ابو عبدالرحمن

صبحك الله بالخير وتحياتنا ليك كتير


فكرتي عمل لقاء معاك في الضل و طبعا بعد اذنــك.
موضوع الفكره : هموم مغترب
العنوان في الضل : بي صراحه
الغرض : 1/ طرح بعض المسائل المتعلقه بالمغتربين عامه والرابط بينهم وبين الاهل
2/ اتاحة فرصه لكل الاعضاء للمشاركه والمداخله
3/ اذا أعجبتك الفكره سوف تكون بدايه للاعضاء لفتح مواضيع أخري ومختلفه

ومن خلال العنوان واسم الموضوع يتضح نوع الحوار

أخيرا أتمنى أن أكون وفقت في توصيل الفكره بصوره مختصره ، وانا منتظرك

[عبدالمنعم]

الأخ الباقر
إبن عبدالرحمن موافق بدون أدني شك يلا أبدأ أسئلتك على ضمانتي

[عبدالمنعم]

الأخ عارف
هذه فرصة لكسر هذا الروتين الممل والدخول في أشاء جادة ومفيدة في إنتظاركم فالفكرة جيده

[عارف عبد الرحمن]

الاخ الصديق الباقر تحياتي وأشواقي .. أي فكرة تخدم المنتدي والبلد من المؤكد ستكون جيدة .. بس هي نفس فكرة الكرسي الساخن لأخونا عبده مصطفي وسيكون نفس الحوار والأسئلة .. وانا كنت أول الجالسين عليه وبالتالي ستكون الأجابات هي نفس الاجابات .. وبشكرك جداً لأختيارك لي .. ولو أديتني حق أختيار من اراه مناسباً لذلك لك حرية الأختيار ما بين أثنين أخونا معاوية أحمد سالم أو أخونا يوسف سعد .. ودا طبعاً بعد اذنك ..

[عوض خضر]

انت ماشي وين كدا لي ورا الراجل طلبك بالاسم ونحن عايزين عارف عايزين ابوعبدالرحمن عايزين عارف

[عبده مصطفي إبراهيم]

ابو عبدالرحمن ردك في محلو.......لكن أظن الباقر داير يقعد معاك في الضل
قعده في لستك .......في كورنة......... في شارع
يعني ونسة ......وشخيط في الواطه.....وكسير دراب
وامكن يجي ماري بيكم حسن حبيب تقعدو معاكم
أهم حاجة الباقر يمر علي الكرسي الساخن عشان ما تعاد الأسئلة
وعندي ليك رايك تاني يا ابو عبد الرحمن..........نخت الباقر في الكرسي
الساخن..........بي هناك......عشان نكمل ليهو كلام حميد دا
وليكم كلكم كل التحايا والإحترام

[محمد ابراهيم احمد ابراهيم]

نفس فكرة الكرسى الساخن لاكن ياعارف الزول دا دايرها معاك ما تنطط

[عارف عبد الرحمن]

الاحباب الحلوين عبده وودالخضر أنا صراحة ماعندي أي مشكلة للجلوس أن شاء الله جنب البير ونشخبط الدنيا كلها بس الكلام بكون معاد .. ولا ود الخضر مبيت النية بطبخة مع الباقر.. الله أستر .. بس أنا مع رأي عبده نقعد الباقر أول حاجة خلينا ننفضو بعدين نجي لموضوع الضل ودا كلام نهائي يا ودالخضر.. ما تحكها شديد زي ما قال يوسف سعد زي سيداحمد الخليفة

حرم حبابكم جيت ومشكورين كتير للترحيب بالفكره

بعدين يا ابو عبدالرحمن الكرسى الساخن بيختلف معاى في أنوالحوار هنا محصور في شئ واحد فقط وليس مفتوح وانا بي صراحه اخترتك لأنك أكثر تواجد في المنتدى بمعني يمكن عبرك يتم تكملة الموضوع وبعدين الموضوع بسيط زي ما قال ليك عبدو عباره عن قعده وكسر للروتين . وليك الهديه دي فوق هموم الغربه.

طريتك ليل وبرقا في المشارق لال
وبلل العينة زي دمعي المحقن شال
طريت الطيبة طيبة امي
طريت فرحي وطريت المي
وطريت همي وريدة اهل الفريق للقول
طريت الناس
رضيت يا دنيا شلت احزاني فوق الراس
اكان يا دنيا تنجمي
وفي الغربه...
قالو البسمة للتانين ودمعك ليك
وعرق الطيبة عند اهل الحنين دساس
بدور يا ناس
بدور متل الخريف ما عاد بعد غرب
متل خلق الله ما بتفرح بدور افرح
وبعد الصبنة والسفاي
وجلدا في العضم كرب
يجيني رشاش واشم الطين
واكج حرماني فرقان ريدة للغاشين
بدور افرح
واقوم يا ناس
بعد هودت فوق الصي
اعاود لي للبلد والحي واتيقن
واشوف الرحمة شوف العين
يزول البي واقوم افرح
تشقشق فرحة الاطفال ويملوا الكون
نضاره وضي
والحنية الما لاقيها من الناس اشيلها قصيد
واسيها سبيل سبيل للناس
فرح يملي الحنينين ري
اصلو البسمة للتانين ودمعك ليك
وعرق الطيبة عند اهل الحنين دساس

[عوض خضر]

ابو عبدالرحمن ياخوي حرم كان نطيت انا ماعندي مانع افو الزيك انت بهددو بمتل الكلام دا والله لايوجد اي شئ مرتب بيني وبين المك وانما لما رايت الامر

حنيت لشئ يكسر السكون و تعال نتمشي في الغيمه