|
|
10-28-2010, 07:40 AM
|
#1 | ||||||||
|
في ذكري عمر الدوش سر مدفون في صدر النيل ؟
انقضت السنة الثانية عشرة على رحيل الشاعر عمر الدوش وهو ملتف في كفنه المحزون في تراب أم درمان صحيح قد فارق الشاعر دنيا الوجود وجاور ربه ودخل في رحمته ، ولكن من يحبون المدرس عمر الدوش دخلوا في (ليل صبي وظالم) من الألم على فراقه وأنا احد الذين أعطاني بعض من دروس (العصر) قائما أو جالسا أو ماشيا لزيارة الأهل أو الأصدقاء وانا غر فطير في الأسرة (آل الدوش)، فأنت مجبور ان تتعلم منه على الأقل بعض التراكيب والتعبيرات اللغوية، فالمدرس عمر الدوش أول من تخصص ببخت الرضا في اللغة العربية والانجليزية معا، لذا كنا معه في البيت في حالة حصة مفتوحة طوال العام تماما مثل الأمطار في خط الاستواء، وهو يقول انا أنجز محاضراتي وحصصي (بطريقتي) ، لم يقل لنا يوما ان الحياة مدرسة !، ولكنه يعلمك كيف تطبق المعنى، ولم نتعجب منه دوما حينما يأتيه احد الطلبة في معهد الموسيقي والمسرح للامتحان العملي ، فيقول للطالب ما في امتحان الآن . ويطلب من الطالب ان يذهب معه مشوار الى أم درمان لبعض الشأن ويقول له انا ما عندي قروش؟! وسنركب (اوتوستوب) (ياعم) وتقنع انت احد أصحاب السيارات لكي يوصلنا بسيارته ودعك من الامتحان الآن؟ بعد محاورة بين الطالب وعربات الشارع وهو يمد يديه إلي السيارات المارة قائلا يا (عم ) .... (ياعم ) .، وبعدها يركب الاثنان ويتجاذبان الحديث مع صاحب العربة وبعد أن يصلا إلي وجهتهما ينزلا ويذهب الأستاذ عمر الدوش إلي بيته قائلا للطالب انتهى الامتحان أنت عايز مسرح اكبر من كدا تمتحن فيهو؟ هكذا كان المدرس عمر الدوش يشكل البيئة التعليمية والوسيلة الملائمة لتقويم الطلاب واعمالهم ومعالجة درجاتهم ، كيف وان الخريج عنده هو ماكان فعالا في مسرح الحياة وواقع الناس ،فعمر الدوش (صديقي اللدود)، كما كان يحلو له ان يناديني كان يقول لي  أنت عارف في السودان دا لما تكون عندك قروش فأنت في حالة تمثيل لذا معظم أصحاب القروش ممثلين فاشلين) والله شي عجيب يا أستاذ لله درك فأنت دائما (عن المسارح تحكي) آه.... يا مدارسنا ومسارحنا ويا جامعاتنا الساقية لسه مدورة .... احمد وراء التيران يخب أسيان يفكر ومنقلب في اللي ماشين المدارس في المصاريف في الكتب وفي اللي ضاق بيهو المكان هسع سافر اغترب ....... تتخيل يا عمر اخوي هسع أنا مغترب والجميع في بلادي اغتربوا بعضهم داخل الوطن والأخر خارجه : تدخل حي العصاصير أو فريق العمايا او العباسية أو حتى البوستة ذاتها ما تجد من يعرفك! تمشي بيت المال تلقي البلد منفي تمشي أبوروف ما تلقى واحد حافي حالق أقول والشمس في عز الامل تهت ومشيت أقول يا نحن يا انتو وبكيت مواعيد يا صباح من غير وسم تهت ومشيت ما ضلمتْ ما بتْعْرف الزول البِجِيك ولا البجيك بيعرفك حتى الشبابيك والزوايا الكان بتجمع في حناياها الشكوك ضلمت اهو النيل الصبح مبول اهوالقمر الخصي وأهبل والعن ياخي ايه فضل صحي الايام بتتبهدل اهو الأيام بتتحول ولكن (سعاد) لا وألف ألف لا يمكن حتتحول مخرج في هذه الأيام تجيء الذكرى الثانية عشرة لرحيل الشاعر عمر الدوش ومازالت بعض بيوت شاعر البطانة الحاردلو التي كان عمر الدوش يرددها لا تغادر سمعي حيث يقول الحاردلو: يارب الوجود انا قلبي كاتم سرو مالقت اليدرك المعنى بيهو ابرو قصبة منصح الوادي المخدر ضرو راحت قلبي تطوي وكل ساعة تفرو فالحاردلو يتغزل أم يخاطب الذات وتجليات النفس ام هو مدرسة عجيبة من مدارس التجريد والتشكيل المهم أن بيوت الحردلو هي حالة سودانية من الإبداع يختلط فيها الغناء بالتصوف، والوضوح بالتعقيد، والسلامة بالعيوب تماما كما تآلفت وامتزجت الدماء الأفريقية بالعربية بالزنجية في الإنسان السوداني .وهذا بعض مما كان يعجب الشاعر عمر الدوش ويأسر فكره . هذا العام، وكما السنوات تأكل الخلايا الدماغية وتصاب بالزهايمر، فان السودان الوطن الحبيب تتجاذبه أمور عديدة ، تختلف في نتائجها، و بنائها ،، وانتهائها عن الأيام التي عاشها الشاعر ولكن تبقى الأسباب التي كان يتساءل عنها عمر الدوش هي ذاتها التي نتساءل اليوم حيث يقول : فتحت جوابك الأول لقيتَك لسَّه يا وطني بتكتب بالعَمار والدم ولسَّه بتسْكَر أمدرمان على الشارع... وتتْكوّم وتمْرُق من صَدُر مسلْول نهودهْا تَدُوسن العربات ترضِّع فى الكلاب مشنوقَهْ من عينيهَا في الساحات وتضْحَك في زمن مسموم ولسَّه بترقُد الخرطوم تبيع أوراكْها للماشين تَطِل من فوق عماراتهْا وتَلِز اطفالهْا في النيلين وترجع للرُقاد تاني اشوفك في جواب تاني ويتساءل الشاعر المرحوم عمر الدوش :- مشيتْ اتمشَّى فوق همكََ وصلْني جوابك التاني يحيض الغيم على سطوركَ يقطِّر من سماكْ دمّك بشوف في جوابك التانى مُدُن مبنيّةْ متكيّهْ بتمْرُق من شبابيكا عيون برموشَهْ مطفيَّهْ شَرَك لي كُلِّ قُمريَّهْ وأماني كتيرَهْ مخصيَّهْ شوارع بالنهار والليل مدبّسَهْ بالحراميَّهْ معلّقَهْ في صدور الناس كلاب اسنانْها مبريّهْ على مرِّ السنين تحْسب شهور أيامها عِبريّهْ مشيتْ اتمشَّى فوق همّك وصلْني جوابك الدمّك رقدتَ على البحر غنيتْ مليت احزاني بالأمواج جرحْتَ الدنيا بالدوبيت جريت لي ساحَة الشُهداء لقيتُم لا وطن لا بيت دخلتَ منازِل الأُمّات وطلّيتْ لي شقاء الاخوات مرقتَ كأني زولاً مات والموت اخي عمر سبيل الأولين والآخرين ولكن موت الوطن شئ مختلف، موت الوطن لا يجعل الإحياء يموتون ويلتحقون بكم في المقابر فحسب، ولكن موت الوطن يجعلكم انتم الأموات تموتون مرات ومرات ويجعل الأحياء من بني وطني يموتون ألف مرة في كل ثانية، والأخطر بموت الوطن أن تموت ذكري الأموات فهي حياتهم التي يعيشون بها بيننا وهي قوت الشعب وطعامه تنعش حياته هي الطاقة والزاد الوحيد الذي ينعش ذاكرة الوطن والأمة. لكن أخي عمر الدوش السؤال الذي تركته مفتوحا ومازال يحيرنا من بعدك هو السؤال الذي خرج من وادي الجن في عقلك والتف بكفن الشعر وشيعته لنا في مقطع من قصيدة (الحفلة) ومازال هذا المقطع يقف شامخاً ساخراً من كل أنواع التفسير تماماً كما تقف الأهرامات في البركل وكبوشية كما تقف الأماتونج وجبال البحر الأحمر وجبل مرة والعوينات قل لي بعد ما جاورك قبر الطيب صالح بمقابر البكري وبعد ان دفن معك رؤساء السودان الرئيس نميري والأزهري وسر الختم الخليفة وكل عظيم ووضيع من بني شعبي ماذا تقصد ؟. فالأحياء منا أصابهم الإعياء وعجزوا عن فهم قولك: بداية الحفلة مبديه ومن وْلَدو الوجع قامت وصوت المادح المبلوع يخربش فى الفضا الممنوع طنين الفاجعه كان مسموع ويوم يبدأ الكلام حتجوع شنو الجدّ عشان نتجارى بين القاهرة وجدة بين القومه والقعده بين الفرهْ والعقدةْ شنو الجدْا ؟ الا تدري ايها الفقير الشاعر أننا بعدك صرنا نتجارى بين القاهرة وجدة وابوجا وطرابلس والدوحة ونيفاشا ونيويورك و....الخ.. ولم يعرف أبناء بلدك (القعدة) إطلاقا والكل يتجاري في بلاد الدنيا ويسال ما هو الجديد الذي يجعلنا نتجاري بين عواصم الدنيا هل من حل لمشاكلنا في بلاد الله الواسعة؟؟ ولكن يبقي السر مدفون في صدرك وفي صدر النيل و الشعب السوداني كله مازال يعرف السؤال (شنو الجدا؟) ولكنه لا يعرف الإجابة فهل من إجابة؟!، فلا حياة لمن ننادي هذه الأيام . ألا رحمك الله الشاعر عمر الطيب الدوش فأنت في حضرة علام الغيوب وكما مت فقيراً من مادة الحياة الدنيا فأنت فقير في الآخرة ولكنك نزيل أكرم الأكرمين وهو أرحم الراحمين، اللهم أغفر له ولنا اللهم آمين. البروفيسور: الحاج الدوش المحامي الرأي العام |
||||||||
|
|
10-28-2010, 03:20 PM
|
#2 | ||||||||||
|
سعاد
الدوش حين سعاد والحفلة بدت يا عوض دقّتْ الدَلّوُكَهْ قُلنا الدنيا ما زالت بخير أهو ناس تعرِّس وتنْبَسِط تكْكَّتَ سروالي الطويل سويتْلُو رقعات فى الوسط فى خشْمِ عضّيت القميص أجرى وازيّد شوق وانُط لا مَن وصلتَ الحفلَهْ زاحمتَ الخلق وركزْتَ شان البِتْ سُعاد أصلى عارف جِنَّها فى زول بيرْكِز وينْسَتِر لكنِّى عارِف إنَّها لو كلو زول فى الحلة بالسُتْرَهْ إنجَلَد يانى الآزاها وجِنَّها برْضِى عارِف أظنَّهَا دِيمهْ فى صَرَّ ة وشيهَا يلفحْنى شوق نافِر لَبَد وركزْتَ للحُرقَهْ المَشَت فوق الضلوع تِحت الجِلد ضمّيت قزازتى مرقتَ عِن طَرَف البلد وسِكرْت جَدْ وأنا جايىّ راجعِ مُنْتَهى لاقتْنى هِى قالت "تعال" كِبْرَتْ كُراعى من الفرح نُص فى الأرِض نُص فى النِّعال اتْلخْبَط الشوق بالزَّعل اتْحَاوروا الخوف والكلام "ه-يْى يا سُعاد على ودْ سكينَهْ وكِلْتِي في خشمو الرماد علي ود سكينَه ومَات أسى وأنا بِت بلاك ملْعُون أبوى لو كنتَ أرْضَى أعرِّسهْا وأنا يا سُعاد وكتين تصُبى سحابَهْ تَنْزِلي زي دُعاش بفْرِش على روحى واجيكْ زولاً هِلِك تعبان وطاش وأنا يا سعاد وكتين أشوفِك ببقى زول فَرَشولوا فَرْش الموت وعاش) قالت سُعاد (بطِّل كلام الجِرْسَهْ انجض يا ولد) مزّقْت روحى نِتَف مرّقْتَ من جيب القميص عرقى وأسق طبّيت قزازتى وصلتَ لى طَرَف البلد وسكْرتَ جَد اذّنت فى الشوك والسَلَم وسرحْتَ بالناس والغَنَم وركعتَ للعرقى البِكِر وقدتَ فى الألم الحِكِر وحلمتَ زى شالنى ومشَى فوف زحمة نْبيْ الله الخِضِر صحَّانى صوت العُمدهْ قال (مسئول كبير زاير البلد) قال لينا (وكَتْ الزول يجِى ، لازِم تقيفوا صفوف صفوف وتهيّجُوا الخَلا بالكفوف وتقولوا عاش.. يحيا البطل) صلّحْتَ طاقيتي الحرير واتنَحْنَح الحشا بالكلام ورميتُو من حلقى الوصَل قُتْ ليهو يا عُمدهْ اختشى مسئول كبير في الدنيا غير الله اِنْعَدَم ما شُفْنا زول رضّع صغار ما شفنا زول نجّح بَهَم ما شفنا زول لمْلَم رِمَم لا صِحِينَا عاجِبنا الصباح لا نُمْنَا غطّانا العَشَم والحِلَهْ من كلَّ الجِهات محروسَهْ بالخوف والوهم ومضينا من زمناً قديم-يا عُمدهْ-مرْسوم انتحار الموت مُباح والحب نِطاح والصِدقِ من جِنس الزِّنا العافيهْ مولودَة سِفاح والرغبَهْ مكسورةَ جناح الحلم والوعد النبيل الطِفلهْ والأم ، النخيل الرّنَهْ فى الوتر الاصيل تلقاهَا فى قاموس نكاح يا يُمَّه واح..يا حِلَّهْ واح *** يا سعاد تعالى ولمِّى من كل البيوت عِدَّة السَفَر الطويل زَخْرِفى الفجر النهار شخْبِطى الضُحى والأًيل المَغْرِب الفجر النجوم. فى صُرَّهْ وارمِيها البحر خلِّينَا فوق الشك نَعُوم والعُمدَهْ فاض العُمدَهْ صار مليون عُمَد العُمده فيل جبلاً تقيل لبْوَهْ وأسد حَسَنَهْ وغَصِب جُمْعَهْ وأحَد بقّيتْ قزازتى مرقْتَ عِن طرف البلد وسكْرتَ جَد وأنا جايى راجِع أجهجهو لاقانى هو سايق العساكر والكلاب رامى بين عيني وعينو كلب وتَكْشيرهْ وحُراب ضاقت نِعالى من الزّعل من تحتهَا اتْمَلمل تُراب الغيم سكب ضُلو ومشَى والدنيا غيما سراب سراب والحِلهْ زى بلداً بعيد زوَّد بُعاد وقُرُب سُعاد اتجمَعَت كلَّ البيوت فى راحتَا زى بِت لِعاب مجنونَهْ تصرخ فى الزوال ممزوجَهْ فى الدم واللُعاب عينيَّ ضاقت نظْرَتهْا والجوف يطقْطِق بالكلام قُبَّال يقولوا لي سلام اتلمُوا حولى بلا نِظام شال وعِمَّهْ توب وغُمَّهْ فاس وطوريَّه وحزام شالونى بى كُل إحترام ورمونى فى قَعَر السجن حصلّنى قبل اليوم يِتم جارنا المدرِّس ودْ خدوم قال ليَّ لا زول قام هتَف لا كف مشَت بتلاقِى كَف والعُمدَهْ زى هَمْبول وقف يا صمت أُف يا دنيا تُف وأنا يا سُعاد للشوق نغَم للهَم عَلَف
|
||||||||||
|
|
|
10-28-2010, 03:29 PM
|
#3 | ||||||||||
|
إتخيلي .. الدوش
اتخيلى اتخيلى الانهار ماصابها أي مرض واتخيلى الاكوان فى مهرجان مسحور هدت النجوم للارض واتخيلينى وحيد وانا فاتنى يوم العرض يانيل صبى وممشوق من بهجة الامواج في زفة منسابة طارت سحابات شوق لمست حشا الغابة طارت طيور بالكوم طافت على الاشجار لقت النخيل محموم غنت مع الساهرين غنت غنا العشاق ياماشى فوق النيل هاك الجمال منديل ياجاى من النيل هاك النخيل اكليل واتخيلنى وحيد انا والجروف والسيل
|
||||||||||
|
|
|
10-28-2010, 03:30 PM
|
#4 | ||||||||||
|
ما ضلمت
ما ضلمت ماضلمت أقول والشمس ِفي عز الأمل تهتَ ومَشيتْ أقول يا نِحنَ يا إنتو وبكيتْ يا مواعيد .. يا صباح من غير وسـِم تهتَ ومَشيتْ ما ضَـلـّمتْ .. ما بْـتــَعرِفْ الزول البجيك .. ولا البـِجيكَ بيـَعرِفكْ حتى الشبابيك والزوايا الكان بـِتَجْمَع في حناياها الشكوك ضَـلـّمتْ أغشاكِ يا نفسي الغريبه من همومي أطلـّعـِك ألقاكِ واقفهْ على الطريق أحزان بتـَفرح وتشتبـِك أفراح بتحزن وتـِرتبـِك لمّنْ رحلتَ مع الغـُنا عـِز الأماني وضَـلـّمتْ مدّيت على الأمل القريب أشواق كـَتيره وقصّـرتْ في زاويه من ضُل الشجون جابت ظنونا وقيـّـلت كلّـمتَ أشجار الخريف عن شوق نما في الوحشه والزمن الأسيف دلـّتنيـ اْفتـّش في المغارب وفي المشارق عن علامات أو رصيف تـَرقـُد الأزهار عليهو يا بنفسج كُحلي غالي وبـُرتقالي أمشو إنتو .. أنا البقيف ما ضَـلـّمتْ ..
|
||||||||||
|
|
|
10-28-2010, 03:35 PM
|
#5 | ||||||||||
|
مطر الكلام
شميس المغرب الممْحوق تميل فوق وشّك المحْروق تبين صُفْرَة سنيناتَك يبين ضُل الكلام مقْلوب تمِيل يا صالح الأيام ولا عاشرتَ هِدْماً زين ولا حتّيت تُراب السوق تَفضّل.. تفضّل يا حفيف الضُل ورُش جرجيرَك البايِّت وعِد ليمونك الفضّل وكوِّم حُزنك الباير وبيع من غير تشاوِر زول... تواريخ دمّك الفاير وتفرُش فى الضُحَى الأعلى.. تبيع سأم العُمُر كيمان ولا لا فتات ولا أوزان لا أتْمَان تَشِد ترْكَب قفَا الأيام زَهضج خيلَك يِلَد تيمان فرس شوقَك دوام مسْبوق تميل يا صالح الأحلام أهو القدَّامك البتبيعو.. أشواق الصبا الأيتام وبرْضَك ما بْتبيع لى زول أسف ربيّتُو فوق كتفك ولا عشقاً شْبِع أوهام أهى الطاحونَهْ يا صالح أهو السوق الصبِح ألغام تفضّل ..يا خفيف الضُل ورشْرِش صبرَك الناير وارفَع صوتَك الحنضل وألعن ما يهمّك زول.. أبوك يا سوق ، سليل الغم أبو الطوريَّهْ والمنجَل وخال الرّجْلَهْ عم الدنيا جِد الفِجْلَهْ والفِلْفِل وشَكْل القُفَهْ والكرتونَهْ والجردَل والعَن ما يفوتَك زول من الشارين من البايعين وجِنْس البِرضَى والبزَعَل واشْتُم ياخى أيه فضّل؟ أيه يحصل؟ وهل تقبل؟ تميل يا صالح النجمات مع القمر الخصي واهبَل مِتين يا صالح الآمال تميل ترقُص وتِتْعدَّل واضحك لا يشيلك هم على النيل الصبح مَبْول صَحِي الأمواج بتتْبهدَل (صحِي الأمواج بتِتْبدَل؟) !وبرضو سُعاد حتتْحوّل؟ لا يُمْكِن دى شمس الضُحى الأعلى ومشيَهْ حنينَهْ تحت الضُل وتكْيَهْ طريَهْ فوق رملَهْ دى أحلام جاريَهْ مُنْبهْلَهْ وما مًمْكن تقيف إلاّ وليد العُمدهْ يلْعَب بي يدرْدِق فى الحرير كرْشو يعاين فى النِّعال وَشِّو ويقْدِل فى الفريق تمساح ينادى سُعاد تَلِم الكون تحت ضُل الضُحى البوّاح تصوّر يا خفيف الضُل دا عِندو الهمسَهْ عِندو الغمْزَهْ عندو اللمْسَهْ !أمر مُبَاح ونقْطَع من لحمْنَا الحي ونقْعُد فوق شحمْنا السَّاح ونهتف نحنا مشويّين ومقليّين دَا يا عُمدتنا ياهو الصاح وياهو الصاح وياهو الصاح أيا عِزَّة نَفِس برَكَت متين بتسِّوى لينا جناح واشيلك يا سعاد وامْرُق من الزمن الدّنى ونبّاح واشيلك يا سعاد وامرق من الزمن الدنى ونباح والعمدهْ صاح يا ولد يا إنتَ يا صالح تعال شِد الحُمار وانْدَه سُعاد شِد الحُمار واندَه سُعاد -ده قليل على يا عُمده فى هذا الصباح والعمدهْ صاح أندَه سُ ع اد ..شِد ال حُ م ار وا فرحَة الحُب المطرّز بالمراسيل والغُبار يا دَه السَماح دَه كتير عليْ يا عُمدهْ فى هذا الصباح شِد الحمار وانده سعاد يا فرحتك يا ود قِنِعْنَا ما بِهِم شَدْ الحُمار إذا نهايتو تشوف سُعاد يا ده السَماح أدّينى بس يا عُمدهْ بس يومين صباح وغروب طويــــــل أقْدَر ألمِلْم فيها عفَش الروح واشد عصب المسافَهْ الواقفَهْ بينى وبين سعاد ادُق يا عُمدهْ بينى وبين حِماك أوتاد وارقُد فى ضواحى السُوق وأحلَم والعمر مشنوق تجينى بلاد أبيع فيها الفَضَل من شوق تطوفْنى بلاد أغيِّر فيها شكل القُفَهْ والأسياد وادِّينى بس يا عمدَهْ بس يومين نهار مع ليل طويل أقْدَر أغيِّر فيها طعم البوح واقولِك يا سُعاد سُعاد ليمون سُعاد نعْناع حكايَة ليل على درب الهوى الضَيّاع سُعاد ميعاد مجاعَهْ وزاد على درْب الهوى الجوَّاع واقولِك يا سعاد "يا دَه السماح ايا عِزَة نِفس برَكَت متين بنْسوِّى لينا جناح واشيِلك يا سُعاد وامْرُق من الزمن الدَّني ونبَّاح
|
||||||||||
|
|
|
10-28-2010, 03:36 PM
|
#6 | ||||||||||
|
ولا كافر
بلد رايح حأسأل عن بلد رايح وافتش عن بلد سايح واسأل عن امانينا اللي ما بتدينا صوت صايح وأسأل وين مخابينا إذا جانا الزمن... لا فح واسأل عن بلد مجروح وعارف الجارحو ليه جارح وابكى على بلد ممدوح وعارف المادحو ما مادح واحلم بي حلم مسروق لا هو الليلة لا امبارح أعلق في جناح سفري خطابات لي زمن فجري وادخل من درب سري لكل مضاجع الأحزان واضفِّر من شجر بلدي بروقاً مارقة من صدري حأسأل عن بلد غاطٍ لحدِّ الليلهْ في الوجعة أَنط فوق سرجي واتْحزَّم أقوم من وقعة لي وقعة أخُتْ ايدي البتوجِعْني على السأم البراجِعْني واسأل.. يا وطن يا بيتنا ليه شوقك مواجهني ليه حبك مجهجهني وليه تاريخ زمن خسران موكّر لسَّه في شجني؟ حأكتب لي شجر مقطوع مسادير يمكن يتحرك خطابات لي طفل مجدوع يقوم يجرى يقع يبرُك رسالهة لكل قُمْريّة إذا دم الشقا اتوزع على كل البيوت ما تْرِك واسأل.. عن وطن رايِح واديكم خبر جارح: بأنو جميع جموع الناس حيفضلوا لا كراع لا راس ونشترى في الدكاكين يوم مسابح من دموع الناس مساحيق من هموم الناس زهج يتْعَبّا في الأكياس ونعلن في المزاد علنا وترغي الجوقة والأجراس: "!نبيع الطفلة والكراس" واصرَخ ! ياوطن! يا بيتنا ليه ما تبقى لينا الساس قدر ما تجري فيك أفكار... يزيدوا الحبس والحراس قدر ما تجري فيك الخيل تدوس الهيبة والإحساس واسأل يا وطن رايح اذا كل القبور دخلت بيوت الناس بلا اسئذان بلا صلوات بلا أكفان جريمة اسائل الدفَان؟ حريمة طلب تمن قبري من البايع في أي مكان؟ واقولك يا وطن رايح واقولك يا وطن آمر سلام النفس ما كافر ولا كافر ولا كافر
|
||||||||||
|
|
|
10-28-2010, 03:39 PM
|
#7 | ||||||||||
|
العمدة جابر
والصباح نَديان رطيب فى اِيدو كان مَاسْك الشروق فى جيبو كان طاوي الغروب فى كرْشُو قَاعِد منْبَسِط فى الكُرسي كان مَاهِل خصيب ما عُمْدَهْ يَاخْ والفرَح أِْكَال يطِيب الشَيَّهْ والجمر الشَّهي الشِيشَهْ والشَّنَب المولِّع حُمَّى قِفْ العُمْدَهْ جابر - الكرسى طَقْطَق تِحْتُو- مَدَّ ايدو على الأوامرِ والأوامِر ما بتطْلَع بَسْ كلام مِن جسمو بِتْنِز مِن حَشَاهو مِن صلَف مَعْمور وعامر مِن قبور أجدادو تزحف للأصاغِر ..والأكابِر مِن منابِت شَعَرو تَطْلَع مِن نهايات الأظافر دَه الصباح العُمدهْ جابِر نَادَى صالِح وَدْ قِنِعْنَا الله ..الله على الأوامِر: إسْتَلِم يا وَدْ قِنعْنَا تسْتَلِم أَمْر الأوائل تَلْقَى طالِع للأواخِر تَسْتَلِم أمْر اللِّى عايش تلْقَى من أهل المقابِر واوْعَىَ من فضلك تَغَالِط دِى الأوامِر ودِى الدفاتِر ودِى العساكِر وافتَح السِّكهْ اليَمُر سيدنا آمر ابن جابر واسْتَلِم يا وَدْ قِنِعْنَا: إنتَ عارِف بيت سُعاد ، وعارف إنَّك من قَبيلَهْ لا رأينَا ولا سِمِعنْا ولا عِشمْنَا ولا .. طِمعْنَا وانت مُرْسَال يا ..بَجَم تدخل البيت زى كأنّك.. مارِق الآن... من جهنم ولمَّا تَطْلَع ليكْ سُعاد كُون خفيف ..زي الأمل ومرَّه أتْقَل زي جَبَل : أوْعَىَ تَفْرَح .. أوْعَى تزْعَل واقْصِر ايدك من سلام خلّى نَظَركْ يِكُون كفيف ومَشِيكْ يكون... ناعم.. مُغرْبَل.. ولما تَطْلع ليك سُعاد زي حلم فى توب رهيف.. أدّيهَا ضَهَركْ يا .. مُغفّل.. وبكُلِّ ما علّمْتُو ليكْ من طاعَهْ من ذُّل.. من وجل... أمْرُق حشاي قِدَّامهْا يلْمَع بالوجع.. قُول ليهَا.. لمَّا الشوق يبين.. مابين ..شجيرات الأراك والفرحَه تغْسِل طرْحتهْا والبدر يمشى على الهلاك والخوف يكون لسَّع جَنين فى رُكْنِ من ساحة الوَّلَه فىزاويَهْ من ساعة الحنين ما بين.. دِى ارْضَك.. ودَاكْ سَمَاك.. العُمْدهْ منْتظْرِك هِناك.. ....... ومِن هِناك.. درْبَك عديل.. نادِى المُدرِّس .. وَدْ خَدوم.. والمديرِس وَدْ خدوم.. العُمْر مربوط بالجرَس والصبْرِ مشْنوق الضُحى والخوف نَزَل من غير حَرَس والعُمْدهْ فوق كل الأصول.. لمْلًم جِرايواتُو و.. جَلَس.. عُمدةْ فوق كل الفصول فى التلاميذ.. فى الطباشير فى التعابير ..فى النَّفَس يا طه يا .. يا إنتَ يا يا ودْ خدوم.. ملعون أوهو الكان ده يوم الإنتَ عريان وقَّفَك والعمدهْ قدَّامك رَفَس وعليكَ إنتَ براك تخمّن هل تكّلم أم تنَحْنَح !!أم عَطَس والعُمدهْ قال: يا إنت يا .. يا طه يا يا ودْ خدوم أنا عندي إنتَ براكَ كوم والحِلَّهْ كوم.. يَاخ ديل بَقَر فى أحْسن الأحوال غجَر. أنْسَانى من كومَة هدوم مشْرورَهْ فى الطين.. والهموم ما حاتَنْشَف حتى لو نِشِف البحر والنساوين والغيوم ما حاتَنْشَف ..ما حاتَنْضَف ما.. والعمدَهْ فوق راسك هتف: (مسئول كبير زاير البلَد وانتَ يا طه العِماد.. إنتَ الفهَم.. إنتَ السنَد لِمَّ الصغار وزِّع عليُهم كلِّ واحد.. فَرْد ..فَرْد الفرحَهْ وافرُش سِكّتْهم مرات طراوَهْ و.. مرّهْ وَرْد.. ولمَّا يهتفوا فى الفصول يحيا ويدوم عاش البطل !!ما يكون هُتاف من أىِّ فَم.. يطْلَع زَخم..يطْلَع زبَد تنْهدَّ حيشان البيوت والفرحَهْ فى أحسَن مزاج لا تْخَلِّى دابَهْ.. ولا تُرابَهْ ولا أحد) هل انتهى يا ربى زيَّاك العَمَد يا ود خدوم وانت سايس للعقول دَه عليكَ إنت بَراك بعْرِف: هل تقدّم أم تزحْزَح !أم جَمَد والمديرِس ودْ خدوم مع إنّو فى حلْقُو مو عَلّق كُلَّ أجراس المدارِس كلَّ صوت فى الدنيا عابِس بِرَجْفَهْ لصَقَت فى سُنونو ، كلُّ رجفات المساكين ، والعواجيز .. والعوانِس .. صوت بيتْعرَى ويضِيع ويلمُّو صوت تَرْيان. ولابِس.. *** وصرخْتَ يا طه وصرَخ ضُل المشاوير.. فى الأصيل. فى الساحَهْ رفَعَت مُقْنَعهْا الذِّلَهْ ... والصبر الطويل رقَصَت مع الكلمات شُجون.. وجَرَت ورا الأحرف خُيول : "!!يا عُمْدهْ هوي" حامت على الناس القَماري وزّعَتْ سَعَف النخيل.. " !! يا عُمدهْ هوي" مَشَت سحابَهْ وجات ربابَهْ وزفَّهْ قامت فى الطبول "!!يا عمدة هوي" الغافى فارق غَمْدَتُو والصاحى تَمْتَم.. فى ذُهول قام ودْ خدوم "يا عُمْدهْ هوي" يا عُمْدهْ بالله إخْتَشِى.. للعوْرَهء ما بِنْفَع هُتاف للسوسَهْ ما بْفِيدَك حَشِى علّمْتَنا الجري فوق جروحنا وقلتَ:أبداً !!دَه المَشِي خَتْيتْنَا فى قلب المشاكل وصِحنا كُلّنا " مافى شِي.. كلمَهْ واحدَهْ.. جناب سعادتَك من ضمير ما مُرتَشِى الحِلَّهْ يا .." والعُمدَهْ ..أو سلطانو قام: "الحِلَّهْ أيه..؟ حتَّه مُعلم مُبتدىء.. الحِلَّهْ أيه مسئول كبير زاير البلد لا ودْ خَدوم ولا ألفِ شُوم أو ألأف بوم !!حيَعَلِّم الوِّز كيف يعوم" والعُمدَهْ جابِر.. دَه الصباح مدَّ إيدو على الدفاتر وقبلما ما ينْصَر جبينو كان شطب كلَّ المساخِر اللِّى حاضِر من مساخِر والمُسافِر ما عدا السجن العُمومي
|
||||||||||
|
|
|
10-28-2010, 03:40 PM
|
#8 | ||||||||||
|
سؤال الدوش
سؤال جِيتْ أسألِك يا طفلَة الألم الرضيع تدِّينى خاطْرِك شان أضيع فى شوق موزّع فى الزحام يا عذاب الريح للخيام يا صهيل كَسر اللِّجام يا خِتَام قبل البدايَهْ يا بدايّهْ بدون خِتَام جيتْ أسألِك مين علّمِك إنّو الزمن فى مرَّهْ ناقِص ومرّهْ تــــــام جيت أسألك الشوق مكتّف فى الطريق والخوف مداخل للفريق جيت أسألِك مين علّمِك لُغة الزهور مين علمك غضب الحريق وانت باحَهْ وانت واحًهْ وانتِ ذاتِك سكَّة الزول للمضيق فارْدَهَ السواعد للزوابع والمطر للْهَم يَولْوِل للشّجر عايز أسألِك مين علّمِك !لَمّ السلامــَهْ مع الخــطــر
|
||||||||||
|
|
|
10-28-2010, 03:42 PM
|
#9 | ||||||||||
|
تاني حفلة يا الدوش ؟؟
الحفلة (1) بداية الحفلة دلوكة نهاية الحفلة متروكةْ لأي صنم يشيل كرباج يَجِلْد الحق يخلي الحفلةْ مرْبوكهْ نهاية الحفلة متروكه لاى صبي يهز السيف ويمْضَغ حسرتو يلوكهْا وبين السيف وبين كرباج مسافة تودي أمريكا (2) بداية الحفلة بالدوباي نهاية الحفلة بالهبباي ِِبتمْرُق من قلوب الناس عقارب لا فهم لاراي وتزرع في سما الحفلة جهاجه وانتباه وبراح وتنعش معْشر السِّراي وتبسط جملة الأفراح (3) بداية الحفلة مبديه ومن وْلَدو الوجع قامت وصوت المادح المبلوع يخربش فى الفضا الممنوع طنين الفاجعه كان مسموع ويبدا الكلام حتجوع (4) شنو الجدّ عشان نتجارى بين القاهرة وجدة بين القومه والقعده بين الفرهْ والعقدةْ شنو الجدْ؟ وكنا هجين خيول الريح تنسد ولاهمَاهَا تنقد ولا رجعت اذا انسد اهو المشوار َوٍكت عرَّش حدانا ندم براهو اتمطي وامتد (5) نهاية الحفلةْ دلوكهْ نهاية الحفلةْ مبروكهْ لأنو الحوت َفتَح خشمو لأنو الزول عِرٍف أسمو لأنو... لأنو ............. يأخي أقيف أهي الأمواج وداك القيف
|
||||||||||
|
|
|
10-28-2010, 03:44 PM
|
#10 | ||||||||||
|
حكاية الدوش
حكاية في الزمن الموشّح بي سكين وحربَهْ والغيم المسافر لَمّ دموعي خَبَّ طلَّ الخوف ملفّح بى حُزن الغلابَهْ خلَّى الشوق مهاجِر بين صمتي وعذابْها اتْلاشَت مسافَهْ مابين سيل وغابَهْ مابين ضُل سحابَهْ وبين وتر الربابَهْ اتلاشت مسافَهْ بين صمتي وعذابْها فوق ايام حنيِنَهْ مالتْ بي ضفيرَهْ صَحّتْ موجَهْ نايمَهْ زاد النيل دميرَهْ مالت نخلَهْ تهمس لي موجات حسيرَهْ عن أشواق أسيرَه مامعروف مصيرهْا يا غيـــم وين مسافــر؟!
|
||||||||||
|
|
 |
|
|
 |
 |
 |
Linear Mode
