عسل سوداني

[صادق محمد عوض]

يا ابوعمار الاصم سيد الشكاير ضمه@
ويا دون الشرف بوقي البزيل الغمه@
بالنضم الأصيل يا الله يوت نتلمه@
ترعد بيكم القافيه وتسقوها زت النمه@

[عبدالمنعم]

اسبوعين تمام والهم موســـــــدو إيدي
خاويت العدم في الدنــــيا ناجع صيدي
الشاغل الفؤاد زولي القســـمتلو ريدي
رضيان ان بقيت لشفاهو شالو وريدي

[صادق محمد عوض]

يا خلي العشق شال المنام والهجعه@
أكلني السهر عقب علي بى وجعه@
من صد الحبيب كل ما أطيب في فجعه@
يوت ما اقول افوت تجبد لجامي الرجعه@.

[عبدالمنعم]

جات تمشي وتميل نفض الكفل هَدَّاما
لادنة طرية ناعمة وكاملة في هِنداما
ام طرفاً كحيل اللي القُلــوب هدامّة
ان بسمت تقول برقاً شـــلع قِداما

[صادق محمد عوض]

شايفك ياقليبي الريد عليك اتقاسه
والريدة المعاك تابن نتيح احساسه
كم من غور جفاك فاقد تملي ايناسه
قالو الريد بحر واياك شراع متراسه

[صادق محمد عوض]

يوم طل القمر نص النهار متجلى
الشمس إختفت وظهر الكسوف الكلى
الخلانى فوق جمر الغرام متقلى
فرع الخيزران منو العنب متدلى

[عبدالمنعم]

الليلة البشير قول ليه بلل راســك
ما فيش بلطجية وما بتفيدك ناسك
حالفين باليمين باكر نقدو نحـاسك
بالثورة المجيدة بنقلعك من ساسك

نحن من تبينا مافيش رجال هزتنا

موية النار شرابنا ولحم الاسود مزتنا

حشود الرجال تخشي وتهاب مرقتنا

فرش البيت حرير ترقد عليو وزتنا

[عبدالمنعم]

البــارح شفتها الساكنة الوريد جوايا
ماليـــها الحنان بي رقة جات لحدايا
قالت يا الحبيب ياسيد غرامي هوايا
كيفن المقيــــــل من غيرك انت دوايا

[صادق محمد عوض]

كَلّب جلدي شعرو وقام جميع مطفوقو
ومن هول ما رأيت قلبي زادو خفوقو
حين شفتا الجمال ظني القمر مرفوقو
لبس مركوبي اقلب وقربت اطفر فوقو