عسل سوداني

[صادق محمد عوض]

البارح طريت البت جبارتي انفكت
ريشة قلبي طارت وتاني تب ما ركت
خلقة ربـي عـيـنـيـها القنابل الدكت
ضامر هافا في جوانا نقشت وحكت

[صادق محمد عوض]

قالت لى بريدك قت لا متل ايش
قالت لى متل خلط اللبن والعيش
شيشك ياولوف لا تكتر الخميش
مادام طبعي الادب عقب العذاب فى ايش

[عبدالمنعم]

مشـــتولة الجزيرة الترّعت ما جفّت
رويـانة وعقب شالْت الثمار وأتعفّت
الفوق وشو بي كلاق مسايرو مكفّت
ما بلقاهو ما دام حظي كلــــو مزفّت

[صادق محمد عوض]

مِى وِسَيخَانَه حَاجَه لَطِيفَه

نَفْسَكْ تَنْفَتِحْ وِكْتَينْ تَمُسُّه قَطِيفَه

إنْ جيتْ شِلْتَهَا تَجِيكَ هِى مِلَيهِيفَه

وتَأَخُذْ ليَهَا ضَحْكَه وتَبْرِدَكْ بَى هَيفَه

[عبدالمنعم]

أب خداً يلالي وجســمو ديمة مخمّرْ
انا دوخني كرفو وظرفو جوه مسمّر
الضامر حشاهو وجوز نهيـدو معمّر
ليهو الحق علي قلبي الرهيف إتأمّر

[صادق محمد عوض]

شُوفْ أُمَّهَا شُوفْ ذُوقَه مَا أَصْفَاهَا

مَا بِتْقُولْ بَدُورْ وبَدُورْ مَا خَصَّاهَا

بَى كُلَّ القَنَاعَة رَبْ العِبَادْ خَصَّاهَا

أنَا مَا وصَّيتَه إلاَّ النَّاسْ تَقُولْ وَصَّاهَا

[عبدالمنعم]

وين الليلة محبوبتي العُيـــــونا حلاتا
زي الريلة نافرة ومني قاطعة صِلاتا
مربوعة القـــــوام تتهادى في قدلاتا
دائماً كل يوم في عيوني زايده حلاتا

[صادق محمد عوض]

يا لولية الغواص صعيب مخزونك
قفل واختفى ومنع المودة حزونك
قمح القجة شركه وضحى بمليونك
عسى اوجد لماك واسعد واكون ممنونك

[عبدالمنعم]

الضـــامر حشاهو وجوز عيونـــو كواحل
بدري سلبني عقلي وزاد جنوني مراحــل
من يوم شفتو أصبح جسمي بالحب ناحل
وين مايمشي فوق آثارو بصبـــــح راحل

[صادق محمد عوض]

وسـط الدارة نزلـن من قصورن
عامـن شوقـن قلبـي البـدورن
هج وضج في ود عينـي نـورن
وطابت روحي من نفحـة عطورن