قصة صديقي

[moawiah ahmed salim]

الجزء الواحد والعشرون

ام ندى تجر فينى لبرة فى واحد عمك قاعد بعيد كدة علق وقال : انتو الواحد وكت مابقدر على السم الهارى دا بتتحنطروا بيو مالكم والكلام فات اضانى لغادى قايل نحن سكرانين والجماعة الجنبو قنبو يضحكوا
ام ندى ودتنى مكان بعيد فى اخر كورنا فى الصالة وجرت ليا كرسيين وقالت لى اقعد فى الواطة دى ياولدى وقول بسم الله - ومشت ملت ليها كباية موية وناولتنى ليا وهى بتقول لى : هاك بل ريقك النشف دا وانا لسة دمى بيغلى وصرت الوش ماراحت وهى تشيل وتهدئ فينى بالكلام الطيب والحنين وتستعطف فينى لحدى ماهديت شوية .وانا قاعد معاها جا فى بالى الطيب ودعمى يقوم يتهور وانا عارفو احمق من ابو الدقيق بعض مرات بشاكل نفسو لوحرّقتو وطوالى قلت ليها : الطيب وينو ، اشرت لي ياهو داك مع عم بناتى بحنس فيو وتتبسم وتعاين لى وتقول : انتو حرارة الدم دى عندكم وراثة ولا شنو
- ابداً ياخالتى . هسع انا القدامك دا شايفانى زول مشاكل ؟ ، الحقارة ما بندورا
- حقارة شنو ياولدى , ماتبقى زول معقد كدى وخلى العوارة والمشاكل ما ليها داعى
- عليك الله ياخالة من عرفتينى - انا زول مشاكل ؟
- ما دا المحيرنى ياولدى البشوفك كلو كلو مابصدق هيجتك السويتا دى
- عشان تعرفى الزول دا إستفزانى وبكوس للمشاكل وبهابش
- كدى انت اهدأ وما حصل شئ قدر دا ، وتعاين لى برجاء كدى : عليك الله عاين ل (نها) دى ما زى اختك داير تخريب ليها عرسا
- العرس انشاء الله ما بخرب بس الزول دا يختا ندى و يلعب بعيد .
- لا إله إلأ الله محمد رسول الله عليك الله ياولدى انسى الزول دا وخليو فى حالو .
- سمح ياخالة ،
الحفلة ما وقفت والفاصل الاخير شغال جاتنى ندى سلمت علينا وغمزت لى امها نظام سيبينى معاهو شوية - الحاجة براحة قامت انسحبت واندمجت فى الحفلة وخلتنى مع زولتى واهاجما ليك طوالى :
- ما بدرى ... علاء بتاعك دا مامنتظرك
- تضحك شوية : أحمد ماتخلى عقلك صغير وتاخد الموضوع بالحساسية دى
- هىى ياندى والله نحن بنصبر على كل شئ بس جنس البسوى الجنا دا ماعندنا ليو روح طويلة فت بنية افرتقو ليك حتة حتة
- ياالله اصلو ما قايلاك شرانى كدى
- شرانى هيه هيه ، اخير انا والله افك فيهو الطيب كان يعدمّو ليك السن
- تضحك لى نظام هظار كدا : غايتو الله يسترنى معاكم ما تكسرو سنونى
- ما اشتغلت بهظارا : ندى انا داير اسألك بصراحة وخليك صادقة معاى
- إنتى علاقتك بالزول دا شنو
- قبل ما اجاوب ليك سؤالك دا دايراك تفهم حاجة واحدة
- شنو دى
- انو فى الدنيا دى كلها ما حبيت زول غيرك وبقول ليك عديل انا بحبك ومستحيل انساك والله حياتى من دونك ما ليها معنى وخليك متذكر الكلام دا كويس
- قلبى برد مرة واحدة ووشى حمّر ورأسى كِبِِِِِر واقول ليا : انتى وكت دى حالتك البتسوى فيو دا شنو
- انا سويت شنو ، بس ورينى انا غلطتا فى شنو
- هو لو ما إنتى اديتو وش حلو كان قدر سوا السوا دا
- ياأحمد الزول دا كلامو كدا ، ودى طريقتو معاى فى الكلام من اشتغلت معاو
- طريقتو دى ما بتركب معانا ، ندى انا قلت ليك خليك صادقة معاى
- وتنفعل : ياخى ما تخليك كدا كرهتنى العيشة ذاتا
- انا كرهتك العيشة دا كلام شنو
- معليش والله ماقصدى ودا كلام من بره ساى .
وتسكت شوية وتدنقر فى الواطة واشوف دموعا جرن وتمسك يدى بيديها وتعصرن بقوة و صوتا من البكا يقطع :
- أحمد انا محتاجة ليك شديد ودايراك تكون جنبى واوعدنى ما تتخلى عنى كلو كلو
حيرتنى البت قبل شوية كانت كويسة يارب القلب كيانة فجأة شنو , معقولة فى الصنة البسيطة دى اتذكرت شئ مؤلم ولا الحاصل شنو - والله إحساسى القبيل الشفتو فيها لمن جات سلمت على ما خاب كلو كلو والحزن الشفتو فى عيونا صحى ما كضب - البت دى متوجعة من جوا وبكاها بكى حار شديد وبكى زول ممغوص .
- ندى مالك بتبكى فى شنو المتعبك ، احكى لى موش نحن حاجة واحدة
- لا لا مافى شئ
- ندى خليك صادقة معاى وما تهربى منى فى شنو بوظتى اعصابى
- مافى شئ
- ياندى انا شايف الالم فى عيونك من يوم شفتك تقول لى مافى شئ ، نحن قبيل موش اتفقنا نكون صادقين وصريحين مع بعض
- خلاص وكت تانى بحكى ليك كل شئ ، بس انا خايفة تفهمنى غلط وتغير رأيك فينى
- لا ما بفهمك غلط .
- خلاص .. بكرة نقعد مع بعض وانا زاتى فاض بى وما قادرة اتحمل اكتر من كدا
- خلاص بكرة إنشاء الله ، يالا خلاص قشى دموعك وامشى على اهلك الحفلة إنتهت
- تصبحى على خير
-تصبح على خير

[moawiah ahmed salim]

الجزء الثانى والعشرون



البت دى محنتنى جنس محنة وخلت شعرى يقوم صوفا صوفا وضيقت على الدنيا واقول لنفسى البت دى مسوية شنو تحزن قدر دا وحالتا صعبة ما فاضل ليها إلا تحضنى من شدة ماهى غرقانة ودايرة ليا صدر حنين تتحامى فيو - شلت ليلى داك كلو سهر افكر فيا وفى ملاقاتا بكرة وياربى )الموّحلة ( شنو كدا .
فى المساء تانى يوم ، دقت على وقالت لى : احمد انا بمر عليك فى البيت عشان نطلع وخليك جاهز - عليك الله شوف محن الدنيا دى هى البتمر على موش انا - هسه لو نزلتا بعربتى ما كان اخير من تمر هى على وكمان تقولى اجهز قادر الله فى حكموا .
مرت على فى البيت وطلعنا سوا لمنتزه فى ام درمان هادى ورايق والهواء البجيك من قصاد النيل يرد الروح ورغم نظرات عيونا الحزينة تشوف فى عيونا لغز لايفسر وهى لما تحزن بتزيد حلاوة و لحظتها حسيت انا جالس قدام (مرية ) الوصفا صلاح احمد ابراهيم فى قصيدتو المعتقة ( ليت لى يامرية إزميل فدياس ........... ) وانا بشوف فمها يرجف بالضيق الكابس فى سدرا، فخطر ببالى جزء من القصيدة وفم كالاسد جوعان زمجر ... ينادى شفةً عطشى واخرى تتحسر )
قعدنا وانا بعاين ليها وعيونى مليانة حيرة ومنتظر تنضم وتفتح خشوما وتقول الشئ المتعبة وكت شفتا غالبها النضمى وابت تبدأ قلت احسن ابدأ انا :
- احمم ... طبعاً انا جاي هنا عشان اسمعك
- وانا ما حا ادس منك اى حاجة
- يالا ورينا مشكلتك شنو
- شوف يااحمد انحنا لمن جينا السودان مرينا بظروف صعبة ما يعلم بيا إلا الله والحياة بقت لينا فظيعة وانا لو ما إشتغلت كان حانمشى لهاوية .المهم عن طريق واحد من معارفنا قدم لى فى الشركة الشغالة فيا انا هسة ومشيت قابلت علاء وطبعاً هو المدير العام وسيدا والشركة بتعمل فى الاستيراد والتصدير يعنى بالعربى كدا شركة تجارة عامة بتصدر وبتستورد اى حاجة فيها قروش ، المهم قابلت علاء ومن اول يوم شافنى حسيت بإهتمامو بى ومعاملتو معاى واتظاهر لى بانو مبسوط من شهاداتى واوراقى وكمان قال لى انا عاوز زولة زيك تترجم لى الاوراق والخطابات البتجى من برة وكمان عندى كمية من المراسلات والمواعيد محتاج زول يديرا لى وانا شايف انتى مناسبة للشغل دا وطوالى قام عينى فى الشركة واشتغلت معاهو، هو زول نافذ ليهو علاقات كتيرة بناس مؤثرين ودخلت عالم تانى وعرفت حاجات لو حكيتها ليك تقول لى دا خيال ما حقيقة ، المهم علاء بدأ يغرينى شوية شوية وزى ما شايف نزلت عربية وبعد فترة فتحت لابوى المغلق الشايفو دا وبقيت معاهو اغلب الوكت وبدأ يلمح لى ويعمل لى فى حركات مريبة وهو عارف انا مخطوبة وكل مرة بذكّروا بالكلام دا وهو مواصل فى حركاتو دى وحاول يمشى اكتر من كدا. اقاطعا
- كيف اكثر من كدا .. اكتر من يعاكسك ويحاول يتنادل معاك ؟؟؟؟؟؟؟؟؟!!!!!!!!!!!
دموعا كبت وانا ساكت وخايف من شئ فى بالى والله يستر وانا اهدئ فى خواطرا عشان تروق وتقدر تتكلم
- ياندى كل شئ بتحل بس كدى قشى دموعك دى واحكى لى الباقى
ترفع رأسا وتواصل
- علاء طلع حقير وندل وانسان سئ للغاية و.............
- يابت الناس وقعتى قلبى قول لى الحاصل شنو
- بس عليك الله يااحمد تسمعنى للنهاية
- حاضر بسمعك لبكرة الصباح
- وتوعدنى انك ما تتسرع
- يابت الناس حرام عليك الحاصل شنو
- خلاص انا بقول ليك .............وتسكت مسافة وترجع تبكى تانى وتقول : احى انا ، ما قادرة اقول ..... خلاص عليك الله خلينى فى حالى
- كيف اخليك وإنت بالحالة دى
- احمد دايرة اقول ليك شئ
- اها
- يا اخ ما قادرة اتكلم ............والله الكلام ما داير يطلع
- ندى قبل ما اكون خطيبك انا صديق واخ ليك
- خلاص انا بقول ليك والبحصل يحصل
- اناااااااا وعلاء متززززوجين فى السر
اعصابى باظت مرة واحدة والواطة لفت بى وبدون مااشعر اقول ليا
- ياخاينة ياتافهة ياغشاشة - - - واقوم من الكرسى وامشى اخليها وتجرى وراى برة المنتزه وتمسكنى من يدى : احمد اسمعنى عليك النبى وعليك الله كان تسمعنى .......... عليك الله ارحمنى
- دايرانى اسمع شنو تانى بعد السمعتو دا
- انت موش وعدتنى ما بتتخلى عنى وقدِّر انا فتحت ليك قلبى بالكاتماهو من زمان وانت وعدتنى تسمعنى للاخر .
- شوفى ياندى انتى سقطتى من نظرى خلاص ومهما كان مامكن تصل بيك الامور لى كدا .
- خلاص يااحمد . بس اسمعنى وما فى زول فى الدنيا دى حايسمعنى غير ك
خلاص نحنا نرجع هسع وبكرة نشوف قصتك شنو مع علاء دا يلا مع السلامة
- وين ماشى ؟؟؟ - ما اوصلك !!!!!!
- لا لا من هسة سكتنا اختلفت ودربنا بقى ما واحد

[moawiah ahmed salim]

ونواصل القصة

[moawiah ahmed salim]

الجزء االثالث والعشرون

رجعت البيت زهجان وقرفان والواحدنفسو مسدودة من كل شئ ، دخلت والجماعة بهناك الوالد والوالدة واخوى ومرتو واولادوالصغار قاعدين فى الحوش بي قادى وسمعوا دخلتى ومتوقعين اجي اقعد معاهم وابوى لمن شافقعدتى جوة الاوضة طولت جانى سلم على وشاف وشى متغير وكان كلكلونى ما بضحك وكعادتومعاى لمن يلاقنى صانى كدى بهاظرنى وطوالى قال لى : غايتو طغى المغتربين دا مابتخلوا ... فكها الله يفك ضيقتك ياولدى ..... سكت وردت ليهو ببرود كدى وغصبن عنى هوطوالى استدرك
- ياولدى ما لك راجع وشك مخطوف كدى وشايل الدنيا فوق رأسك
- مافى شئ بس الجو مغير معاى شوية وكمان عدم الموضوع
- كان على الموضوع ساهلوجاياك الشيلة ودى براها موضوع
موضوع الشيلة مرق من بالى وانا مكلموم انو بعدعرس بتهم (نها ) نودى الشيلة وبعدين يرجعوا البلد وهم من طلعت من البيت ماسكينموضوع الشيلة وتجهيزاتها. رديت عليو بدون ما اشعر
- بعدين بعدين انشاء الله
- بعدين بتين انت مالك جاى الليلة مهبوش كدى
- انشاء الله كل شئ ببقى
- ياولدى بس انت ادينا القروش والباقى علينا وانشاء الله اليومين الجايات دى بنوديهاليهم .
- مافى مشكلة
هسع ياربى انا اوريهم بالحاصل وانو العرس طرشق والشيلةدى اخير نلما لبت الحلال البتجى والله صعب الواحد يخلعهم فجأة كدا وكان سكتا بتبقىعوجة كبيرة وتدخلنى فى حتة ضيقة وصعبة وقلت يازول خلى الموضوع دا معلق كدا وبكرةربنا بحلا.
النوم غلبنى والسرير تقول مولعين فيهو نار اتقلب فيهو جاى وجاىوالعيون ما دايرة تغمض وتهجس افكر ساى فى البت دى كيف باعتنى بالرخيص كدا ونست كلالبينا وفقدتنى الثقة فى كل البنات وبقيت اشوفين كضابات وبتاعت لف وزوغات والواحدةقدر ماتحسن فيها ياها دى اخرتا تبيعك فى اقرب ملف ولا يهما تموت ولآتفطس مامهم عندا، بس تعيش حياتا هى - منتهى الانانية ،وعاملة فيها برئية واجرجرت مع علاء لحدى ماقدر عليها وهى عاملة لى مفتحة .
الليل كلو ندى تشيل وتضرب وانا عامل اضان الحاملطرشة ولاهببتو ليا ولا عندى نفس زاتو عشان ارفع التلفون ارد عليا وارد عليا عشانشنو وكت تعبت وفترت من الدقان وقفت بعد مايئست ، الموبايل زاتو إرتاح من رناتاالكتيرة وبعد شوية تانى الموبايل يرن بس المرة دى من امها وقلت دى على انا تشيلىموبايل امك عشان افتح الخط برضو ما برد - بعد شوية جات رسالة القاها ليك من مهابتقول لى : احمد رد على عاوزاك ضرورى ..خالتك ....... الرسالة دى من امها يعنى مامن ندى ياربى خير وادق عليها
- اهلاً خالتى
- كيفك
- تمام
- اناكلمتنى ناهد بتى وقالت لى ندى كانت معاك
- ايوا كانت معانا ورجعت البيت قبيل .... خير فى شنو
- يا احمد إنت عملت فى البت دى شنو جات حالتا مقلوبة وكاضمةوقافلة على نفسا الاوضة بتبكى بكا شديد وموجوعة بالحيل .
- أساليها مالا
- اوع تكون عملتا فيها حاجة والله العظيم...............
- شوفى ياخالة الكلامالشين مافى داعى ليهو وكان الواحد داير يسوى العيب ما بغلبو وانا جيتكم بالباب وفىمليون طريق بجيبنى بالشباك وخلينا نكون محترمين احسن
- طوالى ترخى فى الكلام لاانا ما بقصد كدى واعذرنى ياولدى والله حالة البت حالة عدوك - كدى عليك الله كلمهاوشوفا مالا
- خلاص بشوفا
ادق على ندى وهى ماصدقت من اول رنة رفعت الموبايل
- ندى ....... انا ما داقى عليك عشان مشتاق ليك بس عشان اقول ليك البسوى فيهودا غلط وخليك قدر تصرفاتك
- إنت بقيت قاسى وقلبك حجر
- دا ما وقتو هسة- امكضربت لى وقلقانة عليك والبكا والجرسة البسوى فيها دى ما بتنفعك ، واحسن تقعدى معامك وتوريها الحاصل
- إنت جنيت داير يضبحونى
- انتى وكت بتخافى قدر دابتغلطى لييه
- احمد بس الله يصبح الواطة واقابلك عشان تعرف انا لييه عرست كداوتشوف العذاب الانا فيهو
-خلاص صباحاتو بيوض هسه قومى اقعدى مع ناس امك وشوفىليك موضوع يخارجك منهم
- كويس ، وانا زاتى بعد ماسمعت صوتك قلبى هجسشوية.
واقفل الخط عشان ما اسمع منها كلام لابودى ولايجيب , وخليتا منتظرة يومبكرة وانا زاتى منتظرو عشان عندى حاجات كتيرة داير افهما عشان ارضى نفسى واسليهاوبقى الموضوع عندى فضول ونفسى اعرف لييه سوت كدا وانا قصرت معاها فى حاجة وياربىعلاء دا سوا ليها شنو عشان تقع غبيانة كدا وتشوت كل شئ وتورطنا معها كدا هسع ابوهاالعيان دا بتحمل الحاجات دى .

[elamirhamdan]

اها ننتظرك اسبوع تاني يعني
كرهتنا المنتدي

[عارف عبد الرحمن]

Originally Posted by elamirhamdan

اها ننتظرك اسبوع تاني يعني
كرهتنا المنتدي

وانت وراك شنو لو مستعجل خلي معاوية يعمل ليك مونتاج ودمج ..الولد التقول ماشي بشارع الفرن .. علي مهلتك يا معاوية ابري بري بشويش .. حرم يامعاوية طلعت براية بتلاتة شفرات .. ما خالك عاد عمر أبري ولا يهمك أبو عفاف ان شاء الله ما مرق منها

[moawiah ahmed salim]

يا ابوعبد الرحمن شكراً على المرور ، وهو ابو عفاف شاف حاجة ولسة القصة يا دوب بدت تسخن . والحلقة الاخيرةانشاء الله تكون من السودان

[عارف عبد الرحمن]

تكون عملت فايدة لو عملت كده .. خلي أخونا أقضم في أظافره حتي الحلقة الجاية .. بعدين ياخي متابعة المسلسلات ليه شنو ما يلعب مع بنيتو دي ؟ عليك الله يامعاوية تخلي المسلسل دا أسا روحو بس أن شاء تتمو من المسلسلات التركية وشوية مكسيكية وبهارات سورية مع ملحة مصرية وتم الباقي موية

[elamirhamdan]

ده ما بقي موضوع الحلقة الجاية
دي بقت حقاره عدييييييييل

سيبني في عز الجمر

وانت من حولي بتمر

وعارف انه حدي

فات حد الصبر

الاخ معاوية رغم خصوصية الموضوع الا انك استطعت تجسيد صورة حقيقية شاملة

للغربه واعجبني المزج الضافي والربط بين السودان والغربه صورة واقعية رائعة

وتجسيد الخصوصية في جوهر الموضوع وانحصاره في فئة معينه لكنها معنية

حركت كل المتاثرين بها ببراعها

أكتب وأكتب تاني وتاني