|
|
08-05-2010, 01:16 PM
|
#1 | ||||||||||
|
كلام الرتينة بت سالم وليد عتمان في حنة علي الشاشوق / القدال
كلام الرتينة بت سالم وليد عتمان في حنة علي الشاشوق بنية..... بنية لسالم وليد عتمان وصلاة الزين سموها الرتينة أمها بت علي الخمجان خريف الرازه عزينه كبار الحلة آباته بكار الحلة أماته تمرق زينه تبرق زينه تمشي تهاتي وزينه بلا الربعة التحجل وشاكية للوديان كتافه وفوق الجيّد علي ضهر البوادي تغني ماخاتية الزرافه سلامها ضنين بسيمها الودعه ألا تزيد لطافه ملامها رصين مقدم زوكها قبال الحصافه كلامها حنين كلامها يطمن الهمباتي والمجلوبة متعارض كتافه وقاريه وكاتبه تحمد سيدها ماخده علي البنيات الشرافه كذا البريبه تبرد عيني لا تغشاها لا أحضر نشافه وكان في الحلة يوم حنة علي الشاشوق مشينا نقدم البنوت علي ضو الرتاين عيونهن هارجه تنبح في الفجر والليل قريب واقف يعاين خدودهن جاهره زي جهر الكهارب الفي المدينه وكان الليل ومافي الحلة ... من الحفله ألا صداها كان زغروده كان غنّاي رقيص الشامه بت حمدين وعرضة حامد العولاق وخت الحنه ليات من حضور ضفرين... ونمات العديل والزين وشنق ود سعد طاقيتو شان في الحلة ساوو كنتين وشكلة عامر المسكين وعيط ودمجمر زين عشان الزينة رقصت زين وفي الشعقيبه.. كان بازمالو شباليين وسكرة وين ؟ وسهرة وين ؟ وبهرة وين ؟ وجهرة وين ؟ أقول آبنيه ليش ماتهمي ليش ماتهمي فوق زولاً مشلهت فوق دريبك لا النفس مجبود ولا لحق الغزاله وقفت ... وانبهر رماشه جدعت بالبسم رشاشه قالت... والعيون ضحّاكه في ضو الرتين بشاشه آ المهجوم.... أهجمك الله كان داير تسيلي الخلعه عاد من حيني جاتني الحاله قتلها لا لا وحات النعمه آبنيه البريد في الريده مابخبر فساله حدرت باسمه قتلها.... عايني تسلم عينك إلا حقيقة مو ساهل كتاله ندهت ناضره حالفابو الصباح الباش يلون في المشارق وتلين الجايه من تالانا تاله وحات أمي البعزها زي تراب حلتنا أبقى حداك آالمريود وأقول لاهلنا ناس قدام وفي ها الحاله مو شيني القواله وآسأل القمره في شأنك واقولها هيله يا القمره وتاني وهيله يا القمره وتالته وهيله يا القمره دحين ساكن وريشات القليب في الحله مو رشه المقاله وحات الفرحة في ها الليل بشوفك فيكا عز ابواتي وضرعاتك خدر ياالباهي وما دايرا لي غيرك كفاله وجاتني النهمه قتلها أقيفي آ المريوده عايز ارمي لي مرباعين وتبقى حمالتي عند سيد الحماله قالت والفجر في خديدها آ الممسوخ حدانا العين بعدما تسدر الضحويه خت الفاس علي كتفك وبوح غادي بوح غادي نم فوق البعجبك ...زين؟ قتلها زين وداك الحين بشوفك يا الرتينه مع الشمش بتلالي مناك للسحاب الكابي فوق حلتنا كان سابل ضلاله بشوفك فوق عوينات الصبيّن العشق لطف ضياهم والنهار وصف خطاهم والصبر زارعينو فوق ضهر البوادر فوق كتافين السقاله بريد ريدك كفاح اهلي وأريد ريدك سماح أهلي أريد مهواك أريد انسانك الجواك وأريدك تاني زي آخر الحتاله وأدوبي لك وأشيلك غنوة للسمحات وأنمك في تراتيلي وكل ما العتمة تنزل سابله انسى عناي واتاوق لقناديلك وأشد حيلي وأدوبي لك وإذا مغنّاي يبرد في الحشا صدرك ويرجع لي تهاليلي بدّوبي لك ولو الشوق عرف بكاك اطري غناي عليك العزة آ المريوده أدوبيلك |
||||||||||
|
|
08-05-2010, 02:02 PM
|
#2 | ||||||||||||
|
مشرف المنتديات الأدبية
|
الأخ الصادق انه عبقري الشعر الاستاذ محمد طه دفع الله ( القدال ) القادم من ارض المحنة من جزيرة الخير والابداع من عمق البسطاء الرائعون ينثر عبير الدهشة بين القوافي والالحان محمد طه القدال رمز من رموز الشعر الحديث في وطن الجمال ، سطر بانامله رائعات الاشعار يمجد فيها هذا الوطن ويرسم لوحة الشموخ لاهلنا الطيبون الكادحون بحثاً عن الستر والفضيلة ، ياتي هذا القدال ليشكل باشعاره واقعهم الجميل بعبارات بسيطة من عمق واقعنا الجميل اماتي القبيل بي حنهن لجني كرفة وقلدة كيف شوف اللبن رجنّي حزنا جاني في ميع الصبا يلجني اطلع مني يا جلدي المنمل جني واطلع مني يا حزنًا بقى مكجني خلني ابدا مسداري واودي قفايا لي دارا بقت مي داري جيت الجلدي بيني وبين عضايا الشحمة الا النار بقت قدامي جلدي الليلة بيني وبين عضايا المافي الا تراني شوال الكبس نفيخ جلاليب الورم هدانّي في جلدي الورم قولنلي ولا صحي الورم عضاني سفريتك مي في النية ماها الكانت محرية خابراك عريف زم العربان ولّا قيام الوردية مالك تريان ومندي كاسي الكتان والهندي قولك ككيف ترجى البيشان ولا الغربة البي زندي برق العبدلي الوزني ما طاش يا جاب المزن فرق ياالضيف فعل الغضبان انفر ثيران الحزن شن القعدة يا ابو السرة شن القعدة في ضل العمارات ام كمرتًا بره .. ضقنا الحنضل اليانكي وبلعنا المرة كملت كوتة التمباك صقعنا الجرة وكت اتقفلت شقيش قبل بالمرة لن يأمرنا في بلد المعاني الحرة الشم خوخّت بردن ليالي الحرة والبراق برق شوف عيني الصقير بي جناحو كفت الفرة تلقاها ام خدود الليلة مرقت برة مرقت برة تغلي مديدة الحلبة التسمن ردفها السمن المبستر يانكي والويقود قعيرات الدخان في العين وفي الفشفاش بسوي عمايلو شن فايدة مديدة الحلبة يا ابو السرة شن فايدة مديدة الحلبة الويقود يشيلو اليانكي قامت من دخاخين العمى تلمع وشيها اليانكي مستنيها كان اليانكي مستنيها في مراية السجم في الليل لقيتها متل فرايخ الطير مرق ود عينها من ود عينها رجافة المزمة الحمى جفلت منو وقعت عندي صدرها بغلي يا ابو السرة شفت اليانكي في ود عينها حسها للبحر يمكن يغسل عينها من اليانكي فتنا الحجرة بالكتة وغتسنا مسافة تبقى قدر مسالك الريده ما لاقانا من يغبانا في البحر الفضا التحتاني ناس عارفاها ناس عارفاك ناس عارفاني نادينا القعونج والبلطي قرقور السمك ودانا لي دابي الخشش نادينا عمال الطمي الصارقيلا والقرموط وود الموية وقتنا عليها كانت نايمة عجال البحر حارساها كا نت نايمة بين حجرين وضل ساسوية وعمال الطمي الصحونا خابرين الدروب لمّو حصى البحر قسموهو يات من كان سبع جمرات دابي الخشش قال ادوها في الجمرات تلات سبعات قلنا ادوها في في الجمرات تلات سبعات مسكنا دربنا وعمال الطمي مرقوبنا في مشرع مسارب الضي لقينا الدنيا تترجانا قوقى القمري خوّى صغيرو وعوّى حدي وعمال الطمي الصحونا لمّو على البعرفو الصي حصى القيزان دوابي الدارقة والسحلية والناس التحت خابرين عمايلاليانكي قولن للاخلا ديارو دمك فرهد في نارو غورّ في الارض طارو صقرين اولاد الارض ما طاروا لحمي غطى بن عمي شو صار حالو يا امي منديل العرض في بيت الدين دمي ما يخلي دمي انا من دير يسن صرنا في جزر التين عم نسقي بعض حب الزيتون بدو يرجع للطين صابرا تحت الدورية صابرة تحت الدورية .. صابرة فوق الدورية يا حالة ضد لحم الطفلين نابت غصن الحرية جزري مو في شاتيلا ما قال حالي يا ويلا احنا في الارض ارض فلسطين يا امي هيلا هيلا قوقي القمري خوّا القي وعوّا حدي وكنا جماعة دابات الارض والسايمة وعوامة البحر والطير وحتى الغيمة دفاقة المطر فوق راسنا شايفة الدرب دريب اليانكي لا يودرنا قال الدابي للضليلة خليك صاحية زوغ اليانكي لايودرنا قال الدابي ان يغباها ما بيغباني ولما الشم مودع غاربة وصّت جملة الصقار عيونن كاربة ابقو الف بفوت للمتلكم ناهدين وفوق دينن عريبا غادي قال السحلي لا تغشوهو دول عربان توابع اليانكي قال الجمعي لا نغشاهو دول عربان توابع اليانكي وخلوها العريب الغايبة السراق طليقو معاهو تيجانا عروشها الخروع الهش العويش النار تعلق فوق عقال العرش ولا خسانا بي هادي العروش الغربة يا ابو السرة لا عقام مسكنا دربنا وعمال الطمي الصحوها خابرين الدروب مرقوببنا من وادي الضلمة الكان عقب لمينا في باقي الجمع قاصين دريب اليانكي شمور الضيب في الكنغو وخبرا من جنوب امريكا ومن كلهاري ديبا ضاري والتمساح وليد امزون ونمرا في النمور كمبودي ونمرة خلا الله مكسيكية ولما لميمنا والشمس البتوقد فوقنا شد شديدنا التمثال مشيل روقنا وعالم حر يدوعل فوقنا لي يوم فوقنا نبزغ فيهو في عينيهو جر واسوقنا يا شمس طلي طلي شاوري على بيتي دلي كيال الكيل ختياري مات ظلي عم يحرس ظلي عادل على خيي ميلي خيي لا يحمل شملي ما خف الشمل تاني المرات ما كل الرصاص شيلي عيني في الفيل ما ظله كلنا ندريه ما نضله يا ويل الويل نرمي الجمرات عدّي المستشهد كله عدي المستشهد كله
|
||||||||||||
|
|
|
08-07-2010, 07:46 AM
|
#3 | ||||||||
|
اسخليوس معروف يا رايعين وهذه فرصه لفتح نافذة القدال بعد الدوش اسخليوس - اريد انسانك الجواك - تري من هي الرتينه هل يمكن ان يتمدد انسان ما ليشمل كل تلك المفاهيم والصور والاخيله والمواثيق والعهود والفرح ما القناديل التي يمارس عليها المتاوقه أقول آبنيه ليش ماتهمي ليش ماتهمي فوق زولاً مشلهت فوق دريبك لا النفس مجبود ولا لحق الغزاله هنا عدة اطراف الزول الما لحق الغزاله والغزاله والبنيه وبين هذه الاطراف مجهودات نفس مجبود وطلب همه ومحاولة لحاق السؤال من هي البنيه من هي الرتينه هل هي فرح غامر ننتظره كلنا نتطلع اليه والرتينه ايضا رمز لها بالغزاله في نهاية البيت الملاحظ ان البنيه والغزاله والرتينه هي نفس المفهوم او الامنيه التي يطمح للوصول اليها الزول ( اطلاق فرد وارادة الكل ) هل يتجاوز القدال هنا المباشره ويضع خلف مداميك ابياته رؤيه اخري كاشفه لحلم يداعب خياله فيتسلل لشعره ابي ام رضي الا يجعلنا هذا الامر الموارب اتفقنا عليه او اختلفنا حوله مشدودين للشعر المسنود بوعي الشاعر بمعاناة ناسه مشدودين للشعر المزدوج القيمه والطرح والبهاء |
||||||||
|
|
|
08-07-2010, 07:49 AM
|
#4 | ||||||||
|
انه خلاص من نوع ما قد نختلف في شكله او طريقة رسمه ولكننا نتفق علي انه خلاص قد نجده في الكثير من الاشعار والكتابات كل مبدع يدس خلاصه حسب رؤيته في ثنايا ابداعه القدال المستفيد من اكتناز اللغه يسطع مشروعه للخلاص دائما دون التباس |
||||||||
|
|
|
08-07-2010, 10:46 PM
|
#5 | ||||||||||
|
الحبيب معروف...شكرا للاضافة...فالجزيرة مليئة بالمبدعين... وحبلي بالخارجين من رحم المعاناة حروفا تتدفق شعرا وفكرة.... يدوزنون الحرف ويلونونه رسوما تحال الي قضية... وكلمات تؤول الي تسامي انساني راقي... |
||||||||||
|
|
|
08-07-2010, 10:56 PM
|
#6 | ||||||||||
|
الاخ عوض.... شكرا للتحليل والتساؤلات التي تعتمل في الدواخل... هنا سيدي نحن بحضرة... رجل احال الفكرة الي كلمة... رجل يملك ادوات الصنعة... ويجيد التعبير عن مكنونات نفسه... رجل من عمق المعاناة خرج.. رجل يساءل نفسه عن غائبة....غائبة اتعبت النفوس في انتظار المجئ ...تتدلل كلما هفت لها القلوب... تتغنج ببعد المنال....يسأل عن ضياء او بصيص من امل يقود اليها...حتي ولو كان ضي رتينه... ارهقه مجابدة النفس في انتظار انبلاج السنا....تخيلها صورا واقعية... فرحا يمتد في واقع بسيط لانسان ابسط... انسان مسكون بحب الريف وتفصيلاته البسيطه ولكنها صادقة ونابعة من البيئة... |
||||||||||
|
|
|
08-08-2010, 02:38 AM
|
#7 | ||||||||
|
زائر
|
مقطع من عمل اخر للقدال حيث اللغة الموغلة في المحلية ...ولكنها تحاكي ( العسل السوداني) لمنعم وحرش , طعما ووعدا وتمني...... مرقن صباحا جيت من عين بروقن خايفات مهاوي الصيد خايفين حروقـن هن فوقنا متسابحات وعيوننا فوقن مرقن من الجايات ختمن مروقن جيتك كما الجمرات راجمات علوقن من نوري متطابقات حالفات يقوقن طيرتين من الجنات منحلي طوقن نشدن غناوي الخير طرقن حلوقن من مغرب الغنوات لا عند شروقن تابات مع البنوت لازمات عشوقن شبلنو متسابقات متساوي روقن شيلن بلا خيلن والعزة طوقن نخلن بلا شعرن والنيل عروقن ما بردن فاترات يوم حر سوقن ما قبلن حارنات خوف البسوقن دمرن شعاب الروح في يوم نشوغن بلدن قلوب الناس والحنة شوقن هن عرفن الخلقن خابرات خلوقن تمن تمام الكيف حسبن فروقن إيش البلد حيكون ناقص دلوقن غنن بنينة الخير فوق حادي نوقن ************************** بنن بنن بانينة يا بنينة هي نبني البنا البانينا يا بنينة هي باسم الله ابتديت يا ربي يا باريني والصلاة والسلام للحبه باريني ................ يا بنينة هي الوطن السماح الحبه باريني قلبي علي الولد قلب البلد باريني ............... يا بنينة هي ما منعوك من شمس الله ما منعوني والكلمة الحقيقة حقيقة شمس الكونِ ............ يا بنينة هي للغبش السواد غنوة وشفا المكنونِ للظالم سياط تجلد قفا الظربوني ................ يا بنينة هي ما منعوني من ريحتك ولا منعوكا ما كازوك لو عرفوا العنا وعرفوكا ............ يا بنينة هي الغنوة البحجروا عليها بالبازوكا دوب سجانها فز وفرهدت في شروكا ........... يا بنينة هي ما منعوها من شوفتك إذا منعوها تلقاك في الأرض في أمها وفي بوها ........... يا بنينة هي شارياك بالنفس ما همها الباعوها لا نايحة بتنوح لا أذنت مندوهة يا .............. يا بنينة هي ما منعوك ما منعوها ما منعونا شيل الناس وشم الطين وشوق أمونة .......... يا بنينة هي ما شفنا البكيل نقص حوافي الشونة ما كبر الصغير بى نفخة البالونة ............... يا بنينة هي كيف العاصمة تبقى الشاية للحرية والعكاز مضبب والزمن جهدية ................ يا بنينة هي نحن عروسنا قولة حق نشيلها هدية لى ابقدوم ونوري حليوة والمكنية .............. يا بنينة هي ************************** نحن الكلمة شمس القايلة ما بنلوكة سن الحق عل الظربوني حلق الشوكة جنياتا بعرفو الغنوة شدوا سلوكا شالو الحق نهيض نقزي وضرب دلوكة نحن بلدنا راسية النيا يراضي حدوبا في الغرب الجبل في النص جبال النوبة في الشرق التلال عطرون علاج القوبة والبركل مع الأماتونج ركايز الحوبة نحن بلادنا باولادها البعرفوا الراطنة أحمد ود قرنق وإسحاق أخوك وأبو فاطنة لو ما كان قبيل حشف القبيلة الجاطنا كنا نهضنا لي قدام لحقنا الفاتنا نحن غنانا للولد البشوف قدامو للبنت البتسند حيلو شادة حزامو ونحن غنانا للبلد البراشي غمامو نطرى جمايلو حميدو وجميل أيامو جيت ناس فلتكان ختونا في غوغايا قالولنا السلام، زيت البلد هو الغاية (شيشانا) القبيل غنونا بالهوهايا ولدولنا السلام ولدة حبل بالداية المهدي القبيل ولدا قدل فوق عزة (والشيشان) سكوت لا زول عرض لا هزة يا نص العصا اللا كرة فيك لا فزة بوش وبلير اخوك ختونا في قد بزة .............. يا بنينة هي __________________ |
||||||||
|
|
|
08-08-2010, 06:34 AM
|
#8 | ||||||||||
|
مشكور اخ ياسر علي الاضافة والزود.....فالرجل ملئ بما هو جدير بالقراءة .... وهاودونا اثرو البوست..... |
||||||||||
|
|
|
08-08-2010, 07:42 AM
|
#9 | ||||||||
|
مشرف قسم العلوم والتكنلوجيا
|
تحيه لك ياصادق انت دائماً تأتى بالجميل |
||||||||
|
|
|
08-08-2010, 08:35 AM
|
#10 | ||||||||||
|
القدال أبن حليوة .. والكل يعرف خالو محمد بادي المفتش الكان في المكتب وشقيقه علي ما أذكر مرتضي كان ضابط أمن في الرئاسة وادي شعير .. يفرحنا هذا الولد المشحون بريحة التراب والقروي المتمسك بالفضيلة والبساطة .. وأن يكون من جزيرة الخير .. فقط أعيب عليه تكرار نفسه في كل قصائده وتستطيع أن تري قصيدته .. لا أن تسمعها .. دهشة لمسرحه ومفرداته وأثرها كمتعة الفرجة علي الكوميديا السوداء..وتذكرني ببرنامج الصلات الطيبة .. تعكس حالة ننساها مجرد ما ينتهي العرض ونبلع غصتنا ..القدال أوغل نفسه في خصوصية طرح مكرر .. ومفرداته لن تعطيها الجرس الذي تسمعه من صاحبها .. خصوصيتها من صوته وأجادة اللغة الخاصة .. يذكرني بمحمد جيب الله كدكي .. نفس اللونية .. متعتها في الأستماع له .. مجرد رأي من زول متزوق لسانو تخين لينا عليها خيل وبكاري لا ما غطسنا واتوكرنا وشان الروح تروح من اصلو يبهت وينقطع طارينا دخلو علينا باللوتاري عبونا وبقينا رطينة تقعد جمعتين في اليانكي يبقى جوازك اخر زينة الماسوني سيد امريكا والصهيوني حاكم امريكا والشاروني عين امريكا ما امريكا هي الذبحتنا ياخ امريكا هي المسكينة بس حكامنا ما فهمونا لا طول الزمن فهمونا قلنا نغني للولد الشهيد كتمونا قلنا سبيا ابوكم قشري ختونا في حديد يا بونا بس حكامنا ما فهمونا لا طول الزمن فهمونا وامريكا بتبيع ما ينشري ختالنا اليهود في كفة لافالنا الحروب في لفة سايقالنا الحزن في الدفة ما همانا في زول لا زلم لا طينة ازيدك في الغبينة.. غبينة عندك غزة احتلوها فاحتلونا بعد الاحتلال حصرونا من بعد الحصار هرسونا في الضحى والعصر عصرونا في بلود الشتات زرعونا بالبلدوزرات حصدونا لا بيتا وقف لا كرزة لاتفاح سلم لا عنزة يا طفل الحجر في غزة لو هتلر نصب شواية دول حشروك في طابونة واتفرجنا والحسرة البتاكل ابونا واتفرجنا والكل بالغبينة انجز واتفرجنا واتطمنا ونسينا القبيل ولدونا يا الخايفين اوان الحزة دول اسياد ليالي المزة من كتر الشجب شجبونا لو كل العيال الشتو من قلب الحبيبة نسوها نحنا مع الشهيد قيلنا لامن يا الخزين ضقرنا لا الكارت الاخيضر شافنا لا عند السفارة بدرنا لا الماسون مضالنا الفيزا لا البنا العظيم سفرنا نحنا على العلينا بقينا ما اتذكرنا؟ ما اتذكرنا كننا ياالشهيد ما نسينا شان نرجي اليجي يفكرنا شيل ارض العرب وادينا من خيرها المرمي عاينا لا حايق عليك لا فينا لا ايديها سفلى عطاها لا مقصر سماها وطينا لو القسمة بس في نيلها الفي بطنها يشبعنا والفي كفها يكفينا اسمع مني يا طاري البلا وناكرنا دي الارض الببكي غناها والارض البغني حزينها ما من فقرها تفقرنا وتفركشنا وتحنكشنا بس من كجها الكاجينا وما من غيرنا جات خيبتنا كتر خير يهود وادينا -------------------------------------------
|
||||||||||
|
|
 |
|
|
 |
 |
 |
Linear Mode
