سلسلة الأمثال الشعبية

[عبدالملك مصطفى]

السودان بلد مترامي الاطراف ومتعدد الثقافات والاعراق ولذا كان لابد أن يحوي هذا البلد القارة كثير من التقاليد والعادات والقصص والحكايات التي تحمل دلالات ومعالم كل منطقة على حده ومن هنا احبتي نود ان تستريح قليلاً مع بعض الروايات الشعبية والتي انبثقت منها أمثال صارت تروى على مدى الازمان واسمحوا لي ان أخوض معكم تجربة علها تجد منكم كل الرضا من أجل الفائدة وأخذ العبر والدروس من أجدادنا وتراثنا القيم والملئ بالكثير والكثير من تلك القصص وفي هذه المساحة سنتطرق لشرح المثل من وجهتين اثنتين
1/ الوجهة الاولى متى يضرب المثل ؟؟؟؟
2/ الدرس المستفاد منه
وسيكون الشرح إنشاءالله باللهجة الدارجية البسيطة وذلك استناداً على منشأ المثل وأول الأمثال
( عواسة السم بتضوقو)
المثل ده بضربوه للزول اللي بحاول يعمل مكائد ولا اي حاجة بتضر باي زول تاني وهو بطابق المثل العربي اللي بقول من حفر حفرة لاخيه وقع فيه
ولشنو قالوا عواسة السم ؟؟؟؟ عشان معروف انو اي زول بطبخ حاجة لازم هو اول واحد يضوق طبيخه ده ؛ شنو ماكان نوع الطبيخ وده بعلمنا انو لازم نسوي الحاجات الحلوة عشان مانقع في مصائبنا ولا نوقع انفسنا في المشاكل بايدينا وبورينا انو الزول البحاول يعمل مشاكل للناس هو نفسه بقع فيها وده برضو بجرنا لمثل شعبي بقول التسوي كريت في القرض تلقاه في جلدها
وبنتلاقى لو المولى مد في عمرنا

[عوض خضر]

حبابك واليوم السعيد الليله جابك والله ياعبدالملك ماعارف الضواقه دي عندي مرتبطه بالكنش او المفراكه ومنظر يد منبسطه وملاح اخضضضضار

[عبدالملك مصطفى]

( سرارة لعـــــــوت مــــايلمهم إلأ المــــــوت)
منو فينا مابعرف اللعوت ؟؟؟؟ هو شجر يمتاز بتباعد فروعه عن بعضها البعض ؛ والسرارة معروفة اللي هي صلة القرابة يقولوا ليك الزول داك سر فلان يعني قريبه؛ وفروع اللعوت معروف عنها انها ما بتتلم مع بعض الا لو قصوها ولموها في شكل كليقة ( حزمة مربوطة ) يعني لاحظوا ما اتلمت الفروع دي مع بعضها الا عند الموت .
1/ المثل بضربوه للناس البكونوا اهل بس متباعدين ومافي حنية بينهم وما بتعرف انهم أهل الا لما يكون عندهم فاجعة ولا موت حتى تحس بقرابتهم؛ شفتو كيف المثل جاي من بيئتنا ؟؟؟ وكل كلماته بسيطة جدا عشان يتفهم سرارة ولعوت ولمة وموت وطبعا بذكرنا المثل وبقول لينا يا ناس ماتبقوا زي اللعوت.
نسأل الله يلمنا في المسرات وبنتلم هنا في المثل الجاي لو المولى مد في عمرنا ؛؛؛

[عبدالملك مصطفى]

( يمى دسي كروك النقول المره أم كرو )
الكرو هو شنو؟؟؟ الكرو أكرمكم الله هو العوار وطبعا هسي اختفى الزمن ده بس هو كان بقوم في شكل تقرحات جلدية وشايلة مادة على الساق وشكلو مقزز مابتسمعو بالمقولة البتقول الجديد في الكرو سمح ؟؟ والقصة انه البت كانت قاعدة مع امها وكانت امها عندها كرو الله يعزكم وجات داخلة عليهم ضيفة برضو عندها كرو فقامت البت قالت لامها يمى دسي كروك عشان نضحك على المرة دي وهو نفس معنى المثل البقول أبو سن يضحك على أبوسنين ومثل فيه حكمة جميلة ودعوة لعدم الضحك على الناس وعدم السخرية منهم مهما كان وخاصة لو كان الزول الضاحك هو بضحك على حاجة في زول هي نفسها فيه والمثل بضربوه في الزول البدعو لحاجة وهو نفسه مابعملها .
ومثل مستمد من بيتنا وعاداتنا البسيطة دي وخلونا بيه نشوف اول حاجة القصور العندنا ونصلح الفينا . اذا هي دعوة للوقوف مع النفس .
وبنتلاقى لو المولى مد في عمرنا ؛؛؛؛؛

[عبدالملك مصطفى]

(نركب في الشّعب لقولة فلان كعب)
منو فينا مابعرف الشعبة ؟؟ بكسر الشين وضم العين وهي زي ماعارفنها فرع ناشف من شجرة وزمان اهلنا بستخدموها في الرواكيب لانو بتكون في شكل عمود ولو اي واحد فينا شاف شكل الشعبة وهي واقفة كده براها بلقاها صعب الواحد يركب فيها من فوق
والمثل بضربوه للزول البفتش للمشاكل من عدم ولا للزول البفتش على أعذار واهية يعني زي الزول يجي يحاول يركب في شعبة وهي مستحيلة طبعا بس عمل كده لشنو؟؟ عشان يجيه واحد تاني يقول ليه يا خوي الشعبة دي ما بتقدر تركب فيها ولا بتتركب اصلا اها هنا النار ولعت للزول البفتش مشاكل. كييييييييييييف تقول لي كده ؟؟؟؟؟ معناها انت زول كعب بس .
ودي دعوة للتسامح وخلو حياتنا بدون شعب عشان هي باب بجيب الريح مش احسن نسدو ونستريح ؟؟؟؟؟
ولحدي مانلقى لينا شعبة تانية ومانركب فيها ومثل تاني نشرحه فتكم بعافية وودعتكم الله .

[عبدالملك مصطفى]

( تلصّق الطين في الكرعين ماببقى نعلين )
والمثل بضربوه عند التزييف ولا لو الواحد شاف حاجة في غير مكانها والمثل بدعونا للاجادة في اي عمل بنعملو واتقانه يعني ما نبقى زي الزول الخايف من الحر بقوم بعمل اي حاجة عدي من وشك بجيب طين بلصقو في رجوله عشان تبقى ليه زي النعلين لكن ياربي بتبقى نعلين ؟؟؟ طبعا أكيد لا
لحدي مانتلاقى في مثل تاني فتكم بعافية

[عبدالملك مصطفى]

( ركاب سرجين وقيع ومساك دربين ضهيب)
المثل بضربوه للزول المتقلب الآراء وما بكون على حال واحد ومرات بضربوه برضو للزول المنافق يكون عنده وشين
فتكم بعافية

[عبدالملك مصطفى]

( رازة ونطاحة )
قبل ما ندخل عندي وقفة شكر ودعوة صادقة من قلبي أن يمتع الله عمنا الجليل إبراهيم الخليل بالصحة والعافية ويمد في ايامه ؛ المثل ده شلته منه ومرة نحنا قاعدين نتونس معاه جات مناسبة مابتذكرها بالضبط هي شنو ؛ قال لينا والله زي ما بقولوا رازة ونطاحة على طول وانا مهووس زي زول اخونا ياسر الخليل وشوفوا الصدفة له التحية بحب الامثال الشعبية طوالي علقت في المثل وقعدت اشرح فيه في راسي النطاحة عرفناها اللي هي البقرة بس الرازة أكيد انتو برضو عرفتوها معاي والرازة كلمة دارجية سودانية معناها الوحلانة والوحلانة وزي ماعارفين جاية من الوحل والطين يعني واقعة في الطين وماقادرة تقيف على حيلها ومع ده كله ماساكتة تناطح وتشاكل ظنيتكم عرفتو معنى المثل وهو بقول لينا لو ماعندكم الاستعداد تعملو الحاجة ما تتطاولوا خلينا نمد كرعينا قدر لحافنا والمثل في غاية البساطة وبضربوه للزول البتطاول للحاجة الكبيرة وهو ماقادر يعمل الأقل منها.
انشاءالله نهز ما نرز ولحدي مانتلاقى في المثل الجاي فتكم بعافية وكفانا الله شر الوحل

[عبدالملك مصطفى]

( بعد ماكانت في الكراع تبقى في الوش )
هي شنو ؟؟؟؟؟ هي مقارنة مابين تعب المشوار وبين الخجلة والملامة البتظهر في الوش والزول لو في واجب وقام بيه يبقى تعب الكراع وده تعب عادي والناس بتتواصل مع بعض في السمحة والشينة بس الواحد لو ما مشى للواجب ومرة من المرات لاقاه الزول صاحب المناسبة ده مابخجل؟؟؟؟بخجل وتلاقيه يزوغ منه يمين ويسار برة وجوة عشان ما يلاقيه لانه هنا بقت الملامة حارة والخجلة شينة والتعب زاد بعد ماكان خفيف مشوار ما يكلف حاجة والمثل بضربوه للزول الماقام بالواجب تجاه اهلو يقولوا ليه بعد ماكانت في تعب الكراع تنقلب تعب وش وخجلة ؛ شوفوا معاي كيف اهلنا بقدروا الواجب وكيف بدوه اهميته ودي حاجة عظيمة تدعو للتكافل والتعاون بين الناس مثل عظيم وليه قيمة عظيمة نابعة من دينا الحنيف ومن تعاليمه السمحاء ؛ والزول البشجعوه على القيام بالواجب وعشان ما يتكاسل يقولوا ليه بعد ماكنت في الكراع تبقى في الوش .
الله لاجاب الشينة وانشاءالله مشوارينا دائما للسمحة ولحدي مانلقى لينا مشوار سمح ومثل تاني ودعتكم الله ووداعة الله عند الرسول

[عبدالملك مصطفى]

(حزمـــــوني ولزمـــــوني خلـــــوني النشــــــــاكل )
والمثل ده بطابق المثل البقول الكداب وصله الباب؛ وكلمة حزموني مشتقة من كلمة الحزام وهنا مش معناها الحزام المعروف في زمنا ده ؛ كان زمان عبارة عن عمة الواحد كان بربطها في نصه ويشدها مظبوط عشان ملابسه ما تضايقه ولزموني كلمة برضو جاية من كلمة لزوم وهي الاشياء المطلوبة لعمل حاجة معينة او هي التجهيز وزمان معروفة طريقة الشكل والعراك وبكون مثلا مشكلة بين الفرقان في الحلة وتلاقي النسوان يزغردوا والاطفال يشجعو والرجال يتشاكلو وهم محزمين ومربطين وجاهزين من كله اها الزول لو ماجاهز ما بشاكل والمثل بضربوه للزول البتحجج بالحجج الواهية عشان ما يعمل حاجة معينة مفروض يعملها لكن لو جهزوه وجابو ليه كل المطلوب بقولوا ليه ( اها حزموني ولزموني خلوني النشاكل )
الله لا جاب المشاكل وياريت نتحزم ونزيد همتنا ونشوف البهمنا ونسال الله يوفقنا ولحدي ما نجهز لينا مثل تاني فتكم بعافية وودعتكم الله.