ايهما تحب الليل ام النهار

بالامس وانا في الليل سرحت شوية مع نفسي وفكرت في الموضوع ايهما احب الليل ام النهار ؟
طبعا الليل فية الهداوة والنجوم التي كالسراج وفية القمر المنير الساطع وبعض السحب التي تجوب السماء حينا بعد حين وفية النسيم العليل الذي يمسح وجهك وجسمك ويرطب جسمك المنهك من التعب وطبعا تكون مستكين وللذين يحبون الكيف طبعا الواحد بكون مشنق لية سفة او بجر في نفس طويل ويسرح بي فكرة بعيد ويفكر في المحبوب ويطلق العنان لفكرة في تخيل يحسد علية ويكون الاولاد قد شربو اللبن ونايمين ولا يعكر صفوك اي مطلب في جيب سكر او لبن او شاي او لحم واي مطلب اخر فقط التامل والتفكير .............................

اما النهار فمن قبل ان تشرق الشمس يكون الاولاد قد صحو وهاك يا نقزي وكواريك ومن بعد طبعا جيب الملاح وخت حق الفطور وجيب داك وما تنسي الشي الفلاني وداك طالبني وديك متسلفة منها المهم يجيك صداع مركز البندول مابشيلو وبعدين دوام الشغل والكفيل للمغتربين والاهل البعاد ورسل المصاريف وحق الاولاد في المدرسة المهم جنس مطالب يشيب لها الولدان وسخانة جد تعرق وانت قاعد وكتاحة ماتشوف القدامك المهم بالنهار مشاكل كثيرة .
قد يختلف معي البعض او يتفق ولكن في نظري الليل جميل وكما قال الشاعر الليل الهادي يزكرني حبيبي الغايب .........................................

[عوض خضر]

اخونا ياسر

مااظن تلقليك زول بحب النهار والاسباب انت ماخليت فيها شئ

والله مع سخانةشمس السودان الحارقةدي ماظنيته زول يحب النهار

[عبده مصطفي إبراهيم]

من الواضح ان الناس "مكجنة".....النهار...لانو "معاشا"...وعاجبم الليل لأنو وكت الراحة
ولكن الغريب إنو الناس هناك بعدو الليل كلو نوم...من بعد المغرب......بس يادوبك يصلو العشاء
وهاك يا نومة إلا تضرب الشمس النافوخ........وبرضو يقولو ليك ...والليل جميل
لا إختلاف إن الحركة في النهار سريعة.....ولكنها أكثر متعة...وخاصة التفاعل مع الطبيعة بكون بشكل متواصل وممتع
فمثلا عندما تسافر بالليل...أو حتي تشق الحلة....ما بتشوف حاجة من حولك....
اما نهارا وهذا ما احبذه فتتاح لك الفرصة لتري الطبيعة من حولك...تتفاعل معها كما تريد
حكاية الإستلقاء والنظر إلي جمال النجوم...دي لحظة ما بتتعدي دقايق...
هنا أمل ليل الشتاء لأنه طويل
وأحب نهار الصيف لأنه ممتع..

الاخوة المداخلين كتر الله خيركم وتب وحات الله مابتقصروا
اخونا عبدو مصطفي يدو ان الطقس اللندني بالنهار عندكم يجنن ولذلك اراك تحبز النهار ولكن كان جيت شهر بس السودان سوف تغير رايك وكان مكضبني جرب والنشوف بعد داك
ومشششششششكوريييييييين