|
|
08-09-2010, 01:23 PM
|
#2 | ||||||||||||
|
مشرف المنتديات الأدبية
|
عوض خضر الله يديك العافيه وبمناسبة حمِّيد باين عليك شوية شويه ناوي تخلينا نهتف عاش كفاح الطبقة العاملة ألف شكر على الملف الجميل و الأداء الرائع لعثمان عبد العظيم وهو شقيق الراحل يس عبدالعظيم (كيفن أصبر قليبي ) أول من تغنى برائعة حميد التي تتناول شريحة مهمة من الطبقة أياها قلما يلتفت إليها شاعر خلاف حميد. لامتين لامتين يا هم تشرِّق الزمان الساعة سايرة المكان فوق ارض دايرة الحديد والواطه فايره سيل عرق نازل يغرق راسو مقطوع حيرتو حايرة فكرو واقف بين يطرق وبين يشيل جالون يشرق يمسك المنجل يطرق ينقر الشاكوش يطربق حمتو شرق حمتو شرق حمتو من اوليك تشرق تاني من اوليك تغرب حمتو ما ولدوك مهندس حمتو ما خلقوك مدرس فيك بوم الهم معشعش ولا متين للراس تنكس يطرا لامن كان ابوهو يدي ردمة من الحديد وياما قام زير عرقو نقع وجسمو نبق بالحديد ماب يهمو قميص مرقع والله سروالا جديد حمتو مرة سال ابوهو لم شفع كاتلوهو يابه وين طينا وارضنا قام ابوهو انضارا غادي ورش بي دمعو الحدادي حمتو صاقع وين ارضنا ووين دواليبنا واوضنا تاني ابوهو انضاري غادي ورش بي دمعو الحدادي انت مالك يابه ساكت ي مالك الدقاك منو قام ابوهو اسغفر الله وشالو قرشين قالو يالله اشتريبا حلاوة يالله حمتو راح باع الحلاوة في الطريق حاشوهو شفع من قبل يصل الحدادي نوحو كان سباق واسرع ورا ابوهو سبب بكاهو وبي عقاب صوتا مقطع قام ابوهو عشان يحصل لاحظ الخطوات بترجع لي طويقات غلبو قفل وكفلت القلب الموجع في جنينة سيدي حايم بين ضلال الرامي يرتع جنب بهيماتا تقنقت كايسي حن اماتا ترضع حمتو برطع للحدادي لم فجاءة لمحلو شفع قدرو جاي من القرايه للفطور شان تاني ترجع في الصريف انضاره لابد والنفس حاميهو يطلع بي بشيش دودر كلابو وفوق خطاهم ليها شكع حمتو قرقر لم قرقر الضحك دنقربو صنقع ما انتقم من خصمو هسع وبكره لي كلبينو ودع حائط الايام تكسر حمتو شب وحمتو يكبر وكل مايكبر الصراع البينو يكبر حمتو سب ووه زمجر وكلما يودر هم قبل ما حمتو ينسر يلق تاني التحتو بنقر جا المطر في ليلة هظر ولي كرارق حمتو كسر لي العفيش والعدي شتت والحديد الراجي صقر في جنينة سيدي صنقر تحتو كوم اطفال مغبر يطرا لامن ماتت امو مالقا الناس البحمو لا لقا الزول البصيح ولا لقا الناس البجمو لا لقا الناس البعزو ولا لقا الناس البصلو ولا لقا الناس البدفنو رغم انو وانو انو هم ما مقصر كلو كلو مرت الايام درايش وحمتو محتار كيف هو عايش جاري في الارزاق يحاوش روب وقع بيناتا دايش حمتو مات بين المعايش مات وسبلتو الحدادي ونعشو شيعتو الانادي مات وما طقالو صايح لا خبيرو طقشلو رادي مات وما نعتو الجرايد لا بقتلو قبير بلادي مات مع الانسان وسطنا يوم صبح عالمنا مادي لامن الصلاي تبلو في قفا الجامع عبادي لم صوت الرب تكسر والقيم باتت قلادي حمتو في الاخرة ويعاين للبيوت روق الجناين زي لنيبة وسط رتاين حمتو بس يسكت يعاين بس يعاين لي الجناين
|
||||||||||||
|
|
08-10-2010, 07:30 AM
|
#3 | ||||||||
|
لا يامعروف ذهبت بعيدا المرحله تتجاوز المواعين الضيقه ولكن حمتو قصيده كانت دائما تحسسني بان هناك من هو اسوأ حالا مني والحمد لله كانها تجعلني عندما يضيق الامر انظر لمن هم يعانون كثيرا فاحس من خلالها باني احسن حالا ومع انها تجلب الكثير من الانفعالات الا انها تبدو كصوت مغلوب علي امره يصدر من بئر سحيق استمعت كثيرا لياسين في الفكي هاشم مع بعض الاخوه وفي بعض بيوت العزابه في الديوم وكان دائما طمبوره في خدمة المسحوقين رحمة الله عليه ولكنه في القعدات يتجلي اكثر حقيقة انا اتفاعل مع المرحوم اكثر اذ ان قدرته الخارقه علي ايصال المعاني من خلال صوته وطريقة ادائه تجعل منه ( وهذا راي شخصي )من افضل المؤدين بالطمبور عثمان رجل مبدع ولكني استمعت اليه قليلا ولكنه يبقي من ريحة المرحوم التقطت هذه الاغنيه مصادفه وانا ابحث عن نص لحميد ورغم سوء التسجيل لكنها جعلتني اعود لايام خلت ياسين رجل مهجس بهموم الناس وهذا الهاجس ينتقل لطريقة ادائه الاغاني المتخمه بالهموم مما يجعل من الاغنيه سفر ونحيب وملامسة هواجس وتقارب ومصداقيه واحيانا حكاية بائسه ولكنه ذات مغزي حبيب الي النفس |
||||||||
|
|
|
08-10-2010, 09:16 AM
|
#4 | ||||||||||||
|
مشرف المنتديات الأدبية
|
الأخ عوض طالما ذكرنا المرحوم يس عبدالعظيم والمبدع محمد الحسن سالم حميد ، لابد من إيراد مرثية الثاني للأول مرثية الراحل ياسين عبد العظيم شعر حميد حُزُنّا عليك بيبقى غضب غضب مشروع تدودي حمامة في دبش الغنا الفاسد مناحاتو ضَرَاعاتُو التّضاضِي تئن عشان قلب الحبيبة يَحِنْ أجل، لا حنّ لا كانت حبيبة آ خوي ولا لما الحبيب إن كان مسبّب عبرتو وراجيكا يا خايب الغناوي البيش تنوح وينوح.. ويسقط حُبْ إذا ما حُولَقْ الرقراق عليهو يموع ويسقط لحنك الرّاكد .. كمنجاتك سلوك طمبورك المرخية يا مزوِّر جواز العشق يا ذاك المغني الياهو يا مُنْدَشْ وكِت فتق القوافي الجوع تسقط غنوتك تسقط.. وأقيف شاهد عليك وعلي أنا البشّرت لحظة طيش والبت الأبت ترقص، تعيش واسقط.. ، أيا هادي المُغني الفنجري المعلوم نخيب نسقط إذا قصّرنا يا وتر الفقارى وراك وغيّرنا الغنا المحموم. غناك الدّغري يا دغريتك المبثوثة شِقّيشْ ما مشيت باراك غناك العينو ملياني وشيهو محل يروح واحد سمح مشروح وإنت محل تروح واحد، وِشَيْ مطروح.. ، سلام في سلام تمام في تمام.. تمام فلاح.. تمام عامل تمام إنسان وماك ساهل متِلْ ما شعاع نزل داخل، بيوت ناساً غبش بالهم، ملاها ثبات وراح راحل، جناح الحِن ويوم الليلي بات مجروح أيا فارساً يا مجهول، وراك كيفِنْ؟ سَمِحْ. كيفن غنيواتنا؟ إذا مرقت براها بلاك، منو اليسرح معاها بلاك..؟ تصل لي مِيسه زي الغيم. تَضُل ما تضِل واللا براها يتلقاها دابي الجو .. هجاير الليل .. طشاشات الصعيد. وسموم تسوي الهوْ.. تجفل غادي.. تجفل جاي.. تقع لا حيلة بين بلدين بلد جملة غُنا الطمبارة بلد بي جاي: نشيد ياسين. ، نشيدك كالتعب مارد مهبهب بالغضب واقد غضب يا وليد، حُزُنّا عليك، تغيب يطلع بدل فاقد.. أيا ولداً حزُنّا عليك يقولّك: عَمِّرْ الطمبور.. وسِنْ سِلْكَاتُو بين نغمين وجُزْ رقبةْ غناوي الزِّيف .. ونَشِّن تالا ليل الرِّيف: ظلاماتو.. عذاب أهلو.. معاناتم محل رحلو.. وأمش ما تقيف .. أمش ما تقيف.. فيا "عفّاضي" ديل فِقَرَاً عمار بيتم خراب بيتنا فيا طمباري يا ود الدِّويحية الغبش جاهد أيا ولداً مستّف بي تَرَا العفّاض .. ملفّح بي سماواتو معمَّر بي غد الأطفال .. مدرَّع بي معاناتو هيا انسِف قبرك الكاذب وخُط بالدّم علي الشاهد: تموت يا هادم الغنوات .. تطق بالهكمة والدّكمة يبق في محلتك إنسان يشر ضو الحياة الواعد نشيد راعد كما الياسين.. نشيد: تَفْضَلْ غُنْوَاتَكْ ضُل قيلَةْ ضد شمس الفجعة القلاية ترتاح أو تاخد أنفاسه الناس الجاية من الورشة .. التُرَب .. السوق .. الطّاحونة الجّامع وطرف الانداية.. فزعوك الفُقَرَا أياديهم تالاها امتديت كارديق. إنطرحت أصابعيك رابون .. طالت آهاتك بنبون يا سَكْرَة وحضْرَة ومُصلاية من لاقيناك عرفناكْ .. تربال أيامنا وغنّاية طلّاع النخل الكَدْرُومِي الضام على قلبو قضيتنا كالأرض كما الجرح اليومي ضافرين رامْلِنْبُو هويّتنا ** مشهد حواري سمج: - الغنوة دي ظاهرة سياسية، وحا تودي رقبتك في داهية.. ولو مرّت بكرة البرنامج في ناحية وكلّنا في ناحية.. - طيِّب والتاني؟ - أقول ليك: أمسك طمبورك ده عليك.. غن في القعدات .. في الرحلات .. في الحفلات المختصرة غن... ، وغنّيت في كل الساحات.. بالنّفَس الحار الإنساني برّدت حشا أولاد الفقرا .. رقّصت بناتا السّمحات أبشِر يا باشِر من تاني .. عُقُبْ رجَّعتَ الرّايحات يااا الله عليك يا ياسين .. أقْفُر خُطا غيمتاً ما جات ** فاض نهر قضيتك فاض فاض ضد سِكّةْ عرق الإجهاض مركب شهدانا الجايين .. هدّن بنا قَبَلْ "العَفَّاض" نلقاك يا قاعد تنوضا .. فوق قيف الغُبُشْ الفيَّاضْ يا واقف حيلك وتِنْقَضّ .. على آفةْ الزّمن الرَّضْرَاض ويا إمّا رَتُوتيكْ والعرضة .. وقدّامك عرب العفّاض الزّحف الصحراوي.. الأرضة ... المرض.. الهدّام العاضّْ تاريخ الجُزُر المنقرضة ..الفقر الهتك الأعراض عينيك تطشِّشْ منقبضة .. العالم ينشرَّ بياضْ تتلفّحُو خالي من الفوضى .. والعسكر وكل الأمراض زي زيَّكْ زيّك ماب نرضى .. الموت يا عريس العفّاضْ يا مقدّم باطفال الرّوضة .. شُويِمْ يا عريس العفّاض يا سِبْحَةْ أُسُرْ الطمبارة والأيدي الشّهرت جيتارا للآخر نازفة محاجرنا بالغضب الدينو دفاترنا والطبقة وأمي وجيفارا قُمنَا وشدّينا حناجرنا ما بينك وبين "فكتور خارا"..
|
||||||||||||
|
|
|
08-10-2010, 09:19 AM
|
#5 | ||||||||
|
الله يباعد الغناوي البيش |
||||||||
|
|
|
08-10-2010, 09:21 AM
|
#6 | ||||||||||||
|
مشرف المنتديات الأدبية
|
وأيضاً رثاه الشاعر إبراهيم ابنعوف ان كان ما الأجل بدرى إتكتب فى اللوح أوكان النفوس تتفدى روح بروح ماكنت مـٌـت ياغريد بلابل الدوح وا حى وا وحيح قلباً عليك مجروح *** بنوت الشعر الليلة ليه ساكتات هيّلن الرماد كبن علي القافيات ابكن ومنحن ونوحن مع النايحات واثكلن الجنا الما بيتولد لمات فى ليل الغلابة وحمتو والشافعات يالله سون الحى ووب عريسكن مات وماتت طيبة الوجه التملى صبوح وا حى واوحيح قلباً عليك مجروح *** قولو ليه يالنجم السطع فى سماك قبت بلا خبر شن شفتا فى دنياك صغير مابقيت مالو القبير ضماك لاشفتا الجديد لانحن سيرناك واسفى الشديد واسفاً عليه صباك يالقطع قلوباً كانت عزاها غناك قطع كبد ابوك وامك الرجاك اخواتك يجرن فى المناحة نباك واخوانك منو الفيهم عليك مابنوح واحى واوحيح قلباً عليك مجروح *** ماكت داير اجامل فيك يوم الشين قصدى القاك عريس بين العديل والزين قصدى تهزو صوتك والجنات راكزين وقصدى غنى البنات والسيرة ليسين ضجه الفرحة فوق عتب الفريق عرزين كربة وابكر والعفاض شمال ويمين راجين يوم جديدك وكلهم دايرين يردولك جمايلك يالوليد الزين وياريت كت عشت وكل الامانى تروح وحى واوحيح قلباتً عليك مجروح *** ليشن يالرميلة شمالنا مايحزن باينة احزانو فوق نخلو الانتنى ودندن فى النيل والجروف وفى الصوبن وعدن فى وش البنيات الملن وماجن حزين اداك وليدو المافي ليه ثمن ويابخت التراب الضمه كل الفن وضمه اجمل رسالة شموخ وحى واوحيح قلباً عليك مجروح *** يسن جاك غريب اغفرلو يامولاى غفران زلت العبد الدوام نساى سحاب الرحمة فوق قبرو اليكب بكاى ودخلو منزلة عبداً تقى صلاى وعوضو فى شبابو الجنة ياعطاى وزوجو من حسان كان للحسان غناى وانت الباقى ازل وكل الخليقة تروح وحى واوحيح قلباً عليك مجروح
|
||||||||||||
|
|
|
08-10-2010, 09:23 AM
|
#7 | ||||||||
|
معروف انه نوح قريب كان حميد كان يعتبر الفقيد فلذة كبده |
||||||||
|
|
|
08-10-2010, 11:37 AM
|
#8 | ||||||||||
|
شعب اليقان
انيقنت من تالاك... انا انيقنت لا آسف ولا محزون على العمر القضيتو معاك براي باقي الدرب بمشي وخطاي تعدم الهدّاي... أكان السكّة حارت بيْ وأكان كرّت سموم الصيْ... على نسم العشم جوّاي قوافل صبري ماب تضهب... وأمان حاديها مو الدوباي خيول قبّال دا ماترّت ولا فرّت من الحوبات ولا حرّت ولا انشدت ولا صدّت سروجه بلاي وأعود من دربك الدردار على شعب اليقان مسنود وأحرس العرسة من تالاي وريح شجن الليالي السود صه .. صه يا الحشا المهرود وهبِّد غلبك الوقّاد قبل ما يرقدك هبّود عشتو معاهو ما هو أجواد زماني بلاهو يبقى يجود …. …. …. عيشكن يا قماري عليّ أنا القطّت تقي دنياي وعشِّكن أبني بي إيدي أنا البين الرياح جاي جاي شرطاً ما تقوقن لي قوقيي يبهلن عيني ويوقد في دواخلي أساي "منو العزَّ الحبيب ما لاك وقدَّس لي عيونو السود أكان سوِّيت غناك في عود كان خدّر ملا الواطة وكان فوّح عبير وورود وما كان الزمن طاطا لا وقع انحزم واقود" …. …. …. شيشكن يا قميريات كم من قبلي خاب مسعا وما شقَّ الجيوب ودعا علي جور الحبيب بآيات ولا هتك القلوب ونعا مزارات القريب بأبيات ولا نوّح على الراحن قدر ما ظنَّ في الجايات مظان الخير وجرحو وِعا ونظر قدّام مضمِّد سكتو الموجعه …. …. …. وكتّر خيرو يا أيام وكتّر خيرك إنتي معا ده ما أول صد ولا آخر ود وكم من صد ودادي رعا ويا زارع حياتي صدود عذابي معاك إنّي غمامة وإنت كركي لا محدود ونبت البينا كان لابد يضبلن ما يضبلن كيف وإنت لقيتو عز الصيف صهاديب الصعب صالا نتقت النسمة من تالا نتفت الغيم خريف وخريف حبست تسابو تحت القيف وقطع سرسار جداول الود وصنّه يباب ودابك جُد قبيل وين كت ؟ قبيلك كان يكفِّي رزاز بعد دا إن جيت أوديك وين بعد دا إن جيت وأنا اتيقنت بدري قبيل بعد فرّجت فيِّ الليل ونبّاه الدغش في العين وأنهكت الوداد بالصد وأشواقي الغبش بالبين حليلك كنت زولي أنا وملاذي الفي السمح والشين تموت آهاتي لما تبق متل جهر العديل والزين …. …. …. خطاي فوق دربك الدردار تشولت من متين ومتين مورقت البيوت بالود نورقت الحصاد كان صد وكان لابُد حليلي تصد نان تقعد تناجي الطيف بلا البيدودي في النيران وما من خلوة لامن ضيفaأشأااا مي كم من شتلة فوق القيف بتيبس وكم حراز في الساب يخدّر يوم بحيرو يصد أمش يعدل عليك الله طريقك لا غلب لا آه ولا نسمع مريكبك تاه وسط لجة زمن جهجاه وأنا الزي الشعوب مغلوب زمان السخرة والملاك أنا العبِّيت مخاليْ ريد وقلت لك يا الحبيِّب هاك أنا القبِّيت لويبي الإلفة ألقِّم في جدَيْ محياك أنا الباسمك ببيت محروس وبي رسمك بقيت مهووس أنا الصبّيت مطيرة شوق رويتك دمّي همِّي ألقاك وجاني الجاني من دنياك ومن تعب القميحي الروس ومن نخل المودة البوص لقيت شدر الهوى النديان مجرد عود وناقرو السوس وما نوحّتَ قُت "يا ملاك حرام رحماك أنا البهواك" ولا حنّيت أزورك يوم أنا الطول الولِف ساساق جمعت أشلاي ولملم روحي من بين ريح زمن فرّاق وقت يا قلبي رغم الغلبِ لا انكسرت قليلة الوعد ولا اندفق وفا العشاق ولا ضاقت رحابة الكون ولا غمّاً نتح حرّاق بحب الناس مشيت مسكون أنا اليي دا وحبايبي يي ديل وشيلتي أماني شايلة شيل وفي إيدي عزاي عصا موساي إذا دنياك حبال فرعون فيا ضل الغنا المايل دريبي عديل أرم موزون على ناساً غبش بالحيل بتآكل من وشي الواطة وتشرب من بواقي السيل وتنطارش جراح الحال تحت موّال معطّر فأل يقطّر من عيون أطفال بتلفح من هجيره ضليل يجم جوّاها زي شبّال يرسِّي الخاطر المغبون يلولي بنسِّي جوع البال خلا الماعون .. تفتِّش في القميرة شليل شليله المافي تربى رجال وتمرق في الدروب آمال تعدل الميل .. وتركز لي رماح الويل وراء درق العشم في بكرة يا بكراها شان ماتكون ويا بكرانا قدر الكون بعد الخيل .. وأشد الحيل .. وأتكِّن فوق تقانت الليل شعاعات الغنا الميمون ... |
||||||||||
|
|
|
08-17-2010, 01:18 PM
|
#9 | ||||||||||||
|
مشرف المنتديات الأدبية
|
|
||||||||||||
|
|
|
08-19-2010, 07:24 AM
|
#10 | ||||||||
|
معروف اشكرك بحراره من وين نكتها دي انا فتشت ليها مالقيتها |
||||||||
|
|
 |
|
|
 |
 |
 |
Linear Mode
