قصة صديقي

[moawiah ahmed salim]

الجزء الخامس

من اليوم داك بقيت اغنى ليك : يايوم بكرة ماتسرع - عشان الشوق غلبنى وعشان اعلان مملكتنا الجديدة بتبدأ من اليوم داك وعمتى شغالة لى شغل وهى جات مع امى تصور وتحمض- وكمان ما تقول السفر ملح وماتقول فيها علاج ملح من وجع البطن والكرعين ومن شافتنى مسكتنى من جضومى وتشلق فينى :
- هسع يالمفعوص كان قلت لى داير اعرس ما كان عرستك ليك و سقت مرتك معاك
- ياعمتى الموضوع جاء براو ، وبعدين اسوقا معاى كيف إنت قايلانى السفير السعودى باركيها بس
- يبركوا فيك خنق , جارى للبدرة دى
والله كلمة البدرة حرقتنى حرقة بس اسوى شنو غير اكب الزوغة منها واخليها مع امى يناضموا ساى وامى تقول ليها
- برى انا امو ما ماشاورنى من هناك متفقين - شباب الزمن دا عاد بنقدر عليو
- اها اتحزمى ساى وارجى الجاييك والله موش نسوان الخرتوم ديل بورنيك ليهو شديدات ولضيضات , هسع بتى الرضية ما لا ما كان زيتنا فى بيتا ولا نحن لينا الله بس
امى تقلبوا هظار طوالى معاها
- الولد بقى راجل وانت ليوم الليلة تشلقى فيهو
- هووى هو ود بتين ، وكان انت امو الوليد تيهو انا امو الربيتو
وتقول ليها :
- هسع دا كلو هين كدى نشوفوا جاب لى شنو
وانا يازول لابد لى تحت حيطة والموبايل فى اضانى واليد فى الاضان التانية التقول داير أأذن .وامى تعاين فينى ساى وتقول للجماعة
- الولد دا مالو جن كدى طويبتو(من طوبة ) دى ما بتفارق اضانو
- ياهو شباب الزمن دا
- والله يقعد يباريا كدى ويتفصل ليا إلا تسوقوا من اضانو زى النعجة

يوم الجمعة الهايس دى اتملت لرب عينها ومعاها البوكس والدلوكة تقول ياقدرتى والله الخطوبة براها بقت سيرة والبرنامج لازم امشى الكوفير اجيب البنية والجماعة التانيين بمشوا على البيت دغرى وبعدين على النادى والنادى دا من عمها فنجرة ساى ونظام بوبار وكمان بعربية ايجار- والطيب ود عمتى سايق لى وعايش جووو صاح مع ترباس وانا راكب معاهو بقدام ماشين للكوفير ودى فرحان بيها فرحة
- الليلة بحتو ليك حت جد اخلى ليك علالاتا فوق
- بس اوعك تقابض مقابضتك ديك - وابقى رايق
- قال رايق والله كان الجكس بتاعون دا دوم ساى بوصلك وبرجع اشوف لي نومة تنفعنى
- دوم انت ، بس اوعك تفتح لى فى خشمك وتسهى فيهن
ونمشى شوية واللستك يضرب بينا تاح واسبير مافى - هسع نسوى شنو