الكــــرسي الســــــــاخن..يجلس عليه (-)

[عوض خضر]

عبدو قاعدين نعاين ليك ونطرق في السكاكين كدي هسع سخن باسئلة ام محمد

غايتو جنس شف يا ام محمد عليك اظنك من زمان تشفي من جارتك في المدرسة والعجب كان وقعتي جنب وحدتا كدا شاطرة كان كتبت اسماء تنقلي .

....................................

كدي النقبل علي الزول القاعد في الكرسي دا .
اصدقاء من زمان ولي هسي ؟
حلم تحقق واخر لسع لم يتحقق ؟
مواقف من الطفولة لحدي الثانوية ( حنتوب ) كانت طريفة ؟
كم عدد الكفوف النلتها في المرحلة المتوسطة وهل كنت بتخاف من الجلد ؟
......
ديل كدا دردقة خفيفة وبجيك صاد .

لك التحيه استاذ عبده .
1/ اشياء اسهمت فى تكوين شخصيتك ؟

2/ لا ارى لا اسمع لا اتكلم متى تطبق هذه المقوله ؟

3/ ماهى مشكلة العصر فى نظرك ؟

4/ ماهى نقطة ضعفك ؟

5/ماذا علمتك الحياة ؟

6/ماذا تعنى لك كل من :

الوالده
البحر
السفر
المال
الغروب
المنتدى
الغربه

7/ هل انت راض عن نفسك وماحققته ؟

8/ سؤال اختيارى
نعم كل شئ قسمه ونصيب ولكن هل وراء زواجك من اجنبيه عدم قناعه بالمراه السودانيه ؟

9 / كيف تعبر عن غضبك ؟

10/متى تصبح الكتابه اعترافا من وجهة نظرك ؟

11/ اذا دارت عجلة الزمن الى الوراء اى المحطات تتمنى ان تتوقف ؟

اتمنى ان لا اكون اطلت عليك .

[نضال احمد]

السيد مديرنا العام قعدتو في الكرسي اللهبة دا
غايتو يا عبدو التسوي بايدك يغلب اجاويدك
والعرب قالو علي نفسها جنت براقش
المهم ونعم انك مديرنا وكدا قلت اتعاطف معاك وافتشت ليك كرسي ابرد من الاول ما لقيت غير دا

خلاص ارضي بي المقسومة ليك وارجي الله في الكريبة
الاخ ياسر مهدي:

غايتو جنس شف يا ام محمد عليك اظنك من زمان تشفي من جارتك في المدرسة والعجب كان وقعتي جنب وحدتا كدا شاطرة كان كتبت اسماء تنقلي .

الكلام الاقتبستو ليك فوق دا كان مفروض تلونو بالحبر السري وتكتب تحتو الكلام موجه لشخص غير جالس علي الكرسي

[عارف عبد الرحمن]

دي الكراسي ولا بلاش .. منتهي الراحة كرسي وثير ومعاهو تكايات تكوع لمن تبقق .. ارتاح آب رويس ، بت أحمد عفيت منك عرفتي ليهو .. تقعد في الناس ساااااااي .. وناسي .. ان شاء الله يوم كرسيك ما أجي .. التسوي بايدك اغلب نجاجيرك ( نجارين يعني ) .. وجلدن ما جلدك قعدو في كراسي الصبار .. دا ماسؤالي .. بس قلتا النتاوق واشوفك في .. لقيت حضرتك جالس بعاااااافية ... برجع بأذن الله

[عبده مصطفي إبراهيم]

السؤال الاول (اجباري)
في ما لايزيد عن خمسة اسطر اجب :-
قارن بين الحياة الاجتماعية في السودان وحياة الشعب البريطاني مصطحبا معك تجربتك بالزواج من بريطانيه
وهل هنالك معادلة تتطلب جهد للتوفيق بينهم وبيننا؟
تمتاز الحياة الإجتماعية في السودان بالترابط الأسري مغلفة بطيب الخاطر وسهولة التعامل وبساطة الروتين وهذا غالبا ما ينظر إليه بأنه أسهل الطرق للهمجية .ولكنه أكيد يفتح مساحات واسعة لإحتواء اللا متوقع
الحياة الإجتماعية هنا بالرغم وصف المجتمع بالإنفتاحية إلا إنها مغلقة عندما نتكلم عن الفرد...فكل إنسان مبدع في مكانه ينتقي من التعاملات
ما يسمح به وقته...لا يسمح بالهمجية التي تنتقص شيئا من حرية الأخر...لان كل واحد يحمل في جيبة برنامج السنه كلها
"تقول لي واحد جايكم زيارة يطلع المفكرة ويقول ليك ممكن يوم كدا أو يوم كدا"...
أما الترابط الأسري هنا يختلف من بيت إلي اخر..لأن تركيبة الفرد تشبعت بالإستقلالية التي تركتز عليها الثقافة الغربية.
لقد تحرر المجتمع البريطاني من سيطرة الفكر الكنيسي وتحرر بعد ذلك من نظريات الانثروبولجيا التي تكرس الفوارق العرقية بغض النظر عن النصرنة...وصار الحياة الإجتماعية مفتوحة لتقبل الغير ... والأخذ من المجتمعات الأخري وظهرت عبارات المجتمع متعدد الثقافات وأحيانا يناديها البعض بالجنة المسالمة...لانها تقبل حتي الذي تلفظه المجتمعات الأخري...فحتي المعادلات التي كانت تتطلب التضحيات قل وجودها.

السؤال الثاني(اختياري)
مدي معرفة الشعب الانجليزي والاوربي بالسودان ونظرتهم للشعوب الافريقية عموما
من الأشياء التي تلفت إنتباهك ...في أي مواصلات عامة..كل فرد يحمل إما كتابا أو جريدة...ولكن يكون دائما الإهتمام محدودجدا....وخاصة إذا كانت المعلومة تحتاج الي خروج عن نطاق المألوف
فالبرغم إلتصاق السودان ببريطانيا إلا أنه عرف عنا حديثا...بدموية المركز وتهميش الأطراف وهذه لمن يهتم بالسياسة أم الإنسان العادي فيعتبره أحد ادغال افريقيا التي
تتمنع وهي راغبة في ثقافة الغرب البيضاء..أما أفريقيا....فلا زالت صور الحوجة والأطفال الغير محظوظين تملأ الشاشات..ترسم فيهم إنسان إفريقيا
وليس من المنطق أن نصفهم بالجهل فالعيب فينا لأننا حتي الان لا نعرف من نختار...ليجعلنا نموزج أحسن

السؤال الثالث

اود وصف دقيق لتقوس الزواج البريطاني في العادات والتقاليد بعيدا عن المسائل الدينيه مقارنا مع الزواج السوداني (يعني حنه وضريره وخلافه)

ترتيبات الزواج غلبا تبدأ قبل سنة أو أكثر بحجز الصالة وشراء ثوب الزفاف وذلك لضغط البرنامج هنا...توزع الكروت قبل شهور ايضا تحمل نوعين الأول للأهل والمقربين وتكون للمراسم الدينية والإستقبال والحفلة أما النوع الثاني للناس البعيدة شوية من الأسرة ودي للحفلة....وينتظر
قبول الدعوة او رفضها...قبل الزواج بأسابيع تخرج العروس مع صديقاتها غالبا يكون يوما أو يومين في رحلة يسموهنا
ليلة الهن"الجدادة ههه ترجمه حرفية"..تلبس العروس حرف الإل يميزها من المعاها...يكون للعريس أيضا ليله خاصة بإسم حفلة العازب..يودع فيها العزوبية
في يوم العرس وبعد الإنتهاء من المراسم الدينية...وإستخراج القسيمة...يتوجهه الجميع الي مكان الحفلة ودائما في النهار
يسمي الريسبشن أو الإستقبال...حيث تقدم وجبة الغداء وتكون فيها الكلمات من أبو العروس اولا ثم وزير العريس ثم العريس
بعد الإنتهاء من الأكل... يتم قطع الكيكة ثم تبدأ المجموعة الثانية بالحضور وتبدأ الحفل
وأعتقد ان هناك مساحة لأشياء أخري ممكن تضاف


الشكر ليك استاذ الطيب

[عبده مصطفي إبراهيم]

أ خونا عبده لك التحية وأمسك الخشب ببدا ليك بشوية مقبلات وسلطات لزوم فتح الشهية وكدا ... هل اصبحت مواعيدك مواعيد خواجات واللا لسع مواعيد سودانية ؟
والله الحمدلله ... بدأ علي شئ من الإلتزام بالمواعيد...وعدم إحترام من لا يلتزم بها
إذا قدر الله وإتخرت أعتزر بأنني سوداني
والغريب إننا ألصقنا إحترام الزمن بالثقافة الغربية... التي أكتسبته من تعاليم ديننا السمحة
________________________
نحن السودانيين لدينا طقوس فى المطبخ خاصة بنا كشعب ناس كسرة ومفروك وشرموط ..... ما مدى معاناتك مع المطبخ البريطانى بهذا الصدد ومعاناة الخواجية الجعلية.؟.
هذا السؤال رده ممكن يكون إمتداد لردي علي الطيب ...بأن المجتمع الإنجليزي صار أكثر قابلية لتقبل الغير
فالمطبخ لم يعد بريطانيا...ولكن المعاناة تبدأ عندما تحتاج إلي كسرة وملاح...لأن هذه الثقافة بالرغم إنها ...لايوق
ولكن صعب جدا مزجها مع الغير....قد يحتاج الي زمن
يتميز الإنسان البريطاني عن بقية إنسان أوروبا بأنه مغامر جدا عندما يأتي الي الأكل... يجرب كل شي قدامو
ولكنه لا يجامل...
فالخواجية لم تعاني إلا قليلا عندما تواجه الأكل السوداني....إلا إنها دائما تسأل كيف تجعلو الويكة لايوقة كدا



شكرا لك أستاذ يوسف

هذه كلمة شكر للانسان صاحب الجهد الوفير , وصاحب القلب الطيب

وصاحب العطاء الآ محدود , بتعامله المحترم , بتصرفاته اللبقة , ووقفته الطيبة مع كل من يطلبه

نشكرك على مجهودك الرائع , اسال الله يديمك ذخر وفخر للمنتدي ولاهل فطيس , فانت ادارة مزجت بحسن

الاخلاق والتعامل ونتمي للمنتدي على يديك ان يتقدم من رقي للقمة من تميز الى ابداع,

نتمني ليك كل التوفيق والتقدم , وانت لا تبخل لا بالكلمة ولا بالوقت .
انشاءالله يوم شكرو ما يجي

أقلب الصفحة

يا جماعة خلونا نبرد للزول دا شوية هسي الزول دا كان جاتو حاجة الخواجية دي

تقول اوووب احييييي كيف

شكيت محنك يانضال ما نجطي الزول دا نجاض وحات شيخي ما قدرت اعاين فية مرتين من الشنا .
لكن ليك يوم تقعدي في واحد زي كرسيك دا وخاشي فيني حلف الا تقولي الروووووووووب .

الاخ الحبيب جدا والمدير العام عبده مصطفي

لك التحية ومنور رغم كرسي نضال دا

اقتبس كل كلمات ام محمد الجميلة والوافية فانت فعلا بهذا القدر واهلا لذلك

سؤوال بسيط هل للمدير العام اي بيت خاص في اي رقعه في السودان ؟ ماتسرح في المقصود

ثلاثة معالم او اشياء دهشتك في الغرب ؟