هيلاري كلنتون شكنبت

شكنبت نسبة لقرية الشكينيبة التي تقع بالقرب من المناقل وينسب اليها كل من اصابه ( الجنون او فطة سطر ) .

البنية صغيرة وجاهلة وما تستاهل قالوا سلوكا اتشربكت وضربت فيوز ، لكن الاميركان غلطانين واحدة زي دي اودوها تبقي وزيرة خارجية كيف للعالم الجايط دا والله عالمنا دا الا اجيبوا لية رجل آلي واحتمال كبير بعد شهر زاتو الرجل الالي دا فيوزاتو تضرب من الضرب الحاصل ويمسح ذاكرة .

هيلاري المسكينة ما تتساهل وتاني ما بتشوفوها بطلتها الجميلة في الاخبار وسط الرجال تتهادي وتوزع البسمات يمنة ويسار ( ربنا يكون في عونكم ) .

سائل ليها شيوخي واحد واحد وقبة قبة من ابوحراز لي اهلي اليعقوباب ان يعافوها ويزيلوا مابها من شربكة ولخبتة

لكي ينعم العالم بالسلم والامان وامبساطة ويعود بيل كلنتون لي هيلاري وهم في اتم صحة وعافية

دعواتكم ياجماعة ربنا يخفف المصائب عن العالم

[عبده مصطفي إبراهيم]

الأخ ياسر ... قالو عملت فيها فطت سطر ... عشان تقرير بنغازي جاي طالع
ومفترض ينادوها للتحقيق (موت اربعة امريكان السنة الفاتت)
وفيه اتهام مباشر ليها.... وكان عندها النية تبقا الرئيس في سنة 2016
اها قالت اعمل فيها مجنونة.... لغاية ما الحاجة دي تمر بخير
..........
عليك الله شوف الناس دي أربعة امريكان ماتو... وزيرة الخارجية ح تسأل سؤال نكير
نحن ... يدمر مصنع ... تحرق مدن.... يقتل ألاف.... يغتسو اربعة طلبة
ذول ساي بسألو مافي
..............
فرق ولا ما فرق

سلام

المرة قالوا اتعافت وبقت شديدة وما فيها الا العافية دي بسبع ارواح , ( عاد شيوخكم شيوخ تماااااااام)

عجايز امريكا كان اولبرايت ولا كونداليزا رايس , ولا هيلاري عملن شنو غير الدمار والقتل في المسلمين

ان شاءالله جن كلكي كان الارتجاج جن .. خلي جابت لينا جن جديد ( جن ديبلوماسي كمان )

ياعبدو

الشيخة دي لسع عندها امل في الدنيا دي ياخي ما كترتوا ومسختوا كلنتون دا ماعندوا كلمة ولا شنو ما يقول ليها خلاص شغل وتعالي تمي باقي عمرك في البيت وشوفي شغلك وين ، كمان داير تبقي رئيسة امريكا حتة واحدة كدا تاني نودي وشنا وين منها .

ام محمد

( عاد شيوخكم شيوخ تماااااااام)

عاد دا كلامك شوفي سوا شنو لي هلورا بقوها نصيحة وفصيحة وعلي كلام عبدو كمان شطحت تاني ودايرة تبقي رئيسة لامريكا

شويخي الحقوني وافزعوني

الفزعة

سلام عليكم

اها يا جماعة المرة راحت عليها , وقالوا اوباما رشح جون كيري خلفا لها


واهلنا زمان قالوا الجن شوال دقيق ما بتنفض كل ما تنفضو يحت دقيق
و اوباما دا الظاهر عارف الحاجة دي مش جدودو جنبنا من كينيا بكون سمع بشوال الدقيق دا

يا حليلها العجوز ما عارفة عامل السن وشغالة رحلات ماكوكية كل يوم ناطة في بلد , تحل وتربط

ما عارفة البشتغل بغيرو دي نهايتو بالذات مشاكلنا المشربكة دي مش تجنن ... تجنن وتمحن