وروني الكلمة دي وين بنلقاها؟؟؟

[عبدالملك مصطفى]

لكل لغة في العالم لهجاتها المتفرعة منها والتي غالباً ماتحمل بصمات كل منطقة على حده فمثلاً في السودان عندنا يمكن للمرء أن يميز أي إنسان يقابله ويعرف من أي منطقة جاء ؛ وفي هذه المساحة وددت أن أعرض عليكم بعض الكلمات الموغلة في العامية السودانية والتي يستحيل تداولها في أي دولة غير السودان والهدف من هذه الفقرة هي تفتيح أولادنا وبناتنا في بلاد الغربة الذين قد يكونون لم يسمعوا بهذه المصطلحات من قبل كل ذلك من اجل ربطهم وتبصيرهم بحياتنا العادية في السودان وتعليمهم وتعويدهم على عادات وتقاليد ولهجات ومصطلحات أهلنا في السودان وكسراً للحواجز التي قد تزيد بمرور الايام وهم بعيدين كل البعد عن الواقع هناك وحتى يسهل إنصهارهم في المجتمع والسهولة في التواصل الحميم واتمنى على المتداخلين ببعض الكلمات والمصطلحات أن يكون هناك تفسير وتوضيح لأي كلمة تكتب وذلك للتيسير
1/ مافي عوجة تب كلمة تب معناها ( نهائي ) والعوجة ( المشكلة ) يعني مافي مشكلة نهائي
3/شحتفت روحي ( حرقت روحي )
ونواصل............

موضوع محمس ومشوق

ارجو ان تواصل سريعا وبلا انقطاع
لان الموضوع زي ماقلت هي تفتيح أولادنا وبناتنا في بلاد الغربة الذين قد يكونون لم يسمعوا بهذه المصطلحات من قبل كل ذلك من اجل ربطهم وتبصيرهم بحياتنا العادية في السودان وتعليمهم وتعويدهم على عادات وتقاليد ولهجات ومصطلحات أهلنا في السودان

مهم بالنسبة لينا ولي غيرنا
وتقبل تحياتي+مروري

[عبدالملك مصطفى]

شكراً على المرور أخوي مصطفى ومن الكلمات سودانية الأصل والجنسية
1/ (أم دلدوم ) الدلدوم هي البنية أو الضربة بقبضة اليد وفي الضهر حصرياً لأن كلمة البنية موجودة برضو عند المصريين - كفانا الله شر الدلاديم
2/ (ماتكورك فينا ) الكوراك هو الصياح بصوت عالي
3/ ( الزول ده مطوفش ) مطوفش معناها مربوش أو زي ماتقول بلغة عصر الجوالات والموبايلات الحديثة ( خارج الشبكة )
4/ ( رقراق ) الرقراق هو حر متقطع في شكل دوائر صغيرة وبنفس قدر الدوائر يكون هناك ضل - ومثال لضل الغربال؛ وزي ماغنى الفنان المرحوم مصطفى سيد أحمد - ادفقي ماتبقي رقراق أبقي ياضل ياشموس
5/ ( ناخد لي جمة ) الجمة هي كلمة مشتقة من الاستجمام والمقصود بها الراحة لفترة قليلة أو هي الإسترخاء بعد التعب-
6/ ( النفاج ) النفاج هو باب صغير بكون مفتوح على الجيران لتسهيل التواصل والتداخل بين الجيران ودي فيها من الحميمية مايكفي أن نقول عليها قمة الحميمية والحنية بين السودانيين وسكان القرى بصورة خاصة
ونواصل...............

[عبدالملك مصطفى]

1/ الزول ( المكعوج) كلمة المكعوج مشتقة من إعوجاج أي الإلتواء بس أهلنا ساي دخلوا عليها حرف الكاف ده زيادة منهم ولما يقولوا ليك الزول ده مكعوج معناها معوج وماعديل وهنا مش المقصود عديل في طباعه أو أخلاقه لا المقصود في شكله
2/ الخضار (المعشكب ) كلمة المعكشب المقصود منها ناشف وشكله قديم
3/ الزول ( المودر ) كلمة ودر ( بتشديد الدال ) معناها مضيع شئ أو زول فاقد ليه حاجة معينة
4/ (كد ) العضم كلمة الكد (بتشديد الدال ) كلمة معناها الإجتهاد في اللغة العربية وبما أنه أكل العضم محتاج لإجتهاد وتعب عشان كدة أظن أنو اهلنا السودانيين أستخدموها في تجريد العضم من أي لحمة حوله
ونواصل.......

[عبدالملك مصطفى]

1/ ( يتمطق) يشتهي نوع معين من الأكل وهو ينظر إليه وباللغة العربية الفصحى يعبر عن الحالة بــ ( سال اللعاب لها )
2/ ( العواسة ) هي صناعة الكسرة وماشابهها
3/ (فناك بحجر) أي رمى عليك حجر من بعيد
4/ ( الصقط) البرد وأظن أن الكلمة مشتقة من كلمة صقيع أي الثلج لما بينهما من علاقة البرودة
5/ ( مجلبط ) معناها متسخ أو ملئ بالطين أو متسخ بالبوهية زي الواحد يقول الطفل ده رجوله مجلبطات بالطين يعني مليانات طين
ونواصل..........

[نضال احمد]

Originally Posted by عبدالملك مصطفى

1/
5/ ( مجلبط ) معناها متسخ أو ملئ بالطين أو متسخ بالبوهية زي الواحد يقول الطفل ده رجوله مجلبطات بالطين يعني مليانات طين
ونواصل..........

الاخ عبد الملك
السلام عليكم ورحمة الله
احرص دائما علي متابعت كتاباتك فهي تعيدني للزمن الجميل فشكرا لك
ملحوظة:
غايتو رجولو دي ابت لي كلو كلو
انت كرعينو دي بنلقاها في ياتو منطقة؟؟؟؟؟؟؟؟؟؟

أخونا عبدالملك لك التحية بمناسبة كلماتنا السودانية فى كلمة بنستخدمها نحنا اهل الريف وخاصة ناس الجزيرة يعنى انا شايف مافى داعى لوجوده فى الجملة ولا بتدى اى معنى وهى
كلمة (خاف ) مثلا الواحد يقوليك خاف انت قاعد او خاف انت ماسافرت ... سؤالى منو البخاف وخاف من شنو وليه خاف لو بتعرف قولينا
وسؤال موجه لبنات حواء من المنتدى عن كلمة ( أجى ) مثلا الواحدة تقوليك أجى عاد بالغت وهى دايما بتاتى فى مواطن الاستغراب عن الشى وطبعا ممكن الواحدة تقوليك ياخى مامعقول
او ماممكن لكن اجى دى مالاقى ليها مبرر

[عارف عبد الرحمن]

أخونا عبدالملك ليك تحية .. والكلمات العامية في السودان لم تأتي من فراغ بس أمكن الناس حورت وبدلت في النطق ولا الحروف ولكن لو بحثت حتجد لها معني زي كلمة تمطق :
5.تمطَّقَ يتمطَّق ، تمطُّقًا ، فهو مُتمطِّق:

• تمطَّق الشَّخصُ ضمّ إحدى شفتيه على الأخرى، وأحدث بلسانه وغاره الأعلى صوتًا يدلّ على استطابة الشّيء "يأكل الحلوى ويتمطَّق".
المعجم: اللغة العربية المعاصر - [ ابحث في المعنى ]

شفت كيف أها طلع ليها معني وحلوي كمان ما ها هينة .. ودمت

[عبدالملك مصطفى]

التحية ليكم اخواني واخواتي زوار واعضاء المنتدى وهنا اخص بالتحية كل من الأخوين الموقرين يوسف وعارف والاخت نضال مروركم على البوست مرور السحاب في ساعة هجير وما مر وعد وفات لا أبداً لكن اخد ليه ( جمة ) وخلوني أرد علي كلامكم الجميل القلتوه
اولاً :- بالنسبة للأخت نضال التحية ليك ؛ كلمة رجولو عارفها كلمة ما بتشبهنا بس قلت أقرب يها المعنى وبعدين كلمة كرعين هي نفسها كلمة سودانية الأصل والجنسية يعني هي كلمة برضو موضوع دراسة ومادام دخلتيها والله ما احرجك ( كرعينو مجلبطات ) وشكراً لمتابعتك لمواضيعي ولكن هي بالفعل بحاول أستمدها من الماضي الجميل بالعابه واغنياته وبراءته وعفويته وتواصله الجميل ؛ وأنا متأكد أي واحد فينا هنا لو خيروه يكون هنا ولا يرجعوه لأيام زمان بختار زمان .
ثانياً : الأخ يوسف سعد ليك مني اجمل تحية وتقدير وأنا بوافقك في كلامك ؛ في الكلمات السودانية هناك كلمات سودانية نسوية بحتة زي ماقلت كلمة بري وكلمة بري طبعاً وأنت الأدرى مشتقة من كلمة براءة زي الواحدة تقول ليك ( بري يايمة مالك علي ) وبرضو كلمة سجمي وكلمة كر علينا ولو ملاحظين معاي كلها كلمات ويلية يعني تعادل في اللغة العربية الفصحى يا ويلتاه وآ اسفاه
ثالثاً : الاخ الموقر عارف ليك مني ما يصعب علي تجميعه من كل كلمات التقدير والتبجيل وبرضو كلامك مظبوط كل الكلمات السودانية موضع الدراسة هي كلمات في الأصل بتكون مستمدة من اللغة العربية الفصحى ولكن على قولك محرف فيها بعض الحروف أو بعض النطق زي كلمة (نضوق) هي كلمة مشتقة من الذوق يتذوق الشئ اي يستطعمه أ يجرب طعمه وبرضو كلمة ( أديني ) مشتقة من كلمة (اليد ) واللي هي بنستعملها في العطاء . وبرضو خلونا ناخد جمة مع بعض الكلمات
1/ ( اديني عرض اكتافك ) والكلمة مستوحاة من عمل الترزية كما هو واضح الترزي لو عايز يشيل مقاسك بقول ليك خليني أشوف مقاس أكتافك كم وفي الحالة دي معناها اديني ضهرك وقبل بوراء ده عند الترزية ؛ لكن لو الواحد قالها ليك معناها قوم امشي مني ومعروف الواحد لما يمشي منك بديك ضهره
2/ ( قومة الهجعة ) دي قومة الفجر بدري
3/ ( ماتهبش ) يعني ما تمسك
4/ ( بوشك ) وبوشك دي معناها امشي عديل يعني قدامك طوالي وهي كلمة واضحة من الوش يعني المقدمة
ونــــواصــــــــــــــــ ـــــــل ...........................

[عبدالملك مصطفى]

1/ (ماتجقلب ) في الفاضي ساي ... الجقلبة هي الجري والهرولة وممكن نقول عليها الجري بلا دليل ولا وجهة معينة
2/ (كليقة ) سمعنو بكليقة القصب وهي عبارة عن ربطة مجمعة من سيقان القصب أو سيقان أي نبات تاني وتكون مربوطة بحبل أو بنبات شبيه الحبل وأعتقد أن الكلمة مشتقة من الكلمة الإنجليزية ( collecting) وهي تعني التجميع
3/ ( ماتجوط ساي ) الجوطة معناها الإزعاج والهرج والمرج
4/ ( البشتنة ) البسمع كلمة بشتنة وسمع عن البشتون يقول في علاقة بين قبائل البشتون في دول شرق آسيا وكلمتنا دي بس مافي أي علاقة صدفة جمعت الحروف كدة والبشتنة عندنا معناها عدم التنظيم والبهدلة
5/ (فتشت عليك ) فتش كلمة مشتقة من التفتيش والتفتيش معناها معروف هي البحث والتقصي بمعنى أدق أي التدقيق في الشئ المعين والمقصود
ونواصـــــــــــل .................