكتور هيثم .. سؤالك وجيه في محلو ؟ بس بسألك سؤال ماذا سيكون الحال لو صار الأسم فطيس ؟ هل ستكون نظيفة .. وبها خدمات ؟ هل المياه المتفجرة والتي من المؤكد عند توقف انسياب الضخ سوف ترجع وبها آلاف البلاوي وأنت سيد العارفين .. هل ستكون البلد مخططة ونظيفة الشوارع .. ولا أحد يتعدي عليها بالزيادات . ؟ هل الزرايب التي تجاور المنازل ستخرج للخارج بعيداً عن الأنسان ؟ هل المدارس ستجد الرعاية والأهتمام ؟ هل سيفي رجب بوعده ولم يضحك علينا مع زمرته ؟ هل ستكتمل المستشفي ؟ هل سيتفق أهلها علي كلمة سواء من أجلها ؟ هل سلبيات البلد في أسمها أم في ناسها .. فلتبقي صفا أو فطيس أو الحسين الزهراء .. فليكن الأسم ما يكون .. فقط لو أهتممنا بالأيجابيات ونظرنا اعمق من الأسم .. ماذا يضير وماذا يفيد الأسم .. بالله عليك بعيداً عن الحساسيات والعواطف.. أيهما أجمل .. فطيس أم الصفا ؟ ولماذا ؟ وما معني كل كلمة ؟؟ معني حرفي ـــ لا أقصد المعني المعنوي أن جاز التعبير ؟؟

[عبده مصطفي إبراهيم]

الأخ عارف مساك الله بالخير
مع إحترامي الشديد...لإهتمامك بأمر البلد وحمل همها
ومع إحترامي لكل هذه التساؤلات لكن ليس هذه من شأن إسم القرية
ما تعاني منه القرية ....معاناة بلد بي حالو
وحتي سؤالك الأخير ...إيهما أجمل....فهو في غير محلو
لأن الأمر...يهتم...بإسم قرية فطيس..الإسم التي عرفت به
فكأنك تقول إسم باريس أجمل من إسم لندن "رأي شخصي"...يلا نغير كل الأسامي
"بعيدا عن الحساسيات والعواطف"
السؤال الأهم....لماذا تم تغير الإسم
هل لأن الناس "خجلانين" من الإسم
ولا ما لاقين ليهو معني
...............

[عارف عبد الرحمن]

تحية أخونا عبده .. أنا قصدت لو كان همنا كيف أمست فطيس وكيف أصبحت .. ولو تجادلنا في الأسم .. حكوة أم ضبيبينة .. أم أيهما الأول البيضة ولا الدجاجة .. حتي نلحق أمات طه ولا بيزنطة .. من غيرها لم يفرض التغيير ولم لم يكن هناك من وافقه لما أستطاع كان من كان يغير ذلك .. وهم برضو من أهل ابلد ولهم رؤية كما لك ولي وللأخ هيثم .. هل يسكننا الحنين أم نحن نسكن الحنين من فينا يستدر الغرائز لنخرج الحلم من الكابوس المرهق للنوم .. ولم يغمض لفطيس أو الصفا جفن .. ونمزق التفاصيل الصغييييييرة تنقيب وأثراء قد تحكمها المعرفة وتنمحي من لدن الفهم الضبابي ـــ لا أعني أم دوانة ــ وقد تكون الدراسة محض صدفة وأعتوار فكر يشوبه السقم والمسبة والحاجة .. وما زلنا نقتل الوقت في من لا يهتم بالمبادئ ولا القيم ... ويبقي السؤال قائماً لماذا فطيس ولماذا الصفا أم الحسين الزهراء .. وأنسان البلد هو نفسه داخل هذا القالب الذي لم نتفق علي أسم له ـــ والذي أجزم لن تغيره القوالب التي نريدها له والأسماء دلالة علي المسمي .. هل نحن أفاطسة أم صفويين .. أم زهارنة .. أما الأبارسة ـــ نسبة لباريس واللندنيين لا أظنهم يتوقفون أما هذه الأشياء .. أهل أم ضبان عندما غيرها نميري لام ضواً بان فرحوا أيما فرح ولم يحتج احدهم بتغيير الأسم .. فيهم من صار ينادي بالقديم وآخرين بالجديد .. ولا يضيرنا شيئاً نحن في ذلك فطيس فطيس صفا صفا شنو يعني ؟ ليس في الأمر عجب

[عبده مصطفي إبراهيم]

ولا يبقي السؤال لماذا فطيس ولماذا الصفا...بل يبقي السؤال لماذا لا لفطيس ونعم للصفا
مع الإحترام لكل ساعد في إختيار ذلك القرار... وأكيد كانت لهم رؤية محددة...وبرضو إحترامات لكل للاراء
ولكن يبقي السؤال ...ما الغلط في إسم فطيس....مع العلم إن هناك قبيلة بحالا....في الخليج.. منها "بن فطيس الشاعر"
وهنا وادي "فطيس" في فلسطين....ولا أدعي إن هناك علاقة بهذه أو تلك... ولكن وهذا إعتقاد شخصي
إن تغير الإسم دائما بكون... لحرج ما... ولا أعتقد إن في فطيس كان في ذول بتحرج من إسم فطيس
ومع إحترامنا للناس القلت غيروها.... فقد نتسائل بأي معايير ...كان القرار...ولماذا ... قرية الصفا...وليس "قرية أم صفقا عراض 2" مثلا

[د.هيثم ابوعاقله سالم]

[شكرا اخي عبدو ود فطيس
شكرا الاخ الراقي عارف علي المداخله
وعلي المفردات اللغويه الشيقه
اولا من الموكد انو فطيس ما كانت موسخانا وللا الصفا هسي حا تنضفنا
وثانيا والسؤال مشروع هل
ومع احترامنا لمن اراد التغيير في ذلك الزمن
من اهلنا الكرام هل نحنا اقتنعنا بالتغيير وللا استفدنا منو
وللا كانت عباره عن صفقه وساوند ثم انفض سامر الحي
واكاد اجزم بانو في ناس ما عارفينها الصفا وللا الصفاء
وهل حصل في زول مننا مشي يوم طابت وللا الحصاحيصا وللا مدني
ومشي سال قال داير موقف الصفا
وللا كتب اسمو في منفستو الحافله وسجل السكن الصفا
وللا في كمسنجي قال الصفا وادي شعير طابت
يعني نحنا لا رضينا بالقديم ولا رضينا بالجديد
وهل اسم فطيس محرج بل انا اعتقد العكس
لانو يمكن يكون اضاع الهويه بتاعتنا
وخير مثال قصتي مع الضابط بتاع الرقم الوطني
المهم فطيس الصفا المروه القصه قديمه
وما فارقه معانا كتير
وربنا يقدرنا كل واحد في مكان عملو يقدر يقدم حاجه
للحله ولي انسان الحله البسيط
مخرج: يا عارف لو جبت معاك شنط من السعوديه وكتبت فيها
السودان الحصاحيصا الصفا ما بتلم فيها تاني[
/]http://shendi.ahlamontada.com/t870-topic
يا عبدو شوف الموضوع دا عن غرايب اسماء المدن والقري السودانيه]