عسل سوداني

[عبدالمنعم]

Originally Posted by عوض خضر

معروف الله يعلم ان هناك حاجات تانيه هي الجابتلنا الفره والخوفه

زي مُهر السّبق في مشــيَّتُو وِوِحِيلُو
ضامر هافو تُقْل أردافو هدَّد حيـــلو
ردفولو الطلح ملَّص عقودو وتيــلو
أخد البوخة قام عرقو الصفيح ما بشيلو

[عبدالمنعم]

الزول المحزَّز جيدو فـــاق ناس جيلو
مصاقِّر حفرة الدخان صباحو وليــــلو
طلع من بيتو طلَّع روحنا بي وحِّيـــلو
يضْوِي جبينو زي بدر التمام في ليلو

بجد كدا ابدعت وزكرتني اخونا شريف حسين ،عندو خفشات لزيزة في اغاني الحقيبه،وزيدنا كمان اصلو لينا زمن ماتكيفنا

[عبدالمنعم]

Originally Posted by عبدالعزيز خيرالله الحسن

بجد كدا ابدعت وزكرتني اخونا شريف حسين ،عندو خفشات لذيذة في اغاني الحقيبه،وزيدنا كمان اصلو لينا زمن ماتكيفنا

عبد العزيز حبابك وكان عندك غُنا جيبو لينا نحن هنا عاملين لينا لمّه للغنا والنميم كل الأخوان شاركونا وأخوي الصادق ما قصر دافر دفر شديد وحالفين ما بنقيف تب إلا الغنا يكمل

بـــص المدرسة البصيتلو بصة عابر
ومن داخلو انطلق سهماً يولول هابر
حش حشاي ما خلى لي عضماً جابر
كيفن الخلاص يا شعرا فيكم خـــابر؟

[عارف عبد الرحمن]

سمرتا زي سماً.. سري في أوصالي
حلاتا عسلاً صافي مو متحالي
بسمتا تفضحني تكشف حالي
ليما بدورو الا صعب يبقالي

[صادق محمد عوض]

يا معروف اخوي مالك بتزيدنا تبهدل
بتجيب طاري الطلح اللي عقولنا يخبل
قعدن فوقو ستاتو ناس عازة امات جنقل
قامن منو بلا البونش ضربوبو هباب سنجل

[صادق محمد عوض]

الزول القبيل ازانا بي تفصيلو
مقسم جسمو عالي خاتي مثيلو
سالب للفؤاد هارد القليب كاويلو
يوم طبق البوخة قام وهز حجيلو

[صادق محمد عوض]

بص المدارس اقيف في السكة ديك راجنك
شايل للبنوت ارفق وجود علينا كترو حنك
خلينا النشوف فايق الجمال الفاهو ديمه محنك
فرد نظرة لي خديدو وعقب خلينا صد لي جنك

[عبدالمنعم]

يا الصادق أخوي أظنك بقيت تقطعو أخضر من الراس
وأنا قبيـــــــــــل كُت قايلك متلي بتجيـــب من الكراس
المهم هذا النم بيســـــــــــعدنا وقد يداوي بعض الناس
واصل يالحبيب أصلو النّم سمح من الراس أو الكراس

[عبدالمنعم]

واحدين قالوا شافوها وسريع إتضارت
واحدين قالوا مرقت بره تقدل ساااارت
الشي الشُفتو أنا وأفكاري فيه أحتارت
ليهَ القمره نزلت من سماااااها وزارت