السودان مكتوب

لا شك ان مشاكل السودان المعقدة والمتشابكة تجعل الانسان يقف احيانا حائرا ومتسائلا اين يكمن الخطأ ؟ هل فينا ام فى حكامنا ام هو سوء طالع يلازمنا من الاستقلال وحتى عهدنا الحاضر 00 ومن هذه الاشكالات مشكلة الخريجين
المتكدسين بالأف حتى اصبحت الجامعات مثل الفقاسات التى تفرخ الكتاكيت 00 وطبعا الزملاء خريجى كليات الزراعة من اكثر الفئات تضررا من البطالة حتى انه قد صيغت فيهم الكثير من النكات والقفشات المضحكة 00وهذه القصة تحكى عن احد الاخوة من قبيلة الزراعيين الراجل خريج زراعة عام 78 وحتى نهاية التسعينات لم يجد فرصة وظيفة ولا حتى جناينى وكرعينو حفن وشهاداتو انهرددت والحال فى حالة والشواكيش على راسو من الجكس
كع كرع اخيرا عندو صاحبو قاليهو شوف يابو الشباب انت اكيد مكجر وانا والله بعرف لى فكى يروب الموية تمشى ليهو وهو بظبط ليك الامور 00الراجل فعلا مشى للفكى وقعد قدامو الفكى قاليهو خت البياض اخونا فتش جيوبو
يمين شمال غايتو لقى ليهو باقى فكة ختاها للفكى 00الفكى قاليهو مشكلة بتااك شنو ؟ اخونا قاليهو والله شوف انا حتى اكون راجل ديمقراطى ووطنى 00ياخى المشكلة ما مشكلتى انا براي 00المشكلة مشكلة الشعب السودانى دا
كلوا نحنا مالنا 00عقول بتفكر وتخطط وصلع ونضارات ورغم دلك ظروفنا زي الزفت 00فياخى شوف لى نحنا مالنا 00الفكى عندو طش ملان مويه فقال للزميل دخل يدك اخونا دخل ايدو فى الطش 00قام الفكى عاين لى فوق وتحت وداها صنه شويه ودا ضهرو انكراشة 00وقال لاخونا شوف ياخوي السودان دا مكتوب 00والعمل عاملنو ليكم المصريين وكاتبنكم فى رجل ورل موجود فى ابوجا عشان كدا كل محادثات السلام هناك00 لكن انا بمرقو
بس عندي طلبات 00 فاخونا قال ليهو طلباتك شنو 00 الفكى قاليهو الطلبات ياخوى كالتالى :
1/ اول حاجة تجيب لى غبار من عجل طائرة سودانية قامت فى مواعيدها
2/ تجيب لى فار اشول
3/ تجيب لى فنيلة لاعب سودانى سجل هدف فى نهائيات كاس العالم
4/ تجيب لى عتود كلو اسود بس اضنىنو بيوض

اخونا قام جرى مطار الخرطوم سأل من سفرية للخطوط السودانىة 00قالو ليهو فى طائرة متجه القاهرة الساعة عشرة مسا 00اخونا جا الساعة عشرة ووقف خلف الطائرة عشان يشيل الغبار 00الطائرة مشت شوىة وطب وقفت
ياخوانا الحاصل شنو قالوا ليهو الرحلة اتأجلت لى بكرة 4 عصر 00مشا لفة كل اتحادات كرة القدم ما لقى فنيلة لاعب احرز هدف فى نهائيات كاس العالم 00 مشا كلية البيطرة عملوا ليهو دراسة على الف فار ما لقو فيها فار اشول
فتش على العتود الكلو اسود واضنىنو بيوض ما لقاهو 00اخيرا عندو بنطلون اسود اخد البنطلون ومشا للفكى طلع ليهو جيوبو البيوض وقال ليهو دا بس اللقيتو بدل العتود يلا فك العمل 00 ضحك الفكى ضحكة عريضة وقاليهو
دى والله شغل ما تشغل خلى تفك عمل السودان 00 وفى المرة القادمة نواصل 00الاولاد عندهم اختبارات

[عبده مصطفي إبراهيم]

لكن الفكي كترا شوية الفار الاشول مقدور عليهو......ولاعب الكورة والعتود مقدورين عليهو لكن طيارة سودانية في مواعيدة دا تعجيز واضح

[عوض خضر]

والله ياخونا يوسف سعد كلو هين بس البفك زنقتنا هسع شنو

دايرين لينا فكي كارب يفك العمل العملوا الجماعه للشعب السوداني عشان يكون الطيش في التظاهر بعد ما كان الاول

وعايزين واحد تاني يفك العمل العملوا الجماعه القيادات السياسيه التي صارت تتخبط كانهم يادوب اب ت ث سياسه

وعايزين فكي يفك كربة دارفور قبل مايفكها ليك فكي جنوبي فنري صناديق الاستفتاء المضمون النتيجه تحمل بعربات الامم المتحده ذات الدفع الرباعي الي فيافي الغرب

وعايزين فكي مخصوص يفك عقدة مشروع الجزيره

وعايزين فكي يحل تعقيدات اتفاقية السلام مع الجنوبيين قبل ما نرجع للمربع الاول والمره دي مع دوله مجاوره وليس مع جزء من الوطن

وعايزين فكي للمصريين ديل عشان يفكوا دربنا ويخلونا في حالنا

وعايزين فكي يحل مشكلتنا الكبيره انو نحن دائما كاثوليك اكثر من البابا متلقين حجج بلا قدره

وعايزين وعايزن وعايزن فقراء كتار يبركوا فد بركه مايقوموا الا يتم تصنفينا في العالم الاول

بحيث نتحول من مستهلكين الي منتجين والي بلاد يتحكم فيها القانون ديدنها الحريات

والعالم كلو يقعد ينتظر الجديد من عندنا ونصدر ليهم من الافكار والقطن والاغاني والافلام والاغاني والبترول حتي السيارات والاسلحه بمختلف انواعها زائدا البهائم السليمه والقمح

والدواجن زائدا القرض الذي سيصبح منتج يتهافت العالم عليه

واوعك تصحي