المرحلة الابتدائية _وذكريات لا تنسي

[عارف عبد الرحمن]

أستاذنا محي الدين الفاتح .. أول عهده بالتدريس كان بفطيس .. وما زلت أذكره يتمرن كرة طائرة واحياناً كرة قدم برداء رمادي كان ذلك الزمان لطلبة الثانوية ..يعني يادوب خلص الثانوي وجاء فطيس .. شكراً لجميلة التي حرضت وأستدعت فينا ذكريات جميلة حقيقة لأنها ترتبط بالطفولة والعود غض وطري لا هم الا الخوف من التسميع وجلدات عمنا الأستاذ زلط واستاذنا حمدان ..
علي ذكر تلك الايام كان عندما يأتي معلم جديد يبدأ بتعريف أسمه بكتابته علي السبورة .. ثم يبدأ يسأل الفصل عن أسمائهم وبالتأكيد لن يتستطيع في تلك اللحظات بحفظ أسماء الفصل .. فقط كان القصد من ذلك العمل خلق جو من الألفة والتوادد بين القادم الجديد والطلبة .. وكان بعض المعلمين يسأل الطلبة عن أمانيهم في المستقبل ماذا يريد الواحد منا أن يكون .. واذكر ان أحدهم قال عاوز أبقي شيخ حلة والآخر قال ترزي أفرنجي .. وعلي ذكر التعارف هذا هناك نكتة .. ان مدرس جاء جديد وبدأ التعارف وكل واحد يذكر أسمو .. وبعد داك قال عاوز نكتة .. وكان هناك طالب يبدو انه من المدينة والدو مفتش ولا حاجة كده .. المهم قال في نملة طلعت وطلعت وطلعت في عامود الكهرباء فووووووووووووق وتاخ وقعت وكسرت كراعا .. فما كان من المعلم الا صار يصفق ويضحك عشان نكتة ود المفتش .. في واحد كل سنة بايت في فصل طويل وعوير وبليد .. قام علي حيلو فندي فندي فننننننننننننندي ـــــ طبعا اولاد الزمن ما بعرفوا فندي .. بقولوا أستاذ أو أستاذة ــ المهم المدرس قال ليهو أها أنت .. قال ليهو بصوت يصدر من مناخرو في نملة طلعت وطلعت فوووووق في عامود الكهربا وبردلب وقعت وكسرت كراعا .. المدرس قال ليهو أقعد العوير دا .. دي ما قالا هيثم دا .. الطالب رد عليه : نانا آفندي الليلتي أنا ما أم ريش ....