نفسك تتوظف

[ابودباره]

نفسك فى قروش كتيرة؟ ياخى القروش دى فتنة أخير ليكا الفقر الإنتا فيهو ده .. لو هسه عملتا ليكا شوية قريشات وبقيت غنى ح ترتكب آثام وح تدخل النار

نفسك تكون مسئول؟ لازم تراجع الطبيب النفسى .. ده هسه كلام يقولوا زول عاقل !

نفسك فى لحمة؟ : اللحمه يا أستاذ ثبت علمياً إنها مضرة بالصحة وبتجيب أمراض كتيره خاصة اللحمة (الكيرى) الأنتا بتاكل منها دى لأنها ما معروفه لحمت شنو؟ والناس بقت ما عندها ذمة ممكن تضبح (أى حاجة) عشان كده خليك فى السليم وأبعد عن الحاجة دى ! وبعدين ياخى الفول ده مالو؟ عيبو ليا ؟ ما برضو فيهو (بروطين) !

نفسك تتفسح إنتا وخطيبتك ؟ ما عندك أى مشكلة طوااالى وعلى حدائق (حبيبى مفلس) ما ح تكلفك الشغلانه خمسة جنيه .. كيسين تسالى .. كيسين فول حاجات .. كبايتين شاى .. إتنين حاجة باردة .. بس لو لموا فيك ناس النظام العام إحتمال المسألة تكلفك أكتر شوية !

نفسك تتوظف؟ : بسيطة .. تمشى طواالى تقابل المسئول القال ح يوفر للخريجين (مليون فرصة وظيفية) وتقول ليهو بالله خلينى أكون (واحد فى المليون) !

نفسك تتزوج؟ : ما تتزوج ليه؟ مش ما عندك التكتح ؟ تتزوج ونص وخمسة وأهو أخوانا العلماء بارك الله فيهم وأثابهم ثواباً كثيراً سهلوا ليكا المسألة وعندك زواج المصواب وزواج المسيار وزواج المصياف ، وزواج المسفار، وزواج المطيار ، وزواج المصياع وزواج المحجاج ، وزواج المسياق .. المهم ما مطلوب منك فى كل الأنكحة المشروعة دى غير (مجهودك الفردى) !

نفسك يكون عندك قطعة سكنية؟ ياخى والله إنتا متفائل جداً .. هو لمن السودان (كان) مليون ميل مربع ما لقيت ليكا قطعة فى الخطة السكنية عاوز تلاقى ليكا قطعه بعد ما بقى مليون متر مربع ؟

نفسك فى ملابس أنيقة؟ يا خى عشان تلبس ليكا لبسة أنيقة عاوز ليك مرتب شهرين بى حالهم .. ياخى ألبس من (المرحوم كان قدرك) هدوم سكند هاند لكن قيافة وآخر وجاهه وتناسب دخلك المهدود

نفسك فى تلفزيون ملون؟ والله الظاهر إنتا ح تجيبوا لى نفسك براك .. ح تجيك المذيعة أم كشاكيش كتيرة ديك وتقعد كل دقيقة تأشر ليك بى أيدا عشان تشوف نقشة الحنة ويجيك بعدها المذيع القاعد يسبل فى عيونو وكل دقيقتين يقعد يقهى ليكا فى سقف الأستديو .. والمصيبة تقوم تشاهد ليك مباراة (غمة) !

نفسك تتعالج ؟ يا أستاذ الشافى الله .. خليك من مسألة الأطباء والمستوصفات دى عشان ممكن يعالجوا ليكا حاجة ويبوظوا ليكا عشرين حاجه ! المهم لو ما سمعتا كلامى وربنا سهل ليكا ومشيت ودخلتا عملية فنصيحة أخوية أعمل جرد لأعضاءك قبل العملية وأكتبهم (للورثة) عشان يراجعوا (العدد) وهم بيغسلوا فيك !

نفسك تلبس كويس؟ : طوااالى ييم وجهك شطر (خلف الجامع الكبير) حيث سوق الحرامية وألبس من (المرحوم كان قدرك) .هدوم مستعمله وآخر وجاهة..و رخيصه.. وقدر ميزانيتك (ده لو عند ميزانية) من أساسو



نفسك أولادك يتعلموا؟ ح تجيب ليهم كل يوم قروش طباشير وقروش كهرباء للمدرسة وموية للمدرسة وقروش فطور للأساتذة وقروش طباعة إمتحانات وقروش مش عارف ايه من وين؟ وبعدين أفرض قعدت تصرف كده لحدت ما إتخرجوا ح يشتغلوا وين؟ أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان !

نفسك تسافر ؟ ممكن بس لازم تدخل ليكا صندوق وتشيل الصرفة الأولى .. إنتا عارف إستخراج الجنسية والبطاقة والجواز بى كم؟ خليك من تذاكر الطيارة (الفيها تصل وفيها تتحرق) فى المدرج قبل ما تقوم !

نفسك تغترب ؟ شيل الفكرة دى من راسك بأسرع ما يمكن .. هو مرتبك هناك ده (لو إشتغلتا) ح يكفى ال ح ترسلو للأسرة وللا الح تدفع منو للقسط بتاع الفيزاء وللا طلبات الأقارب والأهل والجيران وللا تجديد الوثائق والضرائب والمساهمة (الإلزامية) والزكاة وترعة

كنانة والرهد وقناة الخرطوم ودمغة الشهيد و الجريح والغريق ...وجاياكا كمان (دمغة الإنفصال) ؟

كسرة :

نفسك تموت وترتاح من الدنيا دى؟ إستمع لتصريحات بعض المسئولين من نوعية (أوروبا تستهدف السودان !) .. يعنى مش بلد بلدين .. لا .. (أوروربا كووووولها) تستهدف السودان .. يعنى (قارة كاملة بى حالها) ... أااخ يا مرارت ساخر سبيل الفاتح جبرا