الدنيا

[عبدالمنعم]

الدنيا

عكـــير

________

تعصرى على البريدك وتقربى تنسيه
يترك طاعة الخالق يكون ناسيه
بى توب سحرك البعمى القلب تكسيه
يصبح محتضر فى تربته تمسيه
سرورك مابتم تابعاه ديمه الفجعة
ظاهرك لينا سكر الاطعمك وجعه
كم طفشت مرتاح قلبو مابى النجعة
روحه تشابى وانت قطعت خط الرجعة
اوصيك نفسى اوصيك(الحيا ومافيها)
شق ود الاحد بيت الشبر صافيها
لمتين تقنعى ونار الضلال تطفيها
تمسكى سكة الشافوها حاجة تفيه
اتغشينا فى حبك لبسنا عباية
ياموية الرهاب الما ملت كباية
عجيب يادنيا امرك الا نحن غبايه
عاشقين الجمال فى لمعة الحربايه
دى الغشاشة دى الغدارة دى العقارة
كم قلبت زغاريد عرسة بى نقارة
اعلنها بى الحرب قبال تشن الغارة
قبل الروح تقرقر تبق فى الغرغارة
يا سامع دبيب النمله فوق العاتمة
ياكاشف الخفايا الفى الضماير كاتمة
بى جاه سيد الرسل الكرام ابو فاطمة
لطفك بى عكير يوم الدفن والخاتمه