عسل سوداني

[عبدالمنعم]

حسدت التـــــوب على اللفة الهنيه
وحاسد الروج على الرطب الجنيِّه
وحاسد الحنة في قـــــــــدم البنـيـَّة
وحـــاسدو غُنايا في الكاوياني كيه

[عوض خضر]

معروف والله انها مرحله متقدمه جدا حتي التوب لاينجو من الحسد وبيني وبينك احيانا التوب بتحسد

[صادق محمد عوض]

من ما قام صغير دون الجميع متفوق
حاز فوق الجمال هامه وديمه مروق
الخلاني دون الخلوق فوقو يوت متعوق
يوم رد السلام فات خلا القلب متعلق

[عبدالمنعم]

بعد الليل سجا ونجماتو ظهرن وضوّن
زار طيف الحبيب غير حياتي ولــــوّن
الزول القبيل من خالص الجمال اتكوّن
قاصدين بيتم زياره رب العباد ان هوّن

[صادق محمد عوض]

بعد الليل جن والخلق هجدت وكل واحدا لزم جحارو
وابا النوم العيون والهم والسهاد جايين علي يتبارو
جاني طيف ام خد هاجم وكارعند الهجعة سال بتارو
حنيت حنين النوق لي ليم خدرو في بلدا بعيد مشوارو

[عوض خضر]

جميل يااسخليوس احتشاد معاني رائعه

[صادق محمد عوض]

مشكور اخي عوض اطراؤك يسعدنا....... ويزيد الهمم .... في انتظار الاخ عبد المنعم معروف..... فغناه خير محفز للمجادعة

[عبدالمنعم]

شَعَـرِكْ كـابـى كالـيـل فيـهـو تُهـنَـا غِرِقـنـا
وحَاجبِـك جَـلا خالقـو النـارو بيهـا حِرقِـنـا
نَظَـراتِـك عجيـبـه وبـــى الـــدلال تَسَـرِقـنـا
فَـاهِــك نَـقَــطَ الـعَـســل الــنــزل عَـشـرقـنـا

[صادق محمد عوض]

الديس فوق الكتوف ليلا طويل مسدل
ونون حاجبك بلا الهلال وللعقول بهدل
قوامك عود بان مع النسيم انتنى وميل
ومعشوقك ودر بي حبك .....امسى مكبل

الزول المــتل منـقـة بلدنا صفـرتو

جـافـل مـنى ياخـلاى قـدر مـادرتـو

العاقل طبيب نفسو واخيرلو سترتو

ما يتهبش الحاجة ان بقت ما قدرتو