|
|
06-29-2010, 04:08 PM
|
#1 | ||||||||||
|
أوبريت أم درمان :الشريف زين العابدين الهندي
[read] مساهر ليلك الطول نجومه هجوع وغرقان قمره في جوه السحاب مصروع بصارع فيك ضلام تمن سنينه سبوع واراقب فجرك الآذن زمانه سطوع وشايلك سيف نصر لا يطيش ولاهو بزوغ ورابطك ي حشاي من العطش والجوع واسقيك مني دم ودموع واوقد لك جحيم وشموع واقش منك دموع الضيم على خدودك بتتحدر واقبل فيك جبين مرفوع كراية النصر وبيرق عزة رفرف في ركاب فاتحين واغسل لك تراب الهجرة باليدين راجيك المجد مدخور لك سنين ودنين من حبوبتك الوقفت ترد الدين وتطرد حملة الباشا ومع الغازين حليله مهيرة كاسرة التوب وحد الزين ** ومن جدك بكبرفوق جبل سرغام ودافن ضهره في كرري ومتكنتل ركاب ولجام وسال في ايده سيف العود ببعج بيهو كبدة وهام وقبال دمه ما إرشح مع البارود اكون شتت عليك اجسام ** أجسام من غزاة ماقدروا اسبوك ولاكشفولك المقنع ولا في الشينة ختوك ولا حلولك احداقهم ولاهم قدروا ادنوك ومما فاتوا لي هسع بدوروا رضاك واطروك ** وكيف انساك وذكراك لي دما هو عروق ومما الهجرة حلت ليهو لابسك انتي عمة وطوق وعايشك جوه وجدانه معايشة الحنين لي الشوق وممزوجة فيك ممازجة اللسان لي الضوق ** بشوفك في عيون النيل وفي الاطفال وفي تاريخك الاخضر على الاجيال وفي بحر الدمي اللسع بجم سيال وفي مستقبلا واعد كبار وعيال بشوفك بشري فيك شقق جبال ورمال بترسم لي طريق نجم العشا الولوال وتكشف فيك اسرارا كتار واهوال ** والقاك حتى في رمش الغريب الضال مهوم في اليمن لا الحامدي لا السلال والاقيك في الخليج مشرورة حالك حال واثكل فيك يبيعوك بي الدهب والمال ** فلذاتك مبعثرة في البلاد مأجورة تبني على الرمال احلامها ثم قصورها خلوك سايبة في ايد الطغاة ماسورة شان ما اسلموك الحلبي روب في كورة ** ابشري نحن لسع في الخلا مرابطين ونحن عقاب عهود انصار مع مهاجرين ونحن سهارى ما بنعرف غمضة العين ونحن فداك نذود عنك بقالنا سنين حالفين بيك قسم غالي وعزيز ويمين مانضوق راحة لانشوف زوجة لا والدين ولا ندفن رؤوسنا على الرمال خايفين حتى نوقي من اشلانا اعلامك على القصرين وحتى نسوي لي القصفوك مقبرتين زي ما صنعنا تاره على الالف الفين وحتى انكسر القيد وانقسم نصين واكون عيدنا الكبير في مقرن النيلين ** ومابننساك عشان اطراك في الازمان قريب منك قرابة الحدقة لي الانسان وجايل فيك جولة الدم على الوردان وقيمتك عنده زي قيمتك معاهو زمان ** بعيشك هضة بتشارف تلال قيسان ويحياك موية في دارفور تبل عشطان واديم فيك من سنار ترع خزان وادفق خيره بي عند الرهد بستان واقول لي الدندر الغاضب كفاك جيشان واسهر لي وليداتك اعشى الحاري والجيعان ** منو الزيك ولد واستالد الاولاد منو الزيك يجيبهم ديمة عشرة انداد منو الزيك ببز الدنيا موية وزاد منو الزيك ضروع وزروع ونيل مداد منو الزيك بطان وغابة دون حداد منو الزيك سهول وادي وجبال اوتاد منو الزيك اصل موروث من الاجداد منو الزيك جراتق دم قدام وجداد قشى الدمعة يابت الرجال مابحكموك اولاد ** بت الحر وام الحر واخت الحر وست الضنبة مردوم بي وراهو بجر ست الفي الخشش من العصير بنتر ست الخيل وست الفي القلوب بنقر وام الحلفو بيك وبي العذاب المر مابختولك الشينة ومناحة كر ** اولادك فضلة الموت وبتلجوبو ودائماً سيرته في لسانهم ويتسلوبو وزرعك من زمان المهدي طارح دوبو واحدين بحصدوا وواحدين بكفو دروبو ** تيلادك مسكر في الخزن محروس هجليج واندراب ومهوقني وابنوس ومن صمغ الهشاب سوي السنط ترتوس ومن شدر التبلدي الموية كوس في كوس ومن ضل النخيل الشمس دايرة تكوس ومن حرب المطر فرع الحراز مدروس ومن شوك السدر جيش السلم هكسوس ومن زهر التبر البادية باقية عروس وبي توب البرم سوي الطلح مبلوس ومن شدر الاراك عطر الرعاش مبثوث ومن سيف العشر جيش هكس صار مهروس والدوام واج بقيف الابتراوي خروس ** فيك الفيل وفيك العنزة والجاموس وفيك التيتل اللبات قرونه تروس وفيك الاصلة والدابي اب درق وجروس وفيك ريل الودي البي ناله راتع اجوس وفيك صقر الكواهلة العينو كالفانوس وفيك فهود وفيك نور وفيك طاؤوس وفي نيلك عشاري اشيل من الجاقوس ** فيك الازرق البي عرفه هد القيف وفيك الابيض الماش منطرح مابقيف وفيك زهد المفازة الوعدو ماخليف وفيك الاتبراوي اللي الشواطيء مخيف وفيك الدندر البهجم هجمة السيف وفيك الباسلام في الفشقة عامل هيف وفيك سيتيت منبت من قناهو صريف وفيك القاش بوري الرعدة والصاعقة الداودو كيف ** وفيك بحر الجبل حاقب عري الرجاف وفيك بحر الغزال والجور وبحر زراف وفيك سوباط ملولو زي دبيبا خاف وفيك بحر العرب مليان نعام وزراف وفيك بحيرة قال (نو) سيده ما الاسلاف وفيك خور اب حبل شاقي البلد كشاف وفيك تمت العظيم شايل الكليت والشاف وفيك خور الدهب ذو الذكرى والاعراف وعندك مقرناً حرم سواك ما انشاف ** وعندك الف خور في الوادي والفين رافد وحسبان الجزائر والجروف ماوارد والنبرو الحبيب لي عودو سيدو اقالد والساقية الحنين توريقها باكي وساهد والبلدات ونجاضات حليلة فايد وسمسم وام صقور وسهل قبوب ود زايد وصقيعة ام بليل براقها قايم وقاعد والمطر البكب اربع شهور ويدارد وفيك قنبلية كمبو سته الوارد وام سنات تغازل دوكة ماشه تحادد اسفاي بقول لي الفشقة بهمك شارد كونه الفار بقت ترع وجناين وموارد [/read]
|
||||||||||
|
|
06-29-2010, 05:20 PM
|
#2 | ||||||||
|
زائر
|
دي انتاجو هو يا ابو عبده ...؟؟؟؟؟.كدي ادينا نبدة عن شاعرية الزول دة....مشكووووووووووووووور |
||||||||
|
|
|
06-29-2010, 05:31 PM
|
#3 | ||||||||||
|
الشريف زين العابدين الهندي ..كان سياسيا محنك ومحدث لبق ومفوه سلس الكلام والحديث لا تمل الاستماع له وان تكلم في السياسة .. في ذلك الوقت لاحظ استاذه القدّال- كان مديراً للمدرسة- موهبته الأدبية المبكّرة فأخذ بيده إلى فرقة التمثيل بالمدرسة، فشارك في أداء بعض التمثيليات؛ وكان يقوم أحياناً بالغناء على المسرح اغاني لبعض كبار الفنانين - في ذلك الزمن – مثل كرومة وسرور وعثمان الشفيع وغيرهم. وأدّى ذلك إلى صقل موهبته وبناءها على قاعدة متينة من حبه للفن والأدب: نثره وقريضه (شعره الرصين الفصيح وعاميه – الدوبيت) حتى تجمعت لديه عدة ملكات، فتكونت عنده شخصية الأديب الخطيب الشعبي والشاعر والسياسي الوطني القومي البارع.. هذه الابيات من روائع ماكتبه الشريف زين العابدين من قصائد.. ليتنى لو كنت أصغر بمعدل نصف عمرى ليس أكبر أو ليت لو أن عمرك أكبر خمسة أعوام وخمس ليس أكثر كنت احببتك أكثر ونثرت الحب في كفيك جوهر وكسوت الكون من ديباجك أخضر وسرحت في عينيك حتى أتبعثر وتغنيت نشيداً يجعل الانسان يسكر وجعلت البحر والأنهار سكر وزرعت الأرض ورداً ورياحين وعنبر وجعلت الريح بستاناً معطر ونسجت النجم عقداً وسوارين ومئزر وصنعت الشمس تاجاً كجبين لك أنضر وتدليت الثريا بين نهديك لتظهر وجمعت الضوء والنور نطاقاً يتخنصر قد بعثت الروح في قلبى غراماً يتفجر وتذكرت عهوداً كان عمرى فيها أخضر كلما ظلل غيم شاقه الطل فأمطر صار للوجد رياضاً ونما فيها وأزهر جعل الحب حياة ومزامير ومزهر كلما أشرق بدر كان حباً يتمخطر أو هفا الجو بعطر كان بشرى لمعطر كلما غنى هزار ارجع الشجو بأكثر أو شدى البلبل لحناً هاجه الشوق فأشعر يجتنى الروض رحيقاً وشذى الأزهار كوثر كان أصباحنا زهوراً وليالى الحب أقصر كلما شقشق فجر قلت للصبح تأخر وسألت الشمس لا تأتي قليل الحب أنور ذاك عهد قد تولى لم يعد ما فيه يذكر كان ما كان وولى وتدثر وبقيت الآن كوناً يتكسر وكياناً كلما سار تعثر واذا حن الى الماضى تحسر لم يعد في العمر إلا ما تذكر فدعينى ان وقتى قد تأخر فأقبلى عذري فأني اتعذر فأمانيّ سراب في دموع تتحدر سأغنى في خفوت ليتنى لو كنت أصغر هذه الابيات من كلمات الراحل الشريف زين العابدين الهندى وهى قصيدة نادرة.. وشكراً علي المرور خلي العزيز
|
||||||||||
|
|
 |
|
|
 |
 |
 |
Linear Mode
