قصة صديقي

[moawiah ahmed salim]

خلاص انتهت القصة على كدا ولو عايز الباقي يا خالد تعال الرياض بسرعة

[moawiah ahmed salim]

طيب نواصل واليوم جزئين انشاء الله واحد لأمير والثاني لخالد

[moawiah ahmed salim]

الجزء السادس عشر

غايتو ناس تكوس رزقا وناس الزرق يكوسا هسه ندى دى فى كم واحدة قاعدة عاطلة ليا سنين مالاقيا شغل وهى تقوم من نوما وتلقى كوما - الله قادر ودى حكمتو يمكن عشان ابوا المرضان واخواتا واخوانا الفى الجامعات والمدارس ولا يمكن نيتا بيضا ساى - وبصراحة انا فرحت من قلبى لانو لو ما إشتغلت حالتم بتبقى صعبة وبدخلوا فى حيص بيص .
المهم شغالين تلفونات تقيلة خاصة بالليل قبل النوم وبقت لى زى حبة المنوم لو ما اتصلت عليا النوم كلو كلو ما بجئ وبحس زى الناقصنى شئ - وهى زاتا ما بتقصر لو إتاخرت ما اتصلت عليا مسكولاتا ما بتقيف ودا حالنا ثلاثة شهور غير التلفونات والماسنجر ما عندنا طريقة نتلاقى والشوق خلى ساى لمن مدفق ومغرق حياتنا
فى يوم كدى بنهاظر وبنشاغل فى بعض قالت :
- احمد دايرة اقول حاجة
- اي ياروحى
- انا عندى ليك مفاجأة حلوة
- خير
- انا طلعت عربية بالتقسيط
- والله -عربية مرة واحدة ، هو بتين بديتى عشان تركبى عربات
- ياخوى المرتب معدل والبنوك بتدى فى العربات الناس الراكبنا احسن منى فى شنو
- اها عرفنا المرتب كويس - اها بشغليا بموية
- الشركة بتسوى فى شنو
- كيف
- والله يااحمد المدير بتاع الشركة زول عسل فى التعامل معانا وهو الاقترح على اطلع العربية وقال بساعدنى بالبنزين
- قلتى لى زى العسل ، والمدير بتاعك دا بخدمك لله ساى
- هىىىىىىىىى ما تمشى بعيد هو عارفنى مخطوبة وبعدين هو معرس يادوبو ما تم سنتين
- ما قلنا حاجة ، قلت لى اسمو منو
- علاء
- يعنى البنزين بصدقو ليك من الشركة
- اى زى ما تقول بدل ترحيل وكدا
- تسكت شوية وتقول : غايتو عليك جنس غيرة
- ياحبيتى ما أسألك ولا شنو انا غلطان السألتك
- خلاص ما تسوى لي فيا زعل وانت كما سويت كدا اعرف كيف بتحبنى
- اها ما قلتى لى كرامة العربية بتين
- بكرة بستلما ما داير يفسحوك بيا
- وانت الحاتسوقى ولا كمان علاء بجيب ليك سواق
- انا البسوق وعندى رخصة كمان شنو رأيك ، وبعدين انت علاء دا علق فى رأسك خلاص
-يازولة مبروكة عليك وانشاء الله تكمليا بعرق المشاوير وكان على كلامى التانى دا كلام هظار ساى
- هظار ولاالغيرة كاتلاك
- هاهاها قال اغير قال :
: ندى تصبحى على خير نحن الاتنين ورانا شغل بكرة والساعة هسع اتنين بالليل يلا مع السلامة
- انت من اهل الخير

[moawiah ahmed salim]

الجزء السابع عشر

ندى ضاربة جو السودان وقابضة الجو وانا بهنا الغربة مطلع روحى وعايشة فى امانة الله وكمان ماسكة مصاريف البيت جت وبقت هى الكل فى الكل حتى نها بتقول لى : الزولة بقت ابونا وولية امرنا وما بنخليك تشيل مننا بعد ما ضقنا قروشا وحتى امها الصوت الحزين داك راح وكيفن ما بروح بعد العربية الفى خشم البيت والبيت زاتو ملك والحال مستور .
الشهور بتمر وبتعدى وانا منتظر والوك فى الصبر واقول بكرة غربتنا تبقى جنا بيها - وباقى للإجازة شهرين قلت خلاص اصلو ما بفوت الفرصة دى واخش فيا القفص الذهبى - وطوالى جهزت الشنطة واشتريت لى حبة دهيبات وختيت النية فى بالى وقلت اكلم الناس ديل بالعرس واول زول اوريهو ندى واتصل عليا :
- ندى مساء الخير
- اهلاً
- كيف حالك
- تمام الحمد لله - والله دى دخلتى البيت من الشغل
- شغل شنو للساعة تمانية دا
- تقول شنو كان عندنا وفد جاى لشغل معانا ولازم استقبلو فى المطار
- دى شلهتا ساى وبعدين فى بيتك بتسوى لى كدى
- كدى لمن يجئ وقتو هين
- وكتو ما جاء خلاص وانا هسة داقى ليك عشان الموضوع دا
- العرس ؟؟؟؟؟
- عندنا غيرو
- والله ما عارفة اقول شنو
- تقول لى شنو !!!!!! يابت الليلة انت مالك
- مالى كويسة الحمد لله
- ونان الحيرة فى شنو
- اسمعنى احمد انا شايفة موضوع العرس دا نأجلو شوية
- نأجلو ؟؟؟؟؟!!!!!!! ليييييييييييييييييييييييه ؟ الحمد لله ابوك بقى كويس بمشى وبتكلم وكل شئ وكان على ناس بيتكم والله عايشين فى نعمة والحمد لله والعيشة العايشنة احسن من عيشتكم فى السعودية اها تانى فى شنو.
- الحمد لله بس انا قصدى ...........
- إنتى قصدك شنو
- الشغل ................
- مالو الشغل
- انت عارف انا يادوب سنة ما كملتا فى الشغل وعاوزة اثبت نفسى كويس - ثم تانى ما بدونى إجازة وانا ماكملت سنة لسة .
- يابت الشغل يطير(بنرفزة وزهج )
- كيف يطير يعنى ....... انت عارف الشغل دا هو المعيشنا
- العايش الله وبعدين انا ما حاميك الشغل
- انا هسة قلت ليك انت حامينى الشغل
- ولييه التعذر
- انا عاوزة افضى ليك برواقة وما يكون بالى مشغول بحاجة تانية .وما دايرة افقد شغلى كمان .
- شوفى ياندى انا كان قلت ليك بأجل العرس كضبت عليك وشاورى نفسك وكمان شاورى اهلك وردى على .
صدمنى كلام ندى صدمة قوية وبقيت اكلم روحى : ياربى البت دى القروش عمتا ولاشنو وبتخاف على الشغل اكتر منى و من بيتا المعلق فى السماء - وين كلاما لمن تقول لى : بتمنى الايام تجرى سريع عشان يضمنا عش واحد ونكون لبعض للابد وهسه لمن الكلام بقى جد تنط منو.
فى الحقيقة انا لاحظت فى الفترة الاخيرة تلفوناتا قلت وكل ما اقول ليها انت عواطفك فترت تتعذر لى بالتعب و الشغل وحماسا بفتر شوية وانا بقول لنفسى يمكن البعد هو السبب والبت الضغط عليا كتر، البيت واخوتا وابوا بس ياربى ممكن بكون قدر دا

[moawiah ahmed salim]

الجزء الثامن عشر

والله حالة ما يعلم بيها إلا اللة - مسكنى صداع حلف ستين يمين إلا يصبحا معاى - يقطع سنين الحب والعرس هسة الواحد ما احسن يقعد عذابى من الشحتفة دى وانا يادوب فى المناظر ولسة مابقينا على سيد اللبن وسيد العدة وكمان بعدين الاستاذ الخصوصى بعد عمر طويل - البت دى دايرة تخرب لى الإجازة مرة واحد - هسة انا كان سمعت كلام امها قبيل وعقدت عليا وخليتا معاى كانت شافت شغل ولا كان ركبت ليا كورولا ياهو مرضنا الكاتلنا الايام دى بعد ما الكريسيدا السمح سيدا بقت تاكسى هكر - يازول اخير تحنسة براحة اصلو النسوان ما بجوا بالقوة وكان عاندت معاها بتزيد زيادة وماتقول هى مسكت فى الشغل مسكة اعمى مسكو العكاز تانى وين تفكو .
اليوم التانى ما مشيت الشغل مشيت للمستوصف وبلغتهم بمرضى وباقى اليوم شلتو نوم جبر من السهر والجماعة فى البيت بعد ما صحيت : مستغربين يازول خبارك ما مشيت الشغل
- عيان شوية وماخد إجازة
- بس ما يكون شئ تقيل
- ارهاق وتعب شوية
عمنا يلاكز
- ياخوى دا تعب الشيلة ساى ما العرس قرب
- الله يتمو
- يازول بنتم تب ،عندك شنو تانى كل شئ جاهز اتوكل على الفتاح وقول يالطيف بس
وفى المساء اتصالات تقيلة واول زول الطيب ود عمتى :
- الطيب كيف حالك
- كويس الحمد ألاف
- يازول إجازتى قربت وناوى اعرس فيا
- عديل ياود الخال ما بنقصر معاك تب - رسل لينا الشنطة عشان نودى ليك الشيلة من هسة
- الصبر شوية
- يازول انت اطلع منا وكل شئ بقضا وكان على ناس ندى ديل على يدى وكمان ياخوى لوجيبتين شنطتين تكون ماقصرت عشان اخش ليك توشك فى الصغيرونة (ناهد)
- الطيب انت جنك دا ما بتخلى وشغل السوق المحلى دا ما بنفع مع الناس ديل ، انت قايل الشغل بضاعة بسمسرو فيا
- شن بدور موش القراية دى ، التقرأ ساى لمن تبطل اصلو ما ماسكة منا .
- يازول انت زول سوق والبت دايرة ليا واحد رقيق يسوقا بشيش موش جنس سواقتك دى كلها دقداق وحفر .
- هسع خلينا فى موضوعك ، كلمت خالى ولا اكلموا ليك .
- لسة بس روق المنقة شوية لحدى ما اتفق مع الناس
- يازول اتفاق شنو انا بقوم ليك بكل شئى وزى ماقلت ليك رسل الشنطة والقروش والله الاسبوع الجاى الشيلة تكون عندهم.
- ما بتقصر ، البنية دايرة تدبر نفسا وانت عارفة شغالة وعندا إلتزامات وكدا
- يازول ما ترخى ليا ودوس ابنص ، وكان راجي تديك رأى واطتك اصبحت
- كيفن الكلام دا
- يازول ياها حال النسوان بتاعين مسميس وجرجرة كتيرة وهو العرس فايت ليو يومين
- مافى مشكلة الطيب بس خلينى اشوف الوضع
- كويس يازول وادنا خبر كان بقيت عليو
-أبشر
اقفل الخط بهنا وادق على الزولة من هنا
- الو ندى كيف قيلتى اليوم
- كويسة
- اها شاورتى نفسك واتكلمتى مع اهلك
- اى
- وصلتو لشنو
- الرأى عند امى اديك ليا تكلما
- مافى مشكلة
انتظر شوية ويجينى صوتا
- اهلاً ياخالة
سؤالات كتيرة كيف حالك وكيف الغربة وكيف عامل وكيف وكيف وبعد ماخلصن تب
- طبعاً ياخالة ندى كلمتك بالموضوع
- اى كلمتنى وما فى عوجة ياولدى ، بس دايرك تسمعنى كويس
- خير انشاء الله
- ياولدى انت صبرت الكتير والحمد لله وندى ياها ليك بس دايراك تجبر بخاطرى وتأجل العرس شوية زى ماقالت ليك .
- والله ياخالة خاطرك فوق رأسى بس ممكن اعرف لشنو
- مافى شئ مانع كل مافى الامر دايرين نرتب حالنا شوية وانت عارف العرس داير ليو مضايرة من بدرى
- الحمد لله لسة فى وكت والعرس بقى ما زى زمان تلتلة وجوطة كتيرة
- عارفة والله ياولدى ، النقول ليك : هسة نحن متوقعين عرس( نها )اختا يكون قريب والليلة (نها ) قالت لى ود عمها فتح ليا الموضوع وانت عارف عرسين وكت واحد صعبة علينا شوية
- والله ياخالة ما عارف اقول شنو
- ما تقول اى حاجة والايام بتجرى سريع وخليهو فى عيد الضحية الجاى
- عيد الضحية !!!!!!!!! عيد الضحية باقى ليوستة شهور
- ما بعيدة وانت زاتك تكون رتبت نفسك كويس
- والله ياخالة حيرتونى عديل كدا .
- والله ياولدى حيرة مافى تب وكما جيت بنعرسا ليك وبنرسل ليك تانى فى كلام
- سمح النشوف
ندى اخدت السماعة والفرحة ما شايلها وتقول
- انشاء الله اقتنعت بكلام امى دا
- هسع عرفنا رأى امك ، ابوك رأيو شنو
- ابوى ما كلمناو بالموضوع ولو بتعزنى ما تفتح ليو الموضوع
- ليه
- لانى عارفة رأيو فى الموضوع دا ومستعجل لعرسى شديد
- كان كدى بكلم ابوك طوالى وانتو مخيرين معاهو
- علييييييك اللله ما دخلوا فى الموضوع والله بزعل منك شديد .
- خلاص يازولة خلينى ادرس الوضع ،هسة كدى خلينا من العرس ، ابوك صحتو كيف
- والله تمام التمام ، سو ليو مغلق كدى وقعد فيو وقلنا احسن ليهو من قعدت البيت والحمد لله امورو كويسة .
- مع السلامة
- مع السلامة
الشغلة ما ركبت لى فى رأسى و براى ما بتتحل لى وداير زول يفكر معاى قلت النشوف عمنا دا بكون خبرتو احسن منى فى الامور دى ولمن شاورتو قال لى : ياولدى العرس ما بالجبر البنية اديها فرصة وستة شهور بتجرى سريع وما تكلفت الناس كدى وانزل إجازتك عادى وودى شيلتك ليهم والشيلة ما بضر كان قعدت سنة ما بجيها شئ وكان الهديمات موضتن انتهت ببدلوهم فى السوق . على قولتك نشوف نهايتا شنو بعد الستة شهور دى وانشاء الله ما تلقى ليا عزراً تانى .

[عارف عبد الرحمن]

يازول داير نصيحتي الناس ديل ناس لف ودوران عديل ودايرين أوزعوك .. وكايسين ليهم طريقة .. أحسن حاجة قالوا الهجوم خير وسيلة للدفاع .. تقوم تقول ليهم جاتني منحة عشان أكمل قرايتي ..وتعمل زغبير .. شنو ليك مارأي؟؟

[moawiah ahmed salim]

انا ماشي معاهم لحدي ما اشوف اخرهم شنو
ولك الشكر ابو عبد الرحمن على المرور وتابع معاي القصة

[moawiah ahmed salim]

الجزء التاسع عشر

قلت مادام العرس وكتو طرشق اخير انزل اجازتى عادى وبعدين إجازة العرس يحلها الف حلال واحسن اسافر واطفئ نار اشواقى ونحلم بيوم باكر والفرحة تعمنا وياربى هون القواسى .
ندى وريتا بميعاد وصولى وبالخطوط الجاى بيها ووصيتا تقابلنى فى المطار لانى عاوزها تكون اول وش اشوفو فى السودان -
هبطت الطائرة فى مطار الخرطوم بسلام وامان والقلب من لحظة ما المضيفة نبهت بربط الاحزمة وان الطائرة ستهبط بعد قليل دقات قلبى زادت بسرعة دق ... دق .... دق ، وجسمى عرق والدقائق بقت لى ساعات وبسرعة كملت اجراءاتى وطلعت للصالة برة واتلفت يمين شمال افتش للزولة واتلفت زى الغنماية الرايحة ... ياربى الزولة دى وين وفى اللحظة دى اشوف يد على كتفى اتلفت القاهو اخوى منتظرنى : حمد لله على سلامة الوصول والبلد نورت ، سلمت عليو وبالى ما معاو ، اتلفت بعيونى قلت يمكن مشت تشترى ليها حاجة ولا يمكن أخرتها الزحمة اصلو البلد شوراعا اتملت بالعربات ، اخوى فهم انا بفتش لشنو وطوالى قال لى : زولتك ما جاية
- كيف الكلام دا
- كلمتنى قبل نص ساعة وهى بتعتذر ليك وقالت عندها إجتماع ضرورى وبتجئ تقابلك المسا فى البيت عندنا
- يازول خير عوجة مافى ، يلا نمشى انا تعبان شديد
فى المساء جات البيت معاها امها عشان تلاقينى ورغم انى زعلان من عدم جيتا المطار وهى كان اصلاً دايرة تجئ كان لقيت ليها ألف سبب تقابلنى بيهو .
بعد ما سلمت علينا وقعدت معاى حسيت فى عيونا حزن مكتوم -وشفت انسان تانى غير ندى البعرفا - برغم انها بتتظاهربالفرح جانى شعور ان البت دى عايشة مع نفسا عزلة وما متصالحة معها وأسأل نفسى وين ندى البت الرقيقة الوديعة - البت لمن تعاين ليا تلقاها مبتسمة فى خجل وبريق عيونا لمن تضحك يمسح كل احزانك ، وكمان كلاما بقى كبار كبار وكلو قروش وعمارات والناس هنا فى السودان عايشة كيف وكيف نحن غاشين نفسنا ساى بنتظر الراتب كل اخر شهر وهنا فى ناس قدر رواتبنا بتصرفا فى يوم واحد فى دعوة غداء ولا حفلة شاى فى صالة من الصالات . ما حبيت استعجل واديها ملاحظات ولا وضحت ليها التوهان الدخلتنى فيهو واحسن استمع ليا وانامستغرب فى كل تصرفاتا بس اتأكد لى رغم كلو كلاما انو هى ما سعيدة عشان انا بعرف نبرات صوتا كويس وبعرف كويس صوت الفرح والسعادة بكون كيف وكمان لمن اعاين فى وشها تهرب بعيونا منى وانا متأكد ما فى زول يقدر يحس الحسيتو دا إلا انا ، لان حياتنا مع بعض كلها احاسيس ومشاعر بتتفهم لكن ما بتتقال - حنيت عليها وأثرتنى حالتا دى .
اللحظات انقضت سريع وودعتنى وحاولت آخد معاها موعد نتقابل فيو بس كان ردا : بينا تلفون عشان ما عارفة ظروف الشغل كيف - وقبل ما يستأذنوا ورتنا ام ندى بعرس ( نها ) بعد عشرة أيام وطبعاً تشريف الاسرة الكريمة شئ ضرورى زى ما قالت .

[moawiah ahmed salim]

الحمد لله انه تم تغيير الشاشة من اسود وابيض الى ملون

[moawiah ahmed salim]

الجزء العشرون

اليوم التانى قلت اصلو ما ادق عليا عشان ما تعمل لى تقيلة وتمارس معاى دلع البنات داك واحسن تجئ منا هى وانتظرت للعشا لا تلفون ولاحتى رسالة ساى تجينى منها وكل ما اسمع الموبايل يرن اقوم زى المخلوع جارى عليهو والحكاية لمن طولت للساعة عشرة ادق عليا
- الو ندى
- اهلاً أحمد
- شنو عاملة فيا تقيلة كدا منتظر تلفون منك من الصباح
- والله كنت مشغولة شديد وطلع من بالى ادق عليك والله
- خلاص بقيتى تنسينى
- ليه بتقول كدا وانت عارف معزتك عندى قدر شنو
- هسة خلينا فى المهم ، اشوفك بتين
- والله ياأحمد الايام دى مشغولة شغلة ولخمة مايعلم بيا إلا الله من العرس الجايينا والشغل والله جرى شديد
- يعنى ما فى طريقة اقابلك بيها قبل العرس .
- والله دايرة اقعد معاك بس طريقة مافى لى .
- خلاص كان كدى انا بمشى البلد وبجئ لعرس نها – اها عاوزة شئ.
- سلامتك بس
- يلا مع السلامة
الايام مرت سريع وجاء يوم العرس والبرنامج بتاع العرس شئ يحير فيو مديح ورقيص وصالة وفنان من الفنانين الشباب وزفة عروس دا غير مكائن الشاورمة - والعصائر الحايقدموا وحاجات كدى ما بتشبه عرسنا فى البلد واقول لنفسى : ارجأ الراجيك ساى - وياحليل الصيوان البدقو قدام البيت والمنظراتية ياود احفر بهنا ولابهنا وقبلو دى على الشارع - لا ياجماعة دا كدا بكشف محل النسوان وين محل الطباخ وووووو .
الحفلة بدت والعرسان قاعدين فى الكوشة صلاة النبى عليهم - واشوف ندى جنب العروس هى وأمها واختها التانية زى البطمنو فيها وبهناك المعازيم مالين الطرابيز واليوم داك ماخلو نور لمن الواطة بقت لينا زى النهار .
مشيت على نها وزوجها باركت ليهوم واشرت لندى تلحقنى على تربيزة قريبة كدى وطوالى تبعتنى وقعدت قصادى
- مبروك لنها وعجبنا ليها
- شكراً ليك
وبدت الونسة لكن ما الدقاقة ديك عشان الوكت لسة بدرى ويادوب فاصل واحد انتهى - وبعد شوية جانا واحد كدا شاكى ومسبسب شعروا ولابسلوا ساعة ذهبية فى يدو اليمين ويدو الشمال فيها مفتاح العربية والموبايل -وهو كلو على بعضو اخر وجاهة ويلفت النظر من بعيد وباين عليو مغرور وعاجباهو روحو شديد سلم علينا وجرى ليهو كرسى وقعد جنبنا وعاين لندى وقال بإبتسامة عريضة :
- الف الف مبروك لنهوية
- الله يبارك فيك - تمتمت شوية ووشها حمر وهى بتقول : نسيت اعرفكم على بعض : علاء ، أحمد بدون ماتزيد اكتر من كدا - وهى بتعاين لى دايرة تشوف رد فعلى بكون كيف وانا بعاين فى علاء وبقول لنفسى : ياهو دا جون دارلينغ المتوصى على زولتى .
علاء دخل بدون مقدمات فى ندى وكأنى ما موجود معاهم ، واخلاقى جات فى نخرتى واعاين ليهو عين قوية وأقول : شنو يا ابو الشباب عملتا الحالة واحدة ، يعاين فينى كدى ويطنش ودى حرقتنى حرقة شديدة وقومت نفسى وطلعتنى برة طورى واهيج فيو وادق الطربيزة بيدى طرااااخ : قوم من هنا ولا اكسر الجك دا فى رأسك - وكان عامل فيها صعلوك وقليل ادب والله نحن مقعطعينا ، ندى اتضايرت بعيد ولمن شافتنى ام ندى هايج جات جارية على وجرتنى جر من وسط الناس وقعدت معاى فى محل بعيد .