االســـــــــاخر جـــــــــــــــبرا

[عبدالمنعم]

أصابت الدهشة كل (العالم) وهو يستمع إلى هذا الخبر الذى تناقلته وكالات الأنباء العالمية وبثته (الفضائيات) :
- فى (الخرطوم) وبعد أن تم تبادل الأدوار (سلمياً) وصار (المسؤولون) هم (الرعية) وأصبحوا خداماً (للشعب) الذى أصبح بدوره (مسئولاًً) عنهم وبعد أن أصدر (الشعب) بعض القرارات الخاصة بترشيد (السفريات) الخارجية للمسؤولين وتخفيض (بدل السفرية) لهم من )خمسميت دولار فى اليوم) إلى (خمسين دولاراً فقط) تجمع عدد من المسؤولين فى الميدان المسمى بـ(ميدان أبوجنزير) وقاموا بتسيير (تظاهرة) وهم يحملون اللافتات التى كتبت عليها شعارات تندد بقرارات (الشعب) الأخيرة هذا وقد تصدت (شرطة الشعب) للتظاهرة حيث قامت بفضها مستخدمة الهراوات والغاز المسيل للدموع مما جعل (المسؤولين) يهربون مستخدمين (الأزقة) ويحتمون ببعض (المحلات التجارية ) هذا وقد وقعت بعض الإصابات فى صفوف (المسئولين) حيث تم نقلهم لتلقى العلاج بالمستشفيات كما تم القبض على بعضهم هذا وفى تصريح أدلى به المتحدث الرسمى باسم (الشعب) أفاد أن المقبوض عليهم سوف يقدمون لمحاكمات عادلة فى الأيام القليلة القادمة.
- إتخيل قالوا (المسؤولين) مشوا (للشعب) عشان يديهم (تصريح) بتسيير المظاهرة قام رفض وما أداهم!!
- والله الشعب عمل كويس.. هم زمان قاعدين يدو زول تصريح؟
- هم مشكلتهم إتعودوا على (الترطيب) والراحات عشان كده (التخفيضات) دى بقت ليهم حاره
- لكن هم بثبتوا؟؟ ما مما هبشوهم (الجرسه) ما تديك الدرب .. واى واى ... واى واى
- عليك الله شفتا نحنا زمانك (ثبتنا) ليهم كيف؟؟ على باليمين قبل الجماعه ديل ما يجو كنت عايش أولادى (التسعه) ومعاهم (أمهم) هسع نزلت المعاش اولادى التسعه ما قادرين (يعيشونى) أنا براى!!
- آآى والله (هلكونا) شئ جبايات وشئ أتاوات وشئ رسوم وكل يوم يطلعوا لينا فى (القرارات)
- بى مناسبة (القرارات) دى قالو (الشعب) الليلة الساعة 8 فى المساء عندو (بيان) للمسؤولين ح يطلع فيهو (قرارات) وح يكون (مذاع) و(متلفز)!!


بيان من (الشعب) للمسؤولين :

فى تمام الساعة الثامنة مساء تماما توقفت الحياة تماما فى كل المدن والأحياء وخلت (الشوارع) من المارة و(تسمر) الجميع أمام شاشات التلفاز وأجهزة الراديو للإستماع (للبيان) الذى سوف يحتوى على (القرارات) التى سوف يتخذها (الشعب) تجاه المسؤولين:

الإخوة المسئولون الأعزاء
السلام عليكم ورحمة الله تعالى وبركاته
إن الحياة كما تعلمون لا تسير بوتيرة واحدة وكما تقول الحكمة المأثورة ( فيوم لك ويوم عليك ) وبعد أن صار (الشعب) هو (الحاكم) وأنتم (الرعية) فقد جاء اليوم (العليكم) فأحسن تثبتوا وتبطلوا (الجرسة) زى ما (الشعب) زمانك (ثبت) وربط (الحزام) ومشيتوهو على العجين !!
الإخوة المسؤولون:
الحقيقه نحنا فى (البيان) ده عاوزين نوريكم (سياستنا) الجايه بالواضح كدا عشان بعد ما (المسائل) إتقلبت والأوضاع (إتغيرت) تعرفوا البيكم والعليكم..
الأخوة المسئولون الأعزاء:
أولن بالتبادى عاوزين نقول ليكم حضروا (حزاماتكم) من هسع والما عندو (حزام) يمشى يشترى ليهو (حزام) ليهو ولى (عيالوا) وناس بيتو عشان خلاص البذخ و(الفشخرة) والقروش السايبه و(العربات) واللاندكروزرات و(الضبائح) والعوازيم والعطلات الخارجية والسفر والطيارات والنسوان (المثنى وثلاث ورباع) ده كلو (الشعب) ح يضع ليهو (حل) وكان بتفتكرو إنو كلما (الشعب) يطلع ليهو (قرار) إنتو ح (تقوموا) مظاهرات تكونوا (غبيانين سااكت) لأنو (شرطة الشعب) ح تتصدى ليها بقوة وحزم شديدين وبراكم شفتو الحصل ليكم فى (مظاهرات أمبارح).. إنتو مشكلتكم إنكم كنتوا بتفتكرو إنو الشعب ده (خدامكم) وجاء الوكت الإنتو تعرفو فيهو إنو إنتو (خدامين للشعب) وإنو (الشعب الفضل) ده هو القاعد يدفع ليكم مرتباتكم (المليونية) وبدل سفرياتكم (الدولاريه) وبنزين عرباتكم (الفارهة) والحاجات التانية الأحسن (نخليها مستورة)!! – ثم فى حزم وجدية -
(ايها المسؤولون) لقد قرر (الشعب) إنفاذ القرارات التالية:
قرار رقم 1: زوجة واحده لكل مسؤول :

بهذا فقد قرر (الشعب) أن تكون فى عصمة كل (مسؤول) زوجة (واحدة) ما لم يثبت المسؤول أن زوجته (عاقر) أو (مصابه بمرض) تستحيل معه الحياة الزوجيه.. القرار ده يعنى بالعربى كده (عرس) بتاع متعه و(عدم موضوع) تانى مافى… يعنى تانى حكاية الواحد فيكم جاب ليهو (سكرتيرة) عجبتو وقام (تنى) ده خلاص إنتهى.. أو شاف ليهو (واحده) فى (مؤتمر) قام تلت .. دى تانى (تلقوها عند الغافل).. إنتو طبعا عملتو لينا (الزواج الجماعى) أها نحنا ح نعمل ليكم (الطلاق الجماعى)… القرار ده بيقول من بداية الشهر الجاى إنو أى (مسؤول) فيكم (يحتفظ) بى (مرا) واحده بس و(يسرح) الباقيات- مواصلا- عليكم الله هو بس لو كان عندكم إنتو شوية (خجل وإستحاء) أنحنا (أفراد الشعب) ده الواحد (مرا) واحده ما قادر عليها يعنى (بيت واحد) ما قادر عليهو بس معقول إنتو الواحد عندو فى ذمتو (تلاته وأربعه) ؟؟؟؟ الناس دى بتأكلوها من وين؟؟ وبتشربوها من وين؟؟ وبتسكنوها أفخر السكن من وين؟؟ وبتعلموها أرقى التعليم بى شنو؟؟ وبتركبوها أحدث (العربات) من وين؟؟ وبتمشوا بيهم (لندن) و(باريس) بى ياتو تذاكر وياتو نثريات)؟؟ - مواصلا فى حزم - شوفو يا أيها (المسؤولون) قدامكم أسبوع ( فك تسجيلات) كل مسؤول فيكم يقعد فى الواطه ويحدد (عاوز يسجل منو) ويقوم يشطب الباقيات!! نعم بعد ده إنتهى عهد (التثليث والتربيع)
... الكاميرا تركز على شخص يقف خلف (المتحدث) الذى يتلو البيان مباشرة (وهو يرفع عصا أبنوس) ويهتف صائحا:
- لا تثليث ولا تربيع يا مسؤول خليكا مطيع
- (أصوات تردد خلفه): لا تثليث ولا تربيع يا مسؤول خليكا مطيع
قرار رقم 2: صالح شعبى عام

بموجب هذا القرار سوف يتم تخفيض (جماهير) المسؤولين وإحالة 99% منهم (للصالح الشعبى العام) بعد أن ثبت أن (نصف) عدد (السكان) هم مسئولون فى الدولة.. معقولة بس سبعه وسبعين وزير .. وزراء الصين واليابان و نيكاراغوا والبرازيل ما بيتمو سبعو وسبعين وزير .. شئ وزراء (ساكت)… وشئ وزراء (دولة).. شئ إتحاديين… وشئ ولائيين… وكل وزير عندو مدير مكتب و(سكرتير) وسواق (للمدام) وسواق (للأولاد) وسواق (ليهو) وبعد ده كمان نجى للمستشارين وعددهم حتى الساعة العاشرة والنصف من صباح الأمس كان 31124 مستشاراً وكل مستشار عندو (سواق ليهو) وواحد (للمدام والأولاد) بعد داك نجى لـ(المحليات) و(المحافظات) و(المعتمديات) شوفو البلد دى فيها قريب التلاتين ولايه وكل ولايه فيها قريب الكم وكمين محافظة أها يعنى يكون فى كم محافظ؟؟ ونائب محافظ؟؟وكم معتمد؟؟ وكم نائب معتمد؟؟ وكم رئيس محلية؟؟ وكم نائب رئيس محلية؟؟ وكل واحد فى ديل عندو (مدير مكتب) وسكرتير وسواق (ليهو) وسواق (تانى) وكل واحد من ديل عندو قال إيه (مستشار إعلامى) ومستشار (شنو بتاع شنو ما بعرف داك) - مواصلا وهو يرفع رأسه من الورقة – ثم مواصلاً – عليكم الله يا (مسؤولين) إنتو هسع عارفين (ربع البصل) بى كم؟؟ وللا عارفين (ملوة الفيتاريتا) بى كم؟؟ وإلا كيلو الطماطم عمل كم ؟- وهو يرفع رأسه عن الورقة مواجهاً الكاميرا - وحكمت الله يوم واحد ما شفنا لينا واحد من (جيش المسؤولين) ده إشتكى قال (مرتباتنا إتأخرت) أو واحد قال ما صرفت (ماهيتى)؟؟

[عبدالمنعم]

قرار رقم 3: ركشة لكل مسؤول:

الأخوة المسؤولون
(الشعب) قرر بعد دراسة مستفيضه (سحب) جميع (الركشات) من (الشوارع) وتعويض أصحابها تعويضاً مجزيا ومن ثم منح هذه (الركشات) للمسؤولين وإعطاء كل مسؤول (ركشة) من أجل تنقلاته بدلاً عن (الليلى علويات) و(التاتشرات) و(المرسيدسات) و(الـ bm دبليوهات) الفارهة والتى يكفى ثمن الواحده منها لإطعام خمسيت مليون (جائع) من غالب قوت أهل البلد – مواصلا متهكما- إذا كان رئيس وزراء (اليابان) قاعد يستخدم (عجلة) فى تنقلاتو ولمن يكون متأخر قاعد يقوم (سدارى) يعنى إنتو يا (مسؤولينا) أحسن منو؟؟ واللا بلدنا أغنى من (اليابان)؟؟ أها تانى بس ... (ركشات) نشوفكم تانى ح (تظللوا) شنو؟؟ قزاز مافى!!!.
قرار رقم 4: الحساب ولد :

الشعب بفتكر إنو فى (مسؤولين) بفتكروا إنو (الشعب) ده (عوير) وريالتو (سايله) .. يعنى (المسؤول) أول ما يتعين يكون ساكن ليهو فى بيت (جالوص) وباب الشارع بتاع (زنكى) وضلفه بتقفل والتانية مسنوده بى (حجر) وعفش البيت كلو (دولاب هدوم) وخمسة سراير و(بنبرين) وتربيزة و(الشفع) كل يوم طاردنهم من (الدرس) عشان ما دفعوا (الرسوم) يقوم (المسؤول) بعد كم سنه من تعيينو تلاقى (الشفع) كبرو وقاعدين يقروا (طب) فى جامعات (خاصة) وساكنين فى عمارة فى (المنشية) ومأجرين عمارة (قاردن سيتى) وخالين (الفيلا) بتاعت (كافورى) فاضية!!.
- مواصلاً فى حزم- الشعب قرر إنو يدى (المسؤولين) ديل فرصة (أسبوع) عشان يجيبوا (الحاوى) العمل ليهم (الشغل ده)!! وأى مسؤول يفشل فى ذلك فسوف تنزع منو هذه (الحيازات) لصالح (الشعب) .

الإخوة المسؤولون الأعزاء :
(الشعب) كله أمل فى أنكم سوف تلتزمون الهدوء وضبط النفس والتعامل مع هذه القرارات (بمسؤولية) ولتعلموا بأن أى محاولات إحتجاج من تظاهرات وخلافه سوف يتم التعامل معها بحزم وقوة كما حدث لتظاهرة الأمس والتى قام بها بعض (المسئولين) الرافضين لقرارات (الشعب) الخاصة بـ(تخفيض) بدل السفرية وتقليص (الرحلات الخارجية) !

الإخوة المسؤولون
لا يخفى على أحد منكم أن (الشعب) قد صبر على (مهازلكم) طويلاً ينظر إليكم وأنتم فى (أبراجكم العاجية) تأخذون أضعاف أضعاف ما تعطون ... تلبسون (حرير) الثياب وتأكلون (لذيذ) الطعام وتمتطون فاره (الجياد) وتحجون إلى بيت الله الحرام (ملح) ومن أموال هذا الشعب (الغلبان) وتتطاولون فى بنيان (الفلل والعمائر) وتنكحون ما لذ لكم وطاب من النساء غير عابئين بهذا (الشعب) الذى أذله الفقر وهدته (المسغبه) وأضناه (المرض) فأصبح أفراده كالأيتام على موائد (اللئام) .

أيها المسؤولون :
لقد حان الوقت أن تمشوا على العجين وما تلخبطوهو.. والقرارات دى أول (الغيث) ويا نحنا يا إنتو ووراكم والزمن طويل والسلام عليكم ورحمة الله وبركاته!!.
تداعيات القرارات :

فى حديقة إحدى (الفلل) الفاخرة بأحد الأحياء الراقية جلس المسؤول ومعه جار(المسؤول الآخر) يرتشفان (القهوة التركية) وأمامهم (سبائط) من العنب و(الخوخ والتمرالشفاف) يستمعان إلى (القرارات):
- الشعب ده جنا وللا شنو؟؟ طيب إذا هو (مسؤول مننا) نحن نكون (مسؤولين) من منو؟؟
- شوف والله بعد (الضرب) الإنضربناهو فى (المظاهرة) أمبارح ده الظاهر (الشعب) ده جاد فى الموضوع
- يا خوى كان كده أحسن الواحد (يبيع) ويتخارج
- يا حبيب بيع شنو؟؟ إنت ما سمعت فى (البيان) هسع قالوا أدونا (إسبوع) عشان نجيب الحاوى؟؟
- إنت (الحاوى) ده سيبو هسع (فك التسجيلات) ده نعمل معاهو شنو؟؟ (النسوان) ديل نوديهم وين؟؟
- (يبتسم فى خبث): والله أنا (حمتى خفيفه) ح أطلق (واحده) وأخلى (واحده) زى ما الشعب قال فى قرارو؟؟
- طبعا يا أبوها ح تفك (القديمه) عكس الهواء!!
- يعنى إنت فاكرنى ح أفك (البرادو) وأخلى (الهيلمان!)!
-(وهو ساهم): والله المشكلة مشكلتى أنا هسع (الأربعه) ديل يفكوا منهم ياتو تلاته؟؟
بينما كان هذا الحديث يدور فى الحديقة بين المسؤول وجاره كانت (ست البيت) زوجة المسؤول (الرابعه) تجلس مع زوجة (المسؤول الجار) الأولى على إحدى البلكونات وهن يناقشن القرارات:
- والله ووالله يلحق (يفك تسجيلى) إلا أفك ليهو رقبتو!! كمان أنا بلعب واللا بلعب
- والله يا (ست النفر) ياختى الرجال ديل ما عندهم ضمان وقالوا (الجديد شديد)
- بتقصدى شنو يعنى يا (شيراز)؟؟ عشان إنتى يعنى جديده و(نمرة أربعه)؟؟
- لا ما كدى والله .. لكن (الرجال) ديل أنا عارفاهم كان فى (فنيش) بفنشو ناس (الخدمة الطويلة) .
- خدمة طويلة خدمة قصيرة.. وحاتك إنتى دى يلحق يفنشنى إلا إفنشو ليكى من الدنيا– مواصلة- وهو ذاتو بينى وبينك قالو ليكى بعد ما يشيلو منو (العمارة) دى و(العربات المكندشة) دى ويركبوهو (ركشه) ويحرموهو (السفر) أنا عايزه بيهو شنو؟؟؟
حوار آخر :

فى (فيلا) أخرى لا تبعد كثيرا عن (الفيلا) الأولى كان مسؤول آخر وزوجته يديران حوارا من نوع آخر:
- أنا يانى العارفاها.. من زمان أنبح ليك يا (سعادتو) سجل العمارات دى للأولاد.. أنبح ليك يا (سعادتو) سجل العمارات دى للأولاد!! أها هسع نعمل شنو؟؟ تجيب ليهم (حاوى) من وين؟؟
- والله صدقتى السودان كلو فيهو حاوى واحد.. (خضر الحاوى) ومات!!
- إنت صدقت حكاية الحاوى دى؟؟؟؟ والله حاوى ما يعمل العملتو ده!! الناس كلها عارفاك (موظف دوله) مما قمت معقولة بس (ماهيتك) تعمل العملتو ده!! والله (عماراتك) دى ياها الشعب شايلا شايلا – مواصلة فى شماته- هسع كان سمعت كلامى وسجلتهم ليا ولى وليداتك ديل ما كان أحسن ليك؟؟
- أنا عارفك زعلانه عشان سجلت (بيت كافورى) للمرا التانيه!!
- والله (الشعب) يقلعو منها زى العجب.. إنت قايل فى حاجه على (الشعب) ده بتندسا؟؟
فهم (سعادتو) من كلمات (زوجته) الأخيرة بأنها سوف تقوم بالوشايه به وتفضح مسألة تسجيل (بيت كافورى) لزوجته (الثانية) وأن ما قالته ليس إلا (تهديداً مغلفاً) فقام بتصعيد الحوار معها حتى درجة (الغليان) وما لبث أن رمى عليها (يمين الطلاق) وهو يقول فى نفسه:
-أهو الواحد يرتاح منها وكمان (يفك تسجيلات)!!

[عبدالمنعم]

تظاهرات:

لأن (الشعب) ضايق (الشغلانه) فى نفسو وعارف إنو (قرارات التخفيض) بالنسبة (للمسؤولين) هى كما (قرارات الزياده) التى كان يفرضها عليه المسؤولون وأنه لا يوجد فرق بينهما سوى (علامة سالب بره القوس) فقد وضع (الشعب) كل قواته على أهبة الإستعداد تحسباً لأى تظاهرات أو (أعمال شغب) يقوم يها (المتضررون) من هذه القرارات وقد كان حدس (الشعب) سليماً وفى (محلو) إذ سرعان ما إنتظمت فى اليوم التالى مباشرة المظاهرات التالية:
الإتحاد العام لزوجات المسؤولين
نظم الإتحاد العام لزوجات المسؤولين تظاهرة سلمية تحركت من أمام (مول عفراء) مشياً على الأقدام متجهه لمبنى ( الأمم المتحدة) لتسليم (المندوب السامى لحقوق المسؤول) مذكرة مندده بقرارات الشعب الأخيرة..
المتظاهرات رفعن (لافتات الإحتجاج) الملونه وسرن فى خطوط متناسقة.. التظاهرة تعبق بمختلف (الروائح الباريسية).. (الحنن) المنقوشة مرسومة بعناية.. (الثياب شيفون) و(توتال) أصليه.. الجزمة لون (شنطة اليد الجلدية Genuine Leather) وشنطة اليد لون (التايير) و(دهب الخليج) يزبن (الأيادى) الناعمة التى لم تعرف (غسيل العده) يوما ًوالتى تمسك بلافتات صغيرة كتب عليها:
(عين الحسود فيها عود )…. (بس معقول نركب ركشات).. الـ (الله بيديهو منو البحميهو ) ...(لا تخفيض للسفريات )
بينما كن يرددن بعض الهتافات:
- مافى طلاق مافى طلاق… موتو موتكم يا عولاق!!
- بى (بنوكنا) وبى (شــركاتنا) ما بنخاف من الجاتنا
الهيئة العليا لأولاد وبنات المسؤولين :

فى تزامن ينم عن تخطيط محكم للفت أنظار (العالم) لهول المأساة التى تحدق (بالمسئولين) وبمصائرهم إنطلقت مظاهرتان .. واحدة من أمام (شارع المشتل) نظمتها الهيئة العليا لزوجات المسؤولين وأخرى نظمتها (الهيئة العليا لأولاد وبنات المسؤولين) مستخدمة فيها (العربات) التى جلس بداخلها (أولاد) و(بنات) المسؤولين من كافة الأعمار وبعضهم قد قام بإخرج (رأسه) من خلال (الزجاج) حاملاً بعض (اللافتات) وها هو (هيثم) و(لينا) يقومان بتنظيم المسيرة قبل إنطلاقها:
- ياجماعه.. يا جماعة… ناس (البرادو) البيضاء يجو الصف القدام ده.. وبعدهم العربات (البى أم ) .. يا جماعه أى زول سائق (جياد) وإلا (أتوس) وإلا حاجه زى دى يكون بالجنبات… يا….
- يا هيثم كلمتهم إنو (البارد والسندوتشات) فى اللاندكروزر بتاع (شيرين وحماده)؟؟
- يا وليد.. ياوليد كلم السواق يجينا بعد نهاية (المظاهرة) طوالى وما يتأخر!!
وإنطلقت التظاهرة بعد أن تم (تنظيم ألوان صفوف العربات) وبدأ ترديد الهتافات عبر(مايكرفون) مثبت فى عربه (برادو 2010) بيضاء (مظللة) وتعالت الهتافات:
- بيرقر بيرقر ماكنتوش… ليه عاوزننا ناكل بوش
ثم فى (نبرة) أكثر جدية وتشنجاً:
- شعب جبان عايز كشه.. ليه عاوزنا نركب ركشة
لم تمر دقائق حتى توقف (الركب) لتتم إذاعة (رسالة عبر الموبايل) من (أولاد المسؤولين) الذين يدرسون بالجامعات (البريطانية):
- إخواننا أبناء المسؤولين (بالداخل) نحيي فيكم روح الصمود.. ونرجو منكم التصدى بكل قوة وحزم لهذه القرارات (الجائرة).. إخواننا.. سيروا وعين (الله) ترعاكم.. وما تشتغلوا بالشعب (المسكين) ده - دى قرارات (فشنك) ساكت!!!
وما أن إنتهى (مذيع التظاهرة) من (إذاعة المحادثة) على (المتظاهرين) حتى دوى(تصفيق حاد) وهتاف متقطع حفزه لقراءة (البرقية) التالية:
- وهذه برقية من إخواننا أبناء (المسؤولين) الذين يدرسون بالجامعات (الإسكندنافية) تقول:
- ولا يهمكم دى حساده ساكت.. قف.. لو حصلت ليكم أى حاجه تعالوا لينا هنا.. قف.. الـ (الله بيديهو منو البحميهو) !
تلاقت المظاهرتان (أبناء المسؤولين وأمهاتهم) عند تقاطع (سانت جيمس) وإزدادت حده الهتافات:
- يا شعب يا جبان.. إنت حاسد وللا (بغران)
- بيرقر بيرقر ماكـــنتوش.. ما بتجبرنا ناكل البوش
بينما كانت (شرطة الشعب) تراقب (المظاهرتبن) فى حذر… إتجهت المظاهرتان نحو مكاتب ( الأمم المتحدة) بشارع الجامعة لمقابلة (المندوب السامى لحقوق المسئولين) بعد أن قامت (زوجات المسؤولين) بالركوب مع أبنائهن فى (العربات) وهن يمسكن بزجاجات (المياه المعدنية البارده) ويصلحن من مكياجهن الذى أفسدته (حرارة الشمس) !
عند وصول (المظاهرتين) لمكتب المندوب السامى تفاجأ الجميع بوجود (تظاهرة) صغيرة غاضبة يقودها عدد من الأشخاص ذوى (الملابس المزركشة الغريبه) والعمائم الملونه .. أحد المتظاهرين كان يمسك بثعبان ضخم من فصيلة (الأصلة) يلفه حول عنقه بينما آخر يقوم بإبتلاع (سلسلة من الأمواس) وعدد آخر يقوم بإخراج بالونات (لهب) من فمه بينما إنهمكت مجموعة أخرى منهم بالمشى على (النار) وهم جميعا يحملون (لافتات إحتجاج ) غاضبة.
إتجهت زوجة أحد المسؤولين (قائدة التظاهرة) غاضبة نحو أحدهم:
- شنو يعنى؟؟ ما تشيلو (دبايبكم) وحاجاتكم دى من هنا.. يعنى عاوزين تبوظوا لينا مظاهراتنا دى؟
- ما تبوظ كان باظت.. إنتو (رجالكم) ديل ما بوظو (سمعتنا) وفضحونا (فضيحة).. هسع (أكبر حاوى) معانا هنا من الشايفاهم ديل بيقدر يبنى ليهو (عمارتين) بى عشرين مليار من ماهيتو؟؟

عبدالمنعم .. لك التحيه

بعدين الـــطـــمــع و شـــناة الـطــبــع دي شـــــنو ؟ 20 سنه لسه ما شــبعـــو؟

[عبدالمنعم]

Originally Posted by الباقر الامين

عبدالمنعم .. لك التحيه

بعدين الـــطـــمــع و شـــناة الـطــبــع دي شـــــنو ؟ 20 سنه لسه ما شــبعـــو؟

إنت في الطمع ؟ رايك شنو في الزول البكتب جنس الكلام دا؟

[عوض خضر]

والله يامعروف الزول دا خطير جدا المام واسع بالموضوع سعه في الخيال تحليل عميق ومن ثم استدراج صوره جميله تلخص معاناة بشكل يجعلنا نضحك من المنا زدنا منه ان امكن

والله دي مرايا اي مسؤل يشوف وشو فيها واي مخدوع يراجعها براو وبعد داك اللجي يقول لينا الناس ديل تمام عشان بطل سياسة دس الراس في الرمل دي

[عارف عبد الرحمن]

أنتو في الموضوع الجميل ..ولا في الحلة العجيبة دي والله بقيت أجي أقرأ أي موضوع كاتبو منعم أجوع .. والأحلي في الحلة ريحة التوم .. تجيب الضهبان

[عوض خضر]

ابوعبدالرحمن انا خايف من حلة صاحبك دا مايرفعها حتي رمضان ساعتها بتكون الحله دي مشكله فعلا حلتو حقة الملاح الاخضر لسع في الذاكره